XYAUM NTSIA LI YES XUS NTSIA (MT 9: 35-36, 10: 1, 5-8)
Yes Xus xaiv 12 tug thwj tim los ua tub tshaj Ntuj Lus, vim Yes Xus muab tas tsoom neeg yuav ntseeg txog nws los piv rau cov His Xas Lais thaud. Cov His Xas Lais thaud, lawv faib ua 12 lub xeem. Lawv 12 tug tub tshaj Ntuj Lus yuav muaj ib txog hauj lwm yog kav 12 lub xeem His Xas Lais tshiab.
Mas Tais, Mas Kos, thiab Lus Kas lawv sau zaj no, lawv saib Pob Zeb loj dua cov, vim Yes Xus tau tsa Pob Zeb ua tus ntaus thawj. Li ntawd, lawv thiaj li xub sau txog Pob Zeb lub npe ua ntej.
12 tus thwj tim Yes Xus tsa ua tub tshaj Ntuj Lus; muaj ‘Xis Moos Pob Zeb’, ‘As Nres’, ‘Yas Kos’, ‘Zam’, ‘Fis Lis Pos’, ‘Npas Tos Los Mas Yos’, ‘Tos Mas’, ‘Mas Tais’, ‘Yas Kos uas yog As Fas Yos tub’, ‘Thas Dais Yos’, ‘Xis Moos tus Ntxes Los’, thiab ‘Yus Das Kas Lis Yaus’.
Nyob ze dej ntuj Nkas Lis Lais muaj pej kum neeg nyob coob, yog li mas cov Nkas Lis Lais ib txhia thiaj yuav lub npe Hes Las; yam li lub npe As Nres, Fis Lis Pos, Npas Tos Los Mas Yos.
Yog muab cov thwj tim cov npe raws li Mas Tais sau mus piv rau Mas Kos, Lus Kas, thiab Zam cov ntawv Moo Zoo, pom tias sib txawv me ntsis; yam li Zam hu Npas Tos Los Mas Yos ua ‘Nas Tas Nais’, thiab hu Tos Mas ua ‘Dis Dws Mos’ txhais tias ‘tub ntxaib’, Mas Kos thiab Lus Kas thiab zam hu Mas Tais ua ‘Les Vis’, Mas Kos hu As Fas Yos tus tub Yas Kos ua ‘Yas Kos me’, hos Lus Kas hu Thas Dais Yos ua ‘Yus Das’, hos lawv hu Xis Moos tus Ntxes Los ua ‘Xis Moos siab kub’ vim tej zaum nws yog ib tug neeg siab kub los yog ib tug hauv pab neeg hu ua ‘Pab Siab Kub’ uas lawv kub siab ntiab cov Los Mas kav cov His Xas Lais kom rov qab.
Nyob hauv lub caij Tos Huab Tais, mas xav kom peb muab siab rau ntsia cov neeg nyob puag ncig peb. Peb muab lub siab nyiam los ntsia lawv, peb muab lub siab hlub los ntsia lawv, peb muab lub siab mos nyoos los ntsia lawv, peb muab lub siab dawb siab huv los ntsia lawv. Peb ntsia li ntawd, mas peb yuav pom tias cov neeg nyob ib ncig peb, lawv sab thiab qaug zog tiag tiag; lawv vam ntsoov kom peb pab lawv.
Peb yog Yes Xus cov thwj tim, peb xyaum ntsia li Yes Xus ntsia, peb muab lub siab hlub los hloov lub siab ntxub, muab lub siab dawb los hloov lub siab dub, muab lub siab dav los hloov lub siab nqaim.
Yes Xus hais tias “Qoob loo ntau kawg, tab sis cov tub zog tsawg. Nej thov tus tswv qoob kom nws xa ib co tub zog tuaj sau nws cov qoob.”
Thaum peb hnov lo lus no, peb nco txog tsoom Leej Choj, cov Leej Tij, Leej Phauj uas lawv tau muab tas lawv txoj sia los qee rau Tswv Ntuj kom tau leg Tswv Ntuj txoj hauj lwm. Tab sis yog peb muab saib kom ntxaws, mas yuav pom tias Yes Xus lo lus no tsis yog ncaj qha hais rau cov Leej Choj thiab Leej Qee xwb, tseem yog hais rau peb txhua tus tau txais lub Cim Ntxuav thiab. Peb sawv daws muaj feem sib pab sau Tswv Ntuj cov qoob.
Yes Xus lo lus no kuj yog Yes Xus txhib peb sawv daws thov Ntuj tsis tseg kom muaj ib hnub twg Huab Tais Tswv Ntuj tshoj neeg lub siab kom txiav siab los ua Tswv Ntuj cov hauj lwm tshaj Ntuj Lus.
Yes Xus pom tias qoob loo ntau, ces nws hu cov thwj tim los thiab muab ‘hwj huam’ rau lawv; yam li ‘ntiab dab’ (MT 10: 1), ‘tshaj txog Ntuj lub Ceeb Tsheej’ (MT 10: 7), thiab ‘kho cov neeg mob’ (MT 10: 8). Yes Xus pub 3 lub hwj huam no rau lawv. Cov hwj huam no tsis yuam leej twg, cov tsis xav ntseeg txog mas lawv tsis ntseeg.
Yes Xus txib lawv tias “Nej xub mus cuag cov yaj ploj hauv haiv His Xas Lais tso, nej tshaj tias Ntuj lub Ceeb Tsheej tuaj txog ze lawm, nej kho cov mob kom zoo, nej tsa cov tuag kom ciaj, nej kho cov mob ruas kom huv, nej ntiab dab kom khiav. Tas txhua yam ntawd, mas nej yuav ua pub dawb rau luag.” Cov lus no mas yog Yes Xus txhib peb kom rov tig los saib peb pawg neeg, los pab cawm cov neeg txom nyem nyob hauv peb pab pawg kom lawv ntsib kev kaj siab, kev zoo siab.
Yes Xus muab hwj huam rau peb cov ntseeg txog nws, kom peb ntiab tau dab thiab kho tau mob; yog ntiab tus dab looj koov neeg lub tswv yim, kho tus mob noj neeg lub siab. Yog peb ntiab tus dab thiab tus mob tawm hauv tus twg mus, mas yog peb tau tsa nws tus plig sawv hauv qhov tuag rov los.
Tab sis ua ntej peb yuav ntiab tus dab thiab tus mob hauv lwm tus, peb xub ntiab tus dab thiab tus mob nyob hauv peb tso. Yog peb tsis ntiab tus dab thiab tus mob nyob hauv peb, mas peb yuav ua li cas mus ntiab tus dab thiab tus mob nyob hauv cov neeg nyob ncig peb tau.
Peb ntsia lwm tus lawm, peb rov ntsia peb; saib tus dab looj koov peb thiab tus mob tuav rawv peb cia yog dab tsi.
