Cov neeg sau Ntawv Ntshiab, lawv xav piav zaj twg, mas lawv siv tus piv txwv uas lub caij ntawd cov sau ntawv lawv siv kam. Thaum lawv yuav qhia txog ib tug me nyuam uas yav tom ntej yuav nto moo loj, mas lawv piav tias ib co Tshiab tawm tuaj xa lus tias tus me nyuam yuav yug los thiab nws txoj hmoov yuav zoo. Lus Kas xav piav txog Zam yuav yug los, mas nws ua raws tus piv txwv ntawd. Yav puag thaud, thaum tus Yaj Saub Xas Muas yuav yug los, mas Tswv Ntuj kuj tuaj hais rau nws niam As Nas tias As Nas yuav xeeb tub thiab. Lub caij ntawd, As Nas yog ib tug poj niam uas tsis muaj me nyuam. Nws siab ncaj thiab nws npuab Tswv Ntuj zoo, ces nws quaj thov Tswv Ntuj tas zog. Tswv Ntuj hlub As Nas thiab mloog nws cov lus thov. Qhov kawg, As Nas thiaj xeeb tub. As Nas yug tau ib tug me tub, nws muab tis npe hu ua Xas Muas. As Nas hais tias “Kuv hu li ntawd, vim kuv thov ntawm Tswv Ntuj los.”
Puas muaj tus Tshiab tawm tuaj tiag?
Tab txawm muaj los tsis muaj kuj zoo ib yam. Vim yog ib txog kev hais tias thaum Es Lis Xas Npes xeeb tub, mas yog ib yam xwm loj rau ntiaj teb neeg. Thiab yog ib qho hais tias Tswv Ntuj tuaj tshoj Ntxas Kas Lias siab, kom nws xub paub tias muaj ib hnub nws poj niam yuav xeeb tub. Thiab nws tus tub yuav muaj ib lub neej pab tsoom neeg tib si. Yog koj ntseeg tias ib tug Tshiab tawm tuaj, mas koj ntseeg kuj tau. Hos yog koj ntseeg tias yog ib txog kev qhia yus tias Tswv Ntuj lub hwj huam tuaj ua hauj lwm nyob hauv Ntxas Kas Lias thiab nyob hauv Es Lis Xas Npes kuj yog zoo ib yam nkaus.
Ntxiv ntawm no mus, yog tej lo lus ntuas peb lub siab ntsws kom peb txawj txais thiab txawj mloog cov lus Tswv Ntuj qhia.
Ntxas Kas Lias thiab Es Lis Xas Npes nkawd, tas ib sim neej nkawd thov Tswv Ntuj kom pub nkawd xeeb tub muaj me nyuam xws li luag tej. Nkawd yog neeg siab ncaj thiab mloog nraim Tswv Ntuj cov lus qhia. Nkawd nyob nkawd 2 leeg thiab nkawd sib hlub zoo heev. Txawm Es Lis Xas Npes laus thiab nws tsis muaj me nyuam, tsis kav Ntxas Kas Lias tsis tau xav tias nws yuav mus muaj dua niam yau. Ces Tswv Ntuj thiaj mloog nkawd cov lus thov.
Tswv Ntuj xav qhia peb tias thaum yus thov Ntuj tsis tseg nyob hauv txoj kev ncaj, mas Tswv Ntuj pub qhov yus thov, los Tswv Ntuj pub lwm qhov uas tseem zoo dua qhov yus thov ntawd. Yam li nws pub ib lub tswv yim zoo dua rau yus.
Thaum tus Tshiab xa lus tuaj rau Ntxas Kas Lias tas, mas Tswv Ntuj ua kom Ntxas Kas Lias hais tsis tau lus mus txog hnub tus me nyuam yug los. Yog vim Ntxas Kas Lias ua siab hnyav tsis ntseeg tus Tshiab cov lus. Nws ua xyem xyav tias tej yam uas tus Tshiab hais ntawd, puas yuav tsheej xeeb tiag. Thiab yog vim Tswv Ntuj tsis xav kom yam xwm ntawd nrov ncha. Es Lis Xas Npes kuj nyob zais ntshis tau 5 lus hlis, kuj yog vim Tswv Ntuj xav kom tej xwm ntawd txhob ncha mus sai. Vim tias Tswv Ntuj tsis nyiam kev ncha, kev khav theeb ntawm tib neeg. Tswv Ntuj ua nws tej hauj lwm nyob hauv neeg nruab siab thiab nyob hauv qhov ntsiag to. Tswv Ntuj xav kom peb ua peb tej hauj lwm nyob hauv txoj kev ntsiag to thiab tsis khav theeb.