Huas Dias Nkaus yug xyoo 1474, nws yog haiv neeg As Mes Lis Ntias nyob Mes Xis Kos teb. Dias Nkaus txais lub Cim Ntxuav thaum nws ib nrab neej lawm. Dias Nkaus yog ib tug neeg ntseeg hwm Yes Xus lub cev zoo heev thiab nws niaj lis piam ntoj taw li 24 ncua kev mus teev Ntuj.
Nyob hauv hnub tim 9 lub 12 hlis xyoo 1531 thaum Dias Nkaus tab tom mus tom tsev teev Ntuj kom tau teev Tswv Ntuj, nyob ntawm tog kev muaj ib lub me nyuam roob hu ua Tes Pes Yas, txawm muaj ib yam nrov txawv txawv saum lub ncov roob tuaj. Dias Nkaus thiaj nres thiab nyob twj ywm mloog zoo zoo. Dis Nkaus txawm hnov ib lub suab hu nws nrov saum lub ncov roob tuaj.
Dias Nkaus thiaj li khiav nce mus saum lub ncov roob ntawd, saib yog leej twg hu nws. Thaum nws mus txog saum lub ncov roob, nws pom ib tug poj niam lub ntsej muag thiab tej ris tsho ci ntsa iab. Muaj qhov pom kev nyob ib ncig ntawm nws, cov pob zeb pob tsuas nyob ze ntawd kuj ci ntsa iab thiab.
Dias Nkaus ntshai thiab nws xav zoj tias qhov ntawd yog dab tsi. Tam sim ntawd tus poj niam ntawd maj mam hais lus rau Dias Nkaus tias “Koj txhob ntshai! Kuv hais rau koj tias kuv yog tus nkauj tsim txiaj Mab Liab, tus tseem Tswv Ntuj uas tau nqes los ua neeg Leej Niam. Koj yeej paub tias tus tsim lub ntuj lub teb yog peb tus Huab Tais Tswv Ntuj. Li ntawd, mas koj mus hais kom cov ntseeg tuaj txhim ib lub tsev teev Ntuj nyob ntawm no mog!”
Thaum Mab Liab hais lus tag nws cia li ploj ntais lawm, ces Dias Nkaus thiaj rov qab los tsev. Nws mus piav tas txhua yam nws tau pom thiab tej lus nws hnov rau nws tus Tswv Qhia nyob hauv lub nroog Mes Xis Kos. Tswv Qhia poob siab loj kawg.
Hnub tom qab Dias Nkaus rov mus xyuas Tswv Qhia ib zaug ntxiv. Nws hais rau tus Tswv Qhia tias nag hmo thaum hnub qaij, nws rov mus pem lub roob Tes Pes Yas. Tus poj niam ntawd rov yees tawm tuaj rau nws pom. Nws hais rau tus poj niam ntawd kom mus hais cov lus rau cov neeg paub txuj, txhob hais rau nws, vim nws yog tus pluag thiab lub tswv yim ruam dua cov.
Dias Nkaus hais tias “Thaum kuv hais li ntawd tas, mas tus poj niam ntawd hais lus luag ntxhi rau kuv tias me tub! Tab txawm koj yog ib tug me dua cov, tsis kav koj yog tus kuv xaiv kuv hu los mas.”
Dias Nkaus hais nws cov lus tas, nws nug Tswv Qhia tias “Txiv Tswv Qhia, koj yuav hais dab tsi rau kuv?”
Thaum ntawd Tswv Qhia xav twj ywm nyob hauv nruab siab tias tus neeg no nws yog ib tug neeg xav tom ntej tom qab tiag. Nws tsis yog neeg vwm. Nws yog ib tug neeg ntseeg nyob hauv peb lub Koom Txoos thiab. Tiam sis yuav ua li cas thiaj paub tias qhov nws hais ntawd yog tseeb los cuav ne? Tswv Qhia thiaj hais rau Dias Nkaus tias “Koj yuav rov qab mus saum lub ncov roob ib zaug ntxiv. Yog tias koj nqa tau ib yam dab tsi tseem ceeb ntawm lub roob Tes Pes Yas los mas kuv thiaj ntseeg qhov koj hais!”
Dias Nkaus thiaj rov mus pem lub ncov roob Tes Pes Yas. Thawj hnub tsis pom muaj dab tsi tshwm sim li. Hnub tom qab kuj tsis pom muaj dab tsi thiab. Hnub peb yog hnub tim 12 lub 12 hlis xyoo 1531, mas Dias Nkaus rov pom tus poj niam ntawd yees tawm tuaj. Nws nug tus poj niam ntawd tias “Koj ua puas tau ib yam dab tsi los zeem tseeb tias koj yog tus nkauj tsim txiaj Mab Liab tiag? Yog tias koj ua tau, mas tsoom ntseeg hauv lub nroog Mes Xis Kos yuav ntseeg kuv thiab lawv zoo siab txhim ib lub tsev teev Ntuj nyob ntawm no.”
Mab Liab kom Dias Nkaus nce mus pem ncov roob thiab mus khaws ib co paj ntoos. Dias Nkaub xav tias nyem no twb yog lub caij ntuj no lawm, mas ntshai kuv yuav tsis pom ib lub paj ntoo li. Tiam sis Dias Nkaus lam ua ib siab mus, ua cas thaum nws mus txog saum lub ncov roob, nws pom muaj ntau hom paj ntoos tawg ntau tsos thiab cov paj ntoos ntawd tsw qab tas nrho. Cov paj ntoos nyob puv tas lub ncov roob. Dias Nkaus tsis tau pom muaj paj ntoos zoo nkauj nyob hauv lub caij ntuj no ib zaug li. Tam sim ntawd nws thiaj khaws ib hom paj ob peb lub los khi ua ib tauv paj loj loj.
Nws muab nws lub tsho tiv no los kauv cov paj ntawd kom txhob zeeg nyob ntawm tej kev. Nws nqa rov los rau Tswv Qhia saib. Thaum Dias Nkaus mus txog hauv Tswv Qhia tsev mas nws qhib nws lub tsho tiv no, ces cov paj ntoo cia li poob rau hauv pem teb. Tswv Qhia xav tias ‘Tej paj ntoos zoo nkauj cuag no, nyob hauv lub caij ntuj no mas kuv tsis tau pom ib zaug li!’ Tab sis muaj ib yam ua rau Tswv Qhia zeem tseeb, qhov ntawd yog nyob hauv Dias Nkaus lub tsho tiv no sab hauv qab mas cia li muaj Leej Ntshiab Mab Liab ib tug duab. Leej Ntshiab Mab Liab tus duab mas luag ntxhi thiab ci ntsa iab xwb.
Tswv Qhia tsis ua xyem xyav li yav tas lawm. Nws ntseeg tias Leej Ntshiab Mab Liab tau yees tawm tuaj rau Dias Nkaus pom tiag. Tswv Qhia thiaj hais kom Dias Nkaus coj Tswv Qhia mus pem lub roob Tes Pes Yas.
Tswv Qhia hu cov ntseeg nyob hauv lub nroog Mes Xis Kos tuaj thiab hais kom lawv pib txhim lub tsev teev Ntuj nyob saum lub roob ntawd, ces txij hnub ntawd los Mab Liab daim duab ntawd thiaj nyob hauv lub tsev teev Ntuj hauv lub nroog Mes Xis Kos los txog tav no.
Txij xyoo 1531 los, mas cov neeg As Mes Lis Ntias hauv teb chaws Mes Xis Kos thiaj tig los yuav lub siab tshiab coob.
Thaum Dias Nkaus muaj 74 xyoos, nws txoj sia tu, yog ncaj rau hnub tim 20 lub 5 hlis 1548.
Nyob hauv xyoo 2002 Vaj Qhia Zam Paj Lug 2 tsa Dias Nkaus ua ib tug Leej Ntshiab.
