Txhob xav tias yus paub Huab Tais Yes Xus zoo lawm (MT 13: 54-58)
Kwv tij Hmoob, cov Nas Xas Les poob siab thiab tsis ntseeg txog Huab Tais Yes Xus vim lawv xav tias lawv paub Huab Tais Yes Xus zoo, ces lawv tsis mloog nws, lawv tsuas sib cav txog Huab Tais Yes Xus lub neej xwb. Nyob hauv peb muaj ntsis zoo li ntawd, thaum peb ua tej yam yuam kev, cov neeg txheeb ze peb lawv ntuas lawv qhuab, mas peb tsis tshua nyiam yuav lawv cov lus; tab sis yog tus sab nraud hais, mas peb ho mloog ho yuav. Li ntawd, peb pom ntau zaus peb ua niam ua txiv hais, mas me nyuam tsis mloog, lawv xum mloog lawv cov phooj ywg dua.
Vim cov Nas Xas Les tsis ntseeg, mas Huab Tais Yes Xus thiaj li tsis ua hwj huam ntau nyob ntawd. Huab Tais Yes Xus ua hwj huam tsis yog kom sawv daws pom, ces lawv ntseeg. Tus ntseeg xwb thiaj tau pom Huab Tais Yes Xus ua hwj huam. Yog peb ntseeg txog Huab Tais Yes Xus, ntseeg txog Tswv Ntuj, mas peb ntsia pom tias niaj hnub hauv peb lub neej yog Tswv Ntuj cov hwj huam; yog peb tsis ntseeg, mas peb tsuas xav tias niaj hnub yog zoo li qhov qub.
Kwv tij Hmoob sawv daws, peb txhob cia peb txoj kev paub Huab Tais Yes Xus los ua chaw rau peb dawm taw.
Tos hais li no vim peb yeej nquag hnov cov ntseeg los ntev lawv hais kam tias lawv paub Huab Tais Yes Xus zoo lawm, lawv tsis tas yuav teev Ntuj ntau, tsis tas yuav mloog Tswv Ntuj Lo Lus ntau ntau. Lawv ua zoo li cov neeg nyob Nas Xas Les.
