1Thaum chiv lub keeb, Tswv Ntuj tsim lub Ntuj thiab lub ntiaj teb. 2Lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua kiv nplawm ntws saum nplaim dej. 3Tswv Ntuj hais tias “Kom muaj qhov pom kev.” Ces txawm muaj qhov pom kev tuaj. 4Tswv Ntuj pom tias qhov pom kev ntawd zoo. Tswv Ntuj cais qhov pom kev ntawm qhov tsaus ntuj. 5Tswv Ntuj hu qhov pom kev ua “nruab hnub” thiab hu qhov tsaus ntuj ua “hmo ntuj”. Txawm muaj tsaus ntuj thiab muaj kaj ntug yog thawj hnub. 6Tswv Ntuj hais tias “Kom muaj ib daim ntuj nyob hauv nruab nrab cov dej thiab kom nws quas cov dej ntawm cov dej.” Ces txawm muaj li ntawd tuaj. 7Tswv Ntuj ua daim ntuj los quas cov dej nyob hauv qab ntuj ntawm cov dej nyob saum qaum ntuj. 8Tswv Ntuj hu daim ntuj ua “ntuj ntsuab”. Txawm muaj tsaus ntuj thiab muaj kaj ntug yog hnub ob. 9Tswv Ntuj hais tias “Kom cov dej uas nyob hauv qab lub ntuj ntsuab sib sau los ua ib pawg xwb, thiab kom av qhuav tshwm los.” Ces txawm muaj li ntawd tuaj. 10Tswv Ntuj hu cov av qhuav ua “ntiaj teb” thiab hu cov dej ua “hiav txwv”. Tswv Ntuj pom tias qhov ntawd zoo. 11Tswv Ntuj hais tias “Kom ntiaj teb tuaj nroj tsuag ntsuab xiab, kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv, nyias muaj nyias hom noob.” Ces txawm muaj li ntawd tuaj. 12Ntiaj teb tuaj nroj tsuag ntsuab xiab, tej nroj tsuag nyias txawj txi nyias hom noob thiab tej ntoo nyias txawj txi nyias hom txiv, nyias muaj nyias hom noob. Tswv Ntuj pom hais tias qhov ntawd zoo. 13Txawm muaj tsaus ntuj thiab muaj kaj ntug yog hnub peb. 14Tswv Ntuj hais tias “Kom muaj tej lub ci ci nyob saum lub ntuj ntsuab saud, cais nruab hnub thiab hmo ntuj, thiab cia ua tej lub cim xam hnub xam nyoog thiab suav hnub suav xyoo; 15kom tej lub ci ci nyob saum lub ntuj ntsuab ua kom ntiaj teb pom kev.” Ces txawm muaj li ntawd tuaj. 16Tswv Ntuj ua ob lub ci ci loj dua cov, lub ci ci loj yog lub kav nruab hnub, lub ci ci me yog lub kav hmo ntuj, thiab cov hnub qub. 17Tswv Ntuj muab lawv txawb rau saum lub ntuj ntsuab saud kom ntiaj teb pom kev. 18Cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo. 19Txawm muaj tsaus ntuj thiab muaj kaj ntug yog hnub plaub. 20Tswv Ntuj hais tias “Kom muaj tej tsiaj muaj sia npau xi nyob hauv cov dej, thiab kom muaj noog ya saum npoo ntiaj teb, saum ib nta ntuj ntsuab.” Ces txawm muaj li ntawd tuaj. 21Tswv Ntuj tsim cov tsiaj hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyias muaj raws nyias hom, thiab tsim cov noog muaj tis, nyias muaj raws nyias hom. Tswv Ntuj pom tias qhov ntawd zoo. 22Tswv Ntuj foom lus zoo rau lawv tias “Nej yeej meem tsim noob, yeej meem huam vam mus nyob puv cov dej hauv hiav txwv, kom cov noog yeej meem huam vam mus puv ntiaj teb.” 23Txawm muaj tsaus ntuj thiab muaj kaj ntug yog hnub tsib. 24Tswv Ntuj hais tias “Kom ntiaj teb txawj muaj tej yam rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj.” Ces txawm muaj li ntawd tuaj. 25Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo. 26Tswv Ntuj hais tias “Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av.” 27Ces Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg; nws tsim nkawd ua txiv neej thiab ua poj niam. 28Tswv Ntuj foom lus zoo rau nkawd thiab hais rau nkawd tias “Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv ntiaj teb.” 29Tswv Ntuj hais tias “Kuv muab tas puas tsav yam nroj tsuag muaj noob uas tuaj nyob saum npoo ntiaj teb, kuv muab tas puas tsav yam ntoo txi txiv thiab muaj noob rau neb. Tej ntawd yuav yog neb tej txhiam laj txhiam xws. 30Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv ntiaj teb thiab ciaj sia, kuv muab rau lawv ua txhiam xws noj.” Ces txawm muaj li ntawd tuaj. 31Tswv Ntuj ntsia tas txhua yam nws tau ua, txhua yam ntawd zoo kawg. Txawm muaj tsaus ntuj thiab muaj kaj ntug yog hnub rau.
Cov His Xas Lais lawv muaj 2 zaj kwv huam piav txog ntuj tsim teb raug. Ib zaj lawv piav raws txoj kwv huam Yas Ves, ib zaj lawv piav raws txoj kwv huam Leej Choj.
Nyob hauv zaj Tswv Ntuj tsim ntuj tsim teb no, yog cov His Xas Lais muab hauv txoj kwv huam Leej Choj los ntim rau hauv lawv phau ntawv Tos Las. Peb cov ntseeg txog Yes Xus, peb saib cov His Xas Lais phau ntawv Tos Las yog ib feem nyob hauv phau Ntawv Ntshiab, peb khaws yuav cov zaj raws li lawv ib txwm sau nyob hauv lawv cov ntawv.
1. Lawv xav qhia cov Yus Das kom caiv hnub xya los yog Hnub Xas Npas Tos (Saturday/ Sabbath day).
Vim li cas lawv hais tias Tswv Ntuj ua hauj lwm 6 hnub tsim lub ntuj lub teb, ces hnub 7 nws so? Yog vim tias ntau pua xyoo ua ntej Mais Xes tau txais Tswv Ntuj 10 lo lus qhia nyob saum lub roob Xis Nais. Lo lus qhia 3 hais tias “Koj yuav cai Huab Tais Ntuj hnub.” Cov Leej Choj pom tias tsoom His Xas Lais coob leej tsis caiv Huab Tais Ntuj hnub, cov Leej Choj thiaj tsim ib zag piav tias thaum Tswv Ntuj tsim lub ntuj lub teb mas nws ua hauj lwm 6 hnub ces hnub 7 nws so, mas tsoom His Xas Lais thiaj caiv Hnub Xya; yuav tsis txhob ua hauj lwm vim yog hnub Tswv Ntuj so, yuav qee Hnub Xya los ua hnub sib sau teev Ntuj thiab txais Tswv Ntuj cov lus.
2. Lawv xav qhia cov Yus Das tias tab txawm lawv cov nyob txim tsis coob, tab sis Tswv Ntuj yuav ua kom lawv huam vam raws li Tswv Ntuj tau foom hmoov rau As Das thiab Es Vas.
Nyob hauv zaj no piav tias Tswv Ntuj ua zoo li cas los tsim lub ntuj thiab lub teb kom zoo txhij. Tas txhua yam Tswv Ntuj tsim puav leej zoo kawg. Tswv Ntuj tsim txhua yam tawm los kom zoo nkauj thiab muaj ntau ces. Cov tsiaj thiab tib neeg lub cev muaj ntau ces sib txawv. Tswv Ntuj tsis yog lam tau lam tsim, tab sis Tswv Ntuj tsim txhua tsav yam los kom muaj quag, muaj caij muaj nyoog.
Tswv Ntuj yog tus zoo txhij. Tswv Ntuj tsis tau tsim lub ntuj lub teb kom muaj tsov rog, kom muaj kev lim hiam, los yog kom muaj tus xeeb ceem phem. Tswv Ntuj vam kom tib neeg ua Tswv Ntuj tus phooj ywg. Yog li mas Tswv Ntuj thiaj li pub lub ntuj lub teb zoo tshaj rau tib neeg. Tswv Ntuj pub xyoob ntoo nroj tsuag rau tib neeg tau ua txhiam xws. Tswv Ntuj siab dav thiab hlub tib neeg.
Lo lus ‘Tswv Ntuj’ yog siv los txhais lo lus tias ‘Es Los His’ (Elohim/ God) uas yog tus tsim tas ib puas tsav yam thiab kav tas lub sim ceeb.
Lo lus ‘Ntuj’ hauv qib 1 tsis yog lub ntuj ntsuab (Sky/ Vault of Heaven) saum taub hau, tiam sis yog ib thaj chaw nyob siab dua txheej ntuj ntsuab lawm saud, los yog Hmoob hais tias ‘qaum ntuj’ (Heaven). Li ntawd, thaum Ntawv Ntshiab hais tias ‘lub Ntuj thiab lub ntiaj teb’, mas yog hais txog txhua tsav yam.
Ua ntej Tswv Ntuj yuav tsim ntuj tsim teb, mas tsis tau muaj dab tsi nyob li, tsuas muaj Tswv Ntuj tib tug xwb yog ‘tus nyob’ (existed).
Lo lus ‘tsim’ (create) yog txhais tau tias ‘ua kom muaj tej yam tawm tuaj tshiab’, yog tawm ntawm tej yam tsis tau muaj dua tuaj. Nyob hauv zaj no tsuas pom hais txog Tswv Ntuj tsim 3 yam xwb:
Yam tim ib; Tswv Ntuj tsim ntuj tsim teb (HP 1: 1).
Yam tim ob; Tswv Ntuj tsim thawj cov tsiaj (HP 1: 21).
Yam tim peb; Tswv Ntuj tsim tib neeg (HP 1: 27).
‘Lub ntiaj teb tseem tsis tau tsheej ntiaj teb thiab tseem tsis tau muaj dab tsi nyob hauv li’ txhais tau tias ua ntej ntawd tsuas muaj kev sib cov (confusion) tsis muaj quag.
Tswv Ntuj tsim ‘qhov pom kev’ vim tias qhov pom kev cheem tsum rau txhua yam Tswv Ntuj tsim los. Thaum muaj qhov pom kwv lawm, Tswv Ntuj mam tsim xyoob ntoo. Yog tsis muaj qhov pom kev, xyoob ntoo yuav hlob tsis tau. Thaum muaj xyoob ntoo lawm, Tswv Ntuj thiaj mam li tsim cov tsiaj thiab tib neeg. Yog tsis muaj qhov pom kev, tsiaj thiab tib neeg yuav ntsia tsis pom dab tsi.
Hais tias muaj tsaus ntuj thiab muaj kaj ntug yog thawj hnub. Lo lus ‘hnub’ tseem muaj ib lub ntsiab tias ‘tiam’. Li ntawd, thawj hnub thiaj li yog thawj tiam. ‘Muaj tsaus ntuj thiab muaj kaj ntug’ muaj lub ntsiab tias ‘Tiam qub dhau mus, tiam tshiab tawm tuaj’. Yog li mas thiaj hais tau tias Tswv Ntuj siv sij hawm 6 tiam los tsim lub ntuj lub teb, tsis yog 6 hnub raws li cov lus Ntawv Ntshiab cim xwm tseg.
‘Daim ntuj’ yog lub ntuj ntsuab peb ntsia pom tias muaj huab muaj cua.
‘Cov dej nyob saum qaum ntuj ntsuab’ yog lo lus hais txog txheej huab cua nyob siab dua lub qab ntuj lawm saud; yog qhov peb ntsia pom lub hnub thiab cov hnub qub ci. ‘Cov dej nyob hauv qab ntuj ntsuab’ yog dej hiav txwv.
Tswv Ntuj tseem tsis tau tsim cov tsiaj thiab tib neeg. Tswv Ntuj xub tsim lub hnub thiab lub hli ua ntej tso, vim tias lub hnub thiab lub hli yuav los quas hnub quas hmo, cia rau xam hnub xam nyoog thiab suav hnub suav xyoo. Li ntawd, cov tsiaj thiab tib neeg tuaj tom qab, lawv thiaj yuav tau muaj lub caij rau ua hauj lwm thiab so hauj lwm tau.
Tswv Ntuj tsim tsiaj txhu. Tsiaj yog tsav muaj sia tshiab txawv xyoo ntoo nroj tsuag; cov tsiaj lawv muaj siab ntsws. Tswv Ntuj xub tsim cov tsiaj nyob hauv hiav txwv ua ntej, ib txhia mas Tswv Ntuj tsim kom muaj tis ya saum huab cua.
‘Tib neeg yog Tswv Ntuj tus duab’, tsis tau txhais tias tib neeg muaj lub cev nqaij xws li Tswv Ntuj lub. Tib neeg muaj lub cev zoo li cov tsiaj tab sis tib neeg muaj leej plig xws li Tswv Ntuj. Li ntawd, tib neeg thiaj paub tau Tswv Ntuj.
Tswv Ntuj hais tias “Peb yuav ua tib neeg raws li peb tus duab.” Tswv Ntuj tsis tau hais tias “Kuv yuav ua tib neeg.” Tos Tswv Ntuj hais tias ‘Peb’, vim tias nyob hauv Tswv Ntuj muaj 3 leeg Huab Tais; yog Huab Tais Leej Txiv, Huab Tais Leej Tub, thiab Huab Tais Leej Ntuj Plig Ntshiab. Peb leeg Huab Tais koom ua ib tug Tswv Ntuj.
Lo lus ‘tsim’ txhais tias ua kom muaj tej yam tawm tuaj tshiab. Li ntawd, ‘Tswv Ntuj tsim tib neeg’ thiaj li muaj lub ntsiab tias ‘Tswv Ntuj ua kom muaj tib neeg tawm tuaj tshiab.’
Tswv Ntuj hais kom tib neeg ua tswv tswj lub ntiaj teb, thiab kav cov tsiaj txhu. Li ntawd, tib neeg thiaj muaj lub luag hauj lwm tu thiab saib xyuas txhua tsav yam Tswv Ntuj tau tsim los.
Tswv Ntuj muab nroj tsuag xyoo ntoo cia rau tib neeg tau ua txhiam xws. Tswv Ntuj tseem tsis tau tso cai rau tib neeg muab tej tsiaj los ua txhiam xws. Tom qab no, Tswv Ntuj mam li kheev cia tib neeg muab cov tsiaj los ua txhiam xws noj (HP 9: 3).
Thaum Tswv Ntuj tsim lub ntuj lub teb, mas txhua yam puav leej zoo kawg. Tom qab dab phem ntxias tau tib neeg lawm, kev phem thiaj li nkag los rau hauv lub sim ceeb.
Thaum Tswv Ntuj tsim txhua tsav yam tas, Tswv Ntuj so. Qhov no hais tau tias Tswv Ntuj tsis tsim dab tsi ntxiv lawm. Tab sis tsis tau txhais tias Tswv Ntuj tsis ua lwm yam hauj lwm. Ntawv Hauv Paus yuav qhia peb ntxiv tias Tswv Ntuj tseem yuav ua ntau yam hauj lwm ntxiv.
Zaj Tswv Ntuj tsim ntuj tsim teb no qhia dab tsi rau peb?
1. Peb yuav muab ib hnub hauv lub Lis Piam los tshwj cia ua Tswv Ntuj hnub. Nyob hauv peb cov neeg ntseeg txog Yes Xus, mas peb xaiv Hnub Chiv ua Tswv Ntuj hnub vim tias hnub ntawd yog hnub Huab Tais Yes Xus sawv rov los.
2. Lub sim ceeb tas huv si yog tuaj ntawm Tswv Ntuj tuaj; Tswv Ntuj yog tus tsim. Li ntawd, thiaj tsim nyog peb yuav teev Tswv Ntuj (worship God) tus tsim thiab kav txhua yam nyob saum ntuj (heaven) thiab nyob ntiaj teb (World).
3. Tswv Ntuj lub hwj huam thiab rab peev xwm loj tas nrho, nws hais ib lo lus ces muaj raws li nws hais.
4. Tswv Ntuj siab zoo, nws tsim tas puas tsav yam zoo; Tswv Ntuj tsim neeg muaj lub cev thiab lub siab zoo. Phau ntawv Hauv Paus rov hais tas zog tias “Tswv Ntuj pom tias qhov ntawd zoo.”
5. Tswv Ntuj saib tib neeg yog tus muaj nqis tshaj tas txhia yam, Tswv Ntuj muab txhia yam rau tib neeg siv thiab ua tus kav.
6. Tswv Ntuj xav kom ntiaj teb neeg huam vam, mas cov Yus Das nyob txim nyob Npas Npis Los tab lawv txawm pom tias lawv rov ua ib haiv neeg me, hos lawv tso siab tias Tswv Ntuj yuav rov tsim lawv huam vam raws li Tswv Ntuj lo lus foom hmoov rau nkawm niam txiv hauv paus tias “Neb yeej meem tsim noob, yeej meem huam vam mus puv ntiaj teb thiab tswj ntiaj teb.”
7. Tib neeg yuav tsum muab siab rau txuag xyoob ntoo, txuag tsiaj txhu kom tib neeg tau zoo kev siv tas txhua yam ntau tiam mus ib txhiab ib txhis. Tswv Ntuj tsis kheev kom tib neeg muab tas puas tsav yam rhuav pov tseg. Peb yuav tsum ua tib zoo xav tswv yim txuag tas puas tsav yam kom kav txhiab vam xyoo.
8. Nyob hauv zaj no tsis qhia tias thaum lub ntuj lub teb tawm tuaj mas yog zoo li cas tiag. Muaj tej tus kws txuj niaj hnub tshuaj txog tej ntawd; lawv paub tias muaj ib lub caij pib muaj lub ntuj lub teb, ces phim yuav muaj tus tsim. Tsis kav muaj tej tus tsis xav ntseeg txog Tswv Ntuj, mas lawv hais tias lub ntuj lub teb nws xeeb txawm muaj nws xwb.
9. Thaum cov neeg thuam kev ntseeg lawv hais tias peb ntseeg tias Tswv Ntuj ua hauj lwm 6 hnub tsim lub sim ceeb, mas lawv tsis to taub tias peb saib zaj ntawd zoo li ib zag paj lug qhia txog tej kev cai peb yuav coj, tsis yog qhia tias zoo li cas thiaj muaj lub ntuj lub teb.
