Nyob hauv tiam 2 mas cov sau ntawv nyob hauv lub Koom Txoos hais tias yog tus Hauv Paus Xa Lus Mas Tais sau thawj phau ntawv Moo Zoo. Lawv hais tias Mas Tais xub sau Yes Xus cov lus ua lus Hes Nplaws yog nyob ze xyoo 40 los 50. Yog xyoo 62 rau 70 mas lawv thiaj mam muab hloov ua lus Hes Las xws li niaj hnub no. Mas Tais sau nws phau ntawv los qhia Yes Xus lub Moo Zoo rau cov Yus Das txais kev ntseeg txog Yes Xus. Cov ntau xav tias yog qhia cov ntseeg nyob As Nthias Kias.

Mas Tais Ntawv Moo Zoo yog 5 zag qhia kev cai. Thaum nws yuav cev ib zag twg, nws xub cev ib co hwj huam yees ntxwv ib co xwm pab yus lub tswv yim kom to taub zaj ntawd zoo. Thiab muaj ntu qhib thiab xaus Yes Xus lub neej. Li ntawd, tas huv tib si Mas Tais Ntawv Moo Zoo thiaj muaj 7 ntu meej kawg; yog 7 zaj tshaj txog Ntuj lub Ceeb Tsheej tuaj txog lawm, li no:
1. Yes Xus lub neej zais ntshis (MT 1-2); yog piav txog Yes Xus lub keeb, yav yau, thiab yav hluas.
2. Yes Xus tshaj txoj cai tshiab kav Ntuj lub Ceeb Tsheej (MT 3-7); yog piav cov xwm lub caij Yes Xus sawv mus tshaj Ntuj lus, thiab cov zaj nws tshaj nyob saum roob.
3. Yes Xus nrog nws cov thwj tim mus tshaj Ntuj lus txog lub Ceeb Tsheej (MT 8-10); yog xub piav cov hwj huam yees ntxwv pab kom sawv daws ntseeg, ces nws hais zaj xa cov thwj tim mus tshaj Ntuj lus.
4. Yes Xus cov zaj paj lug hais txog Ntuj lub Ceeb Tsheej (MT 10-13: 52); yog xub piav tej xwm ua kom paub tias Ntuj lub Ceeb Tsheej yuav tsum tiv thiab yeej ntau leej ntau yam, ces nws cev cov zaj paj lug hais txog lub Ceeb Tsheej yuav hlob mus zoo li cas.
5. Ntuj lub Ceeb Tsheej pib sawv, yog cov thwj tim (MT 13: 52-18); yog tej xwm piav tias tsoom sid tsis to taub Yes Xus, ces nws thiaj ua hwj huam thiab hais cov lus qhuab qhia cov thwj tim uas yog thawj lub Koom Txoos.
6. Tshuav tsis ntev Ntuj lub Ceeb Tsheej yuav tawm tuaj (MT 19-25); yog tej xwm thiab ib co lus ua kom to taub tias ntau leej tsis txais Yes Xus; Ntuj lub Ceeb Tsheej yuav maj mam sawv mus txog lub ntiaj teb kawg.
7. Lub cim uas lub Ceeb Tsheej pib sawv yog Yes Xus txoj kev tuag thiab sawv rov los (MT 26-28).

Mas Tais cev Yes Xus zoo li cas?
Mas Tais hais tias Yes Xus yog tus uas ib txwm cov Yaj Saub xub tau hais txog. Tos Mas Tais muab siab rau qhia qhov ntawd zoo, los yog vim nws tshaj lub Moo Zoo rau cov Yus Das. Cov Yaj Saub xub tau hais tej yam nram no tib si:
1. Yes Xus yog Das Vis xeeb ntxwv (MT 1: 1-17).
2. Yes Xus yug ntawm ib tug nkauj ntshiab los (MT 1: 23).
3. Yes Xus yug los nyob Npes Les Hes (MT 2: 6).
4. Yes Xus dim ntawm tus vaj muab cov me nyuam tua (MT 2: 17).
5. Yes Xus khiav mus tsiv nraim nyob Hais Nkws Tos teb (MT 2: 15).
6. Yes Xus mus nyob Nas Xas Les (MT 2: 23).
7. Yes Xus mus nyob Kas Fas Naus (MT 4: 14-16).
8. Yes Xus los nyob hauv Yes Lus Xas Les xws li ib tug vaj (MT 21: 5, 16).
9. Yes Xus kho cov neeg mob kom zoo hlo (MT 11: 4-5).
10. Yes Xus tshaj txoj cai xws li Mais Xes thiab zoo dua Mais Xes (MT 5: 17, 21-48, 19: 3-9, 16-21).
11. Yes Xus yog Tswv Ntuj tus Tub Txib (MT 12: 17-21).
12. Cov thwj tim tso Yes Xus pov tseg (MT 26: 31).
13. Lawv muag Yes Xus 30 lub txiaj nyiag (MT 27: 9-10).
14. Cov Yus Das ntes Yes Xus (MT 26: 54).
15. Yes Xus zwm ntxa peb hnub (MT 12: 40).
16. Cov Yus Das tsis ntseeg Yes Xus (MT 13: 13-15).
17. Cov Yus Das mloog lawv txoj cai zoo dua mloog Yes Xus (MT 15: 7-9).
18. Yes Xus yuav tsum hais tej zaj paj lug ntau (MT 13: 14-15, 35).
Tas txhua yam ntawd, mas cov Yaj Saub xub tau hais tias Leej Pleev yuav raug tej ntawd. Yes Xus tau raug tej ntawd tiag, ces Yes Xus thiaj yog Tswv Ntuj tus Pleev.

Mas Tasi Ntawv Moo Zoo lub ntsiab yog li no:
1. Yes Xus tuaj tshaj cov txhooj tshiab kav Tswv Ntuj lub Ceeb Tsheej.
2. Yes Xus yog Tswv Ntuj Leej Tub.
3. Yes Xus yog tus tsim thiab txheeb lub Koom Txoos.
4. Yes Xus txhawb lub Koom Txoos rau saum Pob Zeb.
5. Lub Koom Txoos yog Tswv Ntuj haiv neeg tshiab yuav ri mus txog plaub ceg kaum ntuj.