(MT 12: 1-8)
Kwv tij Hmoob, zaj Ntawv Moo Zoo hnub no piav txog thaum Huab Tais Yes Xus thiab cov thwj tim hla ib thaj teb npleg. Thaum ntawd ntshai tav su dua lawm, ces cov thwj tim tshaib plab, lawv thiaj dej tej hnab nplej los ntxais. Nyob ntawd muaj ib cov Fas Lis Xais dhau kev thiab, cov Fas Lis Xais pom cov thwj tim dej nplej, mas lawv nco txog cov lus qhia caiv hnub Xas Npas Tos tam sid.
Hnub Xas Npas Tos cov Yus Das caiv dab tsi?
Cov Yus Das yuav tsis txhob ua hauj lwm, tsis txhob rauv taws, tsis txhob tua tsiaj, tsis txhob mus qhov twg tshaj 1 ncua kev.
Thaum cov thwj tim dej cov hnab nplej, mas txhais tau tias lawv tawm zog ua hauj lwm, ces yog lawv hla hnub Xas Npas Tos. Cov Fas Lis Xais thiaj li hais rau Huab Tais Yes Xus tias ua cas Huab Tais Yes Xus cov thwj tim ua tej yam txwv tsis pub ua hnub Xas Npas Tos.
Huab Tais Yes Xus thiaj li muab cov xwm thaud tus vaj Das Vis muab cov ncuav mov txi Ntuj los faib rau nws cov npawg noj thiab cov Leej Choj ua num hauv lub Tuam Tsev Teev Ntuj hnub Xas Npas Tos los ua piv txwv teb rau cov Fas Lis Xais tias ua cas ho tsis muaj leej twg hais dab tsi. Qhov kawg Huab Tais Yes Xus hais rau lawv tias “Neeg Leej Tub yog tus tswv kav hnub Xas Npas Tos.”
Kwv tij Hmoob, zaj Ntawv Moo Zoo no peb pom tias Tswv Ntuj tsis saib tias peb ua neej nyob, peb coj txoj cai nruj npaum cas, qhov Tswv Ntuj saib yog hauv peb lub siab lub plawv thiab qhov cheem tsum rau peb txoj sia. Yog peb coj txoj cai nruj dhau ua rau ib tus neeg twg ntsib teeb meem xwv txheej, mas puas yuav zoo dab tsi tuaj? Tswv Ntuj puas yuav nyiam peb dua tus uas muaj lub siab nyiam thiab hlub txog luag lwm tus?
Tib neeg txoj sia yeej muaj nqis dua txoj cai tib neeg tsim tawm los coj. Txoj cai yeej zoo tiag yog tias txoj cai pab txhawb tib neeg txoj sia thiab lub neej kom ua qhov zoo, tab sis yog txoj cai tsuas muaj qhov rhuav tib neeg lub neej txo tib neeg txoj sia, mas txoj cai ntawd puas yuav zoo dab tsi tuaj.
Muaj ib lo lus peb hnov Huab Tais Yes Xus hais, yog lo lus Huab Tais Yes Xus vam txog cov lus hauv Yaj Saub Os Xes phau ntawv (OX 6: 6) tias “Qhov kuv xav yuav yog txoj kev khuv leej, tsis yog thaj txi Ntuj.” Huab Tais Yes Xus lo lus no pab kom peb ras tias tab txawm peb ua cov Txoos Teev Ntuj zoo tshaj, tab txawm peb ntseeg zoo npaum cas, yog peb tsis muaj lub siab hlub luag lwm tus, mas peb cov zaj teev Ntuj thiab peb txoj kev ntseeg ntawd tsis muaj qab hau dab tsi nyob ntawm Tswv Ntuj xub ntiag li.
Huab Tais Yes Xus xav kom peb ua neeg muaj siab muag mos txawj hlub cov neeg nyob ib ncig, tsis txhob ua tus tos ntsoov saib tus twg ua txhaum ua yuam kev, ces tos cem tos muab txim rau.
Kwv tij Hmoob sawv daws, Huab Tais Yes Xus yog tus tswv kav hnub Xas Npas Tos, yog tus loj tshaj tas cov txoj cai huv tib si. Hnub Xas Npas Tos tsis yog tshwj cia peb tau so hauj lwm, tab sis tseeb tiag hnub Xas Npas Tos muaj cia rau peb tau so nyob hauv Tswv Ntuj, tau chaws los nkaum hauv Tswv Ntuj qhov ntxoov ntxoo, los txais Tswv Ntuj kev nyiam. Hnub Xas Npas Tos thiaj yog zoo rau peb ua qhov zoo, ua cov hauj lwm tsom kom pom txog Tswv Ntuj kev nyiam, ua cov hauj lwm cav txog Tswv Ntuj lub koob meej.
