Lub caij Plaug Caug yog hais txog 40 hnub, suav txij Hnub Plaub Txais Tshauv mus txog hnub ua hmoov Hla raws li lub Koom Txoos Kav Tos Liv thiab qee cov Plos Tes Taas ua kam, yog rov nco txog yus txoj kev txhaum thiab yoo mov.
Lub ntsiab hauv caij Plaub Caug, yog li no: Ua ntej Huab Tais Yes Xus yuav leg nws Txiv txoj hauj lwm cawm ntiaj teb neeg, Huab Tais Yes Xus tau muab 40 hnub sib law los ua tej yam zoo li nram no:
1. Huab Tais Yes Xus npaj muab nws ua cov txim txi rau Tswv Ntuj kom tau txhiv tas qab ntuj neeg.
2. Huab Tais Yes Xus teev Ntuj kom tau nrog Leej Txiv tham txog nws lub luag hauj lwm zaum no.
3. Huab Tais Yes Xus yoo mov ua ib yam zeem tseeb tias tsis muaj dab tsi yuav tseem ceeb tshaj Leej Txiv Tswv Ntuj tus tsim ntuj tsim teb lawm.
Huab Tais Yes Xus 3 yam saum no muab xaus tau zoo li no: qee koj tus kheej pub rau lwm tus, teev Ntuj nrog Tswv Ntuj tham, thiab yoo nqaij yoo mov kom tau txuag yam Tswv Ntuj tsim.
Peb yam tau hais los no, yog tus qauv cia rau cov ntseeg sawv daws yoog raws nyob hauv caij Plaub Caug no, mas sawv daws thiaj yuav tig los yuav tau lub siab tshiab thiab hloov tau lawv lub neej.
Huab Tais Yes Xus tau ntuas cov thwj tim kom ua tib zoo xav txog 3 yam ntawd raws li tus Hauv Paus Xa Lus Mas Tais khaws tseg cia hauv nws phau ntawv Moo Zoo tias “Nej ceev faj, nej txhob ua ncaj nyob ntawm neeg xub ntiag xwb, kom luag qhuas nej. Thaum koj teev Ntuj, koj mus nyob twj ywm hauv koj kem txaj, kaw koj qhov rooj, ces koj teev koj Txiv uas nws nyob hauv qhov chaw nraim. Thaum nej yoo mov, nej txhob ua ntsej muag ntshaus xws li cov neeg zoo sab nraud, hos koj, mas thaum koj yoo mov, koj yuav pleev tshuaj tsw qab saum taub hau, koj ntxuav muag kom txhob muaj neeg paub tias koj yoo mov, tsuas kawg koj Txiv uas nws nyob hauv qhov chaw nraim tib leeg paub xwb (MT 6: 1, 6, 16-18).
Huab Tais Yes Xus cov lus ntuas no muab nthuav tau zoo li no:
Thaum koj pub yam koj muaj rau lwm tus neeg, koj tsis yuav qhia rau sawv daws paub tias koj tau pub rau lawv kom sawv daws qhuas koj; koj txhob xav tias koj pub rau lwm tus kom cov txiaj ntsim ntawd rov poob rau saum koj tib tug xwb; tsis yog yam koj pub ntawd, koj tau nyiag tau txeeb luag lwm tus los ces koj tu siab koj thiaj muab pub rau lwm tus mus; thiab koj txhob pub yam koj tsis yuav lawd rau lawv, koj tsum pub yam koj muaj mas thiaj yog.
Thaum koj teev Ntuj, mas koj txhob ua kom luag qhuas tias koj yog tus neeg ntseeg zoo ntseeg ruaj; koj txhob lam teev Ntuj kom tau laug lub sij hawm los yog vim luag tej hais kom koj teev; thaum koj teev Ntuj koj yuav tau qhib siab luag txais Tswv Ntuj, mloog Tswv Ntuj lo lus hais rau koj nruab siab, thiab koj yuav tau coj mus ua nyob hauv koj lub neej.
Thaum koj yoo mov yoo nqaij txhob ua niag ntshau ntshau kom lug paub tias koj tab tom coj kab ke yoo; koj yoo mov tsis yog vim koj xav txuag nyiaj txuag txiaj los yog vim koj xav tau lub cev zoo nkauj ntxim sawv daws ntsia xwb.
Nyob hauv lub caij Plaub Caug no, Tswv Ntuj xav kom peb sib thooj siab koom ntsws, sib pab sib nres, tsob hwb cov neeg txom nyem, kub siab teev Ntuj mloog Ntuj lus, tshaj lub Moo Zoo rau cov nyob ib puag ncig, thiab coj lub neej tus, ua neeg pluag hauv nruab siab.
Yog li mas thaum txog caij Plaub Caug cov neeg ntseeg hauv lub Koom Txoos yuav ua 3 yam hauj lwm li no: ua kab ke yoo, pub rau tus neeg txom nyem, thiab teev Ntuj.
1. KAB KE YOO. Kab kev yoo, yog yoog raws Huab Tais Yes Xus uas nws raug dab phem ntxias thiab nws yoo mov 40 hnub 40 hmo nyob hauv teb chaws suab puam.
Nyob hauv Ntawv Ntshiab pom tau tias kab ke yoo yog txoj hauj lwm txuam nrog kev teev Ntuj xws li thaum cov neeg ntseeg hauv As Nthias Kias teev Ntuj thiab ua kab ke yoo, ces Leej Ntuj Plig Ntshiab qhia lawv kom xa Npas Nas Npes thiab Xauv mus ua txoj hauj lwm tshaj lub Moo Zoo (HL 13L 1-3), thiab nkawd kuj tau nrog sawv daws teev Ntuj thiab yoo mov tas mas thiaj tsa ib co txwj laus (HL 14: 23). Yog li kab ke yoo thiaj yog ib txoj kev pab kom tus neeg ntawd muab siab rau teev Ntuj.
Tsis tas li ntawd xwb, thaum peb ua cov kab ke yoo mas yog peb tab tom koom nrog cov kwv tij nkauj muam lawv koom kev tshaib, yog ib txog kev khaj cai nriav kev ncaj ncees rau cov neeg raug quab yuam.
Nyob hauv lub ntuj tiam neeg no, muaj cov neeg tshaib nqhis txog 1 feem 3 ntawm tag nrho ntiaj teb neeg. Sawv daws muaj feem ua txhaum rau lub sim ceeb no yog li mas kab ke yoo thiaj yuav pab tau peb kom lees tias peb muaj feem tsim kev tshaib nqhis rau peb cov kwv tij nkauj muam lwm tus, peb tsim nyog nrog pab lawv, peb yuav tau hloov peb lub neej noj seem noj pov tseg no, peb yuav tau nrog lwm tus txuag zaub mov pub rau cov neeg tshaib tau noj kom tsau plab.
Dhau ntawm zaub mov lawm, peb yuav tau yoo txhua yam peb siab ntshaw thiab, xws li nkaub ncaws, dej cawv, kev ntxias neeg mus ua txhaum.
Kev yoo nqaij yoo mov yog ib txog kab ke qhia cov neeg ntseeg kom txawj tswj lub siab thiab lub tswv yim kom nyob tau tus.
Nyob hauv Koom Txoos Kav Tos Liv, muaj txoj cai teeb tseg tias ua ntej yuav txais Yes Xus lub Cev mas tsum yoov nqaij yoo mov li 1 teev ua ntej.
Nyob rau txheej thaud, Huab Tais Yes Xus cov thwj tim lawv coj kab ke yoo nyob hauv Hnub Plaub thiab Hnub Rau. Txog xyoo 1917 lub Koom Txoos thiaj hloov txoj cai tshiab kom tsuas yoo nqaij yoo mov nyob hauv lub caij Plaub Caug xwb.
Xyoo 1996 Vaj Qhia Paj Lug Rau tau kho txoj cai tshiab cia cov neeg ntseeg hauv lub Koom Txoos tsuas ua kab ke yoo nyob hauv txhua Hnub Rau lub lis piam, hais txog lub caij Plaub Caug mas kom sawv daws ua hauj lwm them txim.
Cov muaj hnub nyoog nce 14 xyoos yuav tau yoo nqaij, cov nto 18 xyoo rov saud yuav noj mov ib hnub ib pluag xwb nyob hauv hnub ua cov kab ke yoo.
Leej Ntshiab Aus Nkus qhia tias “Yog peb muab siab rau coj kab ke yoo tiag, peb tsum tau yoo txoj kev ua txhaum thiab”, txhais tias ua ntej yuav coj kab ke yoo nqaij yoo mov, cov neeg ntseeg tsum nrauj kev ua txhaum tso.
Neeg nyiam ua tsis nruj rau neeg, ces neeg thiaj poob rau txoj kev txhaum vim lub siab nyiam ua ywj lub tswv yim neeg thiaj poob rau txheej qis. Yog li cov neeg ntseeg thiaj yuav xyaum tswj yus lub siab kom nyiam nrhiav Tswv Ntuj mus li. Neeg yuav ua tau li ntawd, mas yog ua hauj lwm them txim thiab coj kab ke yoo.
Leej Ntshiab Aus Nkus hais tias “Tsis muaj tus twg yuav ua xyem xyav tias kev them txim thiab kab ke yoo yog qhov tsis muaj txiaj ntsim, vim tias thaum ib tug neeg twg txaus siab coj kab ke yoo, mas txhais tias nws tab tom ntshaw txog yam nws thov tiag. Yog li thiaj muaj tej lo lus hais tias “Kev teev Ntuj yuav muaj zog thaum coj kab ke yoo” (TN 12: 8) vim li ntawd, thaum peb yoo mov teev Ntuj, Tswv Ntuj thiaj yuav mloog peb lo lus thov.
Kab ke yoo lub hom phiaj yog pab tus neeg coj kab ke kom nws tswj tau nws lub siab ntshaw ua txhaum raws li Leej Ntshiab Aus Nkus hais tias “Yog peb xav yoo tiag mas peb tsum tso tseg kev ua txhaum”, yog li kev yoo thiab them txim hauv caij Plaub Caug thiaj tsum khiav kom deb txoj kev ua txhaum thiab ua siab tawv qawv tawm tsam dab phem txoj kev haub ntxias peb lub siab.
Thaum peb yoo, mas peb yuav ras ntsoov tias yog peb tab tom coj kab ke yoo kom peb tus plig zoo txhij raws li Leej Pleev tus lwj lwm, peb yoo kom tau koom nrog Leej Pleev raug txom nyem.
2. PUB RAU LWM TUS. Kev pub yog kev pab luag tej kom txhob mus ua txhaum, kom txawj sib nyiam tsis hlub thiab sib zam txhaum.
Yam yooj yim tshaj uas neeg yuav pub rau lwm tus tau, mas yog nyiaj txiag. Yog li lub Koom Txoos thiaj nqua hu sawv daws kom qee yus li nyiaj los pub ua peev rau cov neeg txom nyem nyob hauv caij Plaub Caug no. Dua li mas peb muaj peev xwm yuav pub lwm yam peb muaj rau cov tsis muaj xws li pub lub sij hawm mus saib xyuas cov neeg mob, pab tu cov neeg laus, pab txhawb siab rau tus neeg qaug zog, pab ris yus tus txij nkawm lub luag hauj lwm.
Kev pub rau lwm tus kuj yog kev ua hauj lwm nyiam luag. Leej Ntshiab Vaj Qhia Les Os tus loj tau hais tseg tias “Txhua tus Leej Ntshiab puav leej hais txog kev nyiam, kev zam txhaum, thiab kev pub rau cov neeg txom nyem.”
Kev zam txhaum yog kev sib nyiam loj tshaj, yog li Leej Ntshiab Vaj Qhia Les Os tus loj thiaj hais tias “Peb yuav tau zam txhaum rau lwm tus, mas peb thiaj yuav tau txais kev zam. Peb yuav zam rau lawv raws li peb tau nrhiav. Peb thov Ntuj pab peb kom txawj zam txhaum rau lwm tus, tsis txhob nrhiav kev sib pauj rov.”
Nws hais ntxiv tias “Txhua lub caij zoo rau peb ua hauj lwm sib nyiam, tab sis lub caij Plaub Caug yog lub caij zoo tshaj rau peb tau ua hauj lwm nyiam luag tej. Tus twg xav kom nws lub tswv yim thiab lub cev ntshiab txaus koom cav txog Leej Pleev kev Hla, mas nws yuav ua tiag ua hauj lwm sib nyiam vim kev nyiam ntim txhua yam txiaj ntsim thiab kev nyiam ntxuav tau txhua yam txhaum. Yog li ua ntej no peb thiaj yuav npaj tus kheej kom zoo txaus ua cov txim cev rau Tswv Ntuj, peb yuav ua siab dav, zoo siab txais cov neeg txom nyem thiab quaj ntsuag tuaj so hauv peb, ces lawv yuav cav txog Tswv Ntuj mus li. Peb yog neeg ntseeg, tsis muaj dab tsi yuav xis Tswv Ntuj siab tshaj qhov tias peb tau pab cov neeg txom nyem, cov pluag. Thaum peb pub rau lwm tus, txhob ntxhov siab tias kuv tsis muaj nyiaj muaj txiaj pub rau, kom peb paub tias lub siab dav yuav muaj nqis dua ib txhab nyiaj txhab kuj. Yeeb vim lub siab nthuav dav, Leej Pleev thiaj ua kom cov ncuav mov ntsu txaus pub sawv daws noj tsau.
Thaum peb pub rau cov neeg tshaib cov neeg txom nyem, mas yog peb nyiam lawv. Li ntawd, txhob cais kev pub tawm hauv kev yoo mov raws li Leej Ntshiab Tswv Qhia Pob Zeb Khis Xos Los Kos hais tias “Kab ke yoo yuav nrog kev ua hauj lwm nyiam taug tib txog kev. Kab ke yoo yuav zoo tau tsum muaj lub siab nyiam ua dej yug. Txawm tias koj rho tau lub siab phem tawm hauv koj, tab sis yog koj tsis ywg dej rau txoj hauj lwm sib nyiam kom tawg tau paj, koj kev yoo yuav muaj txiaj ntsim dab tsi tau.”
3. TEEV NTUJ. Kev teev Ntuj yog hauj lwm tseem ceeb hauv lub caij Plaub Caug vim tias ‘kev txhaum’ ua kom neeg khiav deb ntawm Tswv Ntuj, thiab rhuav Tswv Ntuj tus duab hauv neeg mus. Yog li mas kev teev Ntuj thiaj yog rov tsim kev khaub zig Tswv Ntuj dua.
Nyob hauv caij Plaub Caug, lub Koom Txoos thiaj nrhiav cov zaj nyeem pab kom tsoom ntseeg kub siab teev Ntuj thiab ruaj nreb taug Tswv Ntuj txoj kev. Li ntawd, tus neeg ntseeg thiaj yuav tau mus koom lub txoos teev Ntuj thiab txais Leej Pleev lub Cev Ntshiab; tus neeg ntseeg yuav tau mus daws txhaum kom nws tau ntxhua lub siab lub tswv yim kom ntshiab txaus chaws mus koom cav txog Leej Pleev txoj kev Hla; tus neeg ntseeg yuav muab siab rau taug Yes Xus kev txom nyem 14 theem.
Leej Ntshiab Zam Ncauj Kub tau hais tias “Thaum peb teev Ntuj, mas peb tab tom koom ua ib tug nyob hauv Tswv Ntuj, ces peb lub qhov muag yuav kaj tuaj. Thaum peb pom kev, ces peb lub siab yuav txais kev kaj, peb yuav tau pom Tswv Ntuj”, thiab nws hais ntxiv tias “Peb lub siab yuav tau dai dhuam rau Tswv Ntuj txhua lub caij, tsis yog thaum peb teev Ntuj xwb…. Peb lub siab yuav nyiam nrhiav Tswv Ntuj thiab nco ntsoov txog Tswv Ntuj mus li, mas peb thiaj yuav muaj lub siab nyiam thiab hnov qab txog Tswv Ntuj nyob hauv peb cov hauj lwm.”
Yog li no, thaum peb teev Ntuj tsis hais lub sij hawm twg, peb lub siab thiaj yuav nyob ze Tswv Ntuj thiab peb thiaj muab siab rau ua peb cov hauj lwm vim peb nyiam Tswv Ntuj.
Peb pom tias niaj hnub Huab Tais Yes Xus tsum xub teev Ntuj tso mam ua lwm yam. Ntawm peb, mas txij thaum yaus los txog niaj hnub no, peb niam peb txiv qhia thiab coj mus teev Ntuj, tej zaus zoo li lawv yuam kom peb mus, ces peb lam mus kom tas xwb. Peb txhob ua zoo li ntawd, peb yuav niaj hnub zoo siab hlo teev Ntuj xws li Huab Tais Yes Xus vim peb yog Tswv Ntuj me nyuam, peb yuav tau nrog peb Txiv sib tham txuas lus txhua hnub, mas thiaj yog.
Vim li ntawd, nyob hauv caij Plaub Caug no thiaj yog lub cib fim zoo rau peb tau rov mus cuag peb Txiv, nrog nws tham, mloog nws cov lus hais rau peb nyob hauv nruab siab thiab hauv Ntawv Ntshiab. Peb yuav mus thov txim ntawm peb Txiv, kom nws zam lub txim pub rau peb, thiab peb yuav sib zam txim ntawm peb cov kwv tij nkauj muam.
Lub ntsiab tob tob hauv caij Plaub Caug thiaj li yog lub sij hawm cia rau peb tau npaj siab thiab npaj lub neej kom ntshiab txaus chaws mus koom ua Hmoov Hla uas yog hnub Huab Tais Yes Xus sawv rov los.
Yog li mas, yus yuav coj yus tus kheej li cas nyob hauv lub Caij Plaub Caug?
1. Yuav nquag lees txhaum thiab thov kom Tswv Ntuj zam cov txhaum.
2. Yuav tig los yuav lub siab tshiab, tso kev ua txhaum pov tseg.
3. Yuav nrog cov neeg txheeb ze sib haum xeeb thiab sib fim.
4. Yuav ua neeg me thiab tsis muab hlob.
5. Yuav ua hauj lwm pab lwm tus yam tsis yuav dab tsi pauj rov qab.
6. Ua hauj lwm them txim xws li taug Yes Xus kev txom nyem 14 theem, zov Yes Xus lub Cev, hais saw Mab Liab, ua cov hauj lwm tsob hwb cov neeg txom nyem, qee yam yus muaj pub rau cov neeg tsis muaj, txw yus tsis txhob haus dej cawv luam yeeb los yog yam ua tsis zoo rau yus lub cev.
7. Saib kev npuab Tswv Ntuj yog qhov tseem ceeb tshaj, thiab nquag teev Ntuj nyob twj ywm ntsiag to, tsis txhob mus ua txhaum.
Nyob hauv caij Plaub Caug, Leej Choj yuav hnav lub tsho ‘tsos xiav’ tsom txog kev tu siab thiab thov txhaum.
Thaum ua lub txoos teev Ntuj yuav tsis hu zaj cav txog Tswv Ntuj lub koob meej tias ‘Nyob pem Ntuj, Tswv Ntuj nto meej nto moo,…’ thiab tsis hu zaj ‘As Les Lus Yas’. Cov nkauj paj nruag kuj yuav tsis hu cov nkauj lom zem.
Lub tsev teev Ntuj yuav faib ib leeg ib lub tais khaws nyiaj cia yus ntim nyiaj coj mus pub rau cov neeg pluag txom nyem. Tej tus yuav nco tias yog lub caij yus tau mus ua hauj lwm tsim koob hmoov xws li mus pab tu cov neeg mob, mus pab lwm tus ua hauj lwm.
Cov ntseeg, tej tus yuav muab siab rau teev Ntuj kom ntau dua qub, tej tus yuav tuaj teev Ntuj kom ntxov dua yav tas. Muaj tej tus npaj siab yuav txais lub Cim Ntxuav.
Cov zaj nyeem hauv Hnub Chiv lub caij Plab Caug yuav mus zoo li no: xyoo A yuav nrhiav cov zaj hais txog Cim Ntxuav, xyoo B yuav nrhiav cov zaj ntuas kom cov neeg ntseeg koom kev nrog Huab Tais Yes Xus, thiab xyoo C yuav nrhiav cov zaj hais txog kev yuav siab tshiab.
Lub Moo Zoo hauv lis piam 1 yuav yog zaj piav txog Huab Tais Yes Xus raug dab phem ntxias nyob hauv teb chaws suab puam. Zaj no qhia cov ntseeg kom pom tias Huab Tais Yes Xus yog tus txais yeej dab phem tau thiab nyob rau yav tom ntej Huab Tais Yes Xus kuj yuav tuag txhiv sawv daws hauv kev txhaum.
Lub lis piam 2 Ntawv Moo Zoo hais txog Huab Tais Yes Xus lub hwj chim tawm tuaj rau Pob Zeb, Yas Kos, thiab Zam pom nyob saum roob Tas Npos. Zaj no tsom kom pom txog Huab Tais Yes Xus lub hwj chim nws yuav tau tom qab sawv hauv cov tub tuag rov los.
Yog li thiaj yuav hais tau tias lub Moo Zoo hauv lub lis piam 1 thiab 2 thiaj pab tau kom cov ntseeg pom tias lawv yuav yeej tau dab phem kev haub ntxias, mas yog yoog raws Huab Tais Yes Xus kev txom nyem thiab tus Ntoo Cuam. Yog thaum cov ntseeg taug Huab Tais Yes Xus tus lw, mas muaj ib hnub lawv yuav tau koom Huab Tais Yes Xus lub hwj chim.
Nyob hauv lub lis piam 3-5 lub Moo Zoo yuav hais txog txoj kev coj mus cuag lub caij ua Hmoov Hla.
Xyoo A lub Moo Zoo yog cov lus nyob hauv Zam Ntawv Moo Zoo.
Lub lis piam 3 hais txog thaum Huab Tais Yes Xus nrog tus poj niam Xas Mas Lias tham (Z 4: 5-42) ces cov neeg hauv Xas Mas Lias cav tias Huab Tais Yes Xus yog tus cawm seej, yog cov dej pub txoj sia rau tus tau haus.
Nyob hauv lub lis piam 4 lub Moo Zoo hais txog Huab Tais Yes Xus kho tus neeg dig muag nruab thiab (Z 9: 1-41) tias nws maj mam qhib muag pom Huab Tais Yes Xus tus yog qab ntuj neeg qhov pom kev, nws hais lus rau Huab Tais Yes Xus xws li yog ib tug neeg, zaum ob nws hais zoo li Huab Tais Yes Xus yog tus Yaj Saub, thiab zaum peb, mas nws ntseeg tias Huab Tais Yes Xus yog Neeg Leej Tub.
Lub Moo Zoo hauv lis piam 5 yog zaj piav txog Huab Tais Yes Xus tau tsa Las Ntxas Los sawv hauv qhov tuag (Z 11: 1-45) mas Huab Tais Yes Xus hais tias “Kuv yog txoj kev sawv rov los thiab yog txoj sia, tus ntseeg txog kuv tab yog nws tuag lawm, nws yuav muaj txoj sia nyob.”
Sawv daws yuav pom tias lub Moo Zoo hauv lub xyoo A no qhia rau sawv daws to taub tias kev hloov siab tshiab yog khiav tawm hauv kev txhaum mus nrhiav Ntuj lub txiaj ntsim xws li tus neeg nrhiav dej haus cawm nws txoj sia, kev hloov siab tshiab yog tawm hauv qhov tsaus mus nyob hauv qhov kaj xws li tus dig muag rov pom kev, thiab kev hloov siab tshiab yog tawm hauv qhov tuag mus txais txoj sia tshiab nyob hauv Huab Tais Yes Xus xws li tus neeg tuag sawv rov los.
Yog vim lub Moo Zoo hauv xyoo A muaj lub ntsiab hais txog kev txais lub Cim Ntxuav, yog li thiaj yog xyoo zoo rau lub Koom Txoos tau txais cov neeg ntseeg tshiab uas lawv yuav txais Cim Ntxuav nyob hauv Hmo Hla.
Nyob hauv xyoo B yuav hais txog kev koom nrog Huab Tais Yes Xus hla tus Ntoo Cuam mus txais lub koob meej raws li lub Moo Zoo hauv Zam Ntawv Moo Zoo.
Lub lis piam 3 lub Moo Zoo yog zaj hais txog thaum Huab Tais Yes Xus mus hauv lub Tuam Tsev Teev Ntuj, nws pom cov tub luam, ces nws muab lawv ntiab tawm mus (Z 2: 13-25), lawv nug tias “Koj yuav muab lub cim dab tsi rau peb pom?”, Yes Xus teb tias “Nej rhuav lub tsev ntshiab no, peb hnub tom qab, mas kuv rov txhim tau.” Yog Huab Tais Yes Xus hais txog nws kev tuag thiab sawv rov los.
Lub lis piam 4 yog zaj tus Fas Lis Xais hu ua Nis Kos Des Mos tuaj nrog Huab Tais Yes Xus tham (Z 3: 14-21), ces Huab Tais Yes Xus hais rau nws tias “Neeg Leej Tub yuav tsum raug luag tsa nws siab xws li Mais Xes tsa tus nab nyob teb chaws suab puam, kom xwv tus ntseeg txog nws muaj txoj sia nyob mus li.” Kuj yog Huab Tais Yes Xus rov hais txog nws txoj kev tuag nyob saum tus Ntoo Cuam, kom tau hliv nws lub txiaj ntsim pub rau sawv daws thiab ua lub cim cav txog Tswv Ntuj kev nyiam ntiaj teb neeg. Thaum Leej Pleev tus Ntoo Cuam raug tsa siab thiab tsoom ntseeg yuav pe hawm Leej Pleev nyob saum tus Ntoo Cuam no tas siab tas ntsws. Peb pom qhov no tau yog nyob hauv Hnub Rau Ntshiab thiab peb yuav nco ntsoov txog thaum peb ua Ntoo Cuam lub cim.
Lub Moo Zoo hauv lub lis piam 5 yog Zam Ntawv Moo Zoo (Z 12: 20-33) hais txog thaum Huab Tais Yes Xus hais tias “Txog lub sij hawm uas Neeg Leej Tub yuav txais koob meej. Kuv hais qhov muaj tseeb tiag rau nej; yog lub noob nplej uas poob rau hauv av tsis tuag, mas nws nyob nws ua ib lub noob twm zeej. Hos yog nws tuag, mas nws txi txiv ntau.” Pom tau tias Huab Tais Yes Xus kev tuag yog kev txais lub koob meej vim nws tau tuag txhiv ntiaj teb neeg, nws coj lub txiaj ntsim tuaj rau sawv daws. Yog li cov ntseeg thiaj tso siab tau tias thaum lawv ua neej nyob hauv kev sis nyiam sis hlub, thiab sib pab mas lawv yuav txais koob haum xws li Huab Tais Yes Xus txais nws lub koob meej.
Xyoo C yog cav txog kev hloov siab tshiab tig los them txim raws li cov lus hauv Lus Kas Ntawv Moo Zoo.
Lub lis piam 3 yuav muab lub Moo Zoo hauv Lus Kas phaw ntawv (LK 13: 1-9) los twm rau sawv daws mloog, yog thaum cov neeg nug Huab Tais Yes Xus txog cov Nkas Lis Lais raug Pis Las Tos tua thiab cov raug tus pej thuam Xis Los Es vau los tsuam, ces Huab Tais Yes Xus teb rau lawv tias “Yog nej tsis xav tig dua los hloov siab tshiab, mas nej yuav tuag ib yam li ntawd thiab.” Zaj no yog Huab Tais Yes Xus ntuas peb kom muab siab rau hloov siab tshiab, muab siab rau tso kev txhaum pov tseg, tsis yog yuav niaj hnub txiav txim rau lwm tus.
Lub lis piam 4 yuav hais txog tus tub loj leeb rov los nrhiav leej txiv (LK 15: 1-3, 11-32), yog zaj paj lug qhia sawv daws tias yuav hloov siab tshiab zoo li cas, yog li nyob hauv lub caij Plaub Caug, thiaj yog lub caij cia rau sawv daws hloov siab tshiab, mas thiaj yuav rov mus cuag lub tsev ntshiab saum Ntuj Ceeb Tsheej tau. Thaum ntawd, Tswv Ntuj yuav ua rooj qav txais tos tus hloov siab tshiab vim Tswv Ntuj hais tias “Kuv tus me nyuam no tuag lawm, zaum no nws ciaj rov los; nws ploj lawm, nyem no nrhiav tau nws rov los.”
Lub lis piam 5 yuav hloov los nyeem cov lus hauv Zam Ntawv Moo Zoo (Z 8: 1-11) piav txog thaum cov Fas Lis Xais coj tus poj niam deev hluas tuaj cuag Huab Tais Yes Xus. Zaj no yuav hais txog kev zam txim nqua hu kom peb hloov siab tshiab thiab ua hauj lwm them txim raws li lo lus Huab Tais Yes Xus hais tias “Koj rov mus, txij no mus koj txhob ua txhaum ntxiv lawm mog.”