Zam yug hnub tim 6 lub 1 hlis 1499 hauv yim neeg nplua nuj nyob Xyis Pas Yas teb. Thaun muaj 14 xyoos, nws txiv xa nws mus kawm ua kws lij choj, tab sis xyoo 1517 Zam tawm hauv tsev kawm ntawv. Zam rov los nyob hauv nws lub zos, nws siv sij hawm 3 xyoos coj lub neej ntshiab. Muaj ib tug Leej Choj dhau kev pom Zam, nws ntuas kom Zam mus kawm ua tub tshaj Ntuj Lus. Zam kawm tau tsis ntev ces nws niam thiab txiv txawm tuag.

Xyoo 1526 Zam txais Cim Tiag Tes ua Leej Choj. Txiv Plig Zam muab nws txiv lub cuab tam muag los faib rau cov neeg txom nyem. Txiv Plig Zam txiav siab meej tias nws yuav mus tshaj Ntuj kev cai rau Mes Xis Kos teb, ces Txiv Plig Zam ntoj kev mus rau Xes Vis Las (Seville) kom tau caij nkoj hla mus Mes Xis Kos. Txiv Plig Zam ua Thaj Txi Ntuj thiab nthuav Ntuj Lus tau ntxim Txiv Plig Hes Nas Dos (Hernando de Contreras) siab kawg, ces Txiv Plig Hes Nas Dos hais txog Txiv Plig Zam rau Tswv Qhia hauv Xes Vis Las. Tswv Qhia thiaj cheem Txiv Plig Zam kom txhob mus rau Mes Xis Kos teb, cia nws pab ua Tswv Ntuj hauj lwm nyob hauv lub Ceeb Koom Txoos.

Xyoo 1532 Txiv Plig Zam ntuas cov nom tswv kom tso tseg lawv tus cwj pwm tsis zoo, ces cov nom tswv tuaj ntes Txiv Plig Zam mus kaw hauv tsev loj faj tau ib xyoos.

Xyoo 1534 Txiv Plig Zam mus nyob hauv Ceeb Koom Txoos Kos Dos Npas (Cordoba), ces nws txhim tsa cov tsev kawm ntawv nyob ntau lub zos, thiab ua tus tswj lub tsev kawm txuj txheej siab Npas Es Zas (Baeza).

Xyoo 1551 Txiv Plig Zam lub cev tsis muaj zog thiab muaj mob. Tim 10 lub 5 hlis 1569 Txiv Plig Zam tas sim neej.