Ib tsoom Hmoob sawv daws, txhua xyoo thaum txog hnub tim 2 lub 2 hlis, lub Koom Txoos ua hmoov cev tus me nyuam Yes Xus rau Tswv Ntuj nyob hauv lub Tuam Tsev Teev Ntuj. Kev ua hmoov no tseem hu tias ‘hnub ua hmoov ntxuav niam Mab Liab’ (the Feast of the Purification of Mary) vim tias hnub ntawd, Yos Xes coj Mab Liab mus ua kab ke ntxuav raws li Mais Xes Txoj Cai tom qab Mab Liab daws cev. Hnub no tseem hais tias yog ‘hnub ua hmoov taws tus tswm ciab’ (the Feast of Candlemas) vim tus me nyuam Yes Xus yog qhov pom kev kaj rau lub ntiaj teb. Hnub no tseem hais tias yog ‘hnub ua hmoov kev cog lus tshiab kev cog lus qub’ (Feast of Encounter) vim yog hnub tus me nyuam Yes Xus, tus yawg laus Xis Mes Oos thiab tus pog As Nas tau sib ntsib.
Raws li Mais Xes Txoj Cai ceev tseg tias tus poj niam twg yug ib tug tub, nws lub cev yuav tsis huv 7 hnub. Hnub 8 nws yuav ua kab ke txiav rau tus me nyuam. Tus poj niam yuav caiv ntxiv li 33 hnub. Dhau lub caij caiv, mas ua kab ke ntxuav rau nws. Thaum tus poj niam ua kab ke ntxuav tas, nws mam mus tau hauv cov tsev txoos. Yog tias tus poj niam twg yug tau ib tug ntxhais, nws yuav tsis huv 14 hnub, thiab nws yuav caiv ntxiv li 66 hnub, mas mam li ua kab ke ntxuav rau. Thaum txog lub caij ua kab ke ntxuav, leej txiv yuav tsum cab ib tug me nyuam yaj hnub nyoog ib xyoos nrog ib tus nquab lwb rwg los ib tus thav nquab dawb mus rau tus Leej Choj muab tua txi rau Tswv Ntuj. Yog npaj tsis tau ib tug me nyuam yaj, nws tsum nrhiav kom tau ib nkawg nquab lwb rwg los ib nkawg thav nquab dawb. Ib tug cia hlawv ua txim cev rau Tswv Ntuj, ib tug cia hlawv them txim (LV 12: 1-8). Mais Xes Txoj Cai hais ntxiv tias txhua tus me nyuam tub xub yug, yuav muab qee rau Tswv Ntuj (KT 13: 2). Thaum tus me nyuam puv hli, mam muab nyiaj txhiv rov qab (XP 18: 16). Yog vim li ntawd, Yos Xes thiaj coj Mab Liab mus ua kab ke ntxuav, thiab coj tus me nyuam Yes Xus mus cev rau Tswv Ntuj hauv lub Tuam Tsev Teev Ntuj nyob pem Yes Lus Xas Les.
Cov Yus Das txoj cai ceev tseg tias tus poj niam yug me nyuam, nws lub cev tsis huv, tab sis cov ntseeg txog Yes Xus tsis xav li. Cov ntseeg ua hmoov cev Yes Xus hauv lub Tuam Tsev Teev Ntuj, kom tau nco txog tej yam li no:
1. Yos Xes txoj kev hlub tus me nyuam Yes Xus nyob hauv kev ntsiag to.
2. Xis Mes Oos txoj kev ntseeg ruaj nreb.
3. As Nas thov Ntuj tsis tu ncua.
4. Mab Liab zoo siab txais cov xwv txheej yuav tuaj nphav nws lub siab.
Chiv thawj cov ntseeg hauv tiam 1 ua hmoov Yes Xus yug nyob hauv hnub tim 6 lub 1 hlis, ces lub Koom Txoos nyob Yes Lus Xas Les thiaj ua hmoov cev Yes Xus rau Tswv Ntuj nyob hauv hnub tim 15 lub 2 hlis, los yog 40 hnub tom qab Yes Xus yug.
Nyob hauv tiam 4 tus tub tawm rooj fiv Ntuj hu ua ‘Es Ntses Lias’ (Pilgrim Egeria) sau tseg tias thaum nws tuaj txog Yes Lus Xas Les, tom qab hnub Yes Xus yug los li 40 hnub, nws pom cov neeg ntseeg ua kab ke nquam Yes Xus mus hauv lub tsev teev Ntuj cav txog kev sawv rov los (The Church of the Resurrection). Nyob ntawd, cov Leej Choj thiab tus Tswv Qhia tau nthuav zaj Ntawv Moo Zoo hais txog Mab Liab thiab Yos Xes cev Yes Xus rau Tswv Ntuj hauv lub Tuam Tsev Teev Ntuj (LK 2: 22-39).
Es Ntses Lias tsis sau tias qhov nws pom ntawd yog lub txoos tab tom ua ntees dab tsi, tab sis nyob hauv tiam 5 mam hnov sawv daws hais tias yog lawv ua ntees ‘hnub ua hmoov kev cog lus tshiab ntsib kev cog lus qub’. Tos lawv muab hu li ntawd, vim lawv xav nco txog hnub tus me nyuam Yes Xus tau ntsib tus yawg laus Xis Mes Oos thiab tus pog laus As Nas. Tus me nyuam Yes Xus tam kev cog lus tshiab, hos Xis Mes Oos thiab As Nas tam kev cog lus qub.
Xyoo 528 muaj av qeeg ua rau neeg tuag coob nyob As Thias Kias, thiab xyoo 541 muaj kab mob sib kis nyob hauv Koos Tas Tis Nos Pos Lis ua rau neeg tuag ntau txhiab leej, ces cov ntseeg thiaj sib txoos thov Ntuj kom tshem cov xwv txheej no mus. Hnub uas tej xwv txheej no dhau ncaj rau hnub ua hmoov cev tus me nyuam Yes Xus rau Tswv Ntuj, ces txij ntawd los cov ntseeg thiaj niaj xyoo ua hmoov.
Nyob hauv cov Los Mas tseem coj dab qhuas, thaum pib lub 2 hlis lawv yuav ua ntees them txim. Lawv ua li ntawd 5 xyoos ib lwm. Vaj Qhia Xaws Ntsis Us (Pope St. Sergius I) xav kom cov ntseeg tsis txhob mus koom nrog cov tseem coj dab qhuas Los Mas ua lub ntees them txim ntawd, nws thiaj li txais lub Koom Txoos sab hnub tuaj txoj kab ke ua hmoov cev Yes Xus rau Tswv Ntuj. Tab sis vim lub Koom Txoos sab hnub poob muab hnub tim 25 lub 12 hlis ua hmoov Yes Xus yug, mas lawv thiaj li txav hnub ua hmoov cev tus me nyuam Yes Xus rau Tswv Ntuj los poob rau hnub tim 2 lub 2 hlis.
Thaum lawv ua lub ntees, lawv yuav ua kab sab mus ncig lub tsheej Los Mas. Tus Leej Choj yuav hnav tsoos tsho tsam xem hais txog kev them txim. Sawv daws ib leeg tuav ib tug tswm ciab nco txog Xis Mes Oos lo lus hais tias Yes Xus yog qhov pom kev tawm tuaj kaj cov pej kum haiv neeg (LK 2: 32). Vim li ntawd, lawv thiaj hu hnub no ua ‘hnub ua hmoov taws tswm ciab’.
Tom qab no, lub Koom Txoos hais tias yog ‘hnub ua hmoov ntxuav niam Mab Liab’ tab sis txij xyoo 1969 los mus, lub Koom Txoos hloov los hais tias yog ‘hnub ua hmoov cev tus me nyuam Yes Xus rau Tswv Ntuj’ vim tias ib txwm los lub Koom Txoos ntseeg tias niam Mab Liab yug los tsis lo neeg lub keeb txhaum. Vim niam Mab Liab tsis lo txhaum, mas niam Mab Liab thiaj tsis tas yuav ua kab ke ntxuav. Tsis tas li ntawd, thaum muab hloov ua hnub cev tus me nyuam Yes Xus rau Tswv Ntuj, mas thiaj pom tias hnub no yog hnub ua hmoov rau Huab Tais Yes Xus tiag.
Hais txog kab ke taws tus tswm ciab, mas muaj 2 yam:
1. Cov ntseeg sib txoos ua ke nyob hauv lub tsev txoos los yog ntawm tej qhov chaw ze ze lub tsev tseev Ntuj. Sawv daws tuav tus tswm ciab cia. Tus Leej Choj hnav tsoos tsho dawb los txog ntawm sawv daws, ces lub txoos hu ib zaj nkauj thiab pib taws tus tswm ciab. Tus Leej Choj hais lus rau sawv daws thiab nthuav tias lub ntees ua hmoov no lub ntsiab yog dab tsi. Tom qab ntawd, Leej Choj mam thov Ntuj thiab pov dej foom hmoov zoo rau tus tswm ciab. Ua li tas, sawv daws mam nquam tus tswm ciab mus hauv lub tsev teev Ntuj.
2. Cov ntseeg sib txoos ua ke nyob hauv lub tsev teev Ntuj, lawv taws tus tswm ciab tuav cia ntawm tes. Leej Choj thiab ob peb tus neeg ntseeg mam nquam tus tswm ciab los hauv lub tsev teev Ntuj.
Hnub no lub Koom Txoos cev 3 zaj nyeem rau lub txoos tau nyeem.
Zaj nyeem 1 yog tus Yaj Saub Mas Las Kis cov lus hais tias “Kuv yuav xa kuv tus tub tshaj xov mus tho kev ua kuv ntej. Ib sij huam, tus Huab Tais uas nej nrhiav nws yuav chaws los hauv nws kem tsev ntshiab. Tus Tshiab tuav lo lus cog uas nej nyiam nws tuaj txog ntawd lawm! Yog tsoom tub rog tus HUAB TAIS hais li ntawd. Hnub nws tuaj txog, leej twg yuav nyob taus? Thaum nws yuav tawm tuaj leej twg yuav sawv taus ntsug tos nws? Nws yuav zoo li tus nchuav hlau cov hluav taws. Nws zoo li tshuaj ntxhua khaub ncaws. Nws yuav tuaj nchuav nyiaj kom huv tuaj. Nws yuav ua kom Les Vis cov tub huv tuaj, ib yam nchuav kub thiab nchuav nyiaj kom tau cov tseem kub tseem nyiaj. HUAB TAIS yuav saib lawv yog cov cev thaj txi Ntuj raws kev ncaj, ces HUAB TAIS yuav pom zoo txais Yus Das thiab Yes Lus Xas Les thaj txi Ntuj ib yam li lub hauv paus thaud” (MLK 3: 1-4).
Zaj nyeem 2 yog cov lus hauv tsab ntawv xa mus rau cov Hes Nplaws, tus sau nws xav qhia tias Huab Tais Yes Xus yog tus Tuam Leej Choj nyob mus li, nws muab nws cev rau Tswv Ntuj nyob saum lub roob Nkos Nkos Tas. Huab Tais Yes Xus yog Leej Choj Ntshiab, nws ua xis Tswv Ntuj siab li no “Vim cov me nyuam koom ib co ntshav, ib ce nqaij, mas Yes Xus kuj nrog lawv koom, kom nws txoj kev tuag yeej tus tuav txoj kev tuag lub hwj huam, tus ntawd yog tus dab phem Xas Tas. Yes Xus npo cov uas mag kev tuag muab lawv ua qhev nyob hauv txoj kev ntshai tuag tas ib sim neej. Yes Xus tsis tuaj cawm cov Tshiab. Nws tuaj cawm Has Nplas Has tsoom xeeb ntxwv. Vim li no, nws thiaj yuav tsum yug los zoo ib yam li nws cov kwv, nws thiaj ua tau ib tug Leej Choj uas ib txhij khuv leej neeg thiab npuab Tswv Ntuj. Nws so tsoom pej xeem cov txhaum pov tseg. Vim nws tau raug kev sim siab, mas nws thiaj txawj pab cov raug kev sim siab” (HN 2: 14-18).
Zaj nyeem 3 yog cov lus hauv Lus Kas Ntawv Moo Zoo (LK 2: 22-32) hais txog Yos Xes thiab Mab Liab coj tus me nyuam Yes Xus mus cev rau Tswv Ntuj hauv lub Tuam Tsev Teev Ntuj, ces lawv tau ntsib yawg Xis Mes Oos thiab pog As Nas. Xis Mes Oos ua Yaj Saub hais tias tus me nyuam Yes Xus yuav coj kev cawm tuaj rau cov His Xas Lais, thiab nws tseem hais tias yav tom ntej Mab Liab yuav raug kev mob siab vim nws tus me nyuam txoj kev txhiv ntiaj teb neeg.
Hnub no, Tswv Ntuj Lo Lus zoo qhia kom peb ras tias thaum peb txais lub Cim Ntxuav, mas yog peb tau muab peb cev rau Tswv Ntuj lawm, thiab txhua hnub peb mus koom Huab Tais Yes Xus thaj txi Ntuj, mas peb rov muab peb thiab peb tsev neeg cev ua txim nrog Huab Tais Yes Xus txi rau Tswv Ntuj nyob saum lub thaj txi Ntuj. Li ntawd, niaj hnub peb thiaj yuav nco ntsoov tias peb yog Tswv Ntuj tug lawm, mas peb yuav ua neej nyob hauv txoj kev ntshiab.
Hnub no, Tswv Ntuj Lo Lus zoo qhia kom peb ras tias peb muaj Huab Tais Yes Xus nrog nraim peb thiab nrog nraim luag tej thiab, mas thiaj muaj ib txhia ua lub neej ntsiag ntsiag nyob hauv lawv txoj kev ntseeg thiab kev tsob hwb Tswv Ntuj yam li tus yawg laus Xis Mes Oos thiab tus pog laus As Nas; txawm tias tsis muaj tus pom, tsis kav Leej Ntuj Plig Ntshiab tau muab lawv ua rab twj coj luag lwm tus los paub Huab Tais Yes Xus. Li ntawd, peb yuav tau thov Leej Ntuj Plig Ntshiab pab kom peb txawj ua zoo li Xis Mes Oos thiab As Nas nkawd, kom peb coj Huab Tais Yes Xus mus cuag cov nyob ncig peb, thiab kom peb ua rab twj coj lawv los vam khom txog Huab Tais Yes Xus.
