TXHOB LIAM FAB RAU TSWV NTUJ LO LUS (MT 11: 16-19)
Cov Yus Das tsis ntseeg tias Huab Tais Yes Xus yog Tswv Ntuj Leej Tub, lawv tsis ntseeg tias nws yog tus Tswv Ntuj xa tuaj cawm lawv. Tsis tas li ntawd, lawv pom Zam Ntxuav Plig yuam nws lub cev nruj them txim, lawv tsis ntseeg tias Zam Ntxuav Plig yog tus Yaj Saub tuaj npaj Leej Tub txoj kev. Lawv hais tias Zam yog niag neeg raug dab. Huab Tais Yes Xus noj mov haus cawv fim cov neeg txhaum, mas lawv hais tias Huab Tais Yes Xus yog neeg quav dej quav cawv.
Sawv daws zoo li cov me nyuam yaus ua si tom tshav puam; ib tug tshuab raj lom zem tab sis ib tug tsis nrog nws dhia, ib tug ua si tu siab ntso tab sis lwm tus ho zaum luag cuj caws.
Muaj ntau zaus tus Txiv Plig nthuav Tswv Ntuj Lo Lus hauv lub Txoos, nws nthuav tas nws nug sawv daws tias ‘Nej puas to taub?’ Sawv daws nyob ntsiag to tsis teb dab tsi. Muaj ntau zaus tus Txiv Plig nug sawv daws tias ‘Lub caij Yes Xus yug los, nej xav kom peb lub tsev teev Ntuj ua kev lom zem dab tsi?’ Sawv daws kuj nyob ntsiag to. Xyov tas lub Txoos, sawv daws pua to taub Txiv Plig cov lus, xyov tas sawv daws puas xav kom muaj kev lom zem nyob hauv lub caij Yes Xus yug los.
Muab hais li no, yog kom sawv daws to taub Huab Tais Yes Xus cov lus muab cov Yus Das piv zoo li cov me nyuam yaus ua si tom tshav puam.
Huab Tais Yes Xus cov lus no kuj zoo hais los piv rau peb tiam neeg no thiab, vim tias lub zim txwv no peb pom nyob ib ncig muaj cov neeg ntsuag nos, cov neeg txom nyem, cov neeg tos kev pab cawm; tab sis zoo li sawv daws lub siab txhav, ces sawv daws tsis quav ntsej nqes tes pab lawv.
Lub caij nyem no, sawv daws nyeem Ntawv Ntshiab, mloog cov tub tshaj Ntuj Lus nthuav Tswv Ntuj Lo Lus tab sis tsis khaws mus ua raws.
Peb tseem hnov tus Yaj Saub His Xais cev Huab Tais Tswv Ntuj rau cov His Xas Lais zoo li no tias “Ab! Kheev lam koj muab siab rau mloog kuv cov lus qhia, mas koj kev vam meej yuav zoo li ib tug niam dej, koj txoj kev ncaj yuav zoo li cov dej nyob hauv hiav txwv, koj tsoom xeeb ntxwv yuav coob ib yam li cov suab puam.”
Huab Tais Tswv Ntuj yog tus pheej xeeb thiab txiav ncaj, Huab Tais Tswv Ntuj tau hais li cas, mas nws yuav ua raws li ntawd. Yog li peb kav tsij mloog Tswv Ntuj Lo Lus, tshwj xeeb yog cov lus Huab Tais Yes Xus qhia rau peb, ces peb thiaj yuav tau txoj koob hmoov li Huab Tais Tswv Ntuj cov lus tus Yaj Saub His Xais hais los ntuas cov His Xas Lais ntawd.
