Yes Xus mus saum ntuj lawm tab sis nws lub hwj huam nrog cov thwj tim nyob, ces thaum Pob Zeb mus tshaj Yes Xus lub Moo zoo txog lub zos Lis Das, nws ntsib ib tug txiv neej hu ua Es Nes pw hauv ib daig khaub lev tau 8 xyoo lawm. Yog ib tug neeg tuag ceg. Pob Zeb hais rau nws tias “Es Nes, Yes Xus Pleev kho koj kom koj zoo, koj sawv los kho koj lub txaj.”
Tam sim ntawd, tus tuag ceg sawv tsees. Tas tsoom sid nyob Lis Das thiab nyob hauv lub tiaj Xas Loos pom Es Nes, mas lawv sawv daws tig los ntseeg txog Yes Xus.
Pob Zeb kuj tsa ib tug poj niam tuag kom sawv rov los nyob hauv lub nroog Yos Pes. Tas lub tsheej Yos Pes hnov lub moo ntawd mas ntau leej ntseeg txog Yes Xus. Pob Zeb nyob Yos Pes ib ntus, nws nyob hauv Xis Moos tus ntswj hlua lub tsev.
Nyob hauv lub nroog Kos Xes Ntxas Les, muaj ib tug xab txheeb hu ua ‘Kos Nes Lias’, nws yog tus kav pab tug rog Is Tas Lias. Kos Nes Lias yog neeg nquag teev Ntuj thiab hwm Tswv Ntuj xws li cov Yus Das. Kos Nes Lias ua siab dav pub ntau yam rau tsoom pej xeem Yus Das thiab nws teev Tswv Ntuj tsis tseg. Muaj ib hnub thaum hnub qaij peb teev, Kos Nes Lias yees pom tus Tshiab chaws los hauv nws tsev. Tus Tshiab hu nws tias “Kos Nes Lias.”
Kos Nes Lias ntsia dheev tus Tshiab, nws ntshai, nws thiaj nug tias “Huab Tais, muaj dab tsi?”
Tus Tshiab teb nws tias “Koj cov zaj thov Ntuj thiab koj cov hauj lwm pab cov pluag nce mus txog Tswv Ntuj. Tswv Ntuj nco txog koj. Ua li mas nyem no koj tso neeg mus tos Pob Zeb tom Yos Pes tuaj. Nws nyob hauv ib tug kws ntswj hlua hu ua Xis Moos tsev, nws lub tsev nyob ze ntug hiav txwv.”
Thaum tus Tshiab hais lus tas nws rov mus lawm, mas Kos Nes Lias hu nws ob tug tub txib thiab ib tug tub rog hwm Ntuj uas yog tus ib txwm yeej nrog nws nraim. Nws piav tas txhia yam rau lawv, ces nws tso lawv mus ntsib Pob Zeb tim Yos Pes.
Tag kis, lawv tab tom mus kev yuav txog lub nroog, Pob Zeb nce mus teev Ntuj saum tsev. Thaum ntawd, tav su lawm, Pob Zeb hnov tshaib plab ces nws xav noj mov. Thaum lawv tseem tab tom npaj zaub rau nws mas nws yees pom lub ntuj qhib thiab pom ib yam zoo li ib daig ntaub pua rooj dav dav nqes los rau ntiaj teb. Daim ntaub ntawd plaub ceg kaum khi ua pob. Nyob hauv daim ntaub muaj tas puas tsav yam tsiaj uas muaj plaub txhais tes taw, muaj tas puas tsav yam noog ya saum ntuj, ces muaj ib lub suab hais rau Pob Zeb tias “Pob Zeb, koj muab los tua noj mas!”
Tab sis Pob Zeb teb tias “Huab Tais, kuv tsis noj! Los txog tav no kuv tseem tsis tau noj dua ib yam tsis huv thiab caiv.”
Lub suab ntawd rov qab hais ntxiv tias “Tej yam Tswv Ntuj ua kom huv tuaj koj tsis txhob hais tias tsis huv.”
Lub suab hais li ntawd peb zaug tas ces daim ntaub rov nce dua saum ntuj lawm. Pob Zeb tsis pom qab xav li cas. Nws tab tom xav tswv yim nrhiav saib tej yam nws yees pom ntawd xav qhia dab tsi. Thaum ntawd, Kos Nes Lias cov neeg tuaj txog, lawv nug Xis Moos lub tsev ces lawv tuaj nyob ntawm rooj loog. Lawv hu thiab nug tias tus hu ua Pob Zeb puas nyob ntawm no tiag.
Pob Zeb tseem tab tom xav xav txog qhov nws nyuam qhuav pom, ces Leej Ntuj Plig Ntshiab qhia nws tias “Muaj ib co neeg nrhiav koj. Koj nqes mus, koj nrog lawv mus, koj tsis txhob ua xyem xyav, yog kuv xa lawv tuaj.”
Pob Zeb nqes mus txog ntawm cov neeg, nws hais rau lawv tias “Kuv yog tus nej nrhiav, nej tuaj dab tsi?”
Lawv teb tias “Tus xab txheeb Kos Nes Lias uas yog ib tug neeg ncaj thiab hwm Tswv Ntuj, tas tsoom Yus Das kuj hais lus zoo txog nws, nws tau pom ib tug Tshiab qhia nws kom hu koj mus tim nws tsev, nws xav mloog cov lus uas koj yuav hais rau nws.”
Ces Pob Zeb hu lawv los tsev thiab nws cheem lawv nrog nws nyob. Tag kis Pob Zeb mam nrog lawv mus Xes Ntxas Les. Kos Nes Lias yeej nyob hauv tsev tos lawv, nws twb xub sau nws tsev neeg thiab nws cov phooj ywg tib si tuaj nyob hauv nws tsev tos. Thaum Pob Zeb chaws los hauv tsev, Kos Nes Lias tuaj txhos caug ntawm Pob Zeb xub ntiag pe Pob Zeb. Pob Zeb thiaj tsa nws sawv thiab hais tias “Koj sawv. Kuv kuj yog ib tug neeg xwb.”
Pob Zeb pom cov neeg tuaj sib sau coob, nws hais rau lawv tias “Nej twb yeej paub tias txoj cai txwv tsis kheev ib tug Yus Das nrog ib tug neeg pej kuj teb sib fim thiab chaws mus hauv nws lub tsev. Tab sis Tswv Ntuj nyuam qhuav qhia kuv tias tsis txhob hu leej twg ua neeg txhaum los neeg tsis huv. Vim li ntawd, thaum nej tuaj hu kuv, kuv tsis tau yig. Nyem no, kuv xav nug nej tias vim li cas nej thiaj tuaj hu kuv?”
Kos Nes Lias teb tias “Tau peb hnub saum no, kuv tseem tab tom teev Ntuj, yog thaum hnub qaij 3 teev, ces cia li muaj ib tug neeg tshwm plaws ntawm kuv xub ntiag, nws hnav ib ce dawb paug, nws hais rau kuv kom xa neeg tuaj nrhiav koj. Koj tuaj, mas peb zoo siab. Nyem no, peb sawv daws nyob ntawm koj xub ntiag, kom peb tau hnov saib Tswv Ntuj kom koj hais dab tsi rau peb.”
Ces Pob Zeb pib hais tias “Nyem no, kuv paub tseeb tias Tswv Ntuj tsis kws leej twg cai. Nyob tas hauv txhia haiv neeg, yog leej twg hwm Ntuj thiab coj txoj kev ncaj mas leej twg ntxim Tswv Ntuj siab. Tswv Ntuj xa lub moo zoo tias neeg yuav nyob thaj yeeb nyob hauv Yes Xus Pleev. Yes Xus Pleev yog sawv daws tus Huab Tais. Tswv Ntuj tau pleev Yes Xus. Tswv Ntuj muab Leej Ntuj Plig Ntshiab thiab muab hwj huam rau Yes Xus. Yes Xus mus ncig teb ncig chaw, nws ua zoo rau sawv daws. Nws kho cov neeg poob hauv dab phem tes kom lawv zoo, vim Tswv Ntuj nrog nws nyob. Peb ua tau tim khawv pom tas puas tsav yam Yes Xus tau ua. Cov Yus Das tau ua phem rau nws, lawv muab nws dai saum ib tug ncej kom nws tuag. Tiam sis hnub peb, Tswv Ntuj tsa Yes Xus sawv rov qab los lawm thiab pub nws tawm tuaj xyuas cov tim khawv uas nws xub tau xaiv ua ntej. Thaum nws sawv hauv cov tub tuag rov los, peb tau nrog nws noj mov, nrog nws haus dej. Nws qhia peb kom peb tshaj rau tsoom pej xeem tias nws yog tus uas Tswv Ntuj tsa los txiav txim rau cov neeg ciaj thiab cov neeg tuag. Tas cov Yaj Saub ua tim khawv txog Yes Xus tias leeg twg ntseeg txog nws mas leej twg cov txhaum yuav daws tas nyob hauv nws lub npe.”
Pob Zeb tseem tab tom hais lus, Leej Ntuj Plig Ntshiab nqes los rau saum cov lawv, ces Pob Zeb ua lub Cim Ntxuav rau lawv nyob hauv Yes Xus Pleev lub npe. Kos Nes Lias thov kom Pob Zeb nrog lawv nyob ob peb hnub ntxiv.
Thaum Pob Zeb rov qab los nyob hauv lub tsheej Yes Lus Xas Les, mas cov neeg Yus Das ntseeg txog Yes Xus tsis zoo siab rau Pob Zeb. Yog vim cov neeg Yus Das uas lawv tau txais lub Cim Ntxuav nyob Yes Lus Xas Les tau 6 xyoo, los 7 xyoo lawm, mas lawv tseem muaj lub siab nqaim xws li cov haiv neeg Yus Das, lawv thiaj hais rau Pob Zeb tias “Vim li cas koj mus so nyob hauv cov pej kum neeg lub tsev? Vim li cas koj nrog lawv noj mov?”
Pob Zeb thiaj piav meej cov xwm nws pom tshwm nyob Xes Ntxas Les thiab hais ntxiv rau cov Yus Das txais lub Cim Ntxuav nyob Yes Lus Xas Les tias “Tswv Ntuj twb pub tib lub txiaj ntsim rau cov neeg nyob hauv Kos Nes Lias tsev xws li nws pub rau peb, Leej Ntuj Plig Ntshiab nqes los rau saum lawv ib yam li thawj zaug nws nqes los rau saum peb, mas kuv yuav ua li cas thiaj yuav txwv tau Tswv Ntuj?”
Cov lus no ua kom cov Yus Das nyob Yes Lus Xas Les lub siab nqig, lawv cav lus zoo txog Tswv Ntuj, lawv hais tias “Tswv Ntuj pub txiaj ntsim rau cov neeg coj pej kum kev cai.”
Yog xyoo tim 62 los 63 tej mas Pob Zeb rov qab mus nyob Los Mas, thaum ntawd Pob Zeb yog ib tug neeg laus hauj sim lawm, nws muaj 60 los 70 xyoo. Tas Pob Zeb sim neej, Pob Zeb tau tshaj Ntuj Lus nyob ntau lub nroog.
Xyoo 65 los yog 66, cov nom tswv Los Mas ntes Pob Zeb. Lawv yuav muab Pob Zeb tua nyob saum ntoo cuam, tiam sis Pob Zeb xav tias nws tsis tsim nyog tuag xws li Yes Xus, ces nws thov kom lawv tsa nws nyob saum ntoo cuam, muab ko taw tig rov saud, hos taub hau tig rov hauv av.
Muaj tej kwv huam piav tias txij hnub Leej Ntuj Plig nqes los rau saum cov thwj tim tas. ‘Yas Kos’ uas yog Zam tus tij laug, nws qhia kev ntseeg nyob Yes Lus Xas Les, ces xyoo 44 tus vaj Hes Los muab nws tua.
Lwm cov Hauv Paus Xa Lus tawm mus tshaj lub Moo Zoo rau pej kum teb. ‘Niam Mab Liab’ nrog cov thwj tim caij nkoj hla mus rau lub pov txwv Kws Plos, tab sis cua ntsawj tuaj coj lub nkoj mus txog Es Thos (Athos), Mas Xes Dos Nias teb. Niam Mab Liab tau tshaj lub Moo Zoo rau cov neeg nyob ntawd, nws hais rau lawv tias “Kuv pub Leej Tub thiab kuv tus Tswv Ntuj rau nej!”
Xyoo 48 Mab Liab rov qab los Yes Lus Xas Les, tus Tshiab Nkas Nplias tawm tuaj qhia Mab Liab tias nws yuav nyob hauv ntiaj teb 3 hnub xwb, ces Mab Liab hu cov Hauv Paus Xa Lus tuaj nrog nws nyob tsuas tshuav Tos Mas thiaj tsis nrog lawv nyob ntawd.
Peb hnub tom qab cov Hauv Paus Xa Lus coj Mab Liab lub cev mus zwm qhov ntxa tas, Tos Mas rov los txog, nws tu siab tias nws tsis tau pom Mab Liab txoj sia tu. Tos Mas hais kom cov Hauv Paus Xa Lus coj nws mus qhib lub qhov ntxa xyuas Mab Liab tus qauv tab sis lawv tsis pom Mab Liab lub cev.
Yav tsaus ntuj, Mab Liab tawm los rau lawv pom thiab hais lus rau lawv tias “Nej nyob kaj lug mog! Kuv yuav nrog nej nyob mus li.”
Cov Hauv Paus Xa Lus paub tias Tswv Ntuj nqa Mab Liab lub cev nrog nws tus plig mus saum ntuj lawm, ces sawv daws mam rov tawm mus tshaj lub Moo Zoo.
Xyoo 60 tus Hauv Paus Xa Lus ‘Npas Nas Npes’, mus tshaj lub Moo Zoo nyob hauv lub pov txwv Kws Plos (Cyprus) ces nws raug tua tuag nyob ntawd.
‘As Nres’ mus tshaj Ntuj Lus nyob Lav Xias qab teb, nyob Xis Thias teb. Nws tshaj Ntuj Lus nyob ntau lub teb chaws. Muaj ib zaug ib tug nom txwv tsis kheev As Nres tshaj Ntuj Lus ntxiv. As Nres tsis nyob twj ywm, nws kuj tshaj tas zog, qhia tas zog ntxiv, ces tus nom muab As Nres tua nyob saum ntoo cuam xws li Yes Xus, yog xyoo 61. Thaum As Nres pom tus ntoo cuam uas lawv npaj rau nws, mas nws hais tias “Ntoo cuam, koj tau nqa kuv tus Huab Tais lawm. Tau ntev los, kuv tos txog koj. Kuv xav nce los dai saum koj. Kuv thiaj li yuav mus cuag tau kuv tus Huab Tais.”
As Nres dai ntawm tus ntoo cuam 2 hnub, tsis kav nws kuj tseem tshaj Tswv Ntuj Lo Lus mus txog thaum nws txoj sia tu nrho.
‘Yas Kos’ tus txheeb Yes Xus ua tus tuav lub Koom Txoos nyob Yes Lus Xas Les, txog xyoo 62 Yas Kos raug tus vaj txheeb Los Mas nyob Yes Lus Xas Les ntes tua tuag nyob Yes Lus Xas Les.
Muaj tej zaj kwv huam piav tias ‘Mas Tais’ mus tshaj Tswv Ntuj Lo Lus nyob Es Thias Pias teb, muaj ib zaug tus vaj Es Thias Pias tus ntxhais tuag lawm, Mas Tais tau pab tsa tus ntxhais kom sawv rov qab los, ces ua rau tus vaj txais kev ntseeg thiab tas lub teb chaws ntawd kuj txais kev ntseeg coob leej. Thaum tus vaj laus thiab tuag lawm, tus sawv los ua vaj tshiab nws xav yuav tus ntxhais Mas Tais tau tsa sawv rov los, mus ua nws tus poj niam. Tiam sis tus ntxhais twb cog lus hais tias nws yuav pab lub Koom Txoos, nws tsis yuav txiv. Tus vaj tshiab hnov hais tias yog Mas Tais pab tus ntxhais kom tau cog lus tsis yuav txiv, ces tus vaj thiaj muab Mas Tais tua nyob hauv xyoo 65.
Xyoo 67 ‘Xis Moos tus siab kub’ thiab ‘Yus Das Thas Des As’ tau mus tshaj lub Moo Zoo txog Pes Xis. Nyob ntawd Xis Moos raug lawv xuas kaw los kaw nws thiab lawv muab hmuv nkaug Yus Das ces nkawd tuag nyob hauv Pes Xis teb.
Hais txog ‘Mas Kos’ mas xyoo 68 nws mus tshaj lub Moo Zoo nyob Hais Nkws Tos teb, nws ntuas sawv daws kom txhob teev cov mlom dab ua rau tsoom pej xeem tsis txaus siab, lawv muab Mas Kos khi rau nees cab tuag nyob hauv lub nroog As Les Xas Nrias.
Muaj kwv huam piav txog tus Hauv Paus Xa Lus ‘Nas Tas Nais’ tias Nas Tais Nais tau mus tshaj Ntuj Lus nyob Is Ntias teb, ntau leej ntseeg txog nws cov lus qhia. Tab sis muaj ib co yeeb ncuab xav hiam Nas Tais Nias. Li ntawd, nws thiaj hloov mus tshaj Ntuj Lus nyob As Mes Nias teb. Tus vaj kav As Mes Nias tus poj niam thiab 12 lub nroog txais Yes Xus lub Moo Zoo, lawv ntseeg txog Yes Xus. Tus vaj muaj ib tug kwv, tus kwv pom tias muaj cov neeg ntseeg txog Yes Xus coob, nws thiaj nrog cov txiv dab muab Nas Tais Nais hlais, thiab lawv txiav nws taub hau tuag xyoo 72.
Zaj kwv huam hais txog tus Hauv Paus Xa Lus ‘Tos Mas’ tias nws mus tshaj Ntuj Lus nyob Is Ntias teb ces xyoo 72 nws tuag nyob ntawd. Xyoo 1200, muaj ib co neeg Aws Los Pas mus ua luam nyob Is Ntias teb, lawv ntsib ib co neeg txais kev ntseeg nyob hauv lub xeev Mas Las Npas, nyob Is Ntias teb. Cov neeg ntawd hais tais thaud yog tus Hauv Paus Xa Lus Tos Mas qhia kev ntseeg rau lawv lub teb chaws. Niaj hnub no cov ntseeg nyob Is Ntias teb tseem hwm Tos Mas lub ntxa nyob hauv lawv lub teb chaws.
Muaj kwv huam piav txog tus Hauv Paus Xa Lus ‘Fis Lis Pos’ tias nws tshaj lub Moo Zoo mus txog Hes Las teb, ces xyoo 80 lawv muab Fis Lis Pos dai tuag saum ntoo cuam.
Nyob hauv xyoo 80 ntawd, ‘Mas Thias’ kuj raug cov Yus Das nyob Yes Lus Xas Les ntes thiab muab pob zeb txawb tab sis nws tsis tuag, ces lawv thiaj muab nws txiav caj dab.
Xyoo 67 ‘Zam’ mus nyob Es Fes Xos. Nws paub cov neeg ntseeg nyob As Xias Me teb, thiab lawv tej nroog zoo. Nws zoo li ib tug yawg koob saib xyuas sawv daws. Thaum tus vaj Dos Mis Xias hiam cov neeg ntseeg xyoo 92, mas cov nom tswv ntes Zam thiab muab nws kaw hauv tsev loj faj nyob Los Mas. Tiam sis Tswv Ntuj lub hwj huam txuag Zam, ces nws tsis tuag.
Nyob nyob, muaj ib tug nom tso Zam tawm hauv tsev loj faj los, ces Zam rov qab los nyob Es Fes Xos. Thaum ntawd nws laus laus lawm, niaj hnub nws mus xyuas tas cov neeg ntseeg nyob As Xias xeev ntuj. Nws tsa tej tus Leej Choj ua Tswv Qhia, nws tsim tej lub Koom Txoos, nws xaiv tej tus neeg los ua Leej Choj.
Thaum ntawd Zam sau nws phau ntawv Moo Zoo, nws kuj sau tej tsab ntawv mus ntuas cov neeg ntseeg. Zam kheev hais rau sawv daws hais tias “Cov me nyuad! Nej sawv daws yuav sib nyiam sib hlub. Tswv Ntuj lo lus qhia yog zoo li ntawd.”
Txog xyoo 100 tej, ces Zam thiaj tag sim neej lawm.
Hais txog cov Hauv Paus Xa Lus mas lawv sawv daws puav leej ua siab loj siab tawv thiab muaj lub siab kub lug, ces tas lawv sim neej lawv tau siv zog tshaj Yes Xus lub Moo Zoo.
Cov neeg tshaj Yes Xus lub Moo Zoo mas tsis yog cov Hauv Paus Xa Lus xwb, vim txij li xyoo tim 60 mus txog xyoo tim 120, mas cov neeg ntseeg txog Yes Xus thiab cov tsis ntseeg coob leej tau sib tham txog txoj kev saib Yes Xus yog tus Huab Tais cawm ntiaj teb neeg. Cov xub tau hnov Yes Xus lub Moo Zoo yog cov Yus Das. Lawv hnov lub Moo Zoo nyob Yes Lus Xas Les, lawv kuj tau hnov nyob Das Mas thiab nyob As Nthias Kias. Cov Yus Das yog ib co neeg ua lag luam nyob tas ntiaj teb, ces lawv tau piav qhov uas lawv ntseeg rau luag tej mloog, nyob tas qhov txhia chaw. Xws li Phas Khas, Mab Liab Mas Ntas Las, Mas Tas, Tis Tos, Tis Mos Tes.
Hais txog ‘Phas Khas’ (Pancras) mas nws txiv tau coj nws mus mloog Yes Xus tshaj lub Moo Zoo nyob Yes Lus Xas Les, ces Pas Khas tau paub Pob Zeb. Thaum Yes Xus mus saum ntuj lawm, Phas Khas tsev neeg txais Cim Ntxuav nyob hauv As Nthias Kias. Tom qab nws txiv tuag, Phas Khas khiav mus nyob Poos Tus teb (Pontus), nws mus nyob hauv ib lub qhov tsua. Pob Zeb tuaj ntsib Phas Khas thiab xa nws mus tshaj lub Moo Zoo nyob hauv lub pov txwv Xis Xis Lias (Sicily) ces nws raug cov neeg hauv lub pov txwv muab pob zeb txawb tuag ua tim khawv hauv xyoo 40.
Muaj tej zaj kwv huam piav tias tom qab Yes Xus mus saum ntuj tas, ‘Mab Liab Mas Ntas Las’ nrog Zam mus tshaj lub Moo Zoo nyob Es Fes Xos. Xyoo 50, cov Yus Das hiam cov ntseeg txog Yes Xus, ces lawv muab Mab Liab Mas Ntas Las ntes tso hauv ib lub nkoj cia dej tshoob mus txog lub zos Mas Xes hauv daim av Fab Kis (Nkas Lias teb). Nws tshaj lub Moo Zoo nyob Pos Vees (Provence) thiab nws nyob ua Twj Cuab hauv ib lub qhov tsua tau 30 xyoo ces nws thiaj tuag thaum muaj 79 xyoos.
Thaum cov Yus Das muab pob zeb txawb Tes Fas Nos ntawd, ‘Las Ntxas Los’ coj nws ob tug muam yog ‘Mas Tas’ thiab ‘Mab Liab’ tsiv mus nyob Kws Plos. Thaum Npas Nas Npes thiab Paj Lug tuaj txog Kws Plos, nkawd tau tsa Las Ntxas Los ua tus saib cov ntseeg nyob lub zos Kis Tis Os (Kittion) hauv Kws Plos. Las Ntxas Los tshaj lub Moo Zoo 30 xyoo nyob ntawd.
Tab sis muaj tej zaj kwv huam hais tias Las Ntxas Los thiab Mas Tas nrog Mab Liab Mas Ntas Las caij nkoj tuaj txog Fab Kis teb. Las Ntxas Los mus tshaj lub Moo Zoo nyob Mas Xes thiab nws raug tus vaj Das Mas Xias txiav caj dab hauv lub tsev loj faj. Mas Tas mus nyob Tas Las Nkos (Tarascon) ces nws tshaj lub Moo Zoo rau cov neeg hauv tham tsam ntawd mus txog hnub nws tuag.
