1 Xis Moos Pob Zeb, Yes Xus Pleev tus tub txib thiab tus Hauv Paus Xa Lus, sau ntawv tuaj rau cov neeg txais tib txoj kev ntseeg, muaj nqe xws li peb txoj, vim txoj kev ncaj uas tuaj ntawm Yes Xus Pleev uas yog Tswv Ntuj thiab yog tus cawm peb. 2 Thov kom nej tau txais txiaj ntsim thiab kev thaj yeeb ntau ntau nyob hauv txoj kev paub Tswv Ntuj thiab paub peb tus Huab Tais Yes Xus.
3 Tswv Ntuj lub hwj huam tau pub tas puas tsav yam txiaj ntsim hais txog txoj sia thiab qhia kev hwm Ntuj. Nws tau ua kom peb paub tus tau siv nws lub hwj chim thiab nws lub siab ntshiab los hu peb.
4 Yes Xus lub hwj chim thiab lub siab ntshiab muab cov lus tsim txiaj thiab cov lus cog loj pub rau peb. Vim cov lus Ntuj cog no, mas peb koom tau Ntuj lub hwj chim, thiab peb dim ntawm txoj kev lwj uas yug ntawm ntiaj teb kev ntshaw los.
5 Nej yuav siv zog muab nej txoj kev ntseeg los tsim kev zoo, muab kev paub txuj los tsim kev zoo, 6 nej yuav caiv txaj haum txoj kev paub txuj, nej yuav caiv txaj tswj lub cev phim ib lub siab ruaj nreb, nej yuav muab lub siab ruaj nreb los txhim txoj kev teev Ntuj, 7 nej yuav muab kev teev Ntuj los txhim txoj kev phooj ywg, thiab muab kev phooj ywg los tsim kev nyiam .
8 Yog nej ua tau tej ntawd tas huv tib si, los yog nej ua tau ntau yam li ntawd lawm, mas tej ntawd yuav tsis cia nej nyob dag, vim tej ntawd yuav txi txiv nyob hauv txoj kev paub peb tus Huab Tais Yes Xus Pleev. 9 Tus tsis ua tas txhua yam uas hais los no, mas nws yog ib tug dig muag, tsis pom kev deb. Nws tsis nco qab ntxuav nws cov txhaum thaud pov tseg.
10 Kwv tij, nej yeej meem nyob ruaj hauv txoj kev uas Tswv Ntuj hu nej thiab xaiv nej kom nej los nyob. Yog nej ua li ntawd, mas nej yuav tsis ntog ib zaug. 11 Yog nej ua li ntawd mas Ntuj yuav pub kev dav rau nej mus hauv tus Huab Tais cawm seej Yes Xus Pleev lub Ceeb Tsheej nyob mus li.
12 Txhua yam uas kuv tau hais rau nej lawm, mas kuv yuav ua kom nej rov nco txog tej ntawd. Nej twb paub tas txhua yam, thiab nej nyob ruaj nreb hauv qhov tseeb, tsis kav kuv yuav rov hais tej ntawd tsis tseg rau nej mus li.
13 Lub caij kuv tseem nyob hauv qhov chaw nkaum no, phim kuv yuav rov hais kom nej nco ntsoov, kom nej ceev faj.
14 Kuv paub tias, tshuav tsis ntev kuv yuav tsum tso kuv qhov chaw nkaum no tseg : peb tus Huab Tais Yes Xus Pleev twb qhia kuv paub lawm. 15 Tab sis kuv yuav muab siab rau ua kom, thaum kuv ncaim mus lawd, nej nco ntsoov txog tej no huv tib si txhua lub sij hawm.
16 Peb tsis tau piav raws li tej zaj dab neeg uas cov neeg ncauj npliag tau xev, peb tsuas tau qhia nej kom nej paub peb tus Huab Tais Yes Xus Pleev lub hwj huam, thiab paub tias nws yuav los. Peb yog ib co tim khawv tau pom xyeem nws lub hwj chim ntawm peb qhov muag.
17 Leej Pleev txais koob meej thiab txais hwj chim ntawm Leej Txiv Tswv Ntuj. Hnub uas Leej Pleev txais koob meej, yog hnub uas Leej Txiv lub suab muaj hwj xyeej nrov tuaj hais tias : ‘Kuv Leej Tub, tus kuv nyiam, nws tau kuv lub txiaj ntsim tas huv tib si.’
18 Lub suab ntawd, peb tau hnov nrov saum ntuj tuaj, hnub uas peb nrog Yes Xus nyob saum lub roob ntshiab. 19 Li ntawd, peb haj yam ntseeg cov Yaj Saub tej lus khov dua. Nej ua tib zoo txais tej lus ntawd thiab mog. Tej lus ntawd yog ib lub teeb ci hauv qhov tsaus ntuj. Yog lub teeb ci mus txog lub caij nkauj hnub tawm tim hauv ntuj los ziab, yog lub teeb ci mus txog lub caij uas lub hnub qub kaj ntug tawm los ntsais hauv nej lub siab.
20 Thawj yam uas nej yuav tsum paub, yog qhov no : nyob hauv Ntawv Ntshiab, tsis muaj ib lo lus uas tus Yaj Saub yuav lam hais raws li nws xav. 21 Tsis yog vim neeg lub siab xav, ces cia li muaj lo lus ua yaj saub tawm los, yog vim Leej Ntuj Plig Ntshiab tshoj, ces thiaj muaj tej tus neeg hais tau cov lus tuaj ntawm Tswv Ntuj tuaj.

1 Yav dhau los lawd, muaj ib co yaj saub cuav sawv los nyob hauv tsoom pej xeem. Tseem yuav muaj ib co kws txoj cai cuav sawv hauv nej los thiab. Lawv yuav nyiag coj tej pab ncaim los qhia txoj kev ploj rau hauv nej, lawv nrauj tus Xib Hwb uas them nqi txhiv lawv, lawv yuav coj txoj kev ploj rov los rau lawv sai. 2 Lawv coob leej yuav mus taug txoj kev ua dev ua npua. Vim lawv, mas txoj kev qhia qhov tseeb yuav raug luag thuam. 3 Vim lawv ntshaw nyiaj txiag, lawv nyiam hais lus nkhaus, lawv tseem yuav muab nej muag. Tau ntev los txoj kev nplua txim rau lawv tsis tau nyob dag, hos txoj kev rhuav lawv yeej tsis tau pw tso dab ntub li.
4 Tswv Ntuj tsis tau zam rau cov Tshiab uas tau ua txhaum. Nws muab cov Tshiab pov rau hauv ntuj txias teb tsaus, nws muab lawv kaw rau hauv cov qhov taub tsaus ntuj nti. Tswv Ntuj yuav cia lawv nyob hauv cov qhov taub ntawd mus txog lub caij txiav txim. 5 Thaum ub Tswv Ntuj tsis zam rau lub qab ntuj neeg. Tswv Ntuj tsuas txuag kom yim leej neeg dim xwb. Cov neeg dim ntawd ib tug yog Nos Hes, nws yog tus tshaj txoj kev ncaj, lub zim txwv Tswv Ntuj tso dej nag los nyab tsoom neeg thuam Ntuj nyob ntiaj teb no. 6 Tswv Ntuj tau muab ob lub nroog Xos Dos Mas thiab Nkos Mos Las rhuav ua plua tshauv. Nws ntxeev ob lub nroog ntawd ua piv txwv qhia tsoom neeg uas yav tom ntej lawv yuav tsis hwm Ntuj .
7 Tswv Ntuj npo Los, tus siab ncaj, vim Los tu siab rau txoj kev ua dev ua npua tua neeg. 8 Los, tus siab ncaj nrog cov neeg ntawd nyob ua ke, nws niaj hnub pom thiab hnov lawv ua tej dej num hla txoj cai, Los lub siab ncaj niaj hnub raug kev txom nyem.
9 Huab Tais txawj npo cov neeg hwm Ntuj kom lawv txhob raug xwv txheej. Huab Tais kuj txawj tseg cov siab tsis ncaj cia tos lub caij txiav txim, kom lawv txais lawv lub txim. 10 Cov uas yuav raug lub txim hnyav, yog cov neeg mloog lub cev nqaij, yog cov ntshaw ua tej yam qias tsuas lawv lub cev, yog cov thuam Huab Tais txoj kev ua Vaj. Lawv muaj cuab kav kawg, lawv khav theeb, lawv tsis ntshai thuam cov Tshiab lub hwj chim.
11 Tsis kav cov Tshiab uas muaj zog dua, muaj hwj huam dua, tsis txiav txim rau lwm cov Tshiab nyob ntawm Huab Tais xub ntiag. 12 Cov kws txoj cai cuav yog zoo li ib co tsiaj tsis muaj tswv yim, lawv tau txais txoj hmoov puas tsuaj. Lawv tsawm tej yam uas lawv tsis paub. Lawv yuav raug kev puas tsuaj xws li cov dab phem. 13 Yog tus nqi zog ntawm lawv txoj kev tsis ncaj. Lawv tseem qab siab ua dev ua npua nruab hnub nrig. Lawv yog neeg tsis huv, lawv nyiam ua phem, lawv zoo siab nrog nej koom tej rooj qav kom lawv tau kev dag nej. 14 Lawv ob lub qhov muag ntsia ntsoov tus poj niam nyiam deev hluas, lawv qhov muag ua txhaum tsis tseg. Lawv dib cov neeg siab tsis khov. Lawv xyaum kom lawv lub siab ntshaw nyiaj txiag. Lawv yog cov neeg tsim nyog raug luag foom phem. 15 Lawv tso kev ncaj pov tseg, lawv tsim nyog taug Npas Las Has nyob Pes Os txoj kev. Npas Las Has nyiam kev tsis ncaj tus nqi. 16 Nws tsis mloog Ntuj lus. Thiaj muaj ib tug cem nws. Ib tug tsiaj tsis txawj hais lus tau qhib ncauj hais lus xws li suab neeg, tus tsiaj cheem tus yaj saub ntawd kom nws tsis txhob hais nws zaj lus vwm.
17 Cov kws txoj cai cuav ntawd yog ib co qhov dej txhawv tsis muaj dej, yog ib co huab pw hav uas khaub zeeg cua tshuab ya mus. Ntuj tshwj lub teb chaws tsaus ntuj nti tseg rau lawv. 18 Lawv hais tej lo lus loj loj, tab sis tsis muaj ntsiab. Lawv siv lub cev nqaij txoj kev ntshaw, thiab kev ua dev ua npua mus dib cov neeg nyuam qhuav dim ntawm tej pab neeg coj lub neej yuam kev.
19 Cov kws txoj cai cuav cog lus tias sawv daws yuav tau txoj kev twj lij, tab sis cov kws txoj cai ntawd twb yog kev lwj cov qhev. Vim tias thaum yus zwm rau leej twg, mas yus yog leej twg tus qhev. 20 Chiv thawj, lawv kuj paub txog Yes Xus Pleev uas yog tus Huab Tais Cawm neeg, ces thaum ntawd lawv dim ntawm ntiaj teb neeg txoj kev qias. Tab sis yav tom qab no, lawv rov qab taug txoj kev qias dua, ces lawv lub neej yim huab phem dua thawj txoj kev qias. 21 Txhiaj khoov lawv tsis txhob paub txoj kev ncaj, zoo dua paub tas lawm, tab sis ho ncaim ntawm lo lus qhia ntshiab uas lawv tau txais.
22 Lo lus paj lug no hais qhov tseeb txog lawv : “Tus dev rov mus noj nws cov ntuav.” “Tus niam npua uas luag nyuam qhuav muab ntxuav tas nrho, rov mus da hauv pas av.”

1 Cov zoo nyiam, tsab ntawv no yog tsab ob uas kuv xa tuaj rau nej. Nyob hauv ob tsab ntawv no kuv rov hais txog tej yam uas tsim nyog nej yuav nco ntsoov txog, kom nej lub tswv yim ras dheev txog. 2 Kuv xav kom nej nco txog cov lus uas cov Yaj Saub Ntshiab tau xub ceeb toom ntxov los, thiab nco txog tus Huab Tais Cawm Seej lo lus uas nej cov hauv paus xa lus tau qhia nej. 3 Qhov nej yuav tsum xub paub yog qhov tias thaum txog hnub kawg, muaj ib co neeg thuam Ntuj yuav coj lawv cov lus thuam tuaj. Cov neeg ntawd yog cov neeg mloog lawv lub siab ntshaw, lawv yuav thuam tias :
4 “Yes Xus cog lus tias nws yuav los. Nws lo lus dua qhov twg lawm ? Txij thaum cov yawg koob mus tsaug zog los txog tav no, mas txhua tsav txhua yam tseem nyob ib yam li thaum ntuj tsim teb raug los.”
5 Cov neeg thuam ntawd ua txoj tsis paub tias, puag thaum ub, cov txheej ntuj, thiab lub ntiaj teb tshwm hauv dej los vim Tswv Ntuj Lo Lus. 6 Tom qab no, vim dej nyab, mas lub qab ntuj neeg thiaj ploj tas lawm. 7 Hais txog cov txheej ntuj thiab lub ntiaj teb tam sis no, mas Tswv Ntuj tib lo lus qub thaud txuag kom lawv nyob mus txog hnub kawg rau hluav taws hlawv, ces cov tsis hwm Ntuj yuav ploj.
8 Cov zoo nyiam, nej tsis txhob ua zoo li nej tsis to taub tias, nyob ntawm Huab Tais xub ntiag, ib hnub yog zoo li ib txhiab xyoo, ib txhiab xyoo yog zoo li ib hnub. 9 Huab Tais tsis ncua lo lus nws cog xws li qee leej uas lawv thuam tias Huab Tais ua yam twg mas nws ua qeeb qeeb. Tab sis, yog vim Huab Tais ua siab ntev rau nej, nws tsis xav kom ib tug ploj li, nws tsuas xav kom sawv daws nyob mus txog hnub uas lawv tig los yuav lub siab tshiab.
10 Huab Tais lub Hnub Nyoog yuav los txog xws li ib tug tub sab. Hnub ntawd, cov txheej ntuj yuav yaj ntshis rau hauv ib lub suab xuav nrov nrov, txhua tsav txhua yam yuav kub hnyiab thiab yuav yaj tas, lub ntiaj teb thiab tas ib puas tsav yam dej num hauv ntiaj teb yuav kub hnyiab yaj tas.
11 Yog vim txhua yam yuav yaj tas li ntawd, mas nej yuav tsum coj tus yam ntxwv ntshiab, thiab yuav teev Ntuj tsis tseg, 12 vim nej tos Tswv Ntuj lub Hnub Nyoog, mas nej xav kom Tswv Ntuj lub Hnub Nyoog los txog sai dua. Hnub ntawd cov txheej ntuj yuav kub hnyiab thiab yuav plam tas, hluav taws yuav kub txhua tsav txhua yam yaj tas huv tib si.
13 Peb tos txog ib lub ntuj tshiab thiab ib lub ntiaj teb tshiab, raws li Lo Lus Tswv Ntuj cog : txoj kev ncaj yuav nyob txawm hauv lub ntuj lub teb tshiab.
14 Cov zoo nyiam, lub caij nej tos no, nej yuav rau siab ua kom Tswv Ntuj pom tias nej tsis tsuas ib tee qias, thiab tsis muaj ib qho xyeej, ces thaum Huab Tais los txog, nws yuav pom nej nyob hauv txoj kev kaj siab lug.
15 Nej yuav saib tias peb tus Huab Tais lub siab ntev cawm nej, raws li peb tus tij laug Paj Lug sau ntawv tuaj rau nej nyob hauv txoj kev thoob tsib uas Ntuj pub rau nws. 16 Paj Lug sau ntawv qhia nej li ntawd. Muaj tej yam mas yeej to taub nyuaj kawg. Cov neeg uas lub tswv yim tsis paub dab tsi thiab lub siab tsis khov, mas lawv ntxeev Paj Lug cov lus, ib yam li lawv ntxeev lwm cov Ntawv. Lawv ua li ntawd mas lawv yuav ploj.
17 Cov zoo nyiam, kuv xub qhia nej paub kom nej ceev faj, txhob cia cov tsis hwm Ntuj pus nej kom nej ncaim ntawm txoj kev ruaj nreb. 18 Nej yuav hlob nyob hauv peb tus Huab Tais Cawm Seej Yes Xus Pleev lub txiaj ntsim, thiab hlob nyob hauv txoj kev paub nws.
Lub koob meej yog nws tug lub zim txwv no mus txog txhiab tiam. Ua li.