Leej Ntshiab Vaj Qhia Zam yug nyob Xis As Nas hauv Is Tas Lias teb. Thaum nws tseem ua Vaj Qhia tus Tub Tsob Hwb, nws muab siab ib rau tus Vaj Qhia Cuav Laus Les Tis Yus (Antipope Laurentius). Tab sis tom qab nws tu siab, ces nws thov Vaj Qhia Xis Mas Kus (Pope Symmachus) kom zam txhaum rau nws.

Xyoo 523 nws ua Vaj Qhia nyob Los Mas. Tus vaj Os Thos Nkaus hu ua Thes Os Dos (the Ostrogoth King Theoderic) nyiam As Lis Yus zaj tswv yim, ces nws xav kom tus vaj Yus Tis Nus nyob Koos Taas Tis Nos Pos Lis rhuav txoj cai tsis pub ntseeg As Lis Yus zaj tswv yim. Tus vaj Os Thos Nkaus thiaj li tsa Vaj Qhia ua tiam lis mus cuag tus vaj Yus Tis Nus. Tus vaj hais rau Vaj Qhia tias yog nws ntuas Yus Tis Nus tsis tau, mas tus vaj yuav tso lus rau tseem hwv hiam cov ntseeg txog Yes Xus. Yog li mas Vaj Qhia Zam thiaj ua ib siab mus raws li tus vaj txib.  

Vaj Qhia Zam lawv mus txog lub tsheej Koos Taas Tis Nos Pos Lis, mas tus vaj Yus Tis Nus zoo siab txais lawv. Vaj Qhia tsis hais kom Yus Tis Nus rhuav txoj cai, nws tsuas thov tus vaj Yus Tis Nus kom tsis txhob ua phem rau cov As Lis Yus xwb. Tus vaj Yus Tis Nus cog lus tias nws yuav mloog Vaj Qhia cov lus.

Vaj Qhia Zam thiab cov phooj ywg rov qab los rau Is Tas Lias teb. Thaum ntawd, tus vaj Thes Os Dos lub tsheej yog nyob Las Vees Nas, ces Vaj Qhia Zam thiaj mus cuag tus vaj hauv lub tsheej. Thes Os Dos hnov tias Vaj Qhia Zam tsis hais kom Yus Tis Nus rhuav txoj cai, ces nws npau taws heev. Thes Os Dos cia li ntes Vaj Qhia Zam kaw hauv tsev loj faj. Ib txwm Vaj Qhia Zam yog neeg muaj mob, thaum nws raug kaw hauv tsev loj faj li ntawd, nws lub zog yim ntaug, ces xyoo 526 Vaj Qhia Zam thiaj li tuag nyob hauv tsev loj faj. Cov ntseeg mam li thauj Vaj Qhia Zam lub cev los zwm ntxa nyob Los Mas.

Vaj Qhia Zam yog ib tug Vaj Qhia siab loj thiab ua tim khawv txog qhov tseeb tias Huab Tais Yes Xus yog tseem Tswv Ntuj thiab tseem tib neeg, nws tsis yeem yuav tus vaj Thes Os Dos zaj tswv yim kom Yus Tis Nus tso lus rau tsoom pej xeem ntseeg yuam kev ntxiv mus. Li ntawd, lub Koom Txoos thiaj saib Vaj Qhia Zam yog Koom Txoos ib tug Leej Ntshiab.

Nyob hauv peb lub neej, muaj ntaus zaus lub ntiaj teb ntxias peb kom muab peb txoj kev ntseeg txo nqi me ntsis, mas peb thiab lub ntiaj teb thiaj li nyob tau thaj yeeb; peb txhob poob rau txoj kev ntxias ntawd xws li hnub no Leej Ntshiab Vaj Qhia Zam tau qhia peb nyob hauv nws lub neej. Peb yuav muab Leej Ntshiab Vaj Qhia Zam ua chaw thiab peb kom muaj cuab kav tiv kev haub kev ntxias, peb yuav muab tas peb txoj sia los ua tim khawv txog qhov tseeb zoo li Leej Ntshiab Vaj Qhia Zam.