Nej puas pom tias ntiaj teb neeg ua ntau pab ntau pawg, nyob hauv haiv Hmoob puas tseem muaj ntau pab sib txawv? Nej puas pom tias nyob hauv nej lub zos puas muaj kev sib koom siab? Nej puas pom tias nyob hauv ib pab kwv tij puas muaj lus tsis sib haum? Nej puas xav tias tas zeej tsoom ua ntau pab ntau pawg yog ib yam zoo los tsis zoo? Yog muaj tib tug Huab Tais saib tas sawv daws thiab pub ib lub tswv yim rau sawv daws mas lub ntiaj teb puas yuav nyob thaj yeeb dua? Tswv Ntuj puas hu sawv daws los ua ib haiv? Sawv daws yuav sib koom siab nyob hauv leej twg?
Tswv Ntuj xav sau tas zeej tsoom los ua ib haiv, Tswv Ntuj thiaj hu Has Nplas Has los ua Tswv Ntuj haiv neeg tus yawg koob. Has Nplas Has yog ib tug neeg zoo li cas? Has Nplas Has yog ib tug txwj laus ua tswv zov tsiaj nyob Mes Xos Pos Tas Mias teb tau 1850 xyoo ua Yes Xus ntej. Has Nplas Has yog ib tug neeg siab ncaj, nws teev cov dab xws li cov neeg nyob hauv lub teb chaws. Has Nplas Has muaj ib tug poj niam hu ua ‘Xas Lais’, nws muaj 70 xyoo mas nws tseem tsis tau muaj me nyuam, ces nws thiaj pub tus ntxhais txib ua Has Nplas Has niam yau; saib puas yuav muaj me nyuam rau Has Nplas Has.
Phau ntawv Hauv Paus piav tias Huab Tais Tswv Ntuj hais rau Has Nplas Has tias “Tso koj lub teb chaws tseg, tso koj tsev neeg, koj tej txheeb ze thiab koj txiv lub vaj tse tseg, koj mus nyob lub teb chaws uas kuv yuav qhia rau koj.” Has Nplas Has sawv kev mus raws li Huab Tais Tswv Ntuj kom nws mus. Thaum Has Nplas Has tsiv hauv Has Laas teb mus, nws muaj 75 xyoos. Has Nplas Has coj nws poj niam Xas Lais (Xas Las) thiab nws tus kwv tus tub hu ua Los nrog nws mus. Nws sau tas nws lub cuab tam uas nws tau tsim, thiab tas nws cov tub txib tub txuas uas nws tau muas los nyob Has Laas nrog nws mus. Lawv sawv kev mus, ces lawv tuaj txog ‘Xis Kes’ nyob hauv lub teb chaws Kas Nas Has. Huab Tais Tswv Ntuj tawm los rau Has Nplas Has pom, Huab Tais Tswv Ntuj hais rau nws tias “Kuv yuav muab lub teb chaws no rau koj tsoom xeeb ntxwv nyob.” Ces Has Nplas Has txhim ib lub thaj txi Huab Tais Tswv Ntuj nyob ntawd (HP 12: 1, 4-7).
Peb yuav pom tias Has Nplas Has mloog lus, nws tso ntau yam pov tseg, nws tsis teev nws txiv cov dab qhuas ntxiv, nws tig los teev HUAB TAIS, ces nws tsa ib lub thaj los txi Huab Tais Tswv Ntuj.
Phau ntawv Hauv Paus piav ntxiv tias Huab Tais Tswv Ntuj yees tawm los hais lus rau Has Nplas hnov li no tias “Koj txhob ntshai mog, Has Nplas! Kuv yog daim leem phiaj thaiv koj. Koj yuav txais koob haum loj kawg.” Has Nplas Has teb tias “Huab Tais Tswv Ntuj, koj yuav muab dab tsi pub rau kuv? Kuv twb yuav dua, kuv tsis muaj tub muaj kiv.” Has Nplas Has hais ntxiv tias “Koj tsis pub kom kuv muaj ib tsob noob li ces ib tug qhev uas yug hauv kuv tsev yuav los txais kuv lub cuab tam.” Huab Tais Tswv Ntuj tseem hais rau Has Nplas Has tias “Tus ntawd yuav tsis yog tus los txais koj lub cuab tam, tus yuav txais koj lub cuab tam yog koj ib tug tub uas yog tseem koj roj ntsha tiag.” Huab Tais Tswv Ntuj coj Has Nplas Has mus nraum zoov thiab hais rau nws tias “Koj tsa muag ntsia saum ntuj thiab suav cov hnub qub saib koj suav puas txheeb. Koj cov xeeb ntxwv yuav coob npaum li ntawd.” Has Nplas Has ntseeg Huab Tais Tswv Ntuj, ces Huab Tais Tswv Ntuj muab Has Nplas Has lub siab ntseeg suav ua kev ncaj rau Has Nplas Has (HP 15: 1-6).
Peb pom ntsoov tias Tswv Ntuj cog lus rau Has Nplas Has, tab sis yog vim Has Nplas Has ntseeg mas Huab Taus Tswv Ntuj thiaj yuav ua tau raws li nws xav ua. Has Nplas Has tsoom xeeb zeej xeeb ntxwv yuav coob ib yam li cov hnub qub, yog ib haiv neeg txawv luag tej thiab yuav ri mus puv lub qab ntuj, lawv yuav yog Huab Tais Tswv Ntuj haiv neeg vim lawv yuav teev Huab Tais Tswv Ntuj.
Has Nplas Has ntseeg txog Tswv Ntuj vim nws tso siab rau cov lus Huab Tais Tswv Ntuj cog nrog nws, ces Huab Tais Tswv Ntuj saib tias Has Nplas Has yog ib tug neeg siab ncaj. Tus neeg siab ncaj yog tus neeg muab tas nws lub siab lub ntsws los mloog Tswv Ntuj lus raws li phau ntawv Hauv Paus tau piav tias Huab Tais Tswv Ntuj hais tias “Coj koj leej tub twm zeej His Xas Has uas koj hlub kawg, koj coj nws mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj.” Tag kis, Has Nplas Has sawv ntxov, nws coj nws tus tub His Xas Has nrog nws mus rau thaj chaw uas Tswv Ntuj qhia rau nws. Thaum nkawd tuaj txog thaj chaw uas Tswv Ntuj tau qhia nws, Has Nplas Has tsa ib lub thaj rau ntawd thiab nws muab cov taws mus teeb rau saud. Nws muab nws tus tub His Xas Has pav, ces nws muab tso rau saum cov taws saum lub thaj txi Ntuj. Has Nplas Has tsa tes mus nthos rab riam yuav coj los tua nws tus tub. Tiam sis Huab Tais Tswv Ntuj tus Tshiab hu saum ntuj tuaj rau nws tias “Has Nplas Has! Has Nplas Has!” Has Nplas Has teb tias “Kuv nyob ntawm no!” Tus Tshiab hais tias “Txhob tsa koj txhais tes rau saum tus me nyuad! Txhob ua dab tsi phem rau nws! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv.” Huab Tais Tswv Ntuj tus Tshiab rov hu zaum ob saum ntuj tuaj rau Has Nplas Has hais tias “Huab Tais hais tias ‘Kuv tuav txog kuv lub npe cog lus rau koj tias vim koj tau ua li ntawd, koj tsis yig, koj tuaj yeem muab koj leej tub twm zeem los txi rau kuv, mas kuv yuav foom hmoov zoo ntau rau koj, kuv yuav ua kom koj tsoom xeeb zeej xeeb ntxwv coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb zeej xeeb ntxwv yuav ua tswv kav lawv cov yeeb ncuab tej qhov rooj loog’” (HP 22: 1-17).
Huab Tais Tswv Ntuj pom Has Nplas Has mloog lus txog qhov kawg, ces Huab Tais Tswv Ntuj zoo siab rov cog lus nrog Has Nplas Has tias nws cov xeeb ntxwv yuav ntau npaum li cov hnub qub nyob saum ntuj thiab cov xuab zeb nyob ntawm ntug hiav txwv. Has Nplas Has cov xeeb ntxwv tsis yog cov tub ki nws yuav yug, tab sis yuav yog tas tsoom neeg ntseeg txog Tswv Ntuj xws li nws.
Yog vim Has Nplas Has yog thawj tus neeg tau teev Huab Tais Tswv Ntuj thiab xub ntseeg txog Huab Tais Tswv Ntuj, mas Has Nplas Has thiaj yog Huab Tais Tswv Ntuj haiv neeg tus yawg koob. Txij Has Nplas Has los txog peb, Tswv Ntuj hu neeg coob li cov hnub qub nyob saum ntuj los ntseeg txog nws, Tswv Ntuj sau tas txhua haiv neeg los ua ib haiv neeg tshiab ntseeg txog Tswv Ntuj. Sawv daws nyias nyob txawv nyias li qub, tab sis sawv daws yuav ib lub siab ib lub tswv yim tshiab ‘hwm’ thiab ‘mloog’ tib tug Tswv Ntuj. Sawv daws koom tib tug Huab Tais.
Yog nej xav ntseeg txog Tswv Ntuj mas nej yuav tso ntau yam pov tseg xws li Has Nplas Has; yam li tso kev teev dab pov tseg, nej yuav ncaim ntawm ntau leej, nej yuav mus taug txoj kev Tswv Ntuj qhia rau nej.
Tswv Ntuj hu Has Nplas Has los ua ib tug piv txwv rau peb, tab sis tus sau tas txhua haiv los ua Tswv Ntuj haiv neeg mas yog Yes Xus, peb tus Huab Tais Pleev. Nws tuaj qhia peb mas peb thiaj sib koom siab nyob hauv Tswv Ntuj. Tswv Ntuj tsis yuam leej twg kom los ntseeg txog Tswv Ntuj, los ua Tswv Ntuj haiv neeg. Tswv Ntuj tsuas txais cov neeg nyiam Tswv Ntuj. Yog peb yeem ntseeg txog Tswv Ntuj mas Tswv Ntuj thiaj txais peb los ua Tswv Ntuj haiv neeg. Yam li peb nrog Tswv Ntuj cog lus tias peb ntseeg txog Tswv Ntuj, peb mloog Tswv Ntuj, peb nyiam Tswv Ntuj. Tswv Ntuj yuav cog lus rau peb tias nws txais peb los ua nws haiv neeg, nws yuav pub nws lub txiaj ntsim rau peb.
Tswv Ntuj hu peb los nyob hauv Tswv Ntuj haiv neeg mas peb yuav txiav siab li no:
1. Peb yuav hloov lub siab lub tswv yim; yam twg tsis ntxim Tswv Ntuj siab mas peb yuav tso pov tseg.
2. Peb yuav cog lus tias peb yuav ntseeg Tswv Ntuj mus li, peb yuav Tswv Ntuj ua peb tus Huab Tais.
3. Peb yuav saib tias txhua haiv neeg yog peb cov kwv tij nyob hauv Tswv Ntuj, peb txhob ntxub txhob thuam lwm tus, peb yuav pab tas txhua tus neeg uas peb ntsib.
4. Peb yuav zoo siab teev Ntuj, peb coj lub neej nyob ntawm Tswv Ntuj xub ntiag.
Tswv Ntuj xaiv peb yog vim Tswv Ntuj Leej Tub tau txhiv peb. Li ntawd, peb ua Huab Tais Yes Xus tsaug, yog vim Huab Tais Yes Xus mas peb thiaj tau los nyob hauv Tswv Ntuj haiv neeg. Peb thov Huab Tais Yes Xus pab peb ua ib tug neeg ntseeg txog Tswv Ntuj zoo.
