¹Thaum lub hauv paus Tswv Ntuj^[i] tsim lub Ntuj^[ii] thiab lub ntiaj teb. ²Lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua^[iii] kiv nplawm ntws saum nplaim dej.

³Tswv Ntuj hais tias “Kom muaj qhov pom kev.” Txawm muaj qhov pom kev tuaj. ⁴Tswv Ntuj pom tias qhov pom kev ntawd zoo. Tswv Ntuj cais qhov pom kev ntawm qhov tsaus ntuj. ⁵Tswv Ntuj hu qhov pom kev ua “nruab hnub” thiab hu qhov tsaus ntuj ua “hmo ntuj”. Txawm muaj tsaus ntuj thiab muaj kaj ntug yog thawj hnub.

⁶Tswv Ntuj hais tias “Kom muaj ib daim ntuj nyob hauv nruab nrab cov dej thiab kom nws quas cov dej ntawm cov dej.” Txawm muaj li ntawd tuaj. ⁷Tswv Ntuj ua daim ntuj los quas cov dej nyob hauv qab ntuj ntawm cov dej nyob saum qaum ntuj. ⁸Tswv Ntuj hu daim ntuj ua “ntuj ntsuab”.^[iv]  Txawm muaj tsaus ntuj thiab muaj kaj ntug yog hnub ob.

⁹Tswv Ntuj hais tias “Kom cov dej uas nyob hauv qab ntuj  ntsuab sib sau los ua ib pawg xwb, thiab   kom av qhuav tshwm los.” Txawm muaj li ntawd tuaj. ¹⁰Tswv Ntuj hu cov av qhuav ua “ntiaj teb” thiab hu cov dej ua “hiav txwv”. Tswv Ntuj pom tias qhov ntawd zoo. ¹¹Tswv Ntuj hais tias “Kom ntiaj teb tuaj nroj tsuag ntsuab xiab, kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv, nyias muaj nyias hom noob.” Txawm muaj li ntawd tuaj.

¹²Ntiaj teb tuaj nroj tsuag ntsuab xiab, tej nroj tsuag nyias txawj txi nyias hom noob thiab tej ntoo nyias txawj txi nyias  hom  txiv, nyias muaj nyias hom noob. Tswv Ntuj pom hais tias qhov ntawd zoo. ¹³Txawm muaj tsaus ntuj thiab muaj kaj ntug yog hnub peb.

¹⁴Tswv Ntuj hais tias “Kom muaj tej lub ci ci nyob saum ntuj ntsuab saud, cais nruab hnub thiab hmo ntuj, thiab cia ua tej lub cim xam hnub xam nyoog thiab suav hnub suav xyoo; ¹⁵kom tej lub ci ci nyob saum ntuj ntsuab ua kom ntiaj teb pom kev.” Txawm muaj li ntawd tuaj. ¹⁶Tswv Ntuj ua ob lub ci ci loj dua cov, lub ci ci loj yog lub kav nruab hnub, lub ci ci me yog lub kav hmo ntuj, thiab cov hnub qub. ¹⁷Tswv Ntuj muab lawv txawb rau saum ntuj ntsuab saud kom ntiaj teb pom kev. ¹⁸Cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo. ¹⁹Txawm muaj tsaus ntuj thiab muaj kaj ntug yog hnub plaub.

²⁰Tswv Ntuj hais tias “Kom muaj tej tsiaj muaj sia npau xi nyob hauv cov dej, thiab kom muaj noog ya saum npoo ntiaj teb, saum ib nta ntuj ntsuab.” Txawm muaj li ntawd tuaj. ²¹Tswv Ntuj tsim cov tsiaj hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyias muaj raws nyias hom, thiab tsim cov noog muaj tis, nyias muaj raws nyias hom. Tswv Ntuj pom tias qhov ntawd zoo. ²²Tswv Ntuj foom lus zoo rau lawv tias “Nej yeej meem tsim noob, yeej meem huam vam mus nyob puv cov dej hauv hiav txwv, kom cov noog yeej meem huam vam mus puv ntiaj teb.” ²³Txawm muaj tsaus ntuj thiab muaj kaj ntug yog hnub tsib.

²⁴Tswv Ntuj hais tias “Kom ntiaj teb txawj muaj tej yam rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj.” Txawm muaj li ntawd tuaj. ²⁵Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo.

²⁶Tswv Ntuj hais tias “Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av.” ²⁷Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg; nws tsim nkawd ua txiv neej thiab ua poj niam. ²⁸Tswv Ntuj foom lus zoo rau nkawd thiab hais rau nkawd tias “Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv ntiaj teb.” ²⁹Tswv Ntuj hais tias “Kuv muab tas puas tsav yam nroj tsuag muaj noob uas tuaj nyob saum npoo ntiaj teb, kuv muab tas puas tsav yam ntoo txi txiv thiab muaj noob rau neb. Tej ntawd yuav yog neb tej txhiam laj txhiam xws. ³⁰Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv ntiaj teb thiab ciaj sia, kuv muab rau lawv ua txhiam xws noj.” Txawm muaj li ntawd tuaj.

³¹Tswv Ntuj ntsia tas txhua yam nws tau ua, txhua yam ntawd zoo kawg. Txawm muaj tsaus ntuj thiab muaj kaj ntug yog hnub rau.

[i] Lo lus ‘Tswv Ntuj’ yog siv los txhais lo lus tias ‘Elohim’ los yog ‘God’ uas yog tus tsim tas ib puas tsav yam thiab kav tas lub sim ceeb.
[ii] ‘Ntuj’ tsis yog lub ntuj ntsuab saum taub hau, tiam sis yog ib thaj chaw nyob siab dua txheej ntuj ntsuab lawm saud, los yog Hmoob hais tias ‘qaum ntuj’.
[iii] Nyob hauv Ntawv Ntshiab lus Aas Kiv siv lo tias ‘God’ s Spirit’ tab sis lo no tsis yog hais txog ‘Tswv Ntuj lub Tswv Yim’ los ‘Leej Ntuj Plig’ tab sis yog hais txog nthwv cua tuaj ntawm Tswv Ntuj tuaj.
[iv] ‘Ntuj Ntsuab’ yog lub ntuj peb pom nyob saum taub hau.

¹Lub Ntuj thiab lub ntiaj teb yog tsim los zoo li no, thiab tas txhua yam nyob rau hauv. ²Tswv Ntuj ua nws  txoj num tiav tas rau hnub xya. Ces hnub xya nws thiaj so, vim nws ua nws txoj num tiav tas. ³Tswv Ntuj foom lus zoo rau hnub xya thiab muab hnub xya ua  hnub ntshiab, vim nws ua nws txoj num tsim ntuj tsim teb tiav tas ces hnub ntawd nws so.

⁴Zaj kwv huam piav txog lub Ntuj thiab  lub ntiaj teb, thaum ntuj tsim teb  raug, mas yog zoo li no, thaum lub caij Yas Ves^[i] Tswv Ntuj tsim lub ntiaj teb thiab lub Ntuj. ⁵Tseem tsis tau muaj ib tug me yub ntoo, ib tug nroj tsuag tuaj li, vim Yas Ves Tswv Ntuj tseem tsis tau ua kom los nag rau ntiaj teb, thiab tseem tsis tau muaj tib neeg los cog tej av. ⁶Tab sis muaj dej txhawv hauv av los ywg tas nrho daim npoo av. ⁷Yas Ves Tswv Ntuj muab ib thooj av nplaum los puab ua tus neeg.^[ii] Yas Ves Tswv Ntuj tshuab pa rau hauv tus neeg qhov ntswg, ces tus neeg ciaj ua ib tug muaj sia. ⁸Yas Ves Tswv Ntuj cog tau ib lub vaj nyob Es Dees,^[iii] nyob sab hnub tuaj, nws muab tus tus neej uas nws tau puab tso rau hauv lub vaj. ⁹Yas Ves Tswv Ntuj ua kom txhua yam ntoo uas zoo saib thiab zoo noj tuaj hauv lub vaj thaj av, tus ntoo muaj txoj sia tuaj nyob hauv nruab nrab lub vaj, thiab tus ntoo uas paub qhov zoo qhov phem. ¹⁰Ib tug  dej txhawv hauv Es Dees ntws mus ywg lub vaj, tus dej ntawd ncau ua plaub ceg. ¹¹Thawj tus dej hu ua Pis Soos: chev hla thoob lub teb chaws Has Vis Las uas muaj kub; ¹²hom kub teb chaws ntawd yog tseem kub. Kuj muaj ib hom txab ntoo zoo thiab muaj hom pob  zeb dub muaj nqis nyob ntawd. ¹³Tus dej ob hu ua Ntsis Hoos. Nws ntoo zoo thiab muaj hom pob  zeb dub muaj nqis nyob ntawd. ¹³Tus dej ob hu ua Ntsis Hoos. Nws chev ncig lub teb chaws Kus Saws. ¹⁴Tus dej peb hu ua Tis Nkis. Ntws nyob As Xws teb sab hnub tuaj. Tus  dej plaub yog tus dej Aws Fas Tes. ¹⁵Yas Ves Tswv Ntuj coj tus neej mus nyob hauv lub vaj Es Dees kom nws cog thiab saib lub vaj. ¹⁶Yas Ves Tswv Ntuj qhia tus neeg li no “Koj noj tau cov txiv txi ntawm tas txhua tsob ntoo hauv lub vaj no tib si; ¹⁷tiam sis koj txhob noj cov txiv txi ntawm tus ntoo paub qhov zoo thiab qhov phem;^[iv] yog hnub twg koj noj, koj yuav tuag.”

¹⁸Yas Ves Tswv Ntuj hais tias “Cia tus neeg nyob ib leeg mas tsis zoo. Kuv yuav ua ib tug pab nws kom phim nws.” ¹⁹Yas Ves Tswv Ntuj thiaj muab av los puab tas puas tsav yam tsiaj qus thiab tas puas tsav yam noog ya saum ntuj. Nws coj los rau tus neeg xyuas saib nws yuav tis npe li cas rau. Txhua yam tsiaj yuav muaj lub npe raws li tus neeg tis rau. ²⁰Tus neeg tis npe rau tas txhua hom tsiaj nyeg, rau cov noog ya saum ntuj, thiab rau tas txhua hom tsiaj qus, tiam sis tib neeg nrhiav tsis tau ib tug pab nws thiab phim nws. ²¹Yas Ves Tswv Ntuj tso ib tug dab ntub hlob laum tib neeg. Ces tib neeg tsaug zog, nws rho tus neeg ib tug tav tawm los, nws rov kaw lub qhov zoo li qub. ²²Yas Ves Tswv Ntuj muab tus tav uas nws rho ntawm tus neeg los puab ua ib tug maum coj los rau tus neeg saib. ²³Tus neeg nqua suab hlo tias “Tus no yog tseem txha ntawm kuv txha thiab tseem nqaij ntawm kuv nqaij tiag. Tus no yuav hu ua  ‘maum’, vim tus no tawm ntawm tus txiv los.” ²⁴Vim li no txiv neej thiaj tso niam tso txiv tseg, mus npuab nws tus poj niam, ces nkawd ua ib lub cev nqaij xwb. ²⁵Thaum ntawd, tus neeg thiab tus poj niam nkawd ob leeg nyob liab qab, tiam sis nkawd ib leeg tsis txaj muag rau ib leeg.

[i] ‘Yas Ves’ yog Tswv Ntuj lub npe, txhais tias ‘Kuv yog tus kuv yog’. Yav tas los mas cov kws txhais Ntawv Ntshiab tsis yeem sau Tswv Ntuj lub npe mas lawv thiaj siv plaub tug txwm ntawv los cav txog Yas Ves, yog plaub tus txawm ntawv tias ‘LORD’, Hmoob txhais tias ‘HUAB TAIS’.
[ii] Tos siv lo tias ‘tus neeg’ vim tias thaum chiv thawj Tswv Ntuj tsim tib neeg los mas nws tsim kom zoo me ntsis li Tswv Ntuj, tab sis Tswv Ntuj tsis yog txiv neej los poj niam.
[iii] Cov Yus Das txhais lo lus ‘Es Dees’ tias ‘xyiv fab’, yog li lub vaj Es Dees thiaj txhais tias ‘lub vaj xyiv fab’.
[iv] ‘Paub qhov zoo thiab qhov phem’ tsis yog kev txawj ntse los lub tswv yim thoob tsib paub tsim txiaj, tiam sis yog cai txiav tias qhov twg zoo qhov twg phem thiab ua raws li tau txiav. Txoj cai txiav no tsuas tshwj rau Tswv Ntuj tib tug xwb thiaj muaj cai txiav qhov zoo qhov phem.

¹Tus nab^[i] yog tus ntse tshaj tas txhua hom tsiaj Yas Ves Tswv Ntuj tau tsim los nyob nruab nrag. Nab hais rau tus poj niam tias “Tswv Ntuj hais tias ‘Neb yuav tsis txhob noj txhua yam txiv ntoo hauv lub vaj no puas yog’?”

²Tus poj niam teb rau tus nab hais tias “Wb noj tau cov txiv txi saum cov ntoo hauv lub vaj no tib si, ³tsuas tshwj cov txiv txi saum tsob ntoo nyob hauv nruab nrab lub vaj. Tswv Ntuj hais tias ‘Neb tsis txhob noj. Nej tsis txhob kov, yog neb noj neb kov mas neb yuav tuag.”      

⁴Tus nab teb ntua tus poj niam tias “Neb yuav tsis tuag li, ⁵ Tswv Ntuj paub tias hnub twg neb noj ces neb qhov muag yuav qhib, neb yuav zoo li Tswv Ntuj uas paub qhov zoo thiab phem.”  

⁶Tus poj niam pom hais tias tus  ntoo ntawd yeej zoo noj thiab zoo saib kawg, thiab yog tus ntoo uas yus ntshaw noj kom yus paub qhov zoo thiab qhov phem, nws de zoj lub txiv ntawm tus ntoo los noj. Nws kuj cev rau nws tus txiv uas nrog nws nyob, ces tus txiv kuj noj thiab. ⁷Ces nkawd ob leeg qhov muag qhib plho, nkawd paub hais tias nkawd liab qab. Nkawd thiaj muab nplooj ncuav pias los ua tiab npua. ⁸Thaum hnub txias zias, nkawd hnov Yas Ves Tswv Ntuj rhais ruam ncig lub vaj. Tus txiv neej thiab nws tus poj niam khiav tsiv nraim Yas Ves Tswv Ntuj hauv cov ntoo nyob hauv lub vaj.    

⁹Yas Ves Tswv Ntuj hu tus txiv neej hais tias “Koj nyob qhov twg?” 

¹⁰Tus txiv neej teb tias “Kuv hnov koj rhais ruam hauv lub vaj. Kuv ntshai vim kuv liab qab; kuv thiaj khiav tsiv nraim.”  

¹¹Tswv Ntuj rov hais ntxiv tias “Leej twg qhia koj tias koj liab qab? Koj noj lub txiv uas kuv txwv tsis pub noj lawm puas yog?”  

¹²Tus txiv neej teb tias “Yog tus poj niam uas koj tso nyob ze kuv, nws muab lub txiv rau kuv, ces kuv thiaj noj.”  

¹³Yas Ves Tswv Ntuj hais rau tus poj niam tias “Koj ua dab tsi li ntawd?” 

Tus poj niam teb tias “Yog niag nab ntxias kuv, kuv thiaj noj.”

¹⁴Yas Ves Tswv Ntuj hais rau tus nab tias “Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 

¹⁵Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws^[ii] yuav tsuj koj taub hau, koj yuav tom nws luj taws.” 

¹⁶Tswv Ntuj hais rau tus poj niam hais tias “Kuv yuav ua kom koj muaj mob ntau thaum koj xeeb tub xeeb ki. Koj yuav tau mob tau ntsaj, koj thiaj yug tau me tub me nyuam. Tsis kav, koj tseem yuav ntshaw koj tus txiv, tiam sis nws yuav tswj koj.”  

¹⁷Tswv Ntuj hais rau As Da^[iii] hais tias “Vim koj tau mloog koj tus poj niam lus, koj thiaj noj lub txiv kuv txwv tsis kheev noj, av thiaj raug foom phem vim koj. Koj yuav siv zog khwv tas koj lub neej koj thiaj tau noj.   

¹⁸Av yuav tuaj pos tuaj nrhab rau koj, thiab koj yuav noj tej nroj tsuag uas tuaj hauv nruab teb. 

¹⁹Koj ntsej muag yuav tawm hws lug koj thiaj tau noj mus txog hnub koj rov mus ua av, vim koj yog av puab. Koj yog av luaj ces koj yuav rov mus ua av luaj.”  

²⁰Tus txiv neej tis npe rau nws poj niam hu ua Es Vas,^[iv] vim nws yog ib tsoom neeg muaj txoj sia leej niam.²¹Yas Ves Huab Tais Ntuj muab tawv los ua tsoos rau As Das thiab nws poj niam hnav. ²²Yas Ves Huab Tais Ntuj hais tias “Zaum no tib neeg zoo li peb lawm, nws paub qhov phem thiab qhov zoo.[v] Yuav tsis pub kom nws cev tes mus de tau tsob txiv muaj txoj sia los noj ntxiv, tsam nws muaj txoj sia nyob mus li.” ²³Yas Ves Huab Tais Ntuj thiaj tshem neeg tawm hauv lub vaj Es Dees, kom neeg mus nrhiav noj hauv cov av uas muab los puab neeg. ²⁴Huab Tais Ntuj ntiab tib neeg tawm, nws tso ib co Kes Lus Npis[vi] zov lub vaj Es Dees, sab hnub tuaj, thiab tsa ib rab ntaj nplaim taws thaiv txoj kev mus txog tus ntoo muaj txoj sia.

[i] ‘Tus nab’ hauv nqe no yog hais txog Tswv Ntuj tus yeeb ncuab, yog Xas Tas.

[ii] Tsis yog hais txog tus poj niam yuav tsuj  tsuj tus nab taub hau, tiam sis hais txog tus poj niam tus tub yog tus yuav tsuj tus nab lub taub hau.

[iii]  ‘As Das’ txhais tias ‘neeg’, yog hlav los ntawm lo tias ‘Av’.

[iv] ‘Es Vas’ txhais tias ‘muaj sia’.

[v] Ntu no txhais tias ‘ziag no tib neeg tau tsa tus kheej cai los txiav tias qhov twg zoo los phem rau lwm tus lawm.’

[vi] ‘Kes Lus Npis’ yog Huab Tais Ntuj cov Tshiab.

¹Tus txiv neej nrog nws poj niam Es Vas pw. Ces tus poj niam xeeb tub thiab yug tau Kas Ees, nws hais tias “Kuv tau ib tug tub ntawm Yas Ves los.” ²Nws kuj yug tau As Npes, yog Kas Ees tus kwv. As Npes ua ib tug tub yug tsiaj hos Kas Ees ua liaj ua teb. ³Ntev tom qab, Kas Ees txawm muab nws cov qoob los txi rau Yas Ves. ⁴As Npes kuj muab thawj tus me nyuam uas nws cov tsiaj yug tau, los txi Ntuj. Nws tseem muab lawv cov roj los txi huv tib si. Yas Ves zoo siab rau As Npes, ces nws txais As Npes cov txim. ⁵Tab sis Yas Ves tsis zoo siab rau Kas Ees thiab tsis txais Kas Ees cov txim, ces Kas Ees npau taws thiab ua ntsej muag dub nciab.

⁶Yas Ves hais rau Kas Ees tias “Vim li cas koj thiaj npau taws thiab ua ntsej muag dub nciab li ko? ⁷Yog koj txiav siab ua zoo mas koj yuav rov tsa taus koj lub ntsej muag. Hos yog koj tsis txiav siab ua zoo ces kev txhaum nyob rawv ntawm koj qhov rooj, xws li tus tsiaj nyas nrhw yuav tom koj. Yog koj xav yeej, mas koj tseem yuav yeej tau txoj kev txhaum.”

⁸Tab sis muaj ib zaug, Kas Ees hais rau nws tus kwv As Npes tias “Wb mus yos.” Thaum nkawd mus nrug deb ntawm zos lawm, Kas Ees txawm dhia rhees mos ntiag nws tus kwv, muab tus kwv tua.

⁹Yas Ves nug Kas Ees hais tias “Koj tus kwv As Npes nyob qhov twg?”

Kas Ees teb tias “Kuv tsis paub. Kuv puas yog tus zov rawv kuv tus kwv?”

¹⁰Yas Ves rov hais tias “Koj tau ua dab tsi? Koj sim mloog saib, koj tus kwv cov ntshav quaj qw hauv av tuaj rau kuv. ¹¹Zaum no koj yuav tau hmoov phem thiab koj yuav raug ntiab tawm hauv thaj av zoo uas tau rua ncauj cug koj tus kwv cov ntshav. ¹²Yog koj ua teb, av yuav tsis txi qoob rau koj lawm.  Koj yuav ua neeg loj leeb ncig ntiaj teb.”

¹³Kas Ees hais rau Yas Ves tias “Kuv lub txim hnyav dhau, kuv ris tsis taus. ¹⁴Ntsia saib, hnub no koj muab kuv ntiab tawm hauv thaj av zoo no mus, kuv yuav tsum mus tsiv nraim deb ntawm koj lub ntsej muag, thiab kuv yuav ua neeg loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb.”

¹⁵Yas Ves teb tias “Yog leej twg tua Kas Ees mas yuav muaj tus ua pauj rau nws xya zaus.” Ces Yas Ves ntaus ib lub cim rau Kas Ees kom thawj tug neeg ntsib nws txhob muab nws tua.

¹⁶Kas Ees thiaj txav mus deb ntawm Yas Ves xub ntiag. Nws mus nyob lub teb chaws Nos Daws, nyob ntawm lub vaj Es Dees, sab hnub tuaj.

¹⁷Kas Ees nrog nws poj niam pw, ces nws poj niam xeeb tub thiab yug tau Hes Nov. Kas Ees txhim ib lub nroog, nws tis npe rau lub nroog raws nws tus tub hu ua Hes Nov. ¹⁸Hes Nov yug tau Is Lav. Is Lav yug tau Mes Hus Yas Ees. Mes Hus Yas Ees yug tau Mes Thus Sas Ees. Mes Thus Sas Ees yug Las Mev. ¹⁹Las Mev yuav ob tug poj niam. Tus niam hlob hu ua As Dav, tus niam yau hu ua Xis Las. ²⁰As Dav yug tau Yas Npas, uas yog cov neeg nyob tsev tsam phooj thiab yug tsiaj tus yawg koob. ²¹Nws tus kwv hu ua Yus Npas,^[i] yog cov neeg uas txawj qoj nkauj nog ncas thiab txawj tshuab raj tus yawg koob. ²²Xis Las yug tau Tus Npas Kas Ees,^[ii] nws yog tus xub muab tooj dub thiab muab hlau coj los nchuav ua toob xib. Tus Npas Kas Ees muaj ib tug muam hu ua Nas As Mas.^{[iii] 23}Las Mev hais rau nws ob tug poj niam tias

“As Dav thiab Xis las, neb mloog kuv lub suab mog. Las Mev ob tug poj niad, neb mloog qhov kuv hais mog, kuv tau tua ib tug txiv neej vim nws ua kuv nqaij ntuag, tua ib tug tub hluas vim nws ua kuv nqaij doog.

²⁴Yog luag twb ua pauj Kas Ees xya zaus, mas luag yuav ua pauj Las Mev xya caum xya zaus.”²⁵As Das rov nrog nws poj niam pw, ces nws poj niam yug tau ib tug tub ntxiv, thiab tis npe hu ua Xes Thes,^[iv] nws hais tias “Tswv Ntuj pub dua ib tug tub rau kuv los sawv As Npes chaw, vim Kas Ees muab nws tua lawm.” ²⁶Xes Thes kuj yug tau ib tug tub, hu ua Es Nos. Lub zim txwv ntawd, neeg pib hu txog Yas Ves lub npe.

[i] ‘Yus Npas’ txhais tias ‘lub hom’ los ‘lub raj’.

[ii] ‘Tus Npas Kas Es’ txhais tias ‘haiv neeg ua kws hlau nyob pej fab.’

[iii] ‘Nas As Mas’ txhais tias ‘tus neeg ntxim hlub.’

[iv] ‘Xes Thes’ txhais tias ‘pub.’

¹Ntawm no yog phau ntawv qhia txog As Das caj ces. Hnub uas Tswv Ntuj tsim tib neeg, nws tsim kom neeg muaj ntsis zoo li Tswv Ntuj. ²Nws tsim nkawd ua txiv neej thiab poj niam, thiab foom hmoov zoo rau nkawd. Hnub uas nws tsim nkawd, nws muab lub npe hu ua ‘Tus Neeg’ rau nkawd. ³Thaum As Das muaj ib puas peb caug xyoo, nws yug tau ib tug tub muaj ntsis zoo li nws, zoo li nws tus duab. Nws tis npe rau hu ua Xes Thes. ⁴Thaum As Das yug tau Xes Thes lawm, nws tseem ua neej nyob yim pua xyoo. Nws yug tau tub tau ntxhais. ⁵Tas nrho As Das lub neej ntev txog cuaj pua peb caug xyoo, nws mam tuag.

⁶Thaum Xes Thes muaj ib puas thiab tsib xyoos, nws yug tau Es Nos. ⁷Thaum yug Es Nos lawm, nws tseem nyob yim pua thiab xya xyoo ntxiv, nws yug tau tub thiab tau ntxhais. ⁸Tas nrho Xes Thes lub neej ntev txog cuaj pua kaum ob xyoos, nws mam tuag.

⁹Thaum Es Nos muaj cuaj caum xyoo, nws yug tau Kes Naas. ¹⁰Thaum Es Nos yug Kes Naas lawm, nws tseem nyob yim pua kaum tsib xyoos ntxiv. Nws yug tau tub thiab yug tau ntxhais. ¹¹Tas nrho Es Nos lub neej ntev txog cuaj pua tsib xyoos, nws mam tuag.

¹²Thaum Kes Naas muaj xya caum xyoo, nws yug tau Mas Has Las Les Ees. ¹³Thaum yug Mas Has Las Les Ees lawm, Kes Naas tseem nyob yim pua plaub caug xyoo ntxiv. Nws yug tau tub thiab tau ntxhais. ¹⁴Tas nrho Kes Naas lub neej ntev txog cuaj pua kaum xyoo, nws mam tuag.

¹⁵Thaum Mas Has Las Les Ees muaj rau caum tsib xyoos, nws yug tau Yes Les. ¹⁶Thaum yug tau Yes Les lawm, nws tseem nyob yim pua peb caug xyoo ntxiv. Nws yug tau tub thiab tau ntxhais. ¹⁷Tas nrho Mas Has Las Les Ees lub neej ntev txog yim pua cuaj caum tsib xyoos, nws mam tuag.

¹⁸Thaum Yes Les muaj ib puas rau caum ob xyoos, nws yug tau Hes Nov. ¹⁹Thaum yug tau Hes Nov lawm, Yes Les tseem nyob yim pua xyoo ntxiv. Nws yug tau tub thiab tau ntxhais. ²⁰Tas nrho Yes Les lub neej ntev txog cuaj pua rau caum ob xyoos, nws mam tuag.

²¹Thaum Hes Nov muaj rau caum tsib xyoos, nws yug tau Mas Thus Xas Les. ²²Thaum yug tau Mas Thus Xas Les lawm, Hes Nov nrog nraim Tswv Ntuj peb puas xyoo ntxiv. Nws yug tau tub thiab tau ntxhais. ²³Tas nrho Hes Nov lub neej ntev txog peb puas rau caum tsib xyoos. ²⁴Hes Nov nrog nraim Tswv Ntuj, ces nws cia li ploj lawm xwb, vim Tswv Ntuj tuaj coj nws lawm.

²⁵Thaum Mas Thus Xas Les muaj ib puas yim caum xya xyoo, nws yug tau Las Mev. ²⁶Thaum Mas Thus Xas Les yug tau Las Mev lawm, Mas Thus Xas Les tseem nyob xya pua yim caum ob xyoos ntxiv. Nws yug tau tub thiab tau ntxhais. ²⁷Tas nrho Mas Thus Xas Les lub neej ntev txog cuaj pua rau caum cuaj xyoos, nws mam tuag.

²⁸Thaum Las Mev muaj ib puas yim caum ob xyoos, nws yug tau ib tug tub. ²⁹Nws muab tis npe hu ua Nos Hes, nws hais tias “Tus no yuav nplij peb lub siab nyob hauv peb tej hauj lwm thiab peb tej kev khwv, yog kev nplij siab tawm hauv thaj av uas Yas Ves tau tsawm lus phem rau.” ³⁰Thaum Nos Hes yug lawm, Las Mev tseem nyob tsib puas cuaj caum tsib xyoos ntxiv. Nws yug tau tub thiab tau ntxhais. ³¹Tas nrho Las Mev lub neej ntev txog xya pua xya caum xya xyoo, nws mam tuag. ³²Thaum Nos Hes muaj tsib puas xyoo, nws yug tau Xees, Has, thiab Zas Fes.

¹Thaum tib neeg pib coob tuaj nyob hauv ntiaj teb lawm, thiab tib neeg yug tau ntxhais coob lawm, ²Tswv Ntuj cov tub[i] pom hais tias tib neeg cov ntxhais[ii] zoo ntxim lawv siab, ces lawv mus yuav tas nrho cov uas lawv nyiam coj los ua poj niam. ³Yas Ves hais tias “Kuv lub Tswv Yim yuav tsis nyob hauv tib neeg, vim tib neeg yog ib lub cev nqaij mas nws lub neej yuav ntev ib puas nees nkaum xyoo xwb.” ⁴Thaum ntawd, twb muaj cov neeg Nes Fis Lis[iii] lawm, lawv tseem nyob yav tom qab ntxiv thiab, lub sij hawm ntawd Tswv Ntuj cov tub yuav tib neeg cov ntxhais coj los yug me nyuam rau lawv, ces thiaj tau cov neeg muaj peev xwm thiab muaj koob meej nto lug txheej thaud.

⁵Yas Ves pom hais tias nyob ntiaj teb, neeg siab phem tas nrho, thiab neeg lub siab tsuas xav qhov phem tas hnub xwb. ⁶Yas Ves khuv xim hais tias nws tau tsim neeg los nyob ntiaj teb, thiab nws tu siab. ⁷Ces Yas Ves hais tias “Kuv yuav muab cov neeg uas kuv tau tsim ntawd rhuav kom ploj tas saum daim npoo av, tsis hais neeg, tsiaj txhu, kab ntsaum los noog ya saum ntuj huv tib si, vim kuv khuv xim tias kuv tau tsim lawv los.” ⁸Tiam sis Yas Ves ntsia Nos Hes yog ib tug neeg zoo xis siab.

⁹Ntawm no yog Nos Hes zaj kwv huam: Nos Hes yog ib tug neeg ncaj, yog ib tug neeg zoo txhij tag nrho tsoom neeg ua neej nyob lub sij hawm ntawd. Nos Hes ua neej nyob hauv Tswv Ntuj. ¹⁰Nos Hes yug tau peb tug tub: Xees, Has thiab Zas Fes. ¹¹Lub ntiaj teb ua phem zuj zus rau Tswv Ntuj, thiab muaj kev ua nruj ua tsiv ntau zuj zus. ¹²Tswv Ntuj pom tias ntiaj teb phem thiab qias kawg nkaus, vim txhua tus neeg uas muaj lub cev nqaij coj tus yeeb yam phem nyob ntiaj teb.¹³Tswv Ntuj hais rau Nos Hes tias “Kuv txiav tias lub caij uas txhua tus muaj lub cev nqaij yuav ploj mus los txog lawm, vim lub ntiaj teb muaj kev phem ntau dhau los ntawm lawv los. Li ntawd, kuv yuav rhuav lawv kom ploj mus nrog lub ntiaj teb. ¹⁴Koj yuav xuas ntoo xwb cob txua ib lub nkoj. Koj yuav xov ntau kem thiab muab roj hmab los leem sab hauv sab nraud rau. ¹⁵Koj yuav txua raws li no. Qhov ntev yog peb puas tshim, qhov dav yog tsib caug tshim, qhov siab yog peb caug tshim. ¹⁶Koj yuav ua ib lub ruv rau lub nkoj kom siab li ib tshim tshaj saud. Koj yuav ua lub qhov rooj rau ntawm ib sab. Koj yuav ua kom muaj txheej ib, txheej ob thiab txheej peb. ¹⁷Ntawm kuv, mas kuv yuav ua kom dej los nyab lub ntiaj teb, kom txhua yam muaj txoj sia hauv lub qab ntuj ploj tas mus. Tas puas tsav yam nyob hauv ntiaj teb yuav tsum tuag kom tas. ¹⁸Tiam sis kuv yuav nrog koj cog lus. Koj yuav nkag mus lawm hauv lub nkoj, koj thiab koj cov tub, koj poj niam thiab koj cov tub cov poj niam nrog koj. ¹⁹Tas puas tsav yam muaj txoj sia, tas puas tsav yam muaj lub cev nqaij, koj yuav muab kom tau ib hom ob tug nrog koj mus lawm hauv lub nkoj kom txuag lawv txoj sia. Yuav tsum yog ib tug maum thiab ib tug txiv. ²⁰Ntawm cov noog, ntawm cov tsiaj nyeg, ntawm tej kab ntsaum nkag hauv av, ib yam ib nkawm yuav nrog koj nkag mus kom txuag lawv txoj sia. ²¹Ntawm koj, mas koj yuav tsum nrhiav tas puas tsav yam zoo noj coj los khaws cia kom ntau, ces thiaj li yuav muaj txhiam xws noj rau koj thiab rau lawv.” ²²Nos Hes ua raws li ntawd. Nws ua tas puas tsav yam Tswv Ntuj hais rau nws.

[i] ‘Tswv Ntuj cov tub’ yog lo lus hais txog Xes Thes caj ces.

[ii] ‘Tib neeg cov ntxhais’ yog hais txog Kas Es caj ces.

[iii] ‘Nes Fis Lis’ txhais tias ‘cov neeg loj.’

¹Yas Ves hais rau Nos Hes tias “Koj thiab tas koj tsev neeg nkag mus hauv lub nkoj, vim nyob hauv tiam neeg no, kuv tsuas pom koj ib leeg xwb thiaj li yog neeg ncaj ncees. ²Koj yuav khaws cov tsiaj huv ib yam xya nkawm nrog koj mus, tus txiv nrog tus maum. Nawm cov tsiaj tsis huv, koj yuav khaws ib nkawg, ib tug txiv thiab ib tug maum. ³Cov noog ya saum ntuj, koj khaws xya nkawm, ib tug lau nrog tus poj, kom tau ua noob rau ntiaj teb. ⁴Tshuav xya hnub ntxiv xwb kuv yuav tso nag los rau ntiaj teb plaub caug hnub plaub caug hmo. Kuv yuav rhuav tas puas tsav yam kuv tau tsim los kom ploj ntais saum daim npoo av mus.”

⁵Nos Hes ua tas puas tsav yam raws li Yas Ves kom nws ua.

⁶Nos Hes muaj rau pua xyoo thaum dej nag los nyab ntiaj teb. ⁷Nos Hes nrog nws cov tub, nws poj niam thiab cov tub cov poj niam, lawv nkag mus hauv lub nkoj kom dim ntawm dej nyab. ⁸Cov tsiaj huv thiab cov tsiaj tsis huv, cov noog thiab cov kab nkag hauv av, ⁹muaj ib yam ib nkawg nkag rau hauv Nos Hes lub nkoj, muaj ib tug maum ib tug txiv raws li Tswv Ntuj tau hais rau Nos Hes. ¹⁰Thaum dhau xya hnub lawm, ces dej nag nyab ntiaj teb. ¹¹Thaum Nos Hes muaj rau pua xyoo txwm nkaus, lub ob hlis, hnub tim kaum xya, hnub ntawd, txhua tus dej txhawv phwj hauv tiv txwv tuaj, hos cov qhov rooj thaiv dej saum ntuj qhib plho rau dej nchuav nthwv sis laub sis lug nqes los. ¹²Nag los tsaus nti tau plaub caug hnub thiab plaub caug hmo rau ntiaj teb.

¹³Hnub ntawd kiag, Nos Hes thiab nws cov tub, Xees, Has, thiab Zas Fes, nrog Nos Hes poj niam thiab nws cov tub peb tug poj niam, lawv nkag hauv lub nkoj. ¹⁴Txhua hom tsiaj qus, tsiaj nyeg, kab nkag hauv av, txhua yam tsiaj ya saum ntuj, txhua hom noog, txhua yam muaj tis nrog Nos Hes nkag mus rau hauv nws lub nkoj.

¹⁷Txhua nkawm tsiaj muaj lub cev nqaij thiab muaj txoj sia nrog Nos Hes nkag mus hauv lub nkoj. ¹⁶Txhua nkawm muaj lub cev nqaij nkag hauv nkoj ntawd muaj ib tug txiv nrog ib tug maum raws li Tswv Ntuj tau hais; ces Yas Ves kaw nkaus lub qhov rooj nkoj lawv Nos Hes qab. ¹⁷Los nag tsaus nti nyab ntiaj teb tau plaub caug hnub, cov dej nce tuaj, ces dej tshoom lub nkoj kom ntab. ¹⁸Cov dej puv zuj zus thiab ntau zuj zus tuaj, ces lub nkoj ntab yeev rau saum nplaim dej. ¹⁹Cov dej nce tuaj puv ntiaj teb, ces cov roob siab tshaj nyob hauv lub qab ntuj txawm ploj hauv qab deg tas. ²⁰Dej tseem nce siab kaum tsib tshim, thiab nyab cov roob tas huv tib si. ²¹Ces txhua yam muaj lub cev nqaij txawj ua zog nyob hauv ntiaj teb tuag tas huv si, me noog, me tsiaj nyeg tsiaj qus, tas puas tsav yam muaj sia npau xi nyob hauv av, thiab tas ib tsoom tib neeg huv tib si. ²²Tas puas tsav yam ua pa ntawm qhov ntswg, los yog tas puas tsav yam nyob saum nruab nqhuab tuag tas. ²³Tas puas tsav yam muaj sia nyob saum npoo av, tsis hais tib neeg los tsiaj txhu, tej kab thiab tej noog saum ntuj, sawv daws ploj hauv ntiaj teb tas huv si, tsuas tshuav Nos Hes thiab puas tsav yam uas nrog nws nyob hauv nkoj xwb. ²⁴Dej puv tuaj nyab ntiaj teb tau ib puas tsib caug hnub txwm nkaus.

¹Tswv Ntuj nco ntsoov txog Nos Hes, tas cov tsiaj qus thiab tsiaj nyeg uas nrog Nos Hes nyob hauv lub nkoj; Tswv Ntuj tso ib nthwv cua tuaj tshuab lub ntiaj teb. Cov dej thiaj nqig tas. ²Cov dej txhawv hauv tiv txwv txhaws tas, hos cov qhov rooj thaiv dej saum ntuj kuj kaw tas huv tib si, ces nag tsis tau kev poob los rau ntiaj teb ntxiv lawm. ³Dej thiaj li nqig zuj zus hauv ntiaj teb. Tom qab ib puas tsib caug hnub dej thiaj mam nqig tas. ⁴Thaum lub xya hli, hnub tim kaum xya, lub nkoj los khuam rau saum cov ncov roob As Las Las. ⁵Dej nqig mus txog lub kaum hli, ces hnub tim ib lub kaum hli cov ncov roob mam li tshwm tuaj.

⁶Nos Hes tos plaub caug hnub, ces nws qhib lub qhov rai uas nws tau ua rau ntawm lub nkoj, ⁷nws tso tus uab lag tawm mus. Uab lag ya mus ya los, tos kom dej qhuav hauv ntiaj teb tso. ⁸ Nos Hes tso tus nquab tawm ntawm nws mus xyuas saib dej puas tau nqhuab hauv av, ⁹tiam sis tus nquab nrhiav tsis tau chaw tsaws li, ces nquab ya rov los rau ntawm lub nkoj, vim dej tseem nyab cov av hauv ntiaj teb thoob plaws. Nos Hes thiaj li xyab tes mus txais tus nquab thiab coj nquab los nrog nws nyob hauv lub nkoj. ¹⁰Nws tos tau xya hnub ntxiv; nws rov qab tso tus nquab tawm ntawm lub nkoj mus dua. ¹¹Thaum tsaus ntuj, nquab ya rov los, ntawm nws kaus ncauj muaj ib tug ntsis txiv ntoo roj uas tus nquab nyuam qhuav de tshiab tshiab. Ces Nos Hes paub tias dej nqig lawm. ¹²Nws rov tos tau xya hnub ntxiv, nws mam rov tso tus nquab tawm mus dua; tus nquab tsis rov los ntxiv lawm.

¹³Thaum Nos Hes muaj rau pua ib xyoos, lub ib hlis, xiab ib, dej qhuav tas hauv ntiaj teb lawm. Nos Hes yaws lub ruv npog lub nkoj. Nws ntsia pom av tab tom pib qhuav. ¹⁴Lub ob hlis, hnub tim nees nkaum xya, ntiaj teb qhuav tas lawm.

¹⁵Ces Tswv Ntuj hais rau Nos Hes tias ¹⁶“Koj tawm hauv nkoj los, koj thiab koj poj niam, nrog koj cov tub thiab koj cov tub cov poj niam. ¹⁷Coj tas puas tsav yam tsiaj muaj sia muaj lub cev nqaij nrog nej tawm los, cov noog, cov tsiaj txhu, thiab tas puas tsav yam txawj nkag uas nkag hauv av huv tib si, kom txhua yam coob mus puv ntiaj teb, kom txhua yam tsim noob thiab huam vam puv hauv ntiaj teb.”

¹⁸Ces Nos Hes tawm hauv nkoj los, nrog nws cov tub thiab nws poj niam thiab nws cov tub thiab lawv cov poj niam. ¹⁹Txhua yam tsiaj, txhua yam txawj nkag, txhua yam noog, txhua yam txawj ua zog nyob hauv ntiaj teb, sawv daws tawm hauv nkoj los, nyias raws nyias npoj nyias pawg.

²⁰Nos Hes tsa ib lub thaj txi Yas Ves, nws muab txhua yam tsiaj huv thiab txhua yam noog huv los hlawv txi Ntuj saum lub thaj. ²¹Thaum Yas Ves hnov cov pa ncho tsw qab. Yas Ves hais hauv nws nruab siab tias “Txawm tias yog tim tib neeg, los kuv yuav tsis foom phem rau av ib zaug ntxiv lawm, vim tias neeg lub siab yeej xeeb tau phem puag thaum yau los. Kuv yuav tsis ua kom txhua yam muaj sia tu noob li kuv tau ua no ib zaug ntxiv. ²²Tsuav yog tseem muaj lub ntiaj teb, mas yuav muaj caij cog qoob thiab caij sau qoob, yuav muaj txias thiab muaj kub, yuav muaj caij sov caij no, yuav muaj nruab hnub thiab muaj hmo ntuj mus li.”

¹Tswv Ntuj foom hmoov zoo rau Nos Hes thiab rau nws cov tub, nws hais rau lawv tias “Nej yeej meem tsim noob, kav tsij huam vam mus puv lub ntiaj teb. ²Tas puas tsav yam tsiaj hauv ntiaj teb, puas tsav yam noog ya saum ntuj. Puas tsav yam tsiaj nkag hauv av thiab puas tsav yam ntses hauv hiav txwv, sawv daws yuav hwm nej thiab ntshai nej. Lawv nyob hauv nej lub xib teg tas huv si. ³Txhua yam txawj ua zog thiab muaj sia yog txhiam xws rau nej noj. Kuv tseem muab cov nroj ntsuab thiab txhua tsav puas yam tas tib si rau nej siv. ⁴Tab sis cov nqaij nrog nws txoj sia, uas yog cov ntshav, mas nej tsis txhob noj. ⁵Vim hais tias, kuv yuav nug txog nej txhua tus cov ntshav, kuv yuav nug ntawm tsiaj thiab ntawm neeg. Yuav nug ib tug txog lwm tus cov ntshav, kuv yuav nug txog tib neeg txoj sia. ⁶Leej twg txo neeg cov ntshav, nws cov ntshav yuav raug neeg txo thiab, vim hais tias Tswv Ntuj tsim neeg los zoo xws li nws tus duab. ⁷Nej yeej meem tsim noob, yeej meem huam vam coob puv ntiaj teb thiab kav ntiaj teb.”

⁸Tswv Ntuj hais li no rau Nos Hes thiab rau nws cov tub ⁹“Ntawm no, kuv nrog nej cog lus cia,[i] thiab nrog nej caj ces puag tom qab, ¹⁰nrog txhua yam uas muaj txoj sia: cov noog, cov tsiaj nyeg, txhua tsav txhua hom tsiaj hauv ntiaj teb uas nrog koj tawm hauv lub nkoj los, txhua hom tsiaj nyob hauv ntiaj teb. ¹¹Kuv cog lus rau nej tias: Tas puas tsav yam muaj sia yuav tsis raug dej nyab rhuav siav kom tu noob ib zaug ntxiv. Yuav tsis muaj dej los nyab thiab rhuav ntiaj teb ib zaug ntxiv lawm.”

¹²Tswv Ntuj hais tias “Lub cim no yuav qhia rau cov tiam neeg tom ntej paub tias kuv tau nrog nej thiab tas puas tsav yam muaj sia uas nrog nej muaj sia cog lus: ¹³Kuv ua zaj sawv rau saum cov huab, thiab nws yuav ua lub cim nco txog tias kuv thiab lub ntiaj teb tau cog lus cia lawm. ¹⁴Thaum kuv sau cov huab los ncaj rau saum lub ntiaj teb thiab pom zaj sawv saum cov huab, ¹⁵kuv yuav nco dheev txog kuv cov lus cog rau koj thiab rau tas puas tsav yam muaj lub cev nqaij, ces dej yuav tsis hlob thiab tsis nyab tas puas tsav yam muaj sia ib zaug ntxiv. ¹⁶Thaum muaj zaj sawv saum cov huab, kuv yuav pom thiab yuav nco txog tias Tswv Ntuj nrog txhua tsav puas yam muaj lub cev nqaij nyob ntiaj teb tau cog lus cia ib txhis mus li.”

¹⁷Tswv Ntuj hais rau Nos Hes tias “Qhov ntawd yog lub cim qhia tias kuv tau nrog txhua yam muaj lub cev nqaij nyob ntiaj teb cog lus lawm.”

¹⁸Nos Hes cov tub uas tawm hauv nkoj los yog Xees, Has, thiab Zas Fes. Has yog Kas Nas Has txiv. ¹⁹Peb tug no yog Nos Hes peb tug tub, thiab lawv yog cov tsim noob los mus nyob puv ntiaj teb.

²⁰Nos Hes yog ib tug neeg ua liaj ua teb, yog thawj tug xub pib cog hmab txiv cawv. ²¹Nws haus cawv ces nws qaug cawv. Nws muab ris tsho hle, nws pw liab qab hauv nws lub tsev ntaub. ²²Has, uas yog Kas Nas Has txiv, pom nws txiv liab qab, ces nws mus hais qhia nws ob tug tij laug nraum zoov. ²³ Xees thiab Zas Fes nkawd muab lub tsho loj kwv saum nkawd xub pwg, ces nkawd thaub qab mus muab lawv txiv vov, nkawd tsis tig ntsej muag ntsia nkawd txiv liab qab. ²⁴Thaum Nos Hes zoo cawv lawm, nws hnov txog tias nws tus tub ntxawg tau ua li ntawd rau nws. ²⁵Nws foom tias “Kom Kas Nas Has hmoov phem. Nws yuav ua tus qhev qis tshaj plaws lost sob hwb nws ob tug tij.”

²⁶Nws tseem hais li no ntxiv “Thov hwm Yas Ves, Xees tus Tswv Ntuj. Cia Kas Nas Has ua nws qhev. ²⁷Kom Tswv Ntuj pub chaw dav rau Zas Fes, thiab cia Zas Fes nyob hauv Xees cov tsev tsam phooj. Cia Kas Nas Has ua nws qhev.”

²⁸Thaum dej nyab ntiaj teb tas, Nos Hes tseem nyob peb puas tsib caug xyoo ntxiv. ²⁹Nos Hes lub neej ntev txog cuaj puas tsib caug xyoo, ces nws tuag.

[i] Tswv Ntuj cog lus zaum no yog cog lus nrog txhua tsav uas Tswv Ntuj tau tsim los nyob rau ntiaj teb.

¹Ntawm no yog Nos Hes cov tub, Xees, Has thiab Zas Fes lawv cov caj ces. Lawv tau yug tub yug kiv txij thaum dej nyab ntiaj teb tas.

²Zas Fes cov tub: Nkos Mes, Mas Nkos, Mas Dais, Yas Vas, Tus Npas, Mos Ses, thiab Tis Las. ³Nkos Mes cov tub: As Kes Nas, Lis Fas, thiab Tos Nkas Mas. ⁴Yas Vas cov tub: Es Lis Sas, Tas Xis, Kis Tis, thiab Los Das Nis. ⁵Cov no yog cov uas tau ua neej nyob raws cov pov txwv.[i] Lawv yog Zas Fes cov tub, nyias muaj nyias teb chaws nyob, nyias muaj nyias hom lus, nyias muaj nyias lub xeem thiab nyias haiv neeg.

⁶Has cov tub: Kus Saws, Mis Khas Yees, Pus, thiab Kas Nas Has. ⁷Kus Saws cov tub: Xes Npas Has Vis Las, Xas Tas, Las Mas, Xas Tes Kas. Las Mas cov tub: Ses Npas, thiab Des Das.

⁸Kus Saws yug tau Nis Los uas nws yog thawj tus neeg kav teb chaws muaj peev xwm nyob hauv lub qab ntuj. ⁹Nws kuj yog ib tug tub tua nqaij muaj peev xwm nyob ntawm Yas Ves xub ntiag. Vim li ntawd luag thiaj piv txoj lus tias “Puav tam li Nis Los uas yog ib tug tub tua nqaij muaj peev xwm nyob ntawm Yas Ves xub ntiag.” ¹⁰Cov nroog tseem ceeb nyob hauv nws lub tuam teb chaws yog cov nroog Npas Npes, Es Les thiab As Kas uas nyob tas nrho hauv lub teb chaws Sis Nes As. ¹¹Tawm hauv lub teb chaws ntawd mus, nws mus rau As Xws thiab tsim cov nroog Nis Nis Vas, Les Hos Npos Tis, Kas Las, ¹²thiab Les Xees uas yog lub tuam ceeb, nyob nruab nrab ntawm Nis Nis Vas thiab Kas Las. ¹³Mis Khas Yees yug tau Lus Dos, As Nas Mis, Les Has Npis, Nas Fas Tus, ¹⁴Pas Rhos, Kas Xas Lus, thiab Kas Fas Tos, uas yog cov haiv neeg Fis Lis Tis lub keeb.

¹⁵Kas Nas Has yug tau Xis Doos, yog tus tub hlob, thiab Hes Tes, ¹⁶thiab cov neeg Zes Npus Xis, cov neeg As Mos, cov neeg Ntsis Nkas Sis, ¹⁷cov neeg His Vis, cov neeg As Kis Tis, cov neeg Xis Nis, ¹⁸cov neeg As Vas Dis, cov neeg Xes Mas Lis, thiab cov neeg Has Mas Tis. Tom qab no, cov haiv neeg Kas Nas Has tau tawg mus nyob ntau qhov. ¹⁹Cov neeg Kas Nas Has tus ciam teb yog txij ntawm Xis Doos ncaj rau Zes Las, mus rau Nkas Xas, thiab mus rau Xos Dos Mas, Nkos Mos Las, As Mas, Xes Npuas Yees, thiab mus txog ntua rau Les Sas. ²⁰Cov no yog Has cov tub, raws li lawv cov xeem thiab lawv cov lus, raws li lawv cov teb chaws thiab lawv cov haiv neeg.

²¹Xees kuj muaj ib cov tub thiab. Nws yog Es Npes cov tub tus yawg koob, thiab yog Zas Fes tus tij laug hlob. ²²Xees cov tub: Es Las, As Xws, As Pas Xas, Lus Dis, thiab As Las. ²³As Las cov tub: Us, Hus, Ntses Tes thiab Mas. ²⁴As Pas Xas yug tau Ses Las; Ses Las yug tau Es Npes. ²⁵Es Npes yug tau ob tug tub: thawj tug hu ua Pes Les, nws ua neej nyob rau lub caij uas ntiaj teb tawg tas. Nws tus kwv hu ua Yos Tas. ²⁶Yos Tas yug tau As Mos Das, Ses Les, Has Xas Mas Ves, Zes Las, ²⁷Has Dos Las, Us Xas, Dis Las, ²⁸Os Npas, As Npis Mas, Ses Npas, ²⁹Os Fis, Has Vis Las, thiab Zos Npas. Cov no yog Yos Tas cov tub. ³⁰Lawv lub teb chaws yog txij Mes Sas mus rau Xes Fas, yog ib lub teb chaws ua pov roob nyob sab hnub tuaj. ³¹Cov no yog Xees cov tub, raws lawv cov xeem, lawv cov lus, lawv cov teb chaws, thiab lawv cov haiv neeg.

³²Cov saum no yog Nos Hes cov tub cov tsev neeg, raws lawv caj ces, lawv haiv neeg. Neeg tawm ntawm cov haiv neeg no los mus nyob thoob hauv ntiaj teb tom qab dej nyab ntiaj teb dhau tas.

[i] Cov pov txwv no yog cov pov txwv nyob ntawm lub hiav txwv Mes Dis Tes Las Nes.