(MT 11: 25-27)
Lub Moo Zoo hnub no yog hais txog tom qab Huab Tais Yes Xus xa cov Hauv Paus Xa Lus mus tshaj lub Moo Zoo tas, lawv los hais qhia rau Huab Tais Yes Xus txog cov hauj lwm lawv mus ua. Cov Hauv Paus Xa Lus hais tias lawv ua raws li Huab Tais Yes Xus txib lawv, mas lawv ua hauj lwm mus tau raws li Huab Tais Yes Xus hais tiag, lawv muaj peev xwm tshaj tau lub Moo Zoo, lawv muaj peev xwm qhia lub Moo Zoo, thab lawv ua tau hwj huam kho cov neeg mob. Peb rab peev xwm no yog cov txiaj ntsim Tswv Ntuj pub rau tus neeg tsis muab hlob thiab tuav txog Huab Tais Yes Xus lub npe los ua hauj lwm.
Huab Tais Yes Xus pom tias cov Hauv Paus Xa Lus tau txais peb rab peev xwm ntawd, mas nws zoo siab, ces Huab Tais Yes Xus thiaj cav txog Tswv Ntuj tias “Txiv, kuv cav lus zoo txog koj, vim koj zais tej yam ntawd rau cov neeg thoob tsib thiab cov neeg ntse, koj ho qhib rau cov me nyuam yaus.”
Kwv tij Hmoob, peb yuav ua cov neeg me ib yam li cov Hauv Paus Xa Lus, mas peb thiaj yuav tau txais Tswv Ntuj cov txiaj ntsim thiab peb kuj yuav cav txog Tswv Ntuj kom tau ua Tswv Ntuj tsaug thiab nrog Tswv Ntuj sib fim.
