Thaum peb ua txhaum, mas peb ntshai tsam luag pom (MT 14: 1-12)
Kwv tij Hmoob, thaum tus vaj Hes Los hnov zeej tsoom cav txog Huab Tais Yes Xus, mas tus vaj Hes Los ntshai thiab rov nco txog nws txoj kev txhaum tau ua yav tas los, ces nws thiaj li hais tias Huab Tais Yes Xus yog Zam Ntxuav Plig sawv rov los (MT 14: 1-2). Tos Zam Ntxuav Plig tuag, vim Zam ntuas Hes Los kom tsis txhob mus txeeb Hes Los Dias uas yog nws niam tij los ua nws poj niam. Qhov no ua rau Hes Los Dias tsis txaus siab, ces Hes Los Dias nrhiav kev kom Hes Los tau muab Zam tua raws li peb hnov hauv Ntawv Moo Zoo (MT 14: 3-5). Hes Los ntshai muab Zam tua tab sis vim nws hais rau sawv daws hnov tias yog Hes Los Dias tus ntxhais thov dab tsi, mas nws yuav muab rau, ces Hes Los ntshai poob ntsej muag nws thiaj muab Zam txiav caj dab raws li tus ntxhais thov (MT 14: 6-11).
Kwv tij Hmoob sawv daws, thaum peb ua ib yam txhaum dab tsi tab txawm peb yuav muab npog cia zoo npaum cas, tsis kav nyob puag hauv peb nruab siab yeej paub ntsoov tias peb tau ua txhaum, ces peb yeej yuav ntshai tias tsam muaj ib hnub twg yuav tshwm tawm rau sawv daws pom. Yam li peb tau ua tub sab nyiag tus twg nyiaj, mas peb yeej ntshai nrog nws tham los hais txog qhov xwm ntawd. Yog peb tsis xav kom muaj tej yam li no nyob hauv peb, mas peb tsis txhob ua. Yog ua lawm, peb yuav tu siab thiab mus thov txais lub Cim Daws Txhaum thiab ua cov hauj lwm them txim.
Peb pom tias Zam Ntxuav Plig pom tus vaj Hes Los ua tsis yog, mas nws mus ntuas kom tus vaj pom txog nws qhov txhaum. Ntawm peb ne! Thaum peb pom luag ua txhaum ua yuam kev, peb puas muaj cuab kav ntuas lawv kom ras tau thiab pom txog lawv qhov txhaum; los peb kav liam tsis yog peb hauj lwm.
Ntau zaus peb tsis xav ua txhaum tab sis vim peb ntshai poob ntsej muag, ntshai luag saib tsis tau, ntshai luag tsis yuav peb, ces peb tab meeg ua txhaum. Yam li ib tug tub hluas nws tsis haus luam yeeb tab sis nws cov phooj ywg txw nws kom haus, lawv hais tias koj tsis haus mas koj tsis zoo li peb, ces koj tsis yog peb phooj ywg. Tus hluas xav kom cov pooj ywg saib taus nws, ces nws nrog lawv haus. Peb ua neeg ntseeg, mas peb yuav tsum feeb kom meej, yuav tsis txhob ib rau txoj kev ua txhaum ua tsis yog.
