(HP 2: 7-9, 3: 1-7; LM 5: 12-19; MT 4: 1-11)

Tswv Ntuj tsim tib neeg kom nyiam qhov zoo xwb. Tab sis Tswv Ntuj cia neeg xaiv saib nws yuav mloog Tswv Ntuj lus, los yuav mloog tus phem lus. As Das thiab Es Vas nkawd xaiv mloog tus phem, ces nkawd thiaj ua txhaum rau Tswv Ntuj, txoj kev tuag thiab nkag los hauv lub ntiaj teb. Tus Hauv Paus Xa Lus Paj Lug thiaj li sau ntawv xa mus ntuas cov ntseeg nyob Los Mas tias As Das yog tus coj tas lub qab ntuj neeg mus ua txhaum thiab raug kev tuag. Tab txawm li ntawd, Tswv Ntuj hlub ntiaj teb neeg, mas Tswv Ntuj thiaj tau pub lub txiaj ntsim thiab paj tshab rau neeg; yog Yes Xus. Yes Xus yog tus rub tas ib tsoom neeg kom rov los hwm Tswv Ntuj thiab txais txoj sia nyob mus li, vim Yes Xus mloog Tswv Ntuj lus mus txog qhov tuag.

Yes Xus qhia kom peb xyaum ua peb yam:
1. Peb yuav pub tej yam rau luag.
2. Peb yuav teev Ntuj.
3. Peb yuav yoo tshaib.

Thaum Yes Xus nyob ntiaj teb nws twb xub ua peb yam ntawd tas nws sid. Nws thiaj qhia peb kom peb ua peb yam ntawd. Tus ua peb yam ntawd, nws muaj peev xwm muab nws lub siab tsis zoo tua pov tseg thiab nws txais Yes Xus txoj sia ntau zuj zus.

Lub caij Plaub Caug no koj yuav xyaum muab tej yam los pub rau luag. Koj txhob hais tias koj pluag dhau koj tsis muaj dab tsi yuav muab pub rau luag. Koj muaj me ntsis, koj faib ib feem rau luag pluag dua koj. Koj tsis muaj nyiaj, tsis muaj toob xib, mas koj muab koj lub dag lub zog los pab luag, koj muab koj lub siab koj lub ncauj los pab luag.

Koj pab luag, mas Yes Xus pub nws txoj sia rau koj thiab Yes Xus pab koj kom koj yeej koj lub siab phem. Nws pab koj kom koj yuam tau koj lub siab phem. Tab sis koj nco ntsoov Yes Xus lo lus ntuas; thaum koj pab luag, mas koj txhais tes laug txhob paub tias koj txhais tes xis ua dab tsi. Yam li txhob tshaj rau luag paub tias koj pub yam ub yam no rau lwm tus. Cia Tswv Ntuj tib leeg paub.

Lub Caij Plaub Caug no, koj xyaum ua yam ob uas Yes Xus qhia rau koj; yam li koj yuav nquag teev Ntuj. Koj teev Ntuj Hnub Chiv. Koj nrog koj tsev neeg teev Ntuj nyob hauv koj tsev. Koj tseem teev Ntuj koj tib leeg.

Koj teev Ntuj hauv koj nruab siab. Los koj hais koj cov lus rau Yes Xus, rau Leej Txiv Tswv Ntuj, rau Leej Ntuj Plig, rau Leej Ntshiab Mab Liab.

Vim koj teev Ntuj, mas Tswv Ntuj pub kom koj muaj zog tiv kev phem, koj muaj peev xwm ua cov hauj lwm hlub zeej tsoom, koj nco ntsoov luag ntxhi rau cov neeg ze koj.

Vim koj nquag teev Ntuj lub caij Plaub Caug no, mas koj txawj muab koj lub siab phem tua, koj txais Yes Xus txoj sia ntau zuj zus. Tab sis koj nco ntsoov tias koj yuav tsis txhob teev Ntuj kom luag tej qhuas tias koj teev Ntuj ntau. Luag pom tias koj teev Ntuj kuj xij peem, luag tsis pom tias koj teev Ntuj kuj xij peem, koj tsuas xav nrog Tswv Ntuj tham xwb, koj tsuas xav kom Tswv Ntuj paub tias koj teev Ntuj.

Tseem tshuav yam peb; yam li lub caij Plaub Caug no, koj xyaum yoo tshaib. Vim thaum koj xyaum yoo tshaib, mas koj txawj tswj koj lub cev thiab koj lub tswv yim zoo zuj zus. Koj txawj quab yuam koj lub siab tsis zoo, ces Yes Xus pub nws txoj sia rau koj.

Yoo tshaib yog ua zoo li cas?

Yuav tsum noj mov kom yus muaj zog ua num los yug yus tsev neeg, muaj zog ua cov hauj lwm luag tos kom yus ua. Tab sis muaj ntau txoj kev yoo tshaib, koj yoo luam yeeb kuj tau, koj yoo cawv kuj tau, koj yoo tej yam qab uas koj xis, tab sis yog tej yam tsis tshua muab qab hau los yug koj lub cev. Los koj yoo kev ua si me ntsis. Koj yoo tsis ntsia lub tshaj xyam, koj yoo tsis mloog tej yam dog dig tsis muaj tsim dab tsi nyob hauv lub tshaj xov.

Koj yoo tshaib, mas koj nco txog Tswv Ntuj ntau dua, koj xyaum tswj koj lub cev, xyaum tswj koj qhov muag, xyaum tswj koj pob ntseg, ces koj txawj ua tswv kav koj lub neej zoo dua. Tswv Ntuj pom koj xyaum yoo tshaib mas nws pub nws tej paj tshab rau koj.

Koj rau siab ua li ntawd lub caij Plaub Caug no, ces thaum ua lub Hnub Nyoog Hla, mas koj txais Yes Xus txoj sia lawm ntau. Tab sis thaum koj yoo tshaib mas koj txhob khav rau zeej tsoom hnov tias koj yoo tshaib. Koj tsuas cia Tswv Ntuj tib leeg paub.