(MT 10: 34-11: 1)
Kwv tij Hmoob sawv daws, thaum peb hnov Huab Tais Yes Xus cov lus hauv hnub no, qhov ua ntej tshaj peb xav tau yog qhov tias cov neeg ntseeg txog Huab Tais Yes Xus yuav tsum ua yeeb ncuab nrog cov neeg xav tsis xws li peb; los yuav xav tias cov neeg ntseeg txog Huab Tais Yes Xus, lawv yuav tsis tas hwm niam hwm txiv, hlub me tub me nyuam, haum xeeb nrog kwv tij neej tsa.
Yog peb xav li ntawd, ntshai peb yuam kev ntawm Huab Tais Yes Xus cov lus qhia lawm deb. Vim Huab Tais Yes Xus qhia kom peb sib nyiam sib hlub, tsis txhob muab txim rau luag.
Tab sis cov lus peb hnov hauv hnub no, yog Huab Tais Yes Xus ntuas cov Hauv Paus Xa Lus uas nws tab tom yuav xa lawv mus tshaj lub Moo Zoo rau zej zog. Huab Tais Yes Xus ntuas lawv kom ras ntsoov tias lawv tsis txhob muab dab tsi los ua chaw theem lawv cia kom tsis txhob tau kev tshaj lub Moo Zoo, tsis tau kev raws Huab Tais Yes Xus. Tab txawm tias qhov lawv xaiv raws Huab Tais Yes Xus ntawd yuav ua rau lawv muaj kev txom nyem nyob hauv lawv lub neej, los yog ua rau lawv thiab tsev neeg tsis tau nyob ua ke, los yog ua rau lawv muaj lus tsis sib haum.
Lub hli tas los ib tug Leej Tij tau txais Cim Tiag Tes ua Leej Choj lis Huab Tais Yes Xus txoj hauj lwm tshaj lub Moo Zoo, nws hais tias nws yeej muaj kev tu siab thaum nws txais Cim Tiag Tes vim tias nws xaiv txoj kev raws Huab Tais Yes Xus zaum no, yuav ua rau nws tsis tau nrog nws tsev neeg nyob ntxiv, nws tsis tau nyob tu niam tu txiv rau yav laus. Txawm li ntawd, nws xav tias kev khaws yus txoj kev tshua txog niam txiv no cia hauv nruab siab, mas yuav zoo dua vim txoj kev tshua no yuav nrog yus nyob mus li. Ntawm nws niam txiv thiab cov kwv tij neej tsa, los lawv kuj yuav tau khaws txoj kev tshua no cia ib yam. Nws thiab tsev neeg yuav sib tshua mus li tias ib tiam neeg no lawv tau yug los sib txheeb thiab muaj kev sib nyiam sib hlub.
Kwv tij Hmoob, xav kom peb khaws tus Txiv Plig tshiab no cov lus mus xav, peb lub neej ua neeg ntseeg tsis yog kom peb txhob haum xeeb nrog cov tsis zoo li peb, tab sis kom peb xav qhov zoo rau lawv mus li, nco txog lawv tas txwv nyob hauv peb kev thov Ntuj.
