Yog peb nyob ruaj hauv Huab Tais Yes Xus cov lus, peb yuav tsis tog rau hauv kev txhaum (MT 14: 22-36)
Kwv tij Hmoob sawv daws, nyob hauv zaj Ntawv Moo Zoo no Mas Tais piav txog cov xwm tom qab Huab Tais Yes Xus ua kom mov ntsu tuaj yug tsib txhiab leej neeg. Peb pom tias thaum Huab Tais Yes Xus tso tsoom sid rov mus tsev tas lawm, Huab Tais Yes Xus mus nrhiav ib qho xu kev kom tau thov Ntuj. Yog li ntawm peb ne, thaum peb ua hauj lwm ib hnub tas, peb puas nrhiav ib lub sij hawm ntsiag ntsiag kom tau ua Tswv Ntuj tsaug, tau nrog Tswv Ntuj tham. Nyob hauv lub neej ua neeg ntseeg, kev thov Ntuj yog kev ntxiv zog rau peb lub neej.
Thaum Huab Tais Yes Xus nce mus saum roob kom tau thov Ntuj, mas cov thwj tim lawv caij nkoj ua ntej hla dej ntuj Nkas Lis Lais mus rau lwm qhov. Nyob hauv dej ntuj mas thaum tsaus ntuj cua hlob heev ua rau dej nphau nphw tuaj nplawm lub nkoj. Cov thwj tim sib pab hwj lub nkoj kom khiav taus tus saum nplaim dej ntuj. Thaum ntawd lawv twb nkuam nkoj los yuav txog tim ntug, lawv pom Huab Tais Yes Xus mus ko taw saum nplaim dej ntuj, mas lawv xav tias yog lawv pom poj ntxoog, ces lawv ntshai. Nyob hauv peb lub neej muaj ntau zaus zoo li cov thwj tim, muaj ntau tsav teeb meem tuaj nphav tuaj raug peb tsis tseg, thaum ntawd peb tsis nco pom Tswv Ntuj, ces peb xav tias tim peb txoj hmoo phem mas teeb meem thiaj tuaj raug peb, peb tsis nco tias cov teeb meem ntawd yog Tswv Ntuj kheev cia tshwm sim hauv peb kom peb tau nco txog Tswv Ntuj ,vam txog Tswv Ntuj lub hwj huam los pab peb, kom peb lub siab ntseeg ruaj tuaj.
Huab Tais Yes Xus hais rau cov thwj tim tias yog nws xwb, txhob ntshai. Pob Zeb hnov li ntawd, nws mam cia siab, ces nws thov mus cuag Huab Tais Yes Xus. Pob Zeb ntsia ntsoov Huab Tais Yes Xus, mas nws tsuj tau saum dej ntuj mus nrhiav Huab Tais Yes Xus. Pob Zeb hnov cua nrov ua rau nws ntshai, ces nws tog rau hauv dej ntuj tam sid. Pob Zeb qw qw kom Huab Tais Yes Xus pab nws, ces Huab Tais Yes Xus thiaj li cev tes tuav Pob Zeb tes thiab npo nws tawm hauv dej ntuj. Huab Tais Yes Xus hais rau Pob Zeb tias ua cas Pob Zeb lub siab yuav ntseeg tsawg ua luaj, ua cas nws ua xyem xyav.
Kwv tij, tos Pob Zeb tsuj tau dej ntuj mus cuag Huab Tais Yes Xus vim nws muab tas nws lub siab dai rau Huab Tais Yes Xus, nws tsis ntsia qhov twg li, nws tsuas ntsia Huab Tais Yes Xus xwb. Tab sis thaum Pob Zeb tig ntsia lwm qhov, nws pib hnov cua hlob, pom dej ntuj nphau, ces kev ua xyem xyav txhawv tuaj nyob hauv nws nruab siab, nws thiaj li pib tog rau hauv dej ntuj. Yog nyob hauv peb, peb dai ncuv rau Huab Tais Yes Xus, ntseeg txog Huab Tais Yes Xus ruaj nreb tsis ua xyem xyav, mas peb yuav tsis plam tes plam taw rau hauv cov teeb meem tuaj raug peb. Tab sis thaum twg peb tsis muab Huab Tais Yes Xus saib ua qhov loj, peb tsuas xav txog teeb meeb xav txog peb kev txhawj xeeb hauv lub neej xwb, mas peb kuj yuav tog rau hauv cov teeb meem zoo li Pob Zeb tog rau hauv dej ntuj. Yog peb nyob ruaj hauv Huab Tais Yes Xus cov lus hais rau peb kom mus cuag nws, mas peb yuav tsis tog rau hauv txoj kev txhaum.
Tab txawm peb poob rau hauv txoj kev txhaum, los Huab Tais Yes Xus tseem hlub peb, yog peb hu kom nws pab cawm peb, mas Huab Tais Yes Xus yeej yuav los npo peb ib yam li Pob Zeb tog rau hauv dej ntuj, nws qw kom Huab Tais Yes Xus pab nws, ces Huab Tais Yes Xus cev tes rub Pob Zeb tawm los.
Kwv tij Hmoob, hnub no thov kom peb nco 3 yam no:
1. Nyob hauv lub neej ua neeg ntseeg, kev thov Ntuj yog kev ntxiv zog rau peb lub neej. Li ntawd, niaj hnub peb yuav nrhiav ib lub sij hawm kom tau thov Ntuj.
2. Yog peb nyob ruaj hauv Huab Tais Yes Xus cov lus, mas peb yuav tsis tog rau hauv txoj kev txhaum. Peb nyob ruaj hauv Huab Tais Yes Xus cov lus tau, mas peb tsum muab siab dai ncuv rau nws.
3. Thaum peb ua txhaum, peb thov Huab Tais Yes Xus pab peb, ces nws yuav npo peb dim ntawm peb cov txhaum.
