Leej Ntshiab Fas Npias Nus yog tus Vaj Qhia saib xyuas lub Koom Txoos nyob Los Mas txij xyoo 236 txog 250. Thaum Vaj Qhia As Tes Lus (Anterus) tuag tas, Koom Txoos xaiv tsa tus Vaj Qhia tshiab. Tsoom ntseeg sawv daws siv sij hawm 13 hnub sib law los xaiv tab sis tsis tau tus Vaj Qhia tshiab li. Muaj ib hnub txawm muaj ib tug noog nquab ya los tsaws saum Fas Npias Nus taub hau zoo xws li thaum Leej Ntuj Plig Ntshiab txia ua tus nquab ya los nyob
saum Yes Xus thaum txais kab ke ntxuav hauv tus dej Yos Las Das, ces sawv daws thiaj sib cav zom zaws tias Tswv Ntuj tau xaiv Fas Npias Nus ua lawv tus Vaj Qhia tshiab. Tsoom ntseeg thiaj tsa Fas Npias Nus ua Vaj Qhia.
Thaum ntawd, tus vaj ‘Des Xis Us’ (Decius) hiam cov ntseeg nyob hauv lub Koom Txoos, tus vaj hais kom sawv daws hawm cov dab Los Mas thiab txi cov mlom Los Mas. Cov ntseeg txais tsis tau tus vaj Los Mas tsab cai no ces Vaj Qhia Fas Npias Nus thiaj raug ntes thiab tua tuag ua tim khawv.
