(MT 11: 20-24)
Kwv tij Hmoob, hnub no peb hnov Huab Tais Yes Xus hais ib cov lus tsawm cov nroog tau hnov tau pom Huab Tais Yes Xus ua hwj huam tab sis lawv tsis tig los yuav siab tshiab. Cov nroog peb tau hnov Huab Tais Yes Xus tsawm yog Kos Las Ntxis, Npes Xais Das, thiab Kas Fas Naus. Peb lub nroog no nyob ncig lub pas dej Nkas Lis Lais, yog thaj tsam Huab Tais Yes Xus tshaj lub Moo Zoo txog Tswv Ntuj lub Ceeb Tsheej ntau tshaj plaws. Huab Tais Yes Xus kho lawv cov neeg mob kom zoo, Huab Tais Yes Xus qhia lawv tsis tseg kom los ua nws cov thwj tim. Cov neeg nyob hauv 3 lub nroog no vam txog Huab Tais Yes Xus kho lawv cov neeg mob, vam txog Huab Tais Yes Xus ua mov ntsu tuaj rau lawv tau noj tsau plab, tab sis txog qhov kawg lawv tau raws li lawv ntshaw, ces lawv tso Huab Tais Yes Xus pov tseg.
Niaj hnub no 3 lub nroog no puas ntsoog kob huam tas raws li Huab Tais Yes Xus tau tsawm tiag.
Kwv tij, peb muab piv rau peb lub neej, muaj ntau zaus peb zoo li cov neeg nyob hauv 3 lub nroog no, peb vam txog Huab Tais Yes Xus tsuas yog thaum peb ntsib kev txom nyem. Thaum peb noj qab nyob zoo, mas peb tso Huab Tais Yes Xus pov tseg. Muaj ntau zaus Huab Tais Yes Xus hais lus rau peb tsis tseg, tsis kav peb tsis quav ntsej mloog Huab Tais Yes Xus lo lus. Muaj ntau zaus peb pom Huab Tais Yes Xus nyob hauv cov neeg pluag txom nyem ib ncig peb, los peb tsis qhib siab hlub lawv li.
Ceev faj mog, tsam txog qhov kawg peb zoo li 3 lub nroog Huab Tais Yes Xus tsawm no.
Txhob cia Huab Tais Yes Xus cov lus ua lus hem kom peb ntshai, tab sis muab Huab Tais Yes Xus cov lus ua lus ntuas kom peb rau siab tig los yuav siab tshiab.
