Tes Las yug tau Has Nplas, Nas Hos thiab Has Laas. Has Laas yug tau ib tug tub hu ua Los. Thaum Tes Las tseem nyob, nws tus tub Has Laas tuag. Has Nplas thiab Nas Hos nkawd yuav poj niam. Has Nplas poj niam hu ua Xas Lais. Xas Lais ua poj tab seeb, nws tsis muaj me nyuam.
Has Nplas nyob tsis deb tsis ze ntawm lub nroog Us nyob Kas Ntes teb. Lub nroog Us thaum ub yog ib lub nroog loj muaj vaj. Has Nplas txiv nrog nws cov tub thiab nrog nws cov xeeb ntxwv tsiv mus nyob Has Laas teb. Has Nplas txiv tuag nyob Has Laas; yog 1800 xyoo ua Yes Xus ntej. Thaum ntawd Has Nplas tseem teev nws txiv Tes Las cov dab qhuas. Yog thaum Tes Las tuag tas lawm mas Has Nplas thiaj hnov Tswv Ntuj lub suab tshoj nws kom nws txiav siab teev Tswv Ntuj tib leeg xwb.
Tswv Ntuj hais rau Has Nplas tias “Koj tso koj lub teb chaws no tseg, tso koj cov kwv tij neej tsa, tso koj txiv tsev neeg tseg. Koj mus nyob lub teb chaws uas kuv yuav qhia rau koj. Kuv yuav koj los ua ib haiv neeg loj. Kuv yuav pub ib txog hmoov zoo rau koj. Kuv yuav ua kom koj lub npe nto moo loj. Tas tsoom sid yuav muab koj lub npe los sib foom hmoov zoo. Kuv yuav foom hmoov zoo rau koj. Cov neeg tsawm koj, kuv yuav saib lawv yog neeg tsis zoo.” Has Nplas thiaj sawv kev mus, nws coj nws poj niam Xas Lais thiab nws tus kwv tus tub Los nrog nws mus. Thaum Has Nplas tso Has Laas tseg nws lub hnub nyoog muaj 75 xyoos lawm.
Has Nplas hla lub teb chaws Kas Nas Has mus txog Xis Kes, nyob ze tus ntoo ntseej. Tswv Ntuj yees tawm tuaj rau Has Nplas pom thiab hais rau nws tis “Kuv yuav muab lub teb chaws no rau koj tsoom xeev ntxwv.” Ces Has Nplas ua ib lub thaj txi Tswv Ntuj nyob Xis Kes. Has Nplas tseem hla mus tim lub roob nyob Npes Thes toob fab. Nws tsa nws lub tsev tsam phooj rau ntawd. Has Nplas ua ib lub thaj txiv Tswv Ntuj thiab nws tuav txog Tswv Ntuj lub npe. Has Nplas tshais chaw zuj zus qhov mus rau qhov nyob ncig Npes Thes.
Has Nplas muaj tsiaj txhu muaj nyiaj muaj kub ntau kawg. Los kuj muaj tsiaj me tsiaj loj tib si, nws kuj muaj nws cov tsev tsam phooj thiab. Lub teb chaws txais nkawd ob leeg nyob ua ke tsis tau, nkawd lub cuab tam loj dhau. Muaj ib zaug, cov tub txib zov Has Nplas cov tsiaj nrog cov tub txib zov Los tej tsiaj sib ceg ib cuam. Li ntawd, Has Nplas thiaj hais rau Los tias “Wb cov tub txib zov tsiaj kuj yuav tsis txhob muaj lus sib ceg ntxiv, vim wb yog kwv tij. Koj ntsia saib tas lub teb chaws nyob ntawm koj xub ntiag. Koj ncaim ntawm kuv mog! Yog koj yuav lub nyob sab laug mas kuv yuav lub nyob sab xis.”
Los tsa muag ntsia lub hav tiaj Yos Las Das muaj dej ntws tas qhov txhia chaw ces Los xaiv tas lub hav tiaj Yos Las Das ua nws tug.
Thaum Los ncaim ntawm Has Nplas tas lawm, Tswv Ntuj hais rau Has Nplas tias “Koj tsa muag ntsia txij qhov chaw koj nyob no mus txog pej fab thiab naj fab, mus rau toob fab thiab xib fab. Tas lub teb chaws uas koj pom no mas kuv yuav muab rau koj thiab rau koj tsoom xeeb ntxwv mus li. Kuv yuav ua kom koj tsoom xeeb zeej xeeb ntxwv lawv coob ib yam ntiaj teb cov plua av. Thaum neeg suav tau ntiaj teb cov tsig av, mas neeg thiaj yuav suav tau koj cov xeeb zeej zeeb ntxwv. Koj sawv tsees mog! Koj mus ncig teb ncig chaw, vim kuv yuav muab los pub rau koj tib si.” Ces Has Nplas mus nyob tom Hes Nploos.
Muaj ib zaug 5 tug vaj tuaj ntes Has Nplas tus xeeb ntxwv Los. Has Nplas sau nws cov tub txib, lawv ua ib npoj mus ntaus yeej 5 tug vaj, nws mam rov qab los, ces tus vaj nyob Xas Les hu ua Mes Kis Xes Des nqa mov mog thiab nqa cawv tuaj. Mes Kis Xes Des ua tus Tswv Ntuj nyob siab tus Leej Choj nyob Xas Les. Mes Kis Xes Des foom hmoov zoo li no “Has Nplas, tus Tswv Ntuj nyob siab uas nws tsim lub ntuj lub teb mas nws foom hmoov zoo rau koj, peb kav tsij cav txog tus Tswv Ntuj nyob siab, uas nws tau muab koj cov yeeb ncuab los tso rau hauv koj xib teg.” Ces Has Nplas muab nws tej toob xib ib feem kaum los pub rau Mes Kis Xes Des.
Zaj lus no qhia ntau yam tseem ceeb:
- Los xaiv thaj chaw zoo thiab tseg thaj chaw zoo tsis heev rau Has Nplas yug nws cov tsiaj, tab sis Has Nplas tsis cib nyeej. Nws hnov moo tias luag tuaj ntes Los mas Has Nplas mus cawm Los.
- Xas Les yog lub zos uas 800 xyoo tom qab mas tus vaj Das Vis yuav los nyob thiab txhim lub tsheej Yes Lus Xas Les nyob hauv lub zos Xas Les ntawd.
- Tus vaj Mes Kis Xes Des teev tus Tswv Ntuj tsim lub ntuj lub teb ib yam li Has Nplas. Mes Kis Xes Des niaj hnub pom Has Nplas yug nws cov tsiaj nyob tsis deb tsis ze ntawm Xas Les. Nws pom tias Has Nplas yog ib tug yawg thoob tsib. Mes Kis Xes Des paub tias Has Nplas tsuas teev tus Tswv Ntuj tsim lub ntuj lub teb. Mes Kis Xes Des qhuas txog Has Nplas. Nws pom Has Nplas mus ntaus yeej 5 tug vaj me ua tub sab, Has Nplas nrog nws cov neeg so nyob ze Xas Les, mas Mes Kis Xes Des mus hwm Has Nplas. Nkawd ob leeg ua ke ua ib thaj hwm Tswv Ntuj.
- Mes Kis Xes Des nqa mov thiab cawv tuaj ua thaj txi Tswv Ntuj. Nws ua xws li Yes Xus ua; yam li Yes Xus muab mov thiab cawv qhia nws cov thwj tim ua thaj txi Tswv Ntuj. Zim txwv no peb cov neeg ntseeg kuj muab mov thiab cawv los ua peb thaj txi Ntuj. Tab sis zim txwv no thaum peb ua thaj txi Ntuj mas mov thiab cawv txia ua Yes Xus lub cev thiab cov ntshav. Mes Kis Xes Des thaj txi Ntuj tsuas yog ib tug qauv xub taw txog tseem thaj txi Ntuj uas Yes Xus yuav qhia rau peb.