(TCO 30: 15-20; LK 9: 22-25)

Caij Plaub Caug zoo rau peb muab siab rau mloog Tswv Ntuj Lo Lus vim tias Tswv Ntuj Lo Lus muaj zog yaug tau peb siab ntsws kom rov ntshiab tuaj, Tswv Ntuj Lo Lus nkag mus tau hauv peb cov paj hlwb txha thiab hauv peb cov ntshav, ces yuav ntws mus yug tas peb lub cev. Peb yim mloog ntau, yim pab tau peb kom npuab Tswv Ntuj. 

Hnub no Huab Tais Yes Xus hais li no “Neeg Leej Tub yuav tsum raug txom nyem loj. Cov txwj laus, cov Thawj Leej Choj, thiab cov Kws Ntawv Ntshiab yuav muab nws xyeeb pov tseg. Nws yuav raug luag tua, tab sis hnub peb nws yuav sawv rov los.” Cov lus no Huab Tais Yes Xus hais tom qab zeej tsoom sib cav tias Yes Xus yog leej twg, ces Huab Tais Yes Xus thiaj li nug cov thwj tim saib ntawm lawv, mas lawv xav tias nws yog leej twg. Pob Zeb teb tias raws li nws pom thiab xav, mas Huab Tais Yes Xus yog Tswv Ntuj tus Pleev.

Huab Tais Yes Xus pom tias Pob Zeb hais tau yog lawm, tab sis Huab Tais Yes Xus kuj paub tias Tswv Ntuj tus Pleev raws li Pob Zeb thiab cov Yus Das sawv daws xav, mas txawv tus Pleev uas Tswv Ntuj xa tuaj. Cov Yus Das xav tias tus Pleev yog tus yuav sawv los ua cov His Xas Lais tus vaj kav tas lub teb chaws Pas Les Tis Nas, yuav coj cov Yus Das sawv los ntiab cov Los Mas rov qab. Huab Tais Yes Xus ua tus Pleev tsis zoo li ntawd, Huab Tais tsis yog yuav ua cov His Xas Lais tus vaj tab sis nws yuav ua sawv daws tus tub txib, nws tsis yog yuav caum cov Los Mas tawm mus tab sis nws yuav coj kev haum xeeb tuaj rau sawv daws, nws tsis yog yuav coj cov His Xas Lais txais kev twj lij xwb tab sis nws yuav npo tas lub qab ntuj neeg ntawm kev ua txhaum qhev.

Huab Tais Yes Xus tsis yog mus txais lub mom teev kub ua vaj, tsis yog mus zaum lub theej kiab ua vaj nyob Yes Lus Xas Les. Qhov Huab Tais Yes Xus yuav mus txais yog lub kauj pos, yog tus Ntoo Cuam. Huab Tais Yes Xus mus hauv Yes Lus Xas Les, tsis yog kom sawv daws cav nws lub koob meej ua vaj, tab sis nws mus txais sawv daws cov lus hiam.

Vim li ntawd, Huab Tais Yes Xus thiaj qhia rau cov thwj tim tias nws kev ua vaj yog zoo li cas.

Huab Tais Yes Xus hais ntxiv tias “Leej twg xav los raws kuv, nws yuav tsis txhob nco txog nws, nws yuav niaj hnub kwv nws tus ntoo cuam thiab lawv kuv qab.”

Ua cas peb yuav tsum tsis txhob nco txog peb?

Huab Tais Yes Xus teb tias “Vim tus nco txog nws, mas nws tsuas xav qhov yuav ua li cas kom nws muaj txoj sia nyob ntxiv; hos tus tsis nco txog nws tus kheej, mas nws tsis nco txog nws txoj sia, ces nws pom kev nyiam kev hlub luag loj dua; nws pab lawv, txawm nws plam txoj sia, los nws yuav tau txais ib txog sia tshiab nyob mus li. Txoj sia tshiab no zoo dua txoj sia qub, txoj sia tshiab no muaj nqis dua txhua tsav yam.

Huab Tais Yes Xus pub 2 txog kev rau peb. Huab Tais Yes Xus hais tias “Tus twg khuv xim nws txoj sia, nws yuav tuag; tus twg yeem tuag vim nws ntseeg txog Yes Xus, mas nws yuav txuag tau nws txoj sia.” Txhais tias tus neeg twg xaiv txoj sia nyob mus li, mas nws yuav raws nraim Huab Tais Yes Xus qab, nws yuav nrauj tus kheej thiab zoo siab ris nws tus ntoo cuam lawv Huab Tais Yes Xus qab.

Yog peb ua tiag nyiaj taus kev txom nyem, tiv taus dab phem txoj kev haub ntxias, mas peb yim muaj zog tuaj, ces yuav tsis muaj dab tsi khuam tau peb ntxiv nyob hauv txoj kev raws Huab Tais Yes Xus. Thaum ntawd, peb lub siab yuav kaj lug, thiab tau saj Tswv Ntuj kev xyiv fab mus li.

Huab Tais Tswv Ntuj txhib Mais Xes kom qhia rau cov His Xas Lais tias yog lawv mloog Tswv Ntuj cov lus qhia, lawv nyiam Tswv Ntuj, lawv taug Tswv Ntuj txoj kev ua neej, thiab ua raws li Tswv Ntuj cov lus qhia, mas lawv yuav muaj txoj sia thiab huam vam. Tom qab no Tswv Ntuj xa Tswv Ntuj Lo Lus tuaj xeeb ua neeg; yog Huab Tais Yes Xus. Li ntawd, niaj hnub peb yuav mloog thiab ua raws li Huab Tais Yes Xus cov lus qhia peb.

Hnub no peb yuav tau khaws Huab Tais Yes Xus lo lus no cog rau hauv peb nruab siab “Leej twg xav los raws kuv, nws yuav tsis txhob nco txog nws, nws yuav niaj hnub kwv nws tus ntoo cuam thiab lawv kuv qab” (LK 9: 23).