Txij li Yes Xus mus saum ntuj lawm, mas cov nom tswv Yus Das hiam cov neeg ntseeg thiab hiam cov thwj tim heev kawg, ces cov neeg ntseeg ntau leej tsiv mus nyob lwm lub nroog, xws li Das Mas thiab As Nthias Kias hauv Xis Lias teb.
Xyoo tim 36 Xauv nrog cov Leej Choj Yus Das pom zoo muab pob zeb txawj tus Tub Tsob Hwb Tes Fas Nos, ces xyoo 37 Xauv mus cuag tus Thawj Leej Choj. Xauv thov ntawv tso cai mus ntes cov neeg ntseeg. ThaumXauv tab tom mus yuav txog lub nroog Das Mas, ib sij huam txawm muaj ib qho pom kev dawb vog tuaj saum ntuj tuaj ncig nws. Xauv vau hauv av, nws hnov ib lub suab hais rau nws tias “Xauv, Xauv, tim li cas koj hiam kuv?”
Xauv teb tias “Huab Tais, koj yog leej twg?” Lub suab ntawd teb tias “Kuv yog Yes Xus, tus uas koj hiam. Koj sawv, koj mus hauv lub nroog. Yuav muaj neeg qhia kom koj ua dab tsi.”
Cov nrog Xauv mus kev sawv daws theem, lawv ntshai, lawv tsis hais ib lo lus vim lawv hnov lub suab, tiam sis lawv tsis pom leej twg. Xauv sawv hauv av los, nws rua muag pliav, tab sis nws tsis pom kev lawm. Lawv tuav Xauv mus txog hauv lub nroog Das Mas.
Nyob Das Mas, muaj ib tug thwj tim hu ua As Nas Nias yees pom Yes Xus hu nws tias “As Nas Nias!” Nws teb tias “Huab Tais, kuv nyob ntawm no.”
Yes Xus hais tias “Koj mus, koj taug txoj kev ncaj mus txog Yus Das tsev. Koj nug txog ib tug hu ua Xauv nyob Tas Xis tuaj. Tam sim no nws tseem tab tom teev Ntuj. Nws pom ib tug txiv neej hu ua As Nas Nias chaws los tsa tes rau saum nws kom nws rov pom kev tuaj.”
As Nas Nias teb tias “Huab Tais, kuv tau hnov ntau leej hais tias tus neeg ntawd ua phem kawg rau cov neeg ntseeg nyob Yes Lus Xas Les. Nws tuaj ntawm no, mas yog cov Leej Choj twb muab cai rau nws khi cov neeg ntseeg txog koj.”
Yes Xus hais rau As Nas Nias tias “Tus neeg ntawd yog ib yam twj kuv xaiv kom nws coj kuv lub npe mus txog cov neeg teev dab, cov vaj, thiab cov His Xas Lais. Kuv yuav qhia nws tias nws yuav tsum raug txom nyem npaum li cas vim kuv lub npe.”
As Nas Nias thiaj mus, nws chaws mus hauv lub tsev Xauv nyob. Nws tsa tes rau saum Xauv, nws hais tias “Xauv, kuv tus kwv, yog Huab Tais xa kuv tuaj, yog Yes Xus uas nws tau tawm tuaj rau koj pom nyob ntawm txoj kev koj tuaj. Nws xa kuv tuaj cuag koj, kom koj rov qab pom kev thiab txais Leej Ntuj Plig Ntshiab puv koj.”
Tam sis ntawd muaj tej daim zoo li nplai ntses poob ntawm Xauv qhov muag los, nws rov qab pom kev ces nws txais lub Cim Ntxuav. Xauv noj mov, nws rov qab muaj zog tuaj.
Xauv nrog cov thwj tim nyob ob peb hnub hauv Das Mas, ces nws mus nyob hauv cov tsev Txoos uas cov Yus Das sib txoos teev Ntuj. Xauv qhia tias Yes Xus yog Tswv Ntuj Leej Tub. Tas tsoom sid tau hnov, lawv poob siab, lawv hais tias “Tus no, tsis yog tus uas hiam cov neeg ntseeg nyob Yes Lus Xas Les lod?”
Xauv cav tias Yes Xus yog Leej Pleev tiag. Xauv ua li ntawd tau ib ntus, ces cov Yus Das sab laj yuav muab Xauv tua, lawv zov lub tsheej cov qhov rooj nruab hnub hmo ntuj huv si. Thaum hmo ntuj cov thwj tim muab Xauv rau hauv ib lub tawb, lawv tso nws nqes ntawm lub ntsa zeb xov lub tsheej mus sab nraud.
Thaum Xauv tuaj txog Yes Lus Xas Les nws xav mus nrog cov thwj tim nyob, tab sis sawv daws ntshai nws, lawv tsis ntseeg tias Xauv yog ib tug thwj tim tiag. Npas Nas Npes thiaj coj Xauv mus cuag cov Hauv Pauv Xa Lus, Npas Nas Npes piav rau lawv txog qhov Xauv tau pom Yes Xus hais lus rau nws ntawm kev, thiab piav tias Xauv tau tshaj Yes Xus lub npe nyob Das Mas, nws tsis ntshai.
Txij hnub ntawd los Xauv nrog cov Hauv Paus Xa Lus nyob hauv Yes Lus Xas Les, nws ua siab loj tshaj Ntuj Lus thiab tuav txog Yes Xus lub npe. Nws kuj nrog cov Hes Las tham, nws nrog lawv sib cav, ces lawv nrhiav kev muab nws tua.
Cov kwv tij ntseeg Ntuj hnov li ntawd mas lawv coj Xauv mus rau Xes Ntxas Les, thiab lawv tso Xauv rov mus rau Tas Xis uas yog lub nroog nws yug los.
Thaum Tes Fas Nos raug tua tas, muaj ib co neeg ntseeg raug hiam, ces lawv thiaj khiav mus txog Fes Nis Xias teb, txog lub pov txwv Kws Plos, thiab txog lub nroog As Nthias Kias. Lawv tsuas tshaj Ntuj Lus rau cov Yus Das xwb. Nyob hauv lawv muaj tus puav yog cov neeg tuaj ntawm Kws Plos thiab Xis Les Nas tuaj, lawv tshaj Yes Xus lub Moo Zoo rau cov neeg uas hais lus Hes Las, ces cov neeg tig los txais kev ntseeg coob kawg.
Lub Koom Txoos nyob Yes Lus Xas Les hnov lub moo ntawd, lawv thiaj xa Npas Nas Npes mus nyob As Nthias Kias.
Thaum Npas Nas Npes tuaj txog, nws pom Tswv Ntuj pub txiaj ntsim rau cov neeg ntawd mas nws zoo siab, nws pab lawv ua siab loj siab tawv, kom lawv nyob ruaj nreb hauv txoj kev ntseeg txog Yes Xus. Muaj ib pab neeg coob ntseeg txog Yes Xus ntxiv, ces Npas Nas Npes mus nrhiav Xauv nyob Tas Xis.
Thaum Npas Nas Npes nrhiav tau Xauv lawm, nws coj Xauv los nyob As Nthias Kias. Nkawd nyob li ntawd ib xyoo, nkawd qhia ib pab neeg coob kawg. Cov neeg nyob hauv muab cov neeg ntseeg txog Yes Xus hu ua ‘cov Pleev’ (Christian).
Muaj ib hnub cov neeg qhia Yes Xus lub Moo Zoo coj cov kab ke yoo tshaib, thiab lawv tab tom ua lub txoos teev Ntuj, ces Leej Ntuj Plig Ntshiab hais rau lawv tias “Nej qee Npas Nas Npes thiab Xauv nkawd, vim kuv hu nkawd mus ua dua ib txog hauj lwm.”
Thaum lawv ua cov kab ke yoo tshaib tag, thiab ua lub txoos teev Ntuj tag, mas lawv tsa tes rau saum Npas Nas Npes thiab Xauv nkawd, lawv tso nkawd mus tshaj Ntuj Lus rau cov pej kum neeg.
Npas Nas Npes thiab Xauv mus tshaj Yes Xus lub Moo Zoo nyob hauv lub pov txwv Kws Plos uas yog lub pov txwv Npas Nas Npes yug los.
Npas Nas Npes thiab Xauv nkawd caij nkoj mus rau lub pov txwv Kws Plos, nkawd xub tuaj txog lub nroog Xas Las Mis. Nkawd pib tshaj Tswv Ntuj Lo Lus nyob hauv cov Yus Das tej tsev txoos, ces nkawd hla thoob lub pov txwv Kws Plos mus txog rau lub zos Pas Fos. Nyob Pas Fos, muaj ib tug yaj saub cuav hu ua Es Lis Mas, nws yog tus vaj Xes Zus Paj Lug uas nyob Los Mas ib tug tub ncig. Tus vaj txheeb Xes Zus Paj Lug yog ib tug neeg thoob tsib thiab xyuam xim, nws tso neeg tuaj hu Npas Nas Npes thiab Xauv nkawd mus cuag nws, vim nws xav hnov Tswv Ntuj Lo Lus.
Tus yaj saub cuav Es Lis Mas tiv cov lus Npas Nas Npes thiab Xauv nkawd tshaj, nws xav kom tus vaj txheeb tsis txhob txais txoj kev ntseeg txog Yes Xus, ces Xauv ntsia ntsoov Es Lis Mas. Leej Ntuj Plig Ntshiab nyob puv hauv Xauv, ces Xauv hais rau Es Lis Mas tias “Neeg dab tsi! Koj lub tswv yim tsuas kawg nrhiav kev dag luag tej xwb. Koj ua yam twg mas koj ua lim hiam thiab ua zais ntshis. Koj yog dab phem tus tub. Koj yog tus yeeb ncuab ntxub txoj kev ncaj. Thaum twg koj thiaj yuav tseg tsis ua kom Huab Tais txoj kev ncaj nkhaus tuaj? Tam sim no Huab Tais txhais tes yuav ntaus koj, koj yuav dig muag tsis pom lub hnub ib ntus.”
Tam sim ntawd Es Lis Mas tsis pom kev. Tus vaj txheeb pom li ntawd mas nws raws txoj kev ntseeg txog Yes Xus. Txij hnub ntawd los Xauv thiaj siv lub npe Los Mas hu ua ‘Paj Lug’ raws li tus vaj txheeb Xes Zus Paj Lug.
Paj Lug thiab Npas Nas Npes nkawd nyob txwm ib hlis hauv lub pov txwv Kws Plos, ces nkawd thiaj caij nkoj hla dej ntuj mus txog lub nroog Pes Zes nyob tsis deb ntawm lub pov txwv Kws Plos.
Nkawd nyob Pes Zes tsis ntev, ces nkawd mus ko taw txog lub nroog As Nthias Kias nyob Pis Xis Dias teb. Zim txwv no cov teb chaws ntawd hu ua Tws Kis teb.
Paj Lug thiab Npas Nas Npes nkawd mus txog lub nroog As Nthias Kias, mas nkawd tos kom txog hnub Xas Npas Tos uas cov Yus Das sib sau teev Ntuj nyob hauv cov tsev txoos, ces Paj Lug piav Yes Xus lub Moo Zoo rau lawv mloog tias “Tswv Ntuj tsa Yes Xus ua tus cawm neeg, los pab cov His Xas Lais. Tab sis lawv muab nws tua. Lawv nrhiav tsis tau ib yam dab tsi nyob hauv Yes Xus kom txaus muab nws tua, tab sis lawv txiav txim rau nws thiab lawv thov kom tus nom Pis Las Tos muab Yes Xus tua. Lawv tso nws lub cev rau hauv ntxa, tab sis Tswv Ntuj tsa Yes Xus sawv rov los lawm. Kwv tij, Yes Xus yog tus tuaj qhia txoj kev daws txhaum rau nej. Mais Xes txoj cai ua tsis tau kom nej ncaj tuaj raws li nej thov. Yog Yes Xus thiaj yuav ua tau. Leej twg ntseeg txog Yes Xus mas leej twg yuav ncaj tuaj.”
Thaum sawv daws tawm mus, muaj coob leej tig los hwm Tswv Ntuj raws li Paj Lug thiab Npas Nas Npes nkawd. Lwm hnub xya, mas cov neeg yuav luag tas lub tsheej tuaj mloog Tswv Ntuj Lo Lus. Cov Yus Das pom neeg tuaj coob coob, cov Yus Das txawm khib, ces cov Yus Das pib hiam Paj Lug nkawd, kom nkawd tawm hauv As Nthias Kias mus.
Paj Lug nkawd mus txog Is Kos Nias, nkawd kuj chaws mus hauv cov Yus Das lub tsev txoos thiab. Nkawd hais lus zoo, ces ib pab neeg Yus Das thiab Hes Las txais txoj kev ntseeg txog Yes Xus. Cov Yus Das uas tsis kam ntseeg, lawv mus cob cov teev dab kom nrhiav lus rau cov ntseeg.
Paj Lug thiab Npas Nas Npes nkawd tseem nyob ntxiv ntev hauj sim, nkawd ua siab loj. Yes Xus pub kom nkawd ua tau hwj huam yees ntxwv pab nkawd txoj hauj lwm tshaj Ntuj Lus thiab tshaj txog Tswv Ntuj lub txiaj ntsim. Vim tej no ces lub nroog Is Kos Nias thiaj faib ua ob tog; ib tog nrog cov Yus Das tiv Paj Lug thiab Npas Nas Npes, ib tog nrog nkawd. Cov Yus Das nrog lawv cov nom tswv npaj yuav ua phem rau Paj Lug thiab Npas Nas Npes nkawd, lawv npaj xuas pob zeb los tua nkawd. Tab sis nkawd xub paub, ces nkawd khiav mus nkaum nyob hauv Lis Ros thiab Des Npes, thiab nyob ib ncig ntawd. Nkawd tshaj Yes Xus lub Moo Zoo nyob ntawd.
Thaum ntawd yog xyoo 45 txog 47 yog thawj zaug Paj Lug thiab Npas Nas Npes nkawd mus tshaj lub Moo Zoo.
Xyoo 50 txog xyoo 52 Paj Lug rov mus tshaj Tswv Ntuj Lo Lus zaum ob. Paj Lug tshaj Yes Xus lub Moo Zoo mus txog Hes Las teb, uas nyob hauv Aws Los Pas Toob Fab. Lub nroog uas Paj Lug nyob ib xyoo thiab 6 hli yog lub nroog Kos Lis Nthos. Paj Lug tsim ib lub Koom Txoos muaj zog nyob Kos Lis Nthos.
Xyoo 53 Paj Lug rov mus tshaj Yes Xus lub Moo Zoo yog zaum peb. Thaum ntawd, Paj Lug nyob As Nthias Kias hauv Xis Lias teb, ces nws xav mus xyuas thawj cov Koom Txoos. Paj Lug mus ko taw ib lub hlis tej, ces nws mus txog Lws Ros, Des Npes, Is Kos Nias uas nyob hauv Nkas Las Tias teb, thiab Fis Zias teb.
Thaum Paj Lug tuaj txog Es Fes Xos, nws rov pom ob niam txiv As Kis Las thiab Plis Xis Las uas nkawd ua luam muag tsev tsam phooj. Tsaib no, nkawd tau pab Paj Lug nyob Kos Lis Nthos. Nyob Es Fes Xos, Paj Lug kuj ntsib ib tug neeg tshaj Tswv Ntuj Lo Lus hu ua As Pos Los. Lub caij ntawd As Pos Los twb yuav mus tshaj Ntuj Lus nyob Kos Lis Nthos.
Es Fes Xos yog ib lub nroog loj nyob ntawm ntug hiav txwv Mes Dis Tes Las Nes. Yog ib lub nroog nto moo loj nyob tas suam teb As Xias Me, vim tias nyob Es Fes Xos muaj ib lub tuam tsev zoo nkauj cia teev tus poj dab As Tes Mis. Cov pej xeem nyob txawm hauv lub nroog Es Fes Xos muaj txog ob puas txhiab los peb puas txhiab leej.
Paj Lug siv zog qhia Yes Xus lub Moo Zoo nyob Es Fes Xos, nws muaj Leej Ntuj Plig Ntshiab lub zog pab nws. Tswv Ntuj pub kom Paj Lug ua tau tej yam hwj huam loj uas teb chaws pom tsis kam, yam li tej phuam, tej ntaub uas tau chwv Paj Lug lawm, lawv muab los chwv cov neeg mob xwb, ces tus mob zoo hlo, thiab cov dab phem kuj khiav. Nyob Es Fes Xos muaj ib co Yus Das uas lawv yog txiv dab, lawv sim tuav Yes Xus lub npe los ntiab dab rau cov neeg raug dab, lawv hais tias “Kuv tuav txog tus Yes Xus uas Paj Lug tshaj txog nws lub npe, kuv ntiab nej.”
Tab sis tus dab phem teb lawv tias “Yes Xus mas kuv paub nws. Kuv kuj paub tias Paj Lug yog leej twg. Tiam sis nej, kuv tsis paub nej yog leej twg.”
Ces tus neeg raug dab phem tib plhaw mus mos ntiag lawv, muab lawv txhom, muab lawv ntaus sab kawg, lawv mam tawm tau hauv lub tsev mus, lawv liab qab tas, thiab ib ce to tas. Cov neeg nyob Es Fes Xos, tsis hais cov Yus Das los cov Hes Las, sawv daws tau hnov hais txog qhov ntawd mas sawv daws ntshai kawg. Sawv daws cav txog Yes Xus lub npe, ces cov neeg tig los ntseeg coob tuaj. Cov neeg teev dab muaj ntau leej tso lawv tej kev cai ua dab pov tseg, lawv nqa lawv tej ntawv teev dab tuaj hlawv rau sawv daws pom.
Xyoo tim 3 uas Paj Lug nyob Es Fes Xos, lawv muaj lus sib cav ntxhov loj hauj sim yog vim txoj kev ntseeg txog Yes Xus. Muaj ib tug kws ntaus nyiaj hu ua Des Mes Rhias, nws nchuav tej lub me tsev nyiaj teev tus dab As Tes Mis. Nws ua li ntawd, mas cov neeg ua zog tau kev tuaj ua hauj lwm ntau hauj sim nyob hauv nws tsev. Tus ntaus nyiaj ntawd hu nws cov tub zog thiab hu cov neeg nchuav nyiaj tib si tuaj, nws hais rau lawv tias “Cov npawg, peb tau zoo noj, tau zoo hnav, vim peb txoj kev nchuav nyiaj. Qhov no, nej twb paub lawm. Tab sis, nej sawv daws tau pom thiab tau hnov hais txog Paj Lug. Nyob Es Fes Xos thiab nyob tas As Xias teb, tus neeg ntawd ntxias ib pab neeg coob kom lawv raws nws. Nws piav rau sawv daws tias cov mlom peb ua tsis yog ib cov tswv ntuj. Ua li ntawd, mas ntev mus ntshai peb txoj hauj lwm yuav poob nqe, thiab yuav tsis muaj neeg saib lub tsev teev peb tus niam nkauj dab As Tes Mis. Nyob tas As Xias teb thiab tas lub qab ntuj neeg sawv daws puav leej hwm As Tes Mis tab sis ntshai nws lub meej mom yuav ploj xwb.”
Lawv hnov cov lus ntawd tas, sawv daws npau taws heev, lawv qw tias “Peb tus niam nkauj dab As Tes Mis uas saib Es Fes Xos, nws yog tus loj tshaj!” Ces ib me ntshis, lawv ua ntxhov hnyo puv tas lub tsheej. Sawv daws khiav tuaj ntsauv Tws Las Nos lub tsev qhia txuj. Lawv ntes Paj Lug ob tug phooj ywg Mas Xes Dos Nias hu ua Nkas Yus (Gaius) thiab As Lis Tas (Aristarchus).
Paj Lug xav mus hais lus rau tsoom sid, tab sis cov thwj tim cheem nws. Ob peb tug nom tswv uas lawv nrog Paj Lug ntaus phooj ywg kuj hais tas zog kom Paj Lug txhob mus tom Tws Las Nos lub tsev qhia txuj.
Cov neeg nyias hais nyias zaj ua ntxhov hnyo. Cov neeg sib sau nyob ntawd ua ntxhov kawg, cov ntau lawv twb tsis paub tias yog vim li cas lawv thiaj tau sib sau nyob ntawd. Sawv daws ua ib tsaug qw ntev li ob teev tias “Peb niam nkauj dab As Tes Mis, nws yog tus loj tshaj!”
Ces tus nom Los Mas uas kav lub tsheej thiaj tuaj ntuas sawv daws, kom sawv daws rov nyob tswm seeb. Nws hais tias yog tus twg muaj yam xav hais, mas yuav hais ntawm cov rooj sab laj raws li txoj cai. Nws hais tas nrho, ces nws tso tas tsoom neeg kom sawv daws nyias rov mus nyias tsev. Paj Lug tseem nyob Es Fes Xos ib hlis ntxiv. Tsoom pej xeem rov nyob tus lawm. Tab sis Paj Lug nrog tsoom neeg ntseeg sab laj, ces sawv daws xam pom tias Paj Lug yuav tsum tawm mus tshaj Ntuj Lus nyob lwm qhov chaw ib ntus thiaj yuav zoo dua rau sawv daws. Paj Lug rab peev xwm tshaj Ntuj Lus loj, ces cov teev tus poj dab As Tes Mis ntxhov siab.
Paj Lug hla dej ntuj rov mus tsham cov ntseeg nyob Mas Xes Dos Nias teb thiab Hes Las teb 3 hlis. Nws ua lub ntees Hla nrog pab neeg ntseeg nyob Fis Lis Pos.
Paj Lug caij nkoj rov hla dej tuaj txog lub nroog Thuas, Paj Lug nrog cov ntseeg ua cov kab ke lov mov. Hnub ntawd yog Hnub Chiv, Paj Lug nrog sawv daws tham txog ib tag hmo. Ib tug tub hluas hu ua Aws Tis Kos zaum saum qhov rais. Aws Tis Kos tsaug zog, nws cia li poob puag saum txheej 3 mus rau hauv pem teb. Thaum lawv mus tsa nws, ces nws twb tuag lawm. Paj Lug nqes los txog, nws khoov mus tsaws tus tub los puag, nws tsa Aws Tis Kos sawv.
Paj Lug rov nce mus saum tsev, nws rov mus ua lub txoos lov mov rau sawv daws, thiab nrog sawv daws noj Yes Xus lub Cev. Ua li ntawd tas, nws tseem tham ntxiv mus txog kaj ntug, nws mam li mus lawm.
Paj Lug rov qab mus Yes Lus Xas Les. Nyob Yes Lus Xas Les mas cov Yus Das xav muab Paj Lug tua, vim Paj Lug tau tshaj Yes Xus lub Moo Zoo. Thaum cov Yus Das pom Paj Lug hauv lub Tuam Tsev Teev Ntuj, lawv qw hu ib pab neeg coob tuaj ntes Paj Lug. Lawv nthe nthe hais tias “Cov His Xas Lais, nej tuaj pab peb saib. Tus no yog tus niag uas qhia sawv daws nyob tas qhov txhia chaw kom ntxub peb haiv neeg, ntxub Txoj Cai, thiab ntxub qhov chaw no. Nej ntsia saib, nws tseem coj ib co Hes Las tuaj tsuj hauv lub Tuam Tsev Teev Ntuj no, thuam lub chaw ntshiab.”
Lawv nthe nthe li ntawd vim lawv tau pom ib tug Es Fes Xos hu ua Tos Fis Mos nrog Paj Lug ua ke hauv lub tsheej, ces lawv xav tias Paj Lug coj nws mus hauv lub Tuam Tsev Teev Ntuj thiab. Kev cai mas cov Yus Das tsis pub lwm haiv neeg mus hauv lawv lub Tuam Tsev Teev Ntuj. Tas lub tsheej ntxhov hnyo, lawv ntes Paj Lug, lawv tseem npaj yuav muab Paj Lug tua, tab sis muaj neeg khiav mus hais rau tus xab txheeb Los Mas. Tus xab txheeb coj nws pab tub rog tuaj npuj cov neeg ua ntxhov ntawd. Thaum lawv pom tus xab txheeb thiab cov tub rog tuaj, mas lawv tsis ntaus Paj Lug ntxiv. Tus xab txheeb paub tias Paj Lug yog ib tug neeg Los Mas, ces nws tsis ua phem rau Paj Lug. Hnub tom qab tus xab txheeb xav paub tseeb tias cov Yus Das liam dab tsi rau Paj Lug, ces nws daws Paj Lug thiab kom cov Leej Choj, cov Txwj Laus, tuaj sib sau. Nws coj Paj Lug mus rau lawv nug, Paj Lug hais tias “Kuv yog ib tug Fas Lis Xais, kuv niam kuv txiv kuj yog Fas Lis Xais. Tos muaj neeg xav txiav txim rau kuv, los yog vim peb muaj txoj kev cia siab tias cov neeg tuag yuav ciaj rov qab los.”
Paj Lug tseem hais lus tsis tau tu, cov Fas Lis Xais thiab cov Xas Dus Kais twb pib sib ceg lawm, ces sawv daws faib kiag ua ob tog. Cov Xas Dus Kais hais tias tsis muaj kev sawv rov los, tsis muaj Ntuj cov Tshiab, thiab tsis muaj dab. Sawv daws thiaj sib cav ntsuag qees. Muaj ob peb tug Kws Ntawv uas yog tog Fas Lis Xais sawv tsees, lawv siv zog hais nrov tias “Peb tsis pom tus neeg ntawd ua ib qho txhaum dab tsi.”
Hmo ntawd, Tswv Ntuj tuaj xyuas Paj Lug, Tswv Ntuj hais rau nws tias “Koj ua siab loj mog. Koj tseem yuav ua tim khawv txog kuv nyob Los Mas ib yam nkaus li koj tau ua tim khawv nyob Yes Lus Xas Les.”
Cov Yus Das tuav xam yuav muab Paj Lug tua, tab sis tus xab txheeb xa Paj Lug mus rau Xes Ntxas Les. Tsib hnub tom qab tus Thawj Leej Choj As Nas Nias nrog ob peb tug Txwj Laus thiab ib tug Kws Hais Plaub hu ua Tes Tus Lus nqes tuaj txog, lawv tuaj kom Paj Lug rau tus vaj txheeb Fes Lis. Tus vaj txheeb Fes Lis hais rau lawv tias “Nej mus, thaum twg tus xab txheeb Lis Xias tuaj txog mas kuv mam li tu nej rooj plaub.” Ces nws kom tus lwm txheeb kaw Paj Lug rau hauv tsev loj faj.
Xyoo tim 58 thiab 59 Paj Lug nyob hauv tsev loj faj nyob Xes Ntxas Les. Paj Lug ceeb toom rau cov nom saib tsev loj faj tias Yes Xus yog tus Huab Tais sawv rov los. Paj Lug xav mus kom txog cov nom loj tshaj uas nyob tim Los Mas kom lawv txiav txim rau nws.
Thaum cov nom nyob Xes Ntxas Les nrhiav tau ib lub nkoj thauj neeg thiab thauj toob xib yuav hla hiav txwv mus txog Los Mas, mas Paj Lug thiaj caij lub nkoj ntawd. Nws tus phooj ywg Lus Kas ua nws luag mus. Thaum Paj Lug mus kuj muaj ib co neeg Los Mas raug xa mus txiav txim tim lub nroog Los Mas xws li Paj Lug thiab. Tas huv tib si cov neeg nyob hauv lub nkoj muaj 200 leej. Lawv caij nkoj mus, lawv nphav xwv txheej loj.
Paj Lug thiaj hais lawv tias “Cov npawg, tam li kuv pom mas peb mus ntxiv yuav raug sav tsam xwb, ntshai tej toob xib puaj yam thiab lub nkoj yuav puas, tab yog cov neeg mas ntshai yuav puas xwm thiab.” Tab sis tus lwm txheeb tsis mloog Paj Lug, nws tso siab rau tus tswv nkoj thiab tus laus pav. Muaj ib hnub cua hlob hlob tim ntug pov txwv tuaj nplawm lub nkoj. Lub nkoj tiv tsis taus cua ces cua pus lub nkoj mus. Thaum lub nkoj mus ncaj ib lub me nyuam pov txwv, mam li tsav tau nkoj. Tag kis cov cua daj cua dub ntsawj heev kawg, lawv thiaj thau ib co toob xib pov tseg huv si, kom nkoj sib.
Hnub peb, cov tswv nkoj muab cov ncej dai ntaub daws pov tseg huv si. Lawv tsis pom lub hnub, tsis pom lub hli, thiab tsis pom hnub qub ci li, cua ntsawj tas zog, tsis ntaug li. Sawv daws kuj tsis noj mov tau ntev hnub lawm. Paj Lug thiaj sawv ntsug hais rau lawv tias “Cov npawg, khuv xim nej tsis mloog kuv hais kom peb nyob Khes Tas tos. Yog nej mloog, mas peb tsis tau raug xwv txheej zoo li no. Tiam sis ua tau li no lawm los xij. Kuv hais rau nej tias nej yuav ua siab loj mog. Nej tsis muaj ib tug yuav ploj, tsuas yog lub nkoj thiaj yuav puas xwb. Hmo no, kuv tau pom Tswv Ntuj ib tug Tshiab, yog tus Tswv Ntuj uas kuv tsob hwb nws ib tug Tshiab. Nws hais rau kuv tias Paj Lug, koj tsis txhob txhawj, koj yuav tsum mus kom txog tus vaj Xes Ntxas lub rooj txiav txim. Ua li mas Tswv Ntuj pub kom pab neeg nrog koj tsis muaj ib tug puas xwm. Cov npawg, ua li mas peb ua siab loj. Kuv tso siab rau Tswv Ntuj, yuav zoo li nws hais rau kuv xwb. Tiam sis peb lub nkoj yuav mus raug ib lub pov txwv.”
Cua nplawm tau kaum plaub hmos, hmo kaum plaub ntawd, lawv ntab saum ntug hiav txwv As Nrias Tis. Thaum ib tag hmo, cov tswv nkoj mem tau tias ze av lawm, lawv tso tus ntsuas mus ntsuas dej, dej tseem tob li nees nkaum daj. Mus deb me ntsis, lawv rov ntsuas dua dej tob li kaum tsib dag. Lawv ntshai tsam lub nkoj mus tsoo pob zeb, ces lawv tso plaub tug nqe lauj nqes mus rau tom hauv nkoj, ces cov tub tswj nkoj xav khiav, tso lub nkoj pov tseg. Lawv yuav tso lub nkoj me nqes mus hauv dej, lawv dag tias lawv xav mus rub cov nqe lauj tom hauv nkoj. Paj Lug hais rau tus lwm txheeb thiab cov tub rog tias “Yog cov neeg ntawd tsis nyob hauv nkoj mas nej yuav tsis dim kiag.”
Tam sim ntawd cov tub rog txiav cov hlua khi lub nkoj me kom poob lawm hauv dej. Sawv daws tos kom kaj ntug, Paj Lug ntuas kom sawv daws noj mov, nws hais tais “Nej nyob zoo li no tau kaum plaub hnub lawm, nej yoo mov tsis noj dab tsi li. Kuv hais rau nej tias nej yuav tsum noj mov nyem no, yog nej xav dim mas nej yuav tsum noj. Nej yeej tsis muaj ib txog plaub hau yuav hle li.”
Paj Lug hais li no tas nws muab mov los, nws ua Tswv Ntuj tsaug nyob ntawm sawv daws xub ntiag, ces nws ntais mov noj. Sawv daws rov tso siab, ces sawv daws noj mov. Thaum sawv daws noj tsau tas, mas lawv muab cov nplej pov tseg hauv hiav txwv. Thaum kaj ntug cov neeg tswj lub nkoj zeem tsis tau tias lawv nyob qhov twg, lawv tsuas pom zem zuag ib thaj av suab puam nyob ntawm ntug dej xwb. Lawv xav sim saib puas yuav coj tau lub nkoj mus txog lub tshav ntawd. Lawv daws cov nqe lauj, lawv tso cov nqe lauj pov tseg hauv tiv txwv dej, lawv kuj daws cov hlua khi cov duav tswj nkoj. Lawv tsa daim ntaub pem hauv nkoj, ces lawv cia cua pus lub nkoj mus lawm tim ntug dej. Tiam sis lub nkoj mus raug ib lub pob zeb loj nyob hauv qab thu dej. Lub hau nkoj mus khuam nyob ntawd, ua tsis taus zog, dej nphau tej niag nthwv ntsawj tw nkoj, lub nkoj ua qob qis thiab tawg tas, ces cov tub rog xav tias cia muab cov neeg nyob txim tua, ho ntshai tsam lam muaj tus puav ua luam dej khiav. Tiam sis tus lwm txheeb tub rog xav txuag Paj Lug, mas nws tsis kheev lawv tua cov neeg nyob txim, nws hais kom leej twg txawj ua luam dej dhia ua ntej mus txog av.
Lub pov txwv Paj Lug lawv mus txog no hu ua ‘Mes Lis Tas’. Cov neeg nyob hauv lub pov txwv txais lawv. Thaum ntawd los los nag thiab no no, ces lawv sawv daws mus nte taws ntawm lub cub tawg. Paj Lug txawm khaws ib tsuag taws qhuav los pov rau hauv lub cub tawg. Sov sov ces ib tug nab tawm hauv tsuag taws los khawm Paj Lug txhais tes. Thaum cov Mes Lis Tes pom tus nab dai ntawm Paj Lug tes, lawv sib ntxhi tias “Tus ntawd ntshai yog ib tug tua neeg, nws nyuam qhuav dim ntawm dej hiav txwv los, tiam sis Ntuj tsis kheev nws ciaj.”
Paj Lug nchos tus nab rau hauv hluav taws, nws tsis hnov mob qhov twg. Cov Mes Lis Tes xav tias ntshai Paj Lug txhais tes yuav o tuaj, los nws yuav tuag tam sid. Lawv tos tos tsis pom dab tsi, ces lawv hloov tswv yim, lawv hais tias Paj Lug yog ib tug Huab Tais.
Nyob ntawd muaj ib lub loog, yog tus ua hau saib lub pov txwv lub loog, nws hu ua Pus Nplis Yus. Thaum ntawd, Pus Nplis Yus txiv tab tom ua npaws heev thiab raws plab, nws pw. Paj Lug mus xyuas nws, Paj Lug teev Ntuj thiab tsa tes rau saum nws, ces nws tus mon zoo hlo. Lawv pom li ntawd, mas tas cov neeg mob nyob hauv lub pov txwv tuaj cuag Paj Lug, ces Paj Lug kho lawv zoo tas tib si. Cov Mes Lis Tes pub yam ub yam no rau Paj Lug lawv.
Paj Lug lawv nyob Mes Lis Tes tau 3 hlis, lawv mam caij ib lub nkoj As Les Xas Nrias mus nqes nyob Xis Las Kus Xas. Lawv nyob 3 hnub ntawd, ces rov caij nkoj raws ntug dej mus txog Les Zias. Hnub tom qab lawv tuaj txog Pus Tos Lis, lawv nyob ntawd xya hnub, mam rov sawv kev mus rau Los Mas. Thaum txog Los Mas lawm, cov nom kheev Paj Lug nyob nws ib leeg hauv lub tsev thiab nrog tus tub rog zov nws nyob xwb. Thaum mus txog tau 3 hnub, Paj Lug hu cov txwj laus Yus Das tuaj. Thaum sawv daws tuaj txog tas, Paj Lug hais rau lawv tias “Cov kwv tij, kuv tsis tau ua dab tsi txhaum rau peb haiv neeg, los txhaum rau peb tej kev cai, tiam sis lawv ntes kuv nyob Yes Lus Xas Les, thiab lawv muab kuv rau cov Los Mas. Thaum cov Los Mas tshuaj lus tas, lawv xav tso kuv, vim kuv tsis tau ua dab tsi yuav tsim nyog kom kuv tuag. Tiam sis cov Yus Das tsis kam tso, kuv thiaj tau hu txog tus vaj Xes Ntxas uas nyob Los Mas no, tsis yog vim kuv xav liam dab tsi txog kuv haiv neeg. Vim li no, mas kuv thiaj xav nrog nej tham thiab hais rau nej paub. Kuv ob txhais tes khi rawv hlua li no, mas yog vim kuv tso siab rau tus cawm peb tsoom His Xas Lais.”
Cov Yus Das teb Paj Lug tias “Peb tsis tau txais ntawv dab tsi tuaj Yus Das teb tuaj hais txog koj li. Cov kwv tij tuaj txog ntawm no, kuj tsis tau hais lus phem dab tsi qhia txog koj rau peb. Tiam sis peb xav hnov koj piav koj zaj tswv yim rau peb mloog. Vim peb paub tias nyob tas qhov txhia chaw sawv daws sib cav txog nej tog uas ntseeg tias Yes Xus yog Huab Tais.”
Paj Lug tuaj txog Los Mas xyoo 60, tab sis twb pom muaj tej pab neeg coob ntseeg txog Yes Xus tau 20 thiab 30 xyoo ua ntej. Cov Yus Das uas ntseeg txog Yes Xus nyob Yes Lus Xas Les muaj tej yim tuaj ua luam, los sis tuaj tsim toob xib nyob Los Mas, Paj Lug twb paub lawv leej puav. Tsib xyoos ua ntej Paj Lug nyob Kos Lis Nthos nws twb xa ib tsab ntawv ntev ntev tuaj qhuab qhia cov Yus Das uas ntseeg Ntuj nyob Los Mas. Yog vim muaj tej ntawd, mas cov Yus Das uas tuaj ntsib Paj Lug nyob Los Mas ib txhia yog cov neeg ntseeg txog Yes Xus ti txha. Tab sis ib txhia tsis to taub zoo txog kev ntseeg txog Yes Xus tias zoo li cas, lawv thiaj hais rau Paj Lug tias “Peb xav hnov koj piav koj zaj tswv yim rau peb mloog, vim nyob tas qhov txhia chaw muaj tej pab neeg Yus Das sib cav txog nej tog uas ntseeg txog Yes Xus.”
Cov Yus Das tuaj nrog Paj Lug tham nyob hauv nws tsev, Paj Lug nthuav nws zaj rau lawv mloog, nws hais txog Tswv Ntuj lub Ceeb Tsheej thiab nws nrhiav tej lo lus zoo kom lawv ntseeg txog Yes Xus, nws muab cov lus nyob hauv Mais Xes txoj cais thiab cov Yaj Saub los zeem tseeb txog Yes Xus. Paj Lug piav ib hnub txij thaum sawv ntxov mus txog tsaus ntuj. Muaj ib txhia txais Paj Lug cov lus zoo, ib txhia tsis ntseeg li. Paj Lug tsis yuam cov Yus Das nyob tim Los Mas teb kom lawv ntseeg txog Yes Xus, Paj Lug tshaj Yes Xus cov lus rau cov neeg teev pej kum dab.
Cov nom tswv Los Mas yuav txiav txim rau Paj Lug, mas lawv yuav tos saib puas muaj ib co neeg Yus Das tuaj ntawm Yes Lus Xas Les tuaj kom nws. Ntshai yuav tos ib ntus ntev hauj sim. Li ntawd, cov nom tswv Los Mas ntiav ib lub tsev rau Paj Lug nyob. Cov nom tswv tso ib tug tub rog nrog nws nyob. Lawv kuj cia cov pej xeem tuaj ntsib Paj Lug tau ywj siab. Lus Kas tau nrog Paj Lug nyob Los Mas ntev.
Xyoo 66, muaj ib tug vaj yuam cov neeg ntseeg txog Yes Xus heev kawg, lawv ntes Paj Lug, thiab txiav lub txim muab Paj Lug tua, lawv txiav Paj Lug caj dab, ces Paj Lug tas sim neej.
