¹As Das paub nws poj niam. Ces tus poj niam xeeb tub thiab yug tau Kas Ees. Nws hais tias “Kuv tau ib tug tub ntawm HUAB TAIS los.” ²Nws kuj yug tau As Npes, yog Kas Ees tus kwv. As Npes hlob, nws ua ib tug tub yug tsiaj hos Kas Ees ua liaj ua teb. ³Ntev tom qab, Kas Ees txawm muab nws cov qoob los txi rau HUAB TAIS. ⁴Hos As Npes, nws kuj muab thawj tus me nyuam uas nws cov tsiaj yug tau, los txi Ntuj. Nws tseem muab lawv cov roj los txi huv tib si. HUAB TAIS zoo siab rau As Npes, ces nws txais As Npes cov txim. ⁵Tab sis HUAB TAIS tsis zoo siab rau Kas Ees thiab tsis txais Kas Ees cov txim, ces Kas Ees npau taws thiab ua ntsej muag dub nciab. ⁶HUAB TAIS hais rau Kas Ees tias “Vim li cas koj thiaj npau taws thiab ua ntsej muag dub nciab li ko? ⁷Yog koj txiav siab ua zoo mas koj yuav rov tsa taus koj lub ntsej muag. Hos yog koj tsis txiav siab ua zoo ces kev txhaum nyob rawv ntawm koj qhov rooj, xws li tus tsiaj nyas nrhw yuav tom koj. Yog koj xav yeej, mas koj tseem yuav yeej tau txoj kev txhaum.” ⁸Tab sis muaj ib zaug, Kas Ees hais rau nws tus kwv As Npes tias “Wb mus yos.” Thaum nkawd mus nrug deb ntawm zos lawm, Kas Ees txawm dhia rhees mos ntiag nws tus kwv, muab tus kwv tua. ⁹HUAB TAIS nug Kas Ees hais tias “Koj tus kwv As Npes nyob qhov twg?” Kas Ees teb tias “Kuv tsis paub. Kuv puas yog tus zov rawv kuv tus kwv?” ¹⁰HUAB TAIS rov hais tias “Koj tau ua dab tsi? Koj sim mloog saib, koj tus kwv cov ntshav quaj qw hauv av tuaj rau kuv! ¹¹Zaum no koj yuav tau hmoov phem thiab koj yuav raug ntiab tawm hauv thaj av zoo uas tau rua ncauj cug koj tus kwv cov ntshav. ¹²Yog koj ua teb, av yuav tsis txi qoob rau koj lawm. Koj yuav ua neeg loj leeb ncig ntiaj teb.” ¹³Kas Ees hais rau HUAB TAIS tias “Kuv lub txim hnyav dhau, kuv ris tsis taus. ¹⁴Ntsia saib, hnub no koj muab kuv ntiab tawm hauv thaj av zoo no mus, kuv yuav tsum mus tsiv nraim deb ntawm koj lub ntsej muag, thiab kuv yuav ua neeg loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb!” ¹⁵HUAB TAIS teb tias “Yog leej twg tua Kas Ees mas yuav muaj tus ua pauj rau nws xya zaus.” Ces HUAB TAIS ntaus ib lub cim rau Kas Ees kom thawj tug neeg ntsib nws txhob muab nws tua. ¹⁶Kas Ees thiaj txav mus deb ntawm HUAB TAIS xub ntiag. Nws mus nyob lub teb chaws Nos Daws, nyob ntawm lub vaj Es Dees, sab hnub tuaj.

Zaj piav txog Kas Ees thiab As Npes tseem yog ib zag dab neeg, tab sis yog ib zag muaj lub ntsiab tob li no: Ib txwm puag thaum ub los, muaj neeg ua kam txhaum loj. Tus ua txhaum rau neeg kuj yog tus tsis hwm Tswv Ntuj. Vim neeg tsis hwm Tswv Ntuj thiaj muaj kev sib tua thiab sib ntaus rog nyob ntiaj teb.

Ntawv hais tias Kas Ees thiab As Npes yog ob niam txiv hauv paus As Das thiab Es Vas thawj ob tug tub, tab sis ntawv Hauv Paus kuj piav tias Kas Ees twb muaj ib co neeg coob kawg nrog nws tsim tej lub nroog (HP 4: 17), thiab As Npes nyob hauv tej lub zos uas muaj neeg coob yug tsiaj. Vim tej ntawd, mas yuav tsum to taub tias Kas Ees thiab As Npes yog ob lub npe hais txog cov neeg puag thaum lub hauv paus sawv daws tib si; txij thaum ub los muaj tej tus neeg hwm Tswv Ntuj zoo dua xws li As Npes, thiab muaj tej tus neeg muab hob tso siab rau lawv lub zog ntau xws li Kas Ees.

Lub npe ‘Kas Ees’ (Cain) txhais tias ‘tau’ (acquired) los yog ‘tswj’ (possess). ‘As Npes’ (Abel) txhais tias ‘pa’ (breathe/ vapor) los tej zaum tseem txhais tau tias ‘ua kom du dais’ (to act emptily).

Zaj hais txog Kas Ees thiab As Npes thawj lub ntsiab yog qhia peb tias ‘thaum ib tug neeg tso siab rau nws lub zog dhau kev cai, mas nws tsis pom tias kev hwm Tswv Ntuj puas muaj qab hau ntxiv, ces nws tsis hwm Tswv Ntuj; thaum nws tsis hwm Tswv Ntuj, mas nws tsis saib neeg yog Tswv Ntuj me nyuam, ces nws tsis hwm neeg.’ Tus tsis hwm ntuj thiab tsis hwm neeg, mas neeg kuj tsis hwm nws thiab, ces Tswv Ntuj tso nws ua neeg loj leeb ncig ntiaj teb. Peb niaj hnub kuj pom tias yog thaum cov nom tswv lawv tsis hwm Tswv Ntuj, ces lawv thiaj ua phem rau tsoom pej xeem.

Vim li cas muaj kev hiam luag tej nyob ntiaj teb no?

Yog vim neeg tsis kam ‘mloog’ Tswv Ntuj lo lus.

Zaj no tseem qhia peb tias Tswv Ntuj tsis ntxub Kas Ees uas tau muab neeg tua pov tseg, Tswv Ntuj tseem txuag nws kom nws ua nws lub neej tau ntxiv mus, Tswv Ntuj zam txhaum rau nws, Tswv Ntuj ua siab ntev tos saib Kas Ees puas yuav tig los ua ib tug neeg hwm Tswv Ntuj thiab hwm neeg. Ntawv Ntshiab hais tias Tswv Ntuj ntaus ib lub cim rau nws kom luag tej txhob muab nws tua pov tseg (HP 4: 13-15). Tswv Ntuj hlub tus neeg txhaum, xws li Huab Tais Yes Xus yuav qhia meej meej kom peb ua.