(YE 2: 12-18; 1KLN 5: 20-6: 2; MT 6: 1-6, 16-18)

Hnub no yog Hnub Plaub Txais Tshauv; yog hnub qhib lub caij Plaub Caug. Ib tsam tsaus ntuj peb yuav tau mus koom lub Txoos Teev Ntuj, ces tus Leej Choj yuav muab cov tshauv los ua Ntoo Cuam lub Cim rau ntawm peb hauv pliaj thiab hais tias “Koj hloov siab tshiab, koj ntseeg txog lub Moo Zoo mog.” Qhov no yog lub cim qhia tias peb tu siab rau peb cov txhaum, ces peb yuav them txim txhaum.

Txij hmo ntawd mus 40 hnub sib law, peb yuav ua cov hauj lwm them txim kom tau ntxuav peb lub siab thiab tus plig kom ntshiab txaus txais Huab Tais Yes Xus tuaj nyob hauv peb.

Hnub no, peb hnov Yaj Saub Yos Es hais tias Huab Tais Tswv Ntuj hais ib co lus zoo li no tias “Nyem no, nej rau siab rov qab los cuag kuv. Nej yoo tshaib, nej quaj, nej nyiav zoo li cov ntoo xyom. Nej tsis txhob ua nej tej tsho ntuag. Nej yuav ua nej lub siab ntuag thiaj yog. Nej rov qab los cuag nej tus Huab Tais Tswv Ntuj.” Thiab tseem hnov tus Hauv Paus Xa Lus Paj Lug sau ntawv mus ntuas cov ntseeg nyob Kos Lis Nthos tias “Peb yog cov uas Tswv Ntuj xa mus ua Leej Pleev cov tiam lis. Peb tuav txog Leej Pleev lub npe thov nej tas zog, kom nej cia li nrog Tswv Ntuj rov sib haum xeeb.

Lub Koom Txoos qhia peb tias nyob hauv caij Plaub Caug, peb yuav ua 3 txoj hauj lwm los them txim li no:
1. Pub rau lwm tus; yog lub cim tias tus pub ntawd nws muab txoj kev nyiam lwm tus saib loj dua nws lub cuab tam, nws txiav siab tsis muab nws khi rau ntiaj teb lub cuab tam. 
2. Teev Ntuj; yog lub cim tias tus ntawd fim Tswv Ntuj. Tus twg teev Ntuj ntau, mas tu twg yim nrog Tswv Ntuj sib fim. 40 hnub no thiaj zoo caij rau peb teev Ntuj kom ntau; yam li hais lus ua Tswv Ntuj tsaug, thov txhaum ntawm Tswv Ntuj, thov Tswv Ntuj pub txiaj ntsim paj tshab rau yus kom rov haum xeeb nrog Tswv Ntuj thiab ntiaj teb neeg. 
3. Yoo tshaib; yog nqhis kev nyiam Tswv Ntuj thiab nyiam ib zeej tsoom ntau dua nqhis tej yam noj yug lub cev kom tsau, yug lub siab kom txhob nqhis. Tsis li ntawd xwb, tseem yog tso tus cwj pwm tsis zoo, tso lo lus phem, tso lub tswv yim qias pov tseg thiab.

Tag nrho 3 yam li hais los saum no, Huab Tais Yes Xus hais tias txhob ua kom tau ntsej muag, tau lus qhuas, tau txiaj ntsim ntawm luag tej. Huab Tais Yes Xus hais zoo li no “Thaum koj pub rau luag, koj txhob tshuab hom ua koj ntej, koj txhob cia koj sab tes laug paub qhov sab tes xis ua. Thaum koj teev Ntuj, koj txhob tab meeg teev Ntuj kom luag pom, tab sis koj teev Ntuj nyob twj ywm hauv koj kem txaj. Thaum koj yoo tshaib mas koj txhob ua ntsej muag ntshaus ntshaus kom muaj neeg paub tias koj tab tom yoo.”

Txawm tias peb yog av luaj, tsis kav peb muaj nqes rau Tswv Ntuj tshaj, yog li peb yuav tau xyaum coj tus yam ntxwv thiab ua cov hauj lwm zoo xws li Tswv Ntuj tau qhia peb nyob hauv Ntawv Ntshiab, raws li lub Koom Txoos tau qhia rau peb, peb yuav niaj hnub mloog saib Huab Tais Yes Xus qhia peb ua lub neej zoo li cas.