(HX 58: 1-9; MT 9: 14-15)

Zam Ntxuav Plig cov thwj tim tuaj nug Huab Tais Yes Xus txog kab ke yoo mov. Lawv nug tias ua cas Huab Tais Yes Xus cov thwj tim tsis coj cov kab ke yoo ib yam li lawv thiab cov Fas Lis Xais.

Kab ke yoo mov yog dab tsi?

Yog ib txoj kab ke cov Yus Das coj nyob hauv lub caij them txim txhaum. Ib xyoos twg, mas cov Yus Das yuav ua kab ke yoo mov li 6 hnub sib law; tshwj xeeb mas yog cov coj txoj cai nruj xws li cov Fas Lis Xais thiab cov Txiv Twj Cuab. 

Zam Ntxuav Plig yog Txiv Twj Cuab, ces nws cov thwj tim thiaj ua raws txoj cai nruj. Lawv xav tias Huab Tais Yes Xus kuj yuav coj nruj li lawv, ces lawv thiaj tuaj nug saib ua cas Huab Tais Yes Xus thiab nws cov thwj tim tsis ua li lawv.

Cov Yus Das muaj ib txoj kab ke tias Hnub Chiv tom qab rooj tshoob yog lub sij hawm nkauj nyab nraug vauv yuav ua ntees lom zem xyiv fab nrog cov phooj ywg, lawv yuav tsis yoo mov raws txoj cai. Li ntawd, Huab Tais Yes Xus thiaj ua paj lug hais tias nws yog tus nraug vauv, hos cov thwj tim yog nraug vauv cov phooj ywg. Lub zim txwv ntawd yog lub caij ua tshoob, lawv tab tom ua ntees lom zem vim Huab Tais Yes Xus tseem nrog lawv nyob, tab sis hnub Huab Tais Yes Xus ncaim lawv mus lawm, lawv mam yoo mov raws txoj cai. Huab Tais Yes Xus thiaj li teb lawv tias “Thaum lub caij nej ua tshoob, nej puas ua kab ke yoo mov los tsis ua, nej yeej tsis ua. Thaum kuv tseem nrog kuv cov thwj tim nyob, mas lawv kuj yuav tsis yoo mov. Tab sis muaj ib hnub twg kuv tsis nrog lawv nyob, mas lawv yuav yoo mov.”

Nyob hauv tus Yaj Saub His Xais phau ntawv, nws hais txog cov Yus Das kev yoov mov tau tshab plaws li no: Huab Tais Tswv Ntuj hais li no “Hnub uas nej yoo mov, nej leg nej tes dej num, nej yuam nej cov tub zog. Hnub yoo mov nej pheej sib cav sib ceg, siv zog xuas nrig sib ntaus. Nej tej kev yoo mov hnub ntawd, tsis zoo ua kom nej lub suab nrov nyob saum ntuj. Hnub uas tus neeg yuam nws tus plig puas yog txoj kev yoo mov uas kuv nyiam? Koj ua taub hau qaij das xws li ib tug tauj, tso cev pw saum ntaub tsaj thiab plua tshauv, puas yog qhov tias koj hu ua yoo mov, hu ua ib hnub uas Huab Tais Tswv Ntuj nyiam?” Huab Tais Tswv Ntuj cov lus ceeb toom yog cov no; yoo mov raws li kuv nyiam, yog daws cov saw hlau tsis ncaj, tso cov neeg raug luag hiam kom rov nyob twj lij, muab cov quab lov tas huv si. Yog koj muab koj cov mov los faib rau tus neeg tshaib noj, yog koj cheem cov txom nyem tsis muaj chaw nkaum kom lawv nyob hauv koj tsev, yog koj muab ris tsho rau tus koj pom liab qab hnav, yog koj tsis tig nraub qaum rau tus muaj lub cev nqaij zoo li koj.

Yog li mas thaum peb yoov mov los yog ua kab ke yoo tshaib nyob hauv lub caij Plaub Caug, mas peb tsum yoo hauv nruab siab tuaj, peb yoo mov kom txhob poob hauv txoj kev ua phem, peb yoo mov kom tau pub rau tus neeg txom nyem. Tsis yog peb yoo kom tau txuag nyiaj cia ua ib pluag loj noj tom qab, tsis yog yoo kom tau txuag nyiaj rau ua lwm yam los daws lub siab ntshaw, tsis yog yoo kom tau lub cev ntaj ntsug zoo saib zoo ntsia.

Peb yoo peb lub siab ntshaw, peb pub qov peb muaj rau tus tsis muaj; peb yoo peb lub siab npau taws, peb hais lus luag ntxhi rau sawv daws; peb yoo lub siab ntxub, peb tig los hlub peb tus yeeb ncuab.