Thaud, tas sawv daws hais ib xeem lus thiab siv ib co lus xwb. Cov neeg mus los nyob Toob Fab lawv ntsib ib lub tiaj nyob lub teb chaws Xis Nes As. Ces lawv ua tsev nyob ntawd. Lawv sib txhob tias “Peb puab ib co av, peb muab ci hauv hluav taws!” Ces lawv siv cov av ntawd xws li siv pob zeb thiab lawv siv roj a dub los leem. Lawv hais tias “Peb kav tsij ua ib lub nroog rau peb nyob ! Peb txhim ib tug pej thuam siab siab kom nws lub ncov chob lub ntuj. Peb thiaj yuav muaj ib lub npe nto moo, peb tsis txhob sib ncaim mus tas ntiaj teb!” Tswv Ntuj nqes los xyuas lub nroog thiab tus pej thuam uas neeg txhim ntawd. Ces Tswv Ntuj hais tias “Sawv daws ua ib haiv neeg hais ib xeem lus xwb. Lawv nyuam qhuav pib ua, lawv twb ua tau tas npaud! Nyem no tsis muaj dab tsi uas lawv yuav ua tsis tau! Peb yuav nqes mus saib! Peb yuav mus ua kom lawv hais lus tsis sib raug, kom lawv tsis sib haum ntxiv.” Yas Ves ua lawv sib ncaim tawg mus nyob tag ntiaj teb. Ces lawv tsis txhim lub nroog ntxiv. Sawv daws thiaj hu tus pej thuam ua Pej Thuam Npas Npes, vim nyob ntawd Tswv Ntuj ua kom lawv hais lus tsis sib raug thiab nws ua kom lawv tawg mus nyob tas ntiaj teb (HP 11: 1-9).
Kwv tij, vim li cas Tswv Ntuj thiaj ua kom tsoom tib neeg tawg mus ua ntau haiv neeg thiab hais tej xeem lus sib txawv?
Hais qhov tseeb mas tsis yog Tswv Ntuj txhob txwm ua kom tsoom tib neeg tawg mus ua ntau haiv neeg uas hais lus sib txawv. Tab sis qhov tseeb mas yog cov His Xas Lais pom cov haiv neeg hais tej xeem lus sib txawv, ces cov His Xas Lais tsim zaj hais txog tus pej thuam Npas Npes. Cov His Xas Lais tsoom poj yawm txwv koob kuj nco tias nyob hauv lub nroog Npas Npis Los thaum ub mas lawv pom ib tug pej thuam loj kawg, lawv hu tus pej thuam ntawd ua tus pej thuam Npas Npes, vim lo lus Npas Npes txhais tias “Ua kom sib tawg.”
Tswv Ntuj muab txim rau cov neeg txhim tus pej thuam Npas Npes vim lawv muab hlob, lawv xav nrog Tswv Ntuj sib twv, lawv xav ua tus pej thuam siab kom nws lub ncov chob lub ntuj.
Kwv tij, zim txwv uas peb nyob no mas muaj ntau leej xav nrog Tswv Ntuj sib twv. Lawv khav tias lawv txawj tsim tej yam zoo dua yam uas Tswv Ntuj tsim. Tab sis cov neeg ntawd tsis txawj tsim kev thaj yeeb thiab kev sib hlub nyob ntiaj teb ces peb pom muaj kev tsov kev rog, kev sib ntxub nyob ntau lub teb chaws. Li ntawd, ntiaj teb neeg uas nyem no nyob mas lawv tsis xyuam xim dua cov neeg txhim tus pej thuam Npas Npes.
Tab sis zim txwv no cov neeg ntseeg Yes Xus lub Moo Zoo lawv muaj ib qhov chaw tso siab loj, yam li cov neeg ntseeg rau siab mloog Leej Ntuj Plig Ntshiab tuaj tshaj lawv lub tswv yim, ces lawv sib nyiam sib hlub thiab lawv sawv daws paub tias lawv yog Leej Txiv Tswv Ntuj cov me nyuam. Peb tsis sib luag xws li cov neeg nyob Npas Npes. Peb sawv daws hais ntau xeem lus, tab sis peb sib hlub nyob hauv Tswv Ntuj.
