Aus Nkus yug los nyob hauv tuam ceeb Los Mas. Nws yog ib tug Txiv Twj Cuab Npes Nes Dis Tis. Aus Nkus tau lub npe tias ‘Tus Hauv Paus Xa Lus rau haiv neeg Aas Kiv’.
Xyoo 595 Vaj Qhia Nqes Nkos Lis xa nws nrog 40 tus Txiv Twj Cuab mus tshaj Yes Xus lub Moo Zoo nyob hauv tus vaj Aas Kiv lub nroog Kaas Tos Npes Lis.
Thaum Aus Nkus lawv sawv kev mus, mas lawv txhawj hauj sim, vim yav nram ntej Aas Kiv teb nto moo phem. Muaj lus moo cua hais tias cov Aas Kiv noj lawv cov yeeb ncuab lub plawv, thiab lawv hais ib xeem lus uas tsis muaj neeg to taub. Luag hais kam tias Aas Kiv teb yog lub teb chaws uas cov neeg tuag tus ntsuj plig mus nyob txim mus li. Cov Txiv Twj Cuab hnov zeej tsoom hais tej lus xaiv lus ncua ntawd, mas lawv ntshai. Tab sis Vaj Qhia nyob Los Mas hais kom lawv mus, ces lawv 40 leej ua ib siab sawv kev mus.
Thaum Aus Nkus lawv tuaj txog Aas Kiv teb, mas tas txhia yam tsheej xeeb tuaj zoo heev. Tus vaj Aas Kiv hu ua ‘Es Thes Npes’ (Ethelbert) nrog nws poj niam Npes Tas thiab nws cov thawj tub rog lawv sawv daws zaum hauv tsob qab ntoo. Lawv pom Aus Nkus nrog cov Txiv Twj Cuab tuaj ua tej kab sab, lawv ke hu cov zaj nkauj teev Ntuj, ke nquam ib tug ntoo cuam nyiaj thiab Yes Xus ib daig duab loj loj.
Tus vaj Es Thes Npes nrog Aus Nkus sib tham ib hnub, nws nug ntau yam hais txog Yes Xus cov lus thiab lub neej. Tus poj vaj Npes Tas ua tus txhais lus rau nws tus txiv. Tus vaj Es Thes Npes mloog Aus Nkus cov lus tas, nws tso lus kheev tshaj Yes Xus lub Moo Zoo rau nws tsoom pej xeem. Nws pub ib lub tsev ze ntawm lub tuam tsev rau Aus Nkus lawv nyob.
Ib xyoos tom qab, yog hnub tim 1 lub 6 hli ntuj xyoo 597, yog hnub uas lub Koom Txoos Kav Tos Liv ua lub ntees cav txog Leej Ntuj Plig nqes los, ces tus vaj Es Thes Npes nrog nws cov thawj tub rog feem coob txais lub Cim Ntxuav.
Lub 11 hlis, xyoos 597 Vaj Qhia xa ib tug Tswv Qhia tuaj tsa Aus Nkus ua thawj tug Tswv Qhia saib lub Koom Txoos nyob Aas Kiv teb. Thaum txog hnub ua hmoov Yes Xus yug, muaj ib vam tus neeg Aas Kiv txais lub Cim Ntxuavnyob hauv ib tug dej. Tus vaj Es Thes Npes zoo siab tas nrho, nws muab nws lub tuam tsev hauv lub nroog Kaas Tos Npes Lis pub rau Tswv Qhia Aus Nkus nyob.
Vaj Qhia xav tsim lub Koom Txoos kav tas Aas Kiv teb, ces nws ceeb toom tuaj rau Aus Nkus tias yav tom ntej yuav muaj 3 tug Tuam Tswv Qhia saib cov ntseeg nyob tas Aas Kiv teb. Ib tug nyob Kaas Tos Npes Lis, ib tug nyob Loos Doos (London), thiab ib tug nyob Yob (York). Yuav muaj 12 tug Tswv Qhia nyob hauv cov nroog me pab tus Tuam Tswv Qhia.
Xyoo 604 Aus Nkus thiaj tag sim neej.