Tus sau: TP. Txhiaj Foom (OMI) Tim 11 lub 12 hlis 2008

Niaj xyoo thaum txog lub 12 hlis, peb kuj nco txog lub caij Yes Xus yuav rov los txiav txim zaum kawg rau ib zeej tsoom neeg ciaj neeg tuag. Yog thaum ntawd, mas tib neeg lub cev yuav sawv rov los, ces Yes Xus yuav txiav txim rau sawv daws raws li nyias tej hauj lwm nyias tau ua los.

Peb yuav tsum ceev faj, peb ua cov hauj lwm zoo, peb zas kom dhau ntawm kev ua phem ua txhaum, peb yuav kub siab ntseeg txog Tswv Ntuj uas yog tus Huab Tais khuv leej neeg tas nrho, peb haj yam yuav tso siab lug rau peb tus Huab Tais Yes Xus Pleev.

1. Huab Tais Yes Xus yog tus txiav txim raws txoj kev ncaj (CCC 1021)

Lub caij Tos Huab Tais, mas peb nco txog 2 yam zoo li no:

1. Huab Tais Yes Xus yuav rov los txiav txim rau ib zeej tsoom neeg ciaj neeg tuag.

2. Peb tso lub ntiaj teb no tseg, yog thaum Tswv Ntuj pom zoo hu peb mus cuag nws.

Yog thaum peb tas sim neej, mas Huab Tais Yes Xus yuav txiav txim rau peb raws txoj kev ncaj, nws yuav txiav txim rau sawv daws raws li tej hauj lwm nyias tau ua los. Huab Tais Yes Xus yuav luj peb tej koob hmoov thiab peb tej txhaum, ces cov neeg zoo yuav mus nrog Tswv Ntuj nyob pem Tswv Ntuj lub Ceeb Tsheej, muaj ib co yuav mus hauv teb chaws them txim, hos cov phem tshaj plaws yuav mus dab phem teb. Yog thaum ntawd, nyias yuav mus nyias qhov chaw zoo thiab phem raws li nyias tej hauj lwm tau ua los. Ntawv Moo Zoo hais tias lub caij ntawd, peb yuav sawv nyob ntawm Leej Pleev xub ntiag, yuav tsis muaj dab tsi thaiv peb, ces nyias yuav pom txhuam yam uas thaum nyob nyias tau ua zoo los tau ua phem. Yog thaum ntawd, mas Huab Tais Yes Xus yuav pauj rau nyias raws li nyias cov hauj lwm (MT 16: 27).

Tas ib sim neeg peb yuav tsum ceev faj, thiab yuav tsun ua zoo xwb, ces thaum txog hnub txiav txim, mas peb thiaj li yuav hnov Huab Tais Yes Xus lub suab hais rau peb tias “Hnub no, koj yuav nrog kuv nyob hauv lub nras lom zem” (LK 23: 42).

2. Peb ib txhia ncaj qha mus pem Tswv Ntuj lub Ceeb Tsheej (CCC 1023-1029)

Peb puas yog ib haiv neeg hla hauv lub ntiaj teb no xwb, ces peb tos txoj sia nyob mus li pem Tswv Ntuj lub Ceeb Tsheej (HN 11: 13, 16, 26).

Yog thaum peb chaws mus hauv Tswv Ntuj lub Ceeb Tsheej, mas Tswv Ntuj yuav so txhua lub kua muag uas ntws ntawm peb qhov muag los. Thaum ntawd, yuav tsis muaj kev tuag, yuav tsis muaj kev quaj nyiav, kev ntsaj, thiab kev mob ntxiv (QYTN 21: 4).

Peb ntshaw txog hnub zoo tshaj plaws uas Tswv Ntuj yuav pub peb nyob kaj lug kaj nrig mus li nyob pem Tswv Ntuj lub Ceeb Tsheej. Yog thaum ntawd, peb yuav pom Tswv Ntuj tim ntsej tim muag (1Z 3: 2, QYTN 22: 4), peb yuav nrog Huab Tais Leej Txiv, Huab Tais Leej Tub, thiab Huab Tais Leej Ntuj Plig nyob, peb kuj yuav nrog niam Mab Liab, nrog Ntuj cov Tshiab, thiab nrog tas nrho ib tsoom neeg siab ntshiab nyob.

            Tswv Ntuj lub Ceeb Tsheej yog ib yam npog nrees, yog ib yam uas peb tsis txawj piav kom txhij kom txhua. Tab sis Ntawv Ntshiab muaj tej lo lus qhia tias nyob pem Tswv Ntuj lub Ceeb Tsheej peb yuav saj qhov pom kev ci ntsa iab, saj kev thaj yeeb nyab xeeb, peb yuav zoo siab xws li peb noj ib rooj tshoob. Tswv Ntuj lub Ceeb Tsheej yog Leej Txiv Tswv Ntuj lub Tuam Tsev thiab yog lub Nras Lom Zem. Peb tsis muaj tswv yim txaus los piav txog Tswv Ntuj lub Ceeb Tsheej, tab sis peb ntseeg tias yuav muaj ib lub caij zoo li ntawd tiag.

Peb tso siab tias Tswv Ntuj yuav hlub peb sawv daws huv tib si, nws yuav roos peb zoo dua qhov peb thov thiab peb xav tau. Peb tsuas yog ib co neeg hla lub ntiaj teb no xwb, ces peb tos txog hnub zoo tshaj plaws uas peb yuav mus nyob hauv Tswv Ntuj lub Ceeb Tsheej (HN 11: 13, 16).

3. Muaj lub teb chaws them txim (CCC 1030-1032)

Tswv Ntuj yog tus Huab Tais siab ntshiab. Li ntawd, tsuas yog cov neeg muaj lub siab dawb huv xwb thiaj li tsim nyog mus nrog Tswv Ntuj nyob pem Tswv Ntuj lub Ceeb Tsheej. Yog vim qhov ntawd, mas cov neeg dua nra uas lawv lub siab tseem lo txhaum, lawv yuav tsum raug them txim txhaum ib ntus kom lawv lub siab huv tuaj, ces thiaj yuav chaws mus txais kev zoo siab nyob pem Tswv Ntuj lub Ceeb Tsheej.

Niaj xyoo thaum txog lub 11 hlis, hnub tim 2 mas peb cov neeg ntseeg hauv lub Koom Txoos Kav Tos Liv nco txog peb cov kwv tij dua nra, ces peb mus ua Thaj Txi Ntuj rau cov neeg tuag nyob tom lub toj ntxas. Peb thov Ntuj rau lawv vim peb tsis paub tias lawv puas tau mus pem Tswv Ntuj lub Ceeb Tsheej, los tseem nyob hauv lub teb chaws them txim. Peb thov Huab Tais Yes Xus uas yog tus Huab Tais cawm neeg, kom so lawv tej txhaum pov tseg.

Qhov uas peb thov Ntuj rau cov neeg dua nra, mas yog ib yam tsim nyog ua, yog ib txog hauj lwm ntshiab dawb huv (2 MKN 12: 45).

Qhov peb yuav pab tau cov neeg nyob hauv lub teb chaws them txim, mas yog qhov peb thov Ntuj tas zog, kom Tswv Ntuj zam txhaum rau lawv, kom lawv dim ntawm lub teb chaws them txim sai. Lub Rooj Ncauj Lus Vas Tis Kas Ob qhia peb tias “Peb tsoom neeg nrog cov neeg ciaj thiab cov neeg tuag sib koom siab koom ntsws. Kev ntseeg rub peb los nrog lawv ua ib yim nyob hauv Huab Tais Yes Xus Pleev lub Koom Txoo” (LG 51).      Peb tso siab tias Huab Tais Tswv Ntuj uas yog tus Huab Tais khuv leej neeg tas nrho yuav mloog peb zaj thov, ces Tswv Ntuj yuav zam txhaum rau peb cov kwv tij uas dua nra lawm (CCC 956-962).

4. Muaj ib co neeg mus dab phem teb (CCC 1033-1037, 1056-1057).

Nyob hauv phau ntawv ‘Ntuj kev cai lub ntsiab’ uas Txiv Plig Nyiaj Pov sau, mas muaj lo lus hais tias “Cov neeg mus dab phem teb yog cov neeg tsis xav mloog cov cai nyob hauv Huab Tais Ntuj lub Ceeb Tsheej, lawv yuav nyob txim mus li.” Ntawv Ntshiab qhia tias leej twg ntxub nws tus kwv, mas nws yog ib tug neeg tua neeg; nej paub tias tsis muaj ib tug tua neeg yuav tau txoj sia nyob mus li los ua nws tug (1 Z 3: 15). Ntawv Moo Zoo yeej muaj tej zaj qhia peb tias muaj ib cov neeg yuav mus dab phem teb, vim tas lawv sim neej, lawv tsis kam mloog Tswv Ntuj lus. Cov neeg ntawd, rov nplua lawv tus kheej, lawv yuav tsis tau nrog Tswv Ntuj nyob.

Ntawv Moo Zoo qhia tias “Nej txhob ntshai cov neeg tua nej lub cev, tab sis lawv tua tsis tau nej tus ntsuj plig. Nej yuav ntshai tus muaj peev xwm rhuav nej lub cev thiab tus ntsuj plig nyob hauv hav hluav taws” (MT 10: 28, 5: 22, 29, 13: 42, 50, MK 9: 43-48).

Nej kuj paub tias nyob Los Tsuas teb, Cob Tsib teb, thiab Suav teb, mas yav dhau los yeej muaj tej pab neeg ntseeg Ntuj yeem tuag ua Yes Xus tim khaw. Lawv ua li ntawd, vim lawv mloog Huab Tais Yes Xus lo lus tias “Nej txhob ntshai cov neeg tua nej lub cev, tab sis lawv tua tsis tau nej tus ntsuj plig.”

Ntawv Moo Zoo qhia peb tia “Nej yuav ntshai tus muaj peev xwm rhuav nej lub cev thiab tus ntsuj plig nyob hauv hav hluav taws.” Tus muaj peev xwm rhuav peb tus ntsuj plig pov tseg hauv qhov hluav taws, mas yog Tswv Ntuj. Peb yuav xub muab siab rau mloog Tswv Ntuj thiab hwm Tswv Ntuj, vim Tswv Ntuj muaj peev xwm ‘cawm tau peb tus ntsuj plig’, thiab Tswv Ntuj muaj peev xwm ‘muab peb tus ntsuj plig pov tseg rau hauv qhov hluav taws’. Yog yus ua Tswv Ntuj tim khawv, mas Tswv Ntuj tsis pov yus rau hauv qhov hluav taws.

Huab Tais Yes Xus tseem qhia peb tias lub caij txiav txim zaum kawg, mas Huab Tais Yes Xus yuav hais rau cov neeg phem tias “Nej txoj hmoov phem, nej khiav mus deb kuv, mus nyob hauv cov hluav taws kub tsis txawj tuag uas Ntuj npaj rau dab phem thiab nws cov dab” (MT 25: 41).

Lub Koom Txoos Kav Tos Liv ib txwm qhia tias yuav muaj tej tus neeg mus dab phem teb. Li ntawd, peb yuav ceev faj, peb zas kom deb ntawm txoj kev ua phem ua txhaum, ces peb niaj hnub yuav ceev faj kawg nkaus.

Xyoo 1917 thaum niam Mab Liab tawm tuaj rau 3 tus me nyuam yaus pom nyob tim lub zos Fas Tis Mas hauv teb chaws Pos Tws Nkas, mas niam mab Liab qhia kom teev Ntuj zoo li no “Kuv tus Huab Tais Yes Xus, thov koj zam txhaum rau peb. Koj cawm peb dim ntawm dab phem cov hluav taws, thiab thov koj coj kom tas txhua leej txhua tus mus saum Ntuj lub Ceeb Tsheej, tshwj xeeb yog cov yuav tsum tau koj khuv leej lawv ntau tshaj plaws.”

5. Yuav muaj lub caij txiav txim zaum kawg (CCC 1038-1050)

Ntawv Moo Zoo qhia peb tias yuav muaj lub sij hawm uas tas ib tsoom neeg hauv lub qhov ntxa yuav hnov Neeg Leej Tub lub suab, ces lawv yuav tawm los. Lub caij ntawd, cov tau ua zoo yuav sawv los txais txoj sia; hos cov tau ua phem yuav sawv los raug txim (Z 5: 28-29).

Yog thaum cov neeg tuag lub cev sawv rov los, mas Huab Tais Yes Xus yuav txiav txim rau tas huv tib si cov neeg ncaj thiab cov neeg txhaum (HL 24: 15). Ntawv Moo Zoo hais tias “Thaum Neeg Leej Tub yuav rov los, nws yuav muaj koob meej, tas tsoom Tshiab yuav nrog nws los. Tas ib tsoom haiv neeg yuav sib sau nyob ntawm nws xub ntiag, nws yuav cais cov neeg xws li tus zov yaj cais cov yaj ntawm cov tshis. Nws yuav cia cov yaj rau ntawm nws sab xis, cia cov tshis rau ntawm nws sab laug. Ces cov neeg txhaum yuav mus raug txim ib txhiab ib txhis. Hos cov neeg ncaj yuav mus txais txoj sia nyob mus li” (MT 25: 31-33, 46).

Huab Tais Yes Xus qhia peb tias “Hais txog lub hub nyoog thiab lub sij hawm ntawd, mas tsis muaj leej twg paub. Cov Tshiab nyob saum ntuj tsis paub. Neeg Leej Tub kuj tsis paub. Kawg yog Leej Txiv thiaj paub xwb” (MK 13: 32).

Huab Tais Yes Xus ntuas peb tias “Nej ceev faj, nej zov hmo, vim nej tsis paub tias thaum twg thiab yog lub sij hawm twg. Tsam Huab Tais yuav rov los thaum nej tsis nco faj, nws yuav pom nej tsaug zog. Qhov kuv hais rau nej no, kuv kuj hais rau tas sawv daws huv tib si; nej zov hmo mog!”

Peb yuav ua neeg ceev faj thiab npaj txhij tos Huab Tais Yes Xus tas mus li. Peb niaj hnub yuav rov nug yus tus kheej tias “Yog ib tsam tsaus ntuj, Tswv Ntuj hu kuv kom tso ntiaj teb no tseg, mas kuv puas yuav tau txais koob haum nyob pem Tswv Ntuj lub Ceeb Tsheej? Hnub no, kuv puas muaj ib lub siab ntshiab dawb huv? Puas tsim nyog nrog Huab Tais Yes Xus nyob, nrog niam Mab Liab thiab nrog tas ib tsoom Tshiab nyob saum ntuj.