PEB LUB SIAB NTSEEG CAWM TAU PEB (MT 9: 27-31)
Yaj Saub His Xais tshaj tias muaj ib hnub mas cov lag ntseg yuav hnov lus, cov dig muag yuav pom kev, cov neeg me yuav zoo siab, cov pluag yuav dhia daj dhia luag, ces thaum Yes Xus tuaj, nws ua tas txhua yam Yaj Saub His Xas hais tseg ntawd; yam li hnub no Yes Xus kho 2 tus deeg dig muag kom rov pom kev.
Ob tug neeg no nkawd dig muag tab sis nkawd hnov lus thiab hais tau lus. Nkawd dig muag, ces nkawd ntsia tsis pom Yes Xus, tab sis nkawd hnov sawv daws cav txog Yes Xus tias muaj hwj huam kho tau neeg tej txiab mob, ces nkawd tos ntsoov hnub yuav tau ntsib Yes Xus.
Thaum nkawd paub tias Yes Xus tuaj txog lawm, nkawd thiaj li qw tias “Das Vis Leej Tub, thov koj khuv leej wb.”
Nkawd hu Yes Xus ua ‘Das Vis Leej Tub’ mas yog nkawd lees ntseeg tias Yes Xus yog Leej Pleev, yog tus Cawm Seej. Nkawd qhov muag dig tab sis nkawd lub tswv yim tsis dig.
Ob tug dig muag tsis yog lees tias nkawd ntseeg tias Yes Xus yog Leej Pleev xwb, nkawd tseem thov txoj kev khuv leej thiab. Nkawd hais tias “Thov koj khuv leej wb.”
Tsis muaj leej twg yuav khuv leej lwm tus tau, tsuas yog Tswv Ntuj xwb; vim tias kev khuv leej yog kev hlub pub dawb rau lwm tus, tsis vam tias muaj ib hnub twg luag yuav pauj rov. Nyob hauv tib neeg, mas ceeb laj muaj tus yuav pub txoj kev hlub dawb dawb rau lwm tus tau. Yog li peb thiaj hais tias tsuas muaj Tswv Ntuj xwb thiaj khuv leej tau lwm tus.
Li ntawd, thaum nkawd hais tias “Thov koj khuv leej wb”, mas yog nkawd ntseeg tias Yes Xus yog tus tuaj ntawm Tswv Ntuj tuaj tiag.
Yes Xus kuj tsis tshua nyiam kom neeg hu Yes Xus ua Das Vis Leej Tub, tab sis yeej yog vim cov neeg tsis paub tias Yes Xus yog leej twg. Lub caij ntawd cov His Xas Lais yeej tos ntshis lawv tus Vaj Pleev uas yog Das Vis caj ces, yuav tuaj cawm haiv His Xas Lais, ces lawv pom Yes Xus ua au hwj huam cawm neeg, mas lawv ntseeg tias Yes Xus yog tus Vaj Pleev uas lawv tos. Yes Xus j to taub txog zeej tsoom txoj kev xav, tiam sis Yes Xus tsis yog tuaj ua raws li qhov lawv xav, nws tuaj ua raws li Leej Txiv Tswv Ntuj lub siab nyiam. Li ntawd, Yes Xus thiaj li tsis kho nkawd qhov muag tam sid.
Thaum ob tug dig muag raws Yes Xus los txog tom tsev, Yes Xus mam li nug tias “Neb puas ntseeg tias kuv kho tau neb qhov muag?” Nkawd teb tias “Huab Tais, wb ntseeg”, ces Yes Xus thiaj teb rau nkawd tias “Yog nej ntseeg li ntawd, ces thov kom muaj raws li nej ntseeg.” Tam sim ntawd, nkawd ob lub qhov muag qhib plho, ces nkawd rov pom kev.
Peb puas ntseeg li ob tug dig muag no?
Peb puas ntseeg tias Yes Xus muaj hwj huam ua tau tas puas tsav yam?
Hnub no thiaj yog ib hnub zoo rau peb rov ua tib zoo nug peb tus kheej, saib peb hais tias peb ntseeg tias Yes Xus yog Leej Pleev, Yes Xus yog Tswv Ntuj; mas peb puas ntseeg txog Yes Xus tiag.
Los niaj hnub no peb tseem vam txog kev ua dab, kev saib hmoov saib yaig, ua neeb ua khawv koob, fiv yeem tej. Tsis muaj leej twg tsom tau peb lub siab lub tswv yim npaum li peb lawm. Kuj tsis muaj leej twg paub peb npaum li Huab Tais Tswv Ntuj. Li ntawd, yog peb pom tias peb tseem vam txog lwm yam loj dua vam txog Huab Tais Tswv Ntuj, los peb tseem tso siab rau lwm yam loj dua tso siab rau Huab Tais Tswv Ntuj, mas peb thov Huab Tais Tswv Ntuj tas zog kom tuaj pab peb hloov siab hloov tswv yim, kom peb ua neeg ntseeg txog Yes Xus xws li ob tug dig muag hauv hnub no.
