5. Tswv Ntuj pub kom kuv pom kuv cov txhaum
Kuv pom kuv txiv thiab kuv niam tu siab zoo li ntawd, tshwj xeeb mas yog kuv txiv, ces kuv rov quaj hu yam tsis muaj kev vam khom ntxiv tias ‘neb pab kuv mas, kuv tsis tau ua txhaum dab tsi li, ua cas kuv thiaj yuav poob los nyob hauv thaj chaw no! Kuv yog Kav Tos Liv! Kuv yog cov Kav Tos Liv nas! Thov neb pab kuv os!’
Thaum kuv hais tias ‘kuv yog Kav Tos Liv’, ces kuv hnov ib lub suab qab zib ntxiag ua rau kuv tus plig ntsib kev xyiv fab thiab kev nyiam, kuv tus plig hom khaj tam sid. Cov dab khawm kuv cia mas lawv tso kuv tseg, lawv khoov ti av txav tawm mus dej ntawm kuv, vim lawv mloog tsis taus lub suab mos qab zib ntxiag ntawd.
Nej nrog kuv xav saib! Cov dab phem dab txaus ntshai ntawd, thaum lawv hnov Tswv Ntuj lub suab xwb, lawv cia li khoov tas tus zoo li ntawd tiag. Txawm yuav yog Xas Tas tus muab hlob los nws tsis muaj cuab kav tiv tau Tswv Ntuj lub suab no. Lawv ntshai thiab lawv tsis nyiam hnov lub suab mos suab qab zib no.
Kuv pom tias tus Leej Choj tab tom tuav lub Cim Yug nyob ntawm txhais tes, nws muab tsa siab, ces niam Mab Liab khoov hawm Tswv Ntuj. Yog lawv tab tom ua lub Txoos Teev Ntuj pub rau kuv tus xeeb ntxwv uas nws tuag lawd. Niam Mab Liab tab tom los pab kuv hauv txoj kev tuag, nws tab tom cev cov lus thov Ntuj pub rau kuv rau Leej Txiv Tswv Ntuj!
Nej puas paub tias thaum cov Leej Choj tab tom tsa lub Cim Yug kom siab, mas peb yuav paub dheev tias yog Huab Tais Yes Xus nyob ntawd. Sawv daws yuav kim caug pe hwm Huab Tais Yes Xus lub cev. Cov dab phem los lawv kuj pe thiab. Tsuas muaj kuv xwb thiaj tsis kim caug li sawv daws, kuv tsis quav ntseg txog li, muaj tej zaus mas kuv zom ntsuas txom ncauj thiab tshuab zais ua si. Ua cas kuv yuav muab hlob li no! Vim li no mas Tswv Ntuj thiaj tsis mloog kuv lo lus thov.
Nej ntseeg cov lus kuv piav no mog!
Txawm cov dab phem, los lawv maj zeeg khoov ntsej ti av hawm Tswv Ntuj tshees na, thaum Tswv Ntuj hla dhau lawv mus. Niam Mab Liab ua tus neeg me kim caug hawm ntawm Tswv Ntuj txhais taw, nws tab tom thov Tswv Ntuj khuv leej kuv.
Ntawm kuv tus neeg muaj txhaum, kuv siab ntxhib xib qwb tawv, tsis hawm Tswv Ntuj thiab txawm muaj cuab kav hais tias ‘li kuv mas thiaj yog neeg zoo!’ Zoo niag dev dab tsi, kuv tsis lees paub Tswv Ntuj thiab tseem tau hais ntau lo lus thuam Ntuj thiab.
Nej nrog xav mas! Kuv muaj txhaum loj npaum cas, kuv li txhaum hnyav npaum cas? Txawm niag dab phem los nws twb txawj hwm Tswv Ntuj!
Lub suab mos qab zib ntawd hais rau kuv tias ‘zoo mas! Koj hais tias koj yog Kav Tos Liv, koj hais saib Tswv Ntuj 10 Lo Lus muaj dab tsi?’
Ces kuv xav twj ywm, kuv tsis xav tias ua cas Tswv Ntuj yuav nug kuv zoo li no. Kuv paub tias muaj 10 Lo Lus xwb, tsis yuav ntau dua no li.
Kuv yuav teb li cas? Kuv nco tau mas yog kuv niam tau qhia rau kuv tias ‘thawj txoj cai yog: nyiam Tswv Ntuj thiab nyiam lwm tus.’ Ces kuv thiaj teb tias ‘Tswv Ntuj thawj lo lus yog kom nyiam Tswv Ntuj tshaj tas puas tsav yam thiab nyiam lwm tus li yus rov nyiam yus.’
Tswv Ntuj hais rau kuv tias ‘zoo kawg! Yog li koj puas ua raws mas, koj puas nyiam kuv mas?’
Kuv teb tias ‘yog kawg, kuv nyiam Tswv Ntuj.’
Tswv Ntuj hais tias ‘koj tsis tau nyiam kuv.’
Thaum kuv hnov li ntawd, mas zoo li xob tua kuv, kuv ib ce mob tas, kuv txaj muag, kuv daim tawv dev poob ntav kawm kuv ntsej muag, xws li kuv tab tom liab qab tsis muaj dab tsi vas kuv lub cev.
Tswv Ntuj lub suab hais ntxiv tias ‘koj tsis tau nyiam kuv uas yog koj tus Tswv Ntuj tshaj tas lwm yam, thiab koj tseem tsis tau nyiam cov nyob ib ncig koj li koj tau hais. Koj saib koj yog Tswv Ntuj. Koj nco txog Tswv Ntuj mas yog thaum koj ntsib kev txom nyem xwb. Koj hais tias koj tau kim caug thov txog Tswv Ntuj, koj tau thov Leej Choj ua Thaj Txi Ntuj pub rau lwm tus, koj tau mus koom lub Txoos teev Ntuj. Koj ua li ntawd mas yog thaum koj txom nyem, koj thiab koj tsev neeg ua neeg me tsis muab hlob, mas yog thaum koj ntshaw tau ib txog hauj lwm ua. Thaum zoo li ntawd mas koj thiaj kim caug thov txog Tswv Ntuj, koj thov kom kuv rho koj tawm hauv kev pluag kev txom nyem, koj thov kom tau hauj lwm ua, koj vam txog kuv thaum koj xav tau ib yam dab tsi. Koj hais tias yog kuv pub kom koj muaj nyiaj, mas koj yuav kub siab hais saw Mab Liab. Tej yam no yog koj muaj rau koj tus Tswv Ntuj. Koj hais tau tab sis koj tsis ua raws li koj tau cog lus cia nrog Tswv Ntuj. Tsis yog koj tsis ua li koj hais xwb, koj tseem tsis nco qab ua kuv tsaug thiab.’
Tswv Ntuj rov hais rau kuv tias ‘koj cog lus nrog Tswv Ntuj, tab sis koj tsis ua li koj tau hais tseg!’
Tswv Ntuj pub kom kuv pom tias yav tas los kuv tau thov dab tsi ntawm Tswv Ntuj. Kuv tau thov Tswv Ntuj kom pub ib lub tsheb rau kuv, thaum ntawd kuv thov Ntuj nyob hauv kev tsis muab hlob, ces kuv tau txais li kuv thov tiag, tab sis kuv tsis nco qab ua Tswv Ntuj tsaug, thiab kuv tseem hais lus tsis zoo txog Tswv Ntuj thiab. Tswv Ntuj qhia tas cov txiaj ntsim nws pub rau kuv, kuv tsis tau ua tsaug Tswv Ntuj ib los li. Kuv yog neeg tsis paub ris Ntuj txiaj ntsig tiag tiag!
Kuv saib Tswv Ntuj zoo li ntawd tiag tiag, kuv saib Tswv Ntuj zoo xws li lub tsev ceev nyiaj. Kuv yuav hais saw Mab Liab yog tias Tswv Ntuj pub raws li kuv tau thov, yog tsis tau raws li hais, mas kuv yuav tawm tsam Tswv Ntuj ntag.
Thaum kuv tau hauj lwm ua thiab kuv muaj nyiaj lawm, kuv pib saib tias kuv yog tus neeg muaj, kuv tsis quav ntseg txog txoj kev nyiam, kuv tsis nco qab txog Tswv Ntuj lub txiaj ntsim.
Hais txog kev ris txiaj ntsig, mas tsis muaj nyob hauv kuv li. Lo lus tias ‘ua tsaug’ los twb tsis hnov tawm hauv kuv lub ncauj los ib zaug li. Hais txog kev thov Ntuj pub rau cov neeg txom nyem, cov neeg tsis muaj vaj tse nyob, mas txhob xav tias yuav muaj nyob hauv kuv. Ua cas kuv yuav phem tas npaum no.
Tsis tas li xwb, kuv tseem mus ntseeg cov neeg saib yaig saib hmoov, kuv ntseeg tias cov hnub qub saum ntuj muaj feem cuam tshuam nrog kuv lub neej, kuv ntseeg tas txhua yam uas lub ntiaj teb hais rau kuv. Kuv ntseeg tias neeg tuag lawm, neeg yuav rov thawj thiab los ua neej dua nyob hauv lub ntiaj teb no. Kuv tsis nco qab txog lub txiaj ntsim tawm hauv Huab Tais Yes Xus cov ntshav los lawm.
Tswv Ntuj hais ntxiv tias ‘txhua yam koj muaj tsis yog los ntawm koj cov lus thov, tiam sis yog yam Tswv Ntuj tau pub rau koj xwb. Koj tseem muaj cuab kav hais tias koj nrhiav tau ntawm koj lub peev xwm los, koj muaj vim koj ua tiag ua hauj lwm, koj tau tej ntawd los ntawm koj ntiag tug los xwb, yog koj lub peev xwm mas koj thiaj muaj txhij muaj txhua li ntawd. Tsis yog li ntawd mog! Koj ntsia saib, muaj cov neeg txawj ntse dua koj, lawv ua hauj lwm ntau dua koj, ua cas lawv tsis muaj xws li koj mas?’
Tswv Ntuj xav qhia kom kuv to taub Tswv Ntuj 10 Lo Lus, kom kuv nkag siab tias ua cas kuv thiaj tsis tau hawm Tswv Ntuj ib tug xwb, ua cas kuv ho mus hawm Xas Tas tus dab phem ntxias neeg. Tswv Ntuj ua kom kuv pom tias nyob hauv kuv chav ua hauj lwm, mas muaj ib tug poj niam saib yaig tau tuaj ntsib kuv, nws hais rau kuv tias nyob hauv kuv chav ua hauj lwm mas muaj vij sub vij sw, kuv yuav tau cheb tej vij sub vij sw ntawd pov tseg kom tas, ces nyiaj txiag yuav ntws sis laub sis lug los nrhiav kuv. Kuv thiaj cia nws ua kab ke cheb vij sub vij sw. Kuv tau qhib qhov rooj tos txais dab phem lawm tiag, kuv yeem cia dab phem nkag los ntxias kuv ywj siab.
Nej puas paub tias ntxim txaj muag npaum cas, Tswv Ntuj tau muab Tswv Ntuj 10 Lo Lus los twm kuv txoj sia: kuv hais lub xyav txog lwm tus, kuv khib cov neeg tau zoo dua kuv, kuv hais lus cuav dag lwm tus. Kuv hais tias ‘kuv yog cov Kav Tos Liv’, mas yog lo lus zeem tseeb tias kuv tab tom hais lus cuav thiab dag. Kuv tau ua ntau yam tsis zoo rau ntau tus, kuv tsis paub ris kuv niam kuv txiv lub txiaj ntsim. Nkawd tag ntau yam kom kuv tau kawm ntawv siab, kom kuv lub neej nto ntsis, tab sis thaum kuv muaj hauj lwm ua, mas kuv tsis thuv laj txog nkawd, kuv tsis nrhiav ib lub sij hawm mus ntsib nkawd, mus saib xyuas nkawd. Kuv ua tus neeg ntsia tsis pom nkawd, tshwj xeeb mas yog kuv niam, vim nws nyiam ua neeg me thiab coj tus yam ntxwv pluag.
Tswv Ntuj pub kom kuv pom tias kuv cav ncauj ntau npaum cas: thaum kuv sawv tsees mas kuv tus txiv hais lus luag ntxhi rau kuv tias ‘nyob zoo hnub tshiab od!’, ces kuv teb tias ‘zoo hnub rau koj qhov twg nas!, koj ntsia saib nag twb yuav poob las mas!’ Yuav ua dab tsi mas kuv cav ncauj tas txwv.
Koj yuav caiv Tswv Ntuj hnub, koj yuav muab Tswv Ntuj hnub ua Hnub Ntshiab? Tswv Ntuj qhib kom kuv pom tias Hnub Chiv kuv tau ua dab tsi. Kuv muab lub sij hawm ntev li 4 txog 5 teev los tu kuv lub cev kom zoo nkauj kom ntxim ntsia ntxim hlub. Kuv twb tsis tau muab sij hawm rau Tswv Ntuj li, txawm 10 fiab xwb los kuv twb tsis kam cais rau Tswv Ntuj. Kuv tsis ua Ntuj tsaug, kuv tsis rau siab thov Ntuj. Kuv tsis tau ua ib yam dab tsi kom hnub no yog Hnub Ntshiab li. Kuv hais saw Mab Liab tiag! Yog kuv hais thaum lawv tso lub sij hawm cia so luv luv, ces kuv hais ua ciaj ua tuag los laug lub sij hawm xwb, kuv maj hais kom tas ua ntej lawv yuav tso xyam hauv TV. Kuv twb tsis muab siab rau hais saw Mab Liab.
Vim kuv tsis tsis muab siab rau hais, kuv tsis cev lub siab rau Tswv Ntuj, ces kuv zaj lus hais saw Mab Liab thiaj tsis tau qab hau dab tsi.
Tswv Ntuj cia kuv pom tias kuv tub nkeeg mus koom lub Txoos teev Ntuj npaum cas: thaum kuv txawm nrog kuv niam thiab kuv txiv nyob, nklawd hais kom kuv nrog nkawd mus teev Ntuj mas kuv teb rau nkawd tias ‘Niad, Tswv Ntuj twb nyob qhov txhia chaw ne, ua cas kuv thiaj yuav tsum mus teev Ntuj tim tsev teev Ntuj xwb mas?’ Kuv hais li ntawd kom kuv tau nyob txawm hauv tsev.
Tswv Ntuj nyob nrog kuv nraim tas nrho 24 teev thiab tas kuv txoj sia, tab sis kuv tub nkeeg, kuv tsis qee ib lub sij hawm hauv Hnub Chiv pub rau Tswv Ntuj li.
Qhov phem tshaj mas yog tias kuv muab Tswv Ntuj hnub cia rau kuv tau tu kuv lub cev kom zoo nkauj xwb, kuv poob hauv kev ua kuv lub cev tus qhev, kuv tsis nco lawm tias yam tseem ceeb tshaj plaws ntawm kuv mas yog kuv muaj tus plig, kuv luam thuam tsis tu kuv tus plig lawm.
Hais txog Tswv Ntuj Lo Lus: kuv tau thuam hais tias cov neeg nyiam nyeem Ntawv Ntshiab mas lawv yog neeg ruam, kuv hais lus phem txog Tswv Ntuj, kuv tau hais tias ‘dab tsi thiaj yuav yog qhov ntshiab tshaj? Tswv Ntuj nyob ntxawm hauv lub Cim Yug tiag lod? Ua cas cov niag Leej Choj yuav khuv xim cov cawv ua luag, ua cas lawv tsis tov cawv kom ntau rau hauv lub ntim kom qab dua no ne?’
Kuv tau ua kom kuv khiav deb ntawm Tswv Ntuj, kuv tso kuv tus plig pov tseg, kuv hais lus xyav thiab thuam cov Leej Choj. Nej puas paub tias kuv tu siab npaum cas thaum kuv rov pom kuv cov txhaum no nyob ntawm Tswv Ntuj xub ntiag. Tswv Ntuj pub kom kuv pom tias kuv tus plig ntog vim kuv cov lus xyav moo txog cov Leej Choj. Kuv tau hais tias cov Leej Choj mas lawv yog cov neeg nyiam deev txiv neej ib yam li lawv. Kuv cov lus no ua rau muaj coob leej ntau tus hauv peb lub zos ntseeg li ntawd.
Kuv ib lo lus me me no muaj zog loj txog qhov tias yuav tua thiab rhuav tau neeg tus plig.
Ziag no kuv pom kuv cov txhaum tas lawm tiag. Kuv tu siab tshaj plaws. Kuv thov nej sawv daws uas mloog kuv cov lus, mas nej txhob ua li kuv tau ua mog! Nej txhob xyav moo txog cov Leej Choj, tiam sis nej yuav thov Ntuj rau lawv.