1As Das paub nws poj niam. Ces tus poj niam xeeb tub thiab yug tau Kas Ees. Nws hais tias “Kuv tau ib tug tub ntawm HUAB TAIS los.” 2Nws kuj yug tau As Npes, yog Kas Ees tus kwv. As Npes hlob, nws ua ib tug tub yug tsiaj hos Kas Ees ua liaj ua teb. 3Ntev tom qab, Kas Ees txawm muab nws cov qoob los txi rau HUAB TAIS. 4Hos As Npes, nws kuj muab thawj tus me nyuam uas nws cov tsiaj yug tau, los txi Ntuj. Nws tseem muab lawv cov roj los txi huv tib si. HUAB TAIS zoo siab rau As Npes, ces nws txais As Npes cov txim. 5Tab sis HUAB TAIS tsis zoo siab rau Kas Ees thiab tsis txais Kas Ees cov txim, ces Kas Ees npau taws thiab ua ntsej muag dub nciab. 6HUAB TAIS hais rau Kas Ees tias “Vim li cas koj thiaj npau taws thiab ua ntsej muag dub nciab li ko? 7Yog koj txiav siab ua zoo mas koj yuav rov tsa taus koj lub ntsej muag. Hos yog koj tsis txiav siab ua zoo ces kev txhaum nyob rawv ntawm koj qhov rooj, xws li tus tsiaj nyas nrhw yuav tom koj. Yog koj xav yeej, mas koj tseem yuav yeej tau txoj kev txhaum.” 8Tab sis muaj ib zaug, Kas Ees hais rau nws tus kwv As Npes tias “Wb mus yos.” Thaum nkawd mus nrug deb ntawm zos lawm, Kas Ees txawm dhia rhees mos ntiag nws tus kwv, muab tus kwv tua. 9HUAB TAIS nug Kas Ees hais tias “Koj tus kwv As Npes nyob qhov twg?” Kas Ees teb tias “Kuv tsis paub. Kuv puas yog tus zov rawv kuv tus kwv?” 10HUAB TAIS rov hais tias “Koj tau ua dab tsi? Koj sim mloog saib, koj tus kwv cov ntshav quaj qw hauv av tuaj rau kuv! 11Zaum no koj yuav tau hmoov phem thiab koj yuav raug ntiab tawm hauv thaj av zoo uas tau rua ncauj cug koj tus kwv cov ntshav. 12Yog koj ua teb, av yuav tsis txi qoob rau koj lawm. Koj yuav ua neeg loj leeb ncig ntiaj teb.” 13Kas Ees hais rau HUAB TAIS tias “Kuv lub txim hnyav dhau, kuv ris tsis taus. 14Ntsia saib, hnub no koj muab kuv ntiab tawm hauv thaj av zoo no mus, kuv yuav tsum mus tsiv nraim deb ntawm koj lub ntsej muag, thiab kuv yuav ua neeg loj leeb ncig ntiaj teb. Ntshai thawj tus neeg tuaj ntsib kuv yuav muab kuv tua xwb!” 15HUAB TAIS teb tias “Yog leej twg tua Kas Ees mas yuav muaj tus ua pauj rau nws xya zaus.” Ces HUAB TAIS ntaus ib lub cim rau Kas Ees kom thawj tug neeg ntsib nws txhob muab nws tua. 16Kas Ees thiaj txav mus deb ntawm HUAB TAIS xub ntiag. Nws mus nyob lub teb chaws Nos Daws, nyob ntawm lub vaj Es Dees, sab hnub tuaj.
Tos Tswv Ntuj tsis txais Kas Ees cov txim yog vim Kas Ees muab hlob. Nws muaj ib co tub coob, lawv tsim tej lub zos vam meej. Lawv thuam As Npes tsev neeg uas lawv yug tsiaj xwb. Kas Ees cov neeg tso siab rau lawv lub zog dhau mas lawv tsis pom tias kev hwm Tswv Ntuj muaj qab hau. Vim lawv tsis hwm Tswv Ntuj mas lawv tsis txawj saib tib neeg yog Tswv Ntuj me nyuam, ces Kas Ees thiaj muab As Npes tua. Kas Ees cov neeg tsis ntshai muab tib neeg tua pov tseg.
Zaj hais txog Kas Ees piav tias Tswv Ntuj muab txim rau Kas Ees, tab sis Tswv Ntuj kuj tseem hlub Kas Ees. Tswv Ntuj txuag Kas Ees kom luag txhob muab Kas Ees tua. Tswv Ntuj siab ntev, Tswv Ntuj tos kom Kas Ees tig los yuav lub siab thoob tsib txawj hwm Tswv Ntuj thiab txawj hwm neeg.
