(LV 19: 1-2, 11-18; MT 25: 31-46)

Lub lis piam no yog thawj lis piam hauv caij Plaub Caug. Lub caij Plaub Caug yog lub caij cia rau peb sawv daws tau tsim koob hmoov cia nyob hauv lub ntiaj teb no, mas txog hnub ntiaj teb kawg ntawm peb, peb thiaj yuav tau mus nyob pem Ntuj Ceeb Tsheej.

Hnub no Huab Tais Yes Xus qhia peb tias thaum peb tus plig tso lub cev no tseg lawd, peb yuav tau mus pom Huab Tais Yes Xus nyob ntawm lub rooj txiav txim. Huab Tais Yes Xus yuav tshuaj xwm txog peb lub neej thaum muaj sia nyob, saib peb puas tau tsim koob hmoov tseg los tsis tau. Tus neeg twg tsim koob hmoov tseg cia mas nws yuav mus nyob pem Ntuj, tus neeg twg tsis tau tsim koob hmoov mas nws yuav poob rau hauv dab phem cov hluav taws.

Peb yuav tsim koob hmoov rau peb tau li cas?

Lo lus ‘tsim koob hmoov’ hauv txoj kev ntseeg, yog hais txog ‘kev nyiam thiab hlub lwm tus’ thaum yus tseem muaj txoj sia nyob. Huab Tais Yes Xus hais tias cov neeg tsim koob hmoov, mas lawv yog cov tau ua li no “Kuv tshaib plab, nej pub rau kuv noj; kuv nqhis dej, nej pub rau kuv haus; kuv yog ib tug qhua, nej txais kuv; kuv liab qab, nej muab rau kuv hnav; kuv raug kaw hauv tsev nkuaj tsev loj fab, nej tuaj tsham kuv.”

Lo lus Huab Tais Yes Xus hais txog, mas yog thaum peb pom lwm tus txom nyem, ces peb lub siab hlub tus neeg ntawd, peb thiaj ua cov hauj lwm los nyiam tus neeg txom nyem ntawd. Huab Tais Yes Xus xav kom peb to taub, mas nws thiaj hais tias “Thaum nej pom ib tus neeg twg tshaib plab, nej hlub nws ces nej cev mov rau nws noj. Thaum nej pom ib tug neeg txom txom nyem tsis muaj zoo khaub ncaws hnav, nej lub siab hlub nws ces nej pub khaub ncaws zoo rau nws hnav. Thaum nej pom ib tug neeg raug mob ces nej hlub nws, nej mus xyuas mus pab tu nws. Thaum nej ua li no mas yog nej nyiam tus neeg ntawd, yog nej tab tom nyiam kuv.” Thaum peb ua li no, mas yog peb tsim koob hmoov tseg, ces Huab Tais Yes Xus yuav hais rau peb tias “Nej yog cov kuv Txiv pub txoj hmoov zoo rau.”

Lub caij Plaub Caug no, peb yuav rov tig los soj ntsuam peb, saib peb puas tau ua zoo li Huab Tais Yes Xus cov lus ntawd; peb puas tau hlub thiab puas tau nyiam lwm tus uas txom nyem dua peb, pluag dua peb, raug kev iab hiam dua peb.

Peb ntsia puas pom cov neeg txom nyem, cov pluag, cov raug iab hiam ntawd?

Peb pheej xav ntsoov tias “Puas yuav muaj tus txom nyem dua kuv, los yog pluag dua kuv; kawg kuv xwb thiaj txom nyem thiab pluag pluag, vim tias niaj hnub no kuv twb tsis muaj noj tsis muaj hnav, kuv twb tsis tau ib daig tawv zoo los sia!” Yog peb tseem niaj hnub xav li no, pom zoo li no, mas nyob hauv lub caij Plaub Caug no, peb yuav nquag teev Ntuj thiab thov Ntuj, kom Tswv Ntuj qhib peb lub tswv yim thiab lub siab, kom peb ntsia pom tus neeg txom nyem dua peb, kom peb pom tias tseem muaj cov pluag pluag tsis muaj noj muaj haus tshaj peb, kom peb pom tias tsis yog peb xwb thiaj yog tus raug iab hiam, tseem tshuav ntau txhiab leej nyob hauv kev quaj ntsuag, lawv tos ntsoov kev nyiam kev hlub ntawm peb.