HNUB CHIV HLA (Z 20: 1-9)

Thaum Huab Tais Yes Xus sawv rov qab los, nws tsis muab txim rau cov thwj tim, tab sis Huab Tais Yes Xus hais rau lawv tias “Nej nyob kaj lug.” Huab Tais Yes Xus hais lo lus no tom qab nws raug ntxeev siab, raug txom nyem, thiab tuag saum ntoo cuam. Hnub ntawd, cov thwj tim ntshai thiab ntxhov siab tas nrho, tab sis Huab Tais Yes Xus xaiv txoj kev pib dua tshiab nyob hauv kev thaj yeeb. Qhov no qhia rau peb paub tias txoj kev sawv rov los coj ib yam tseeb tiag tuaj rau lub ntiaj teb.
Nyob hauv Zam Ntawv Moo Zoo piav tias thawj hnub qhib lub lis piam, Mab Liab Mas Ntas Las sawv ntxov mus tom Huab Tais Yes Xus lub qhov ntxa, nws pom tias daim txiag zeb npog lub qhov ntxa raug leej twg muab dov lawm. Mab Liab Mas Ntas Las khiav mus hais rau Pob Zeb thiab Zam, ces nkawd sawv tsees khiav tuaj xyuas. Zam xub mus txog ua ntej, nws sawv sab nraud xauj mus hauv lub ntxa, nws pom cov hlab ntaub tso rau ntawm ib sab. Pob Zeb tuaj txog, nws chaws mus hauv, ces Zam mam raws qab mus. Nkawd pom, ces nkawd ntseeg.
Nyob hauv zaj Ntawv Moo Zoo no tshoj peb siab li cas?
Qhov Ib, kev sawv rov los pib ntawm kev nrhiav me me uas hloov tau txhua yam.
Lub caij Hla tsis yog pib nyob hauv kev ua ib lub ntees lom zem. Tab sis caij Hla pib ntawm kev muab siab rau soj ntsuam; yam li Mab Liab ntsia pom tias daim txiag zeb raug dov tawm ntawm lub qhov ntxa lawm. Mab Liab Mas Ntas Las pom, ces nws mus qhia cov thwj tim. Qee lub sij hawm yam pauv ntxeev loj tshaj hauv peb lub neej yog pib ntawm tej lub cim me me uas qhia peb tias muaj tej yam tsis zoo li qhov qub. Qee zaus lub siab ntseeg kuj yog pib ntawm kev ras paub me me li ntawd.
Kev thov Ntuj ntsiag ntsiag, kev xav tswv yim ntuas siab, los kev ua cov hauj lwm sis nyiam sis hlub me me puav leej diaj tau kev tso siab kom sawv dua tshiab.
Kev sawv rov qab los ntuas peb tias Tswv Ntuj nyiam pib hloov peb lub neej nyob hauv tej lub cim me me coj peb mus rau txoj kev ntseeg tob.
Qhov Ob, kev sawv rov los coj kev thaj yeeb tuaj kaj peb lub siab mob.
Cov thwj tim ua neej nyob hauv kev ntshai thaum lawv pom Huab Tais Yes Xus raug ntes mus tua saum ntoo cuam. Lawv kev tso siab raug zwm av nrog Huab Tais Yes Xus lub cev. Yog peb nyeem zaj Ntawv Moo Zoo hnub no mus ntxiv, peb pom tias Huab Tais Yes Xus sawv rov los, nws tawm tuaj rau cov thwj tim pom thiab hais rau lawv tias “Nej nyob kaj lug.”
Lub Moo Zoo yog qhov no; kev kaj lug yog thawj lub paj tshab Huab Tais Yes Xus pub rau peb tom qab Huab Tais Yes Xus sawv rov los.
Thaum lub neej nyob hauv kev tsis ruaj khov los yog thaum muaj teeb meem ntau tsav tuaj raug peb, Huab Tais Yes Xus kev sawv rov los yog qhov ntuas peb tias Huab Tais Yes Xus tsis tuaj txiav txim rau peb, tab sis Huab Tais Yes Xus tuaj nplij peb kom tsis txhob ntshai thiab nws rov tuaj kho peb lub siab kom rov tawv dua.
Peb muaj peev xwm nres thiab rov nug peb tus kheej txog tej nqe lus li no kom tau pab peb xwv tswv yim tias “Kuv puas ntsia pom kev tso siab cov cim me me uas Tswv Ntuj niaj hnub pub rau kuv? Thaum txoj kev ntshai los yog kev tsis ruaj khov chaws los rau hauv kuv nruab siab, kuv puas cia Huab Tais Yes Xus lo lus ‘koj nyob kaj lug’ ua lo lus coj kuv lub tswv yim thiab kuv kev txiav siab? Thaum kuv tab tom ua ntees lom zem cav txog lub caij Hla, kuv faib Huab Tais Yes Xus kev sawv rov los txoj kev kaj lug rau cov nyob ib ncig kuv li cas?”