Thaum ntawd, Tswv Ntuj pom ntiaj teb neeg siab phem tas nrho, tas hnub neeg tsuas xav qhov phem nyob hauv nws siab xwb. Ces Tswv Ntuj khuv xim tias nws tsim neeg los nyob ntiaj teb. Tswv Ntuj tu siab. Nws hais tias “Kuv yuav rhuav cov neeg kuv tsim los kom ploj hauv ntiaj teb mus tag. Cov tsiaj txhu, cov noog ya saum ntuj yuav nrog neeg ploj mus tas. Kuv khuv xim tias tau tsim lawv los.” Tab sis nyob ntiaj teb muaj tus yawg Nos Hes tau ua zoo xis Tswv Ntuj siab. Nos Hes yog ib tug neeg siab ncaj, hauv tas zeej tsoom uas lub zim txwv ntawd nyob mas nws tsis muaj chaw xyeej. Nws ua nws lub neej nrog Tswv Ntuj. Tswv Ntuj hais rau Nos Hes tias “Lub caij uas txhia tus muaj lub cev nqaij yuav puas tas tuaj txog lawm. Kuv txiav tau li ntawd, vim nyob ntiaj teb, neeg ua phem ntau heev, mas kuv yuav tua kom neeg ploj mus tas. Koj yuav txua ib lub nkoj ntoo thuv. Koj yuav muab tauj los ua lub nkoj thiab. Koj yuav muab rog hmab los leem sab hauv thiab sab nraud.” Tswv Ntuj hais rau Nos Hes tias “Koj coj tas koj tsev neeg nej nkag mus hauv lub nkoj. Tas nej phaj no kuv tsuas pom koj ib leeg thiaj yog neeg ncaj xwb. Koj khaws cov tsiaj huv ib hom xya tus, koj khaws ib co maum thiab ib co txiv. Cov tsiaj tsis huv koj khaws ib nkawg xwb. Thiab koj khaws cov noog ya saum ntuj ib hom xya tus maum thiab xya tus txiv. Koj ua li ntawd kom tas puas tsav yam tsiaj nyob ntiaj teb txhob tu noob. Ntxiv xya hnub mas kuv yuav tso dej los nyab lub ntiaj teb plaub caug hnub thiab plaub caug hmo, ces kuv yuav rhuav tas puas tsav yam kuv tsim los rau ntiaj teb.” Nos Hes ua tas raws li Tswv Ntuj hais. Ces xya hnub ntawd tas mas nag hlob poob los nyab ntiaj teb. Cov dej hlob mus nyab ntiaj teb ib puas tsib caug hnub sib law. Thaum tu nag tau plaug caug hnub lawm, Nos Hes qhib lub qhov rais uas nws ua rau lub nkoj. Nws tso ib tug uab lag tawm mus. Tus uab lag ya mus los kom txog thaum dej qhuav tas nyob ntiaj teb. Nos Hes kuj tso ib tug nquab mus xyuas saib dej puas tau nqig. Tus nquab nrhiav tsis tau kev tsaws nws rov qab los ntawm lub nkoj, vim dej tseem nyab puv ntiaj teb. Nos Hes cev tes mus muab tus nquab los rau hauv nkoj. Nos Hes tos xya hnub ntxiv, nws rov tso tus nquab mus. Thaum yuav tsaus ntuj, tus nquab rov los, ua ciav nws kwv ib re nplooj txiv ntoo roj mos mos los! Ces Nos Hes paub tias dej nqig lawm. Nos Hes tseem tos xya hnub ntxiv, nws rov tso tus nquab, ces nquab tsis rov los lawm. Dej qhuav nyob ntiaj teb, yog lub ib hlis xiab ib thiab yog lub xyoo uas Nos Hes muaj rau pua ib xyoos. Nos Hes yaws lub ruv vov lub nkoj, nws ntsia no pom av qhuav qhuav lawm! Nos Hes tsa ib lub thaj txi Ntuj, nws muab cov tsiaj huv thiab cov noog huv coj los tua txi rau Tswv Ntuj. Tswv Ntuj hnia cov pa tsw qab ntawd nws hais tias “Kuv yuav tsis tsawm ntiaj teb ib zaug ntxiv, vim tias neeg lub siab yeej phem txij thaum yau los. Kuv yuav tsis rov rhuav tas txhia yam muaj txoj sia uas kuv nyuam qhuav ua los. Ntiaj teb nyob txog thaum twg mas yuav muaj caij tseb noob, yuav muaj caij muab qoob loo, yuav muaj kub muaj txias, yuav muaj caij no caij sov thiab yuav muaj hnub muaj hmo mus li.” Tswv Ntuj foom hmoov zoo rau Nos Hes thiab rau nws cov tub. Tswv Ntuj hais rau lawv tias “Nej huam vam mus puv lub ntiaj teb. Tas cov tsiaj nyob ntiaj teb, cov noog ya saum ntuj, tas puas tsav yam mus los nyob ntiaj teb, cov ntses nyob hauv hiav txwv, sawv daws yuav ntshai nej, lawv yuav yog nej tug. Nej noj tau tas puas tsav yam txawj mus kev thiab muaj txoj sia. Kuv muab tej ntawd tib si ua txhiam xws rau nej noj, ib yam li kuv muab tej nroj tsuag rau nej huv si thiab. Tab sis nej yuav tsis txhob noj nqaij ntxuag ntshav, vim ntshav yog nqaij tus plig. Kuv yuav nug txog nej cov nshav tib si. Kuv yuav nug txog cov tsiaj tej ntshav tas tib si. Thiab kuv yuav nug cov neeg tib si txog neeg tus plig. Leej twg tua neeg mas nws yuav raug neeg tua nws, vim neeg tsim los xws li Tswv Ntuj tus duab. Nej coob mus mog! Nej huam vam mus puv ntiaj teb thiab mus kav ntiaj teb mog!” Tswv Ntuj hais rau Nos Hes thiab rau nws cov tub tias “Kuv nrog nej cog lus, thiab kuv nrog nej cov xeeb ntxwv tseem yuav tuaj cog lus. Kuv nrog tas puas tsav yam muaj txoj sia nyob nrog nej cog lus, yam li me noog, me tsiaj nyeg tsiaj qus nyob tas ntiaj teb uas lawv tawm hauv lub nkoj los. Kuv nrog nej cog lus tias dej yuav tsis rhuav leej twg ntxiv. Yuav tsis muaj dej tuaj nyab ntiaj teb ntxiv.” Tswv Ntuj hais tias “Kuv tsa ib lub cim tau nrog nej cog lus thiab nrog tas puas tsav yam muaj txoj sia cog lus rau cov phaj yuav tuaj. Kuv tsa zaj sawv saum cov huab. Yog lub cim tias kuv nrog ntiaj teb cog lus” (HP 6-9).
Kwv tij Hmoob sawv daws, ntau haiv neeg nyob ntiaj teb no puav leej muaj zaj dab neeg hais txog dej nyab ntiaj teb. Yog vim puag txheej thaud dej nyab lawv teb chaws ces lawv sib qhia tiam dhau tiam tias dej nyab ntiaj teb. Tab sis tsis muaj ib zaug uas dej nyab tas ntiaj teb. Qhov tseeb mas yog dej nyab thaj tsam uas yus haiv neeg nyob xwb!
Hmoob kuj muaj zaj hais txog dej nyab ntiaj teb, vim nyob Suav teb mas dej nyab tej thaj tsam dav ntau zaus.
Cov His Xas Lais xub hnov haiv neeg nyob Npas Npis Los piav lawv zaj hais txog dej nyab Npas Npis Los teb chaws. Cov His Xas Lais khaws cov neeg Npas Npis Los zaj los ua ib zag qhia tias yog Tswv Ntuj tso dej los nyab ntiaj teb vim ntiaj teb neeg ua ntau yam txhaum. Tswv Ntuj yuav tsum nplua ntiaj teb neeg, ces nws tso dej nag los nyab ntiaj teb. Tab sis Tswv Ntuj siab ncaj ces nws thiaj npo yawg Nos Hes vim Nos Hes siab ncaj.
Tsis tag li ntawd, Phau Ntawv Ntshiab tseem hais tias Tswv Ntuj tsa ib lub cim nyob saum ntuj cog lus tias Tswv Ntuj yuav tsis rov tso dej nag los nyab ntiaj teb ib zaug ntxiv. Tswv Ntuj thiaj tsa zaj sawv saum cov huab. Raws li Hmoob txoj kev teev dab mas yog zaj sawv haus dej. Tab sis raws li cov His Xas Lais lub tswv yim mas yog lub cim tias Tswv Ntuj rov luag ntxhi rau ntiaj teb neeg vim Tswv Ntuj cog lus tias nws yuav tsis rov rhuav ntiaj teb neeg. Tswv Ntuj yeej paub tias ntiaj teb neeg yuav rov ua ntau yam txhaum mus li. Tswv Ntuj siab zoo, nws yeej yuav rov nplua thiab qhuab qhia ntiaj teb neeg ntau zaus, tab sis nws yuav tsis rov rhuav ntiaj teb neeg.
Kwv tij, thaum peb pom lub cim zoo nkauj ntawd ci ntsa nyob saum cov huab mas peb paub tias yog lub hnub tuaj ziab cov huab, hos tsis yog zaj sawv haus dej xws li cov neeg txheej thaud hais. Tab sis peb kuj zoo siab nco tias yog Tswv Ntuj luag ntxhi rau peb tsoom neeg.
