(MT 11: 28-30)
Hnub no Huab Tais Yes Xus hais tias “Tas nej sawv daws uas nej khwv thiab ris nra hnyav, nej tuaj cuag kuv mog, kuv yuav cia nej so los siav.”
Cov khwv thiab ris nra hnyav yog leej twg? Yog peb cov neeg ntsib kev txom nyem tsis hais txom nyem sab daim tawv los yog sab tswv yim.
Huab Tais Yes Xus tsis tau hais tias nws yuav pub yam ub yam no rau cov tuaj vam txog nws, Huab Tais Yes Xus tsuas hais tias nws yuav cia lawv so los siav. So los siav yog kom lawv lub siab tau nyob kaj lug. Tus twg lub siab kaj lug, mas nws tsis muaj kev ntxhov siab.
Li ntawd, tus twg ntsib kev txom nyem yog nws vam txog Huab Tais Yes Xus, nws lub siab yuav kaj tuaj.
Huab Tais Yes Xus hais ntxiv tias “Nej txais kuv tus quab, vim kuv tus quab kwv yooj yim thiab kuv lub nra sib.”
Thaum peb txais Huab Tais Yes Xus tus quab los kwv, mas yog peb zoo siab koom nrog Huab Tais Yes Xus kwv tib tug quab, peb muaj Huab Tais Yes Xus nrog nraim peb mus kev ua ke, Huab Tais Yes Xus pab nrog peb kwv, ces peb tus quab yuav sib tuaj.
Huab Tais Yes Xus tus quab yog ua neeg siab zoo thiab ua neeg tsis muab hlob. Yog li thaum peb txais Huab Tais Yes Xus tus quab, mas thiaj li yog peb xyaum ua neeg siab zoo tsis muab hlob raws li Huab Tais Yes Xus tau ua piv txwv.
