(HX 55: 10-11; MT 6: 7-15)

Ib yam hauj lwm them txim txhaum hauv lub caij Plaub Caug, yog ‘teev Ntuj tsis tseg’. Hnub no Huab Tais Yes Xus ntuas peb tias thaum peb teev Ntuj, peb txhob ua xws li cov neeg tsis tau ntseeg, txhob hais lus ntau ntau los yuam Huab Tais Tswv Ntuj kom ua kiag raws li peb lub siab ntshaw.

Yog peb saib txog peb Hmoob lub neej, peb yuav pom tias yav thaud peb tseem coj kev cai dab qhuas, thaum peb teev dab, mas peb yuav fiv ntuj fiv teb, fiv dab vaj dab tsev, dab toj roob hauv pes txhua yam kom tau raws li siab ntshaw, ces peb yuav pauj rau, los tej zaus mas peb ntaus kuam yuam kom dab yuav raws li peb lub siab xav, peb ntuas mus mus los los kom dab yeem, ces peb thiaj yuav zoo siab.

Tab sis thaum peb tig los ntseeg Ntuj, mas peb yuav mloog Huab Tais Yes Xus lo lus hais. Huab Tais Yes Xus ntuas kom peb tsis txhob ua zoo li tav thaud lawm, peb txhob yuam Tswv Ntuj, tab sis peb yuav thov Tswv Ntuj rau lwm tus, peb thov kom muaj tuaj raws li Tswv Ntuj lub siab nyiam.

Huab Tais Yes Xus hais tias “Nej Txiv paub tias qhov twg yog qhov nej yuav tsum muaj, tab yog nej tseem tsis tau thov, nej Txiv twb xub paub lawm.” Yog li thaum peb teev Ntuj, peb thiaj yuav ua zoo li ib tug tub mloog mloog lus, yuav cuab ntsej zoo mloog saib Tswv Ntuj uas yog peb Txiv yuav hais dab tsi rau peb, peb yuav tso siab tias Tswv Ntuj yog peb Txiv, mas nws yuav muab yam zoo tshaj rau peb, tsuav yog peb ua siab ntev tos.

Tswv Ntuj yog peb Txiv, nws hlub peb txhua tus, yog li ua ntej Tswv Ntuj yuav pub raws li peb thov, mas Tswv Ntuj xav kom peb ua siab dav thiab huv txaus, peb yuav tau rho qhov phem tawm hauv peb siab tso.

Peb yuav rho qhov phem tawm hauv peb tau, mas yog kom peb nyiam lwm tus, kom peb zam rau cov neeg ua tsis zoo rau peb, rau peb tus yeeb ncuab.

Huab Tais Yes Xus qhia tias peb yuav hais rau Huab Tais Tswv Ntuj tias “Txiv, peb thov kom muaj raws li koj nyiam nyob ntiaj teb no li nyob saum ntuj”, mas yog peb tab tom thov kev thaj yeeb rau lub ntiaj teb, kom tas sawv daws txawj mloog Tswv Ntuj Lo Lus, kom peb ib tug txawj zam rau lwm tus, kom kuv paub zam txim rau koj, koj los paub zam txim rau kuv; kom peb sawv daws muaj kev sib haum xeeb.

Lub caij Plaub Caug no, thov kom peb sawv daws muab siab rau teev Ntuj thiab thov Huab Tais Tswv Ntuj tus yog peb Txiv pub kev thaj yeeb rau peb sawv daws, kom peb sib pab hloov tau lub ntiaj teb no kom zoo li Tswv Ntuj lub Ceeb Tsheej; yog lub Ceeb Tsheej thaj yeeb, sawv daws nyob kaj siab lug mus li hauv kev sis nyiam sis hlub.