TUS MLOOG THIAB UA RAWS LI YES XUS QHIA, MAS YOG NWS MUAB NWS TXOJ SIA TSO RAU HAUV TSWV NTUJ (MT 7: 21, 24-27)
Thaum Yes Xus pom tsoom sid coob coob raws nws, ces Yes Xus nce mus saum ib lub me nyuam roob, nws qhia lawv txog cov tau txoj hmoov zoo, thiab Yes Xus nthuav Txoj Cai lub ntsiab rau sawv daws mloog. Yes Xus hais nws cov lus tas, mas nws thiaj hais cov lus hauv hnub no. Yes Xus hais tias “Tsis yog cov uas hu kuv ua “Huab Tais, Huab Tais,” yuav tau mus hauv Ntuj lub Ceeb Tsheej. Yog cov uas ua raws li kuv Txiv nyob saum ntuj lub siab nyiam thiaj yuav tau mus.”
Kev ua raws li Leej Txiv lub siab nyiam yog ua zoo li cas?
Nyob rau hauv peb kev ua neej, peb yeej paub tias txog kev phem kev zoo, peb muaj peev xwm ua raws li Leej Txiv lub siab nyiam, yog peb xaiv txoj kev zoo taug, peb tso kev ua phem pov tseg. Yam twg ua txhaum txoj cai, ua txhaum rau luag lwm tus, mas peb tsis txhob ua; peb xaiv txoj kev ncaj ncees taug. Qhov no yog peb ua haum Huab Tais Leej Txiv lub siab.
Yes Xus tuaj qhia kom peb hlub luag, ntsia pom Tswv Ntuj nyob hauv cov neeg nyob ib ncig peb. Yes Xus qhia tias “Thaum nej pub mov rau ib tug neeg me me noj, mas qhov ntawd yog nej ua rau kuv.” Qhov no yog txoj hau kev rau yus coj lub neej ntshiab, yog txoj kev ua xis Tswv Ntuj siab. Yog peb ua li no, qhov kawg peb yeej tau mus nyob hauv Ntuj lub Ceeb Tsheej xwb.
Tej zaum nej yuav hnov ib txhia hais tias “Tsuav yog kuv ntseeg Tswv Ntuj xwb, ces kuv yeej yuav tau mus saum ntuj lawm, kuv tsis yuav ua cov hauj lwm sis nyiam sis hlub li.” Los muaj tej tus hais tias “Kuv tsis tas yuav mus teev Ntuj los yog pab luag tej yeej tau, vim kuv twb paub Huab Tais Yes Xus zoo lawm.” Yes Xus qhia peb kom txhob xav zoo li ntawd, Yes Xus thiaj li hais tias “Tsis yog cov hu kuv ua Huab Tais yuav tau mus hauv Ntuj lub Ceeb Tsheej, tab sis yog cov ua raws li kuv Txiv nyob saum ntuj lub siab nyiam, lawv thiaj yuav tau mus hauv Ntuj lub Ceeb Tsheej.”
Yes Xus hais tias “Leej twg ua raws li cov lus kuv nyuam qhuav hais, mas tus neeg ntawd, piv tau rau ib tug neeg xyuam xim txhim tsev rau saum tsua. Thaum los nag hlob, deb sab siv huam thiab cua tshuab ntsawj, mas nws lub tsev yuav tsis vau.”
Yaj Saub His Xais ntuas cov Yus Das tias “Huab Tais Tswv Ntuj cia tus neeg tso siab rau Tswv Ntuj nyob thaj yeeb. Nej tso siab rau Huab Tais Tswv Ntuj mus ib txhis, vim Huab Tais Tswv Ntuj yog lub tsua nyob tiam dhau tiam.”
Thaum peb paub li no, peb thiaj to taub tias tus neeg mloog thiab ua raws li Yes Xus cov lus qhia, mas yog nws tab tom muab nws txoj sia tso rau hauv Huab Tais Tswv Ntuj, nws yuav nyob thaj yeeb mus li.
Yes Xus cov lus qhia lub ntsiab yog hais txog dab tsi?
Kawg yog hais txog kev sis nyiam sis hlub; yam li hlub cov neeg txom nyem, nyiam tus ntxub yus, tsim kev haum xeem nrog tus tsis nrog yus nyob ib tog, pub rau tus tsis muaj, pab tus lub zog me. Tej no yog lub ntsiab hauv Yes Xus cov lus qhia.
Tswv Ntuj cov lus hauv hnub no thiaj yog txhib peb siab kom peb tawm mus tsim txoj kev sis nyiam sis hlub, mas peb txoj sia thiaj yuav nyob tau ruaj thiab nyob thaj yeeb mus li.
Yes Xus hais tias “Tus twg hnov”, mas yog nws tab meeg hais rau cov neeg paub Yes Xus cov lus thiab tau pom tias Yes Xus cov lus zoo lawm, tab sis lawv tsis muab siab rau ua raws; yam li peb cov neeg ntseeg.
Yes Xus tsis nyiam cov uas lawv lub ncauj hais tias lawv ntseeg txog Yes Xus, tab sis lawv tsis mloog Yes Xus cov lus. Cov neeg nruaj nreb yog cov mloog Yes Xus lus thiab coj tus yam ntxwv raws li Yes Xus hais. Vim li ntawd, peb cov neeg ntseeg yuav ceev faj zoo; peb yog cov hnov Yes Xus cov lus, tab sis peb puas yog cov neeg ua raws li Yes Xus qhia rau peb.
Peb yuav ua neeg xyuam xim tsa tsev tsev rau saum pob zeb, peb tsa peb lub neej rau saum Yes Xus lub Moo Zoo mog, vim tias Yes Xus zaj tswv yim khov kho li lub tsua loj.
Yes Xus lub Moo Zoo twb kav tau ob txhiab tawm xyoo los lawm thiab tseem muaj zog mus li, hos neeg zaj tswv yim kav tsis tau ib puas xyoo twb yuav dua mus. Peb paub tias peb sim neej muaj ntau yam xwm tshwm los nphav peb zoo li tej nthwv cua nplawm ntws, yog zoo li tej dej nphau nphwv. Peb puas yuav muaj lub siab khov kho, peb puas yuav txawj ua neeg ruaj ntseg ntwb nto. Yog peb tsis muaj ib tug neeg nres peb kom peb ua siab loj xws li Yes Xus tau ua, mas ntshai thaum txog lub caij chim siab, peb yuav tsis muaj zog tiv kev ntxhov.
Yog peb muaj Yes Xus lub Moo Zoo pab peb ua neeg thoob tsib thiab yog peb muaj Yes Xus lub zog pab peb, mas peb yuav hla dhau lub caij nyuaj siab. Peb lub tsev yuav tsis vau, peb lub neej yuav nyob tus yees mus li.
Tus uas niaj hnub khaws Yes Xus cov lus tseg hauv nws nruab siab nws muaj zog tiv tas txhua yam tuaj nphav nws. Yes Xus lub Moo Zoo yog lub pob zeb yog lub tsua cawm peb.
Peb ua neej nyob hauv lub qab ntuj no, mas muaj ntau yam kev haub ntxias tuaj raug peb tsis tseg, peb yuav thov Tswv Ntuj pub kev thoob tsib rau peb, kom peb ua tau tus neeg xyuam xim coj lub neej mus raws li Yes Xus cov lus qhia, kom peb txhob ua neeg ruam saib ntiaj teb lub cuab tam thiab neeg lub siab ntshaw los ua qhov loj. Lub caij Tos Huab Tais, peb yim mloog thiab yim ua raws Yes Xus cov lus qhia kom sis nyiam sis hlub, mas hnub Yes Xus tuaj txog, peb thiaj muaj cuab kav tsa ncauj hais tias “Yes Xus, koj yog kuv tus Huab Tais.”
