Xyoo 299 tus vaj Dias Les Xias Nus (Diocletian) rov pib hiam cov neeg ntseeg, nws yuam cov tseem hwv ntseeg txog Yes Xus kom txi cov dab Los Mas. Xyoo 303 Dias Les Xias Nus rhuav cov tsev teev Ntuj, hlawv cov Ntawv Ntshiab, thiab muab cov neeg ntseeg tsis yeem txi cov dab Los Mas tua pov tseg. Nyob hauv cov neeg raug tua ntawd muaj ib tug yog Pas Nkhas, nws muaj 14 xyoos.

 Pas Nkhas yug nyob Fis Zias (Phrygia) hauv As Xias teb (Asia Minor). Pas Nkhas niam tuag thaum yug nws, nws txiv tuag thaum nws muaj 8 xyoo. Pas Nkhas txiv hlob Daws Nis (Denis) tuaj tos nws mus nyob hauv lub tsheej Los Mas. Nkawd tig los ntseeg txog Yes Xus.

Thaum Dias Les Xias Nus tso cai rau tseem hwv hiam cov neeg ntseeg, Pas Nkhas raug ntes. Lawv ntxias Pas Nkhas kom thim kev ntseeg thiab cev cov txim txi cov dab Los Mas, tab sis Pas Nkhas tsis yuav lawv cov lus ntxias. Tus vaj Dias Les Xias Nus hais rau Pas Nkhas tias yog nws hlawv xyab txi cov dab Los Mas, mas tus vaj yuav pub nyiaj rau nws. Pas Nkhas teb tus vaj tias “Txawm kuv lub cev yog ib tug me nyuam yaus, tsis kav kuv lub siab yog ib tug laus. Vim kuv muaj Huab Tais Yes Xus, mas koj cov lus ntxias tsis ua kom kuv ua xyem xyav.” Tus vaj hnov cov lus ntawd, nws npau taws, mas nws thiaj li kom luag coj Pas Nkhas mus txiav caj dab.