LIS PIAM 5 CAIJ HLA, HNUB TSIB

Huab Tais Yes Xus hais tias “Nej nyob hauv kuv txoj kev nyiam mog.” Lo lus no yog kom peb ua neej nyob sis nyiam sis hlub.
Huab Tais Yes Xus hais ntxiv tias “Nej yuav nyob ruaj hauv kuv txoj kev nyiam tau, yog nej coj kuv cov lus qhia”. Yog kom peb ua raws li cov lus Huab Tais Yes Xus qhia rau peb; yog nyiam Tswv Ntuj thiab nyiam cov nyob ib ncig peb ib yam li peb pom Huab Tais Yes Xus nyiam nws Leej Txiv thiab nyiam lub qab ntuj neeg.
Huab Tais Yes Xus nyiam Leej Txiv Tswv Ntuj, mas nws niaj hnub nrhiav ib qho chaw xu kev kom tau thov Ntuj, nws niaj lis piam mus koom teev Ntuj nyob hauv cov tsev txoos, nws zoo siab mloog thiab ua raws li Leej Txiv txhib kom nws ua. Huab Tais Yes Xus nyiam ib zeej tsoom tsis hais tus hlob tus yau, tus muaj tus pluag, tus zoo tus phem. Huab Tais Yes Xus pom lawv poob rau qhov txhaum, pom lawv raug txom nyem muaj mob, Huab Tais Yes Xus hlub lawv, ces nws thiaj pab npo lawv hauv lub qhov txhaum, pab cawm lawv hauv kev txom nyem, pab daws lawv tus mob kom zoo hlo.
Tus neeg nyob hauv Huab Tais Yes Xus kev nyiam thiaj yuav tsum ua raws Huab Tais Yes Xus tus piv txwv. Huab Tais Yes Xus nyiam Tswv Ntuj, mas nws ua cov hauj lwm thiab lub siab kom txav mus nyob ze Tswv Ntuj yam li nws nquag thov Ntuj, koom nrog sawv daws teev Ntuj ua ke. Huab Tais Yes Xus nyiam luag tej, ces thaum nws pom sawv daws txom nyem, nws thiaj cev tes mus pab lawv kom dim hauv kev txom nyem.
Yog peb tsis muaj lub siab nyiam, mas peb puas yuav muaj lub siab hlub; yam li nyob hauv nruab siab koj ntxub tus neeg twg, mas thaum koj pom nws raug txom nyem koj yeej yuav tsis hlub txog nws, koj tsuas thuam nws tuaj nruab siab. Tab sis Huab Tais Yes Xus tsis xav kom peb ua neeg tsis nyiam luag tej, mas Huab Tais Yes Xus thiaj hais tias “Nej nyob ruaj hauv kuv txoj kev nyiam mog, vim kuv nyiam nej ib yam li Leej Txiv nyiam kuv.”
Peb yuav paub txoj kev nyiam tau, yog peb ntsia tias cov ua niam ua txiv nyiam lawv tej me nyuam zoo li cas. Yeej tsis muaj leej niam leej txiv twg yuav ntxub tau nws cov me nyuam, txawm tias cov me nyuam txhoj puab npaum cas los phem npaum cas, lawv yeej nrauj tsis tau txoj kev nyiam lawv cov me nyuam pov tseg.
Tus me nyuam nyiam niam thiab txiv, nws kuj yuav mloog niam txiv lus. Yog peb nyiam Huab Tais Yes Xus tiag, peb kuj yuav mloog Huab Tais Yes Xus hais. Yog peb nyiam Huab Tais Tswv Ntuj tiag, peb kuj yuav mloog Huab Tais Tswv Ntuj cov lo lus tawm hauv Huab Tais Yes Xus lub ncauj tuaj. Thaum ntawd, peb thiaj yuav nyob hauv Huab Tais Yes Xus txoj kev nyiam.