Peb ua ntses zoo los ntses phem (MT 13: 47-53)
Nyob hauv Huab Tais Yes Xus zaj paj lug no, nws muab Ntuj lub Ceeb Tsheej piv rau lub vas puav ntses uas pov rau hauv dej ntuj, ces mag ntau hom ntses, tus ntses zoo los muaj, tus ntses tsis zoo los muaj.
Lub vas puav ntses yog dab tsi? Yog Huab Tais Yes Xus lub Koom Txoos.
Dej ntuj yog dab tsi? Yog lub qab ntuj neeg.
Cov ntses yog dab tsi? Yog neeg ntiaj teb. Neeg muaj cov zoo thiab cov phem. Huab Tais Yes Xus cia lub Koom Txoos hu sawv daws los nyob hauv, lub Koom Txoos tsis saib tias tus no ua neeg zoo, tus tod ua neeg phem, tus no yog neeg tawv dawb, tus tod yog neeg tawv daj, tus no yog noob nom, tus tod yog tub qhev. Huab Tais Yes Xus lub Koom Txoos saib sawv daws muaj vaj huam sib luag, muaj tsim ua Tswv Ntuj me nyuam zoo tib yam, thiab hlub sawv daws ntau tib yam.
Huab Tais Yes Xus hais tias thaum lub vas puav ntses tau ntses ntau lawm, cov tub puav ntses rub lub vas los rau tim nqhuab, lawv xaiv cov ntses zoo cia, cov ntses tsis zoo lawv muab pov tseg. Ces Huab Tais Yes Xus mam txhais rau cov thwj tim tias lub zim txwv kawg, kuj yuav zoo ib yam li ntawd; cov Tshiab yuav cais cov neeg phem ntawm cov neeg ncaj. Lawv yuav muab cov neeg phem pov tseg rau hauv lub qhov hluav taws.
Kwv tij, niaj hnub no peb pom tias nyob ib puag ncig peb muaj cov neeg zoo thiab cov neeg phem, hauv peb cov neeg ntseeg los yeej muaj cov zoo xyaw cov phem ib yam. Tswv Ntuj cia kom muaj li ntawd, Tswv Ntuj tsis maj nplua sawv daws. Tswv Ntuj tos kom txog hnub txiav txim, nws mam tuaj rhau sawv daws. Tus dim tsis yog tus tau lub npe tias yog neeg ntseeg, tus dim yog tus muab nws txoj sia los npuab Tswv Ntuj.
Huab Tais Yes Xus nug cov thwj tim tias lawv puas to taub. Tos Huab Tais Yes Xus nug lawv vim nws tsis xav kom lawv mloog nws cov lus li ib zag dab neeg, Huab Tais Yes Xus xav kom lawv muab siab rau xav kom lawv to taub cov lus qhia, mas lawv thiaj yuav coj nws cov lus qhia los txhim kho lawv lub neej tau.
Hnub no peb hnov Huab Tais Yes Xus xaus nws cov lus tias “Ua li mas, thaum ib tug thoob xwm ntawv los ua thwj tim hauv Ntuj lub Ceeb Tsheej, nws zoo li ib tug tswv tsev uas rho tau tej yam qub thiab tej yam tshiab hauv nws lub cuab tam los.” Lo lus tias ‘tej yam qub’, mas yog Mais Xes Txoj Cai thiab cov lus qhia. Lo lus ‘tej yam tshiab’, mas yog qhov tseeb Huab Tais Yes Xus tuaj qhia. Tus ua Huab Tais Yes Xus thwj tim, nws yuav kawm kom to taub Txoj Cai thiab nws kuj yuav cia Leej Ntuj Plig Ntshiab coj nws kev ua neej.
Kwv tij Hmoob sawv daws, niaj hnub no lub Koom Txoos puav tau peb lawm, peb puas yuav ua tus ntses zoo los peb yuav ua tus ntses phem. Peb puas kawm kom paub txoj kev ntseeg thiab cia Leej Ntuj Plig qhia peb kom txawj ua lub neej mus raws li qhov peb ntseeg, los peb lam tau lub npe tias yog neeg ntseeg tab sis tsis kub siab kawm kev ntseeg thiab tsis cia Leej Ntuj Plig ua hauj lwm hauv peb.
