(HX 65: 17-21; Z 4: 43-54)

Yog vim li cas Huab Tais Yes Xus thiaj zoo siab kho tus me nyuam ntawd kom zoo hlo? Yog vim ob yam no:

1. Huab Tais Yes Xus zoo siab kho tus me nyuam yog vim leej txiv tsis muab hlob. Leej txiv ntawd nyob Kas Fas Naus, nws hnov hais tias Huab Tais Yes Xus mus 7 hnub kev txog Yes Lus Xas Les hos nyem no Huab Tais Yes Xus rov qab los txog lub zos Kas Nas uas yog deb ntawm Kas Fas Naus 20 tawm km. Leej txiv xav thov Huab Tais Yes Xus tuaj kho nws tus tub. Leej txiv twb yog ib tug nom, nws tsis kom nws cov tub txib mus tos Huab Tais Yes Xus. Leej txiv tsis nco txog nws lub hwj chim nom, nws saib Huab Tais Yes Xus loj dua nws. Nws saib Huab Tais Yes Xus yog Tswv Ntuj tus neeg, ces thaum kaj ntug nws sawv kev mus tos Yes Xus. Nws rau siab mus, thaum hnub qaij nws tuaj txog Kas Nas uas Huab Tais Yes Xus nyob. Nws ua zoo thov kom Huab Tais Yes Xus mus nrog kho nws tus tub yuav tuag txog tes.

2. Huab Tais Yes Xus zoo siab kho tus tub tseem hwv tus me nyuam kuj yog vim Huab Tais Yes Xus pom tias tus tub tseem hwv tso siab rau Yes Xus, ntseeg tias Huab Tais Yes Xus muaj lub peev xwm kho tau nws tus me nyuam. Nws ntseeg tas siab tias Huab Tais Yes Xus yog Tswv Ntuj tus neeg.

Huab Tais Yes Xus xub hais ib lo lus sim tus tub tseem hwv siab tso. Huab Tais Yes Xus hais rau nws tias “Yog nej tsis pom kuv ua hwj huam yees ntxwv, mas nej yeej tsis ntseeg!” Yog zoo li Huab Tais Yes Xus cem tus tub tseem hwv. Tus tub tseem hwv puas yuav tus siab? Puas yuav cav tias nws ntseeg?

Tus tub tseem hwv tsis muab hlob thiab nws yeej ntseeg tias Huab Tais Yes Xus lub hwj huam loj. Nws thiaj tsuas teb “Huab Tais, thov koj mus cheem kuv tus me nyuam tseem tsis tau tuag!”

Huab Tais Yes Xus tseem sim tus tub tseem hwv siab. Huab Tais Yes Xus tsis mus. Huab Tais Yes Xus tsuas hais rau nws tias “Koj rov mus. Koj tus tub zoo neej!” Tus tub tseem hwv puas yuav xav tias Huab Tais Yes Xus saib nws tsis muaj nqi dab tsi li? 

Tus tub tseem hwv xav kom Huab Tais Yes Xus nrog nws mus. Tab sis nws ntseeg lo lus uas Huab Tais Yes Xus hais rau nws ‘Koj rov mus. Koj tus tub zoo neej!’

Tub tub tseem hwv tsis cav, nws pw ib hmos nyob Kas Nas. Tag kis nws rov mus.  Nws pom nws cov tub txib tuaj tos nws vim tus tub zoo neej lawm tiag. Tab tom yob lub caij uas nag hmo Huab Tais Yes Xus hais tias “Koj tus tub zoo neej”, ces tus tub zoo neej tiag! Huab Tais Yes Xus tau kho nws tus tub kom zoo hlo, vim Huab Tais Yes Xus pom tias nws yog tub tseem hwv, tab sis nws tsis muab hlob thiab nws tso siab rau Huab Tais Yes Xus kom ti txha.

Tus tub tseem hwv thiaj qhuab qhia nws tsev neeg kom sawv daws saib Huab Tais Yes Xus yog tus neeg uas Tswv Ntuj xa tuaj cawm ntiaj teb neeg. Lawv txais Huab Tais Yes Xus los ua lawv tus Xib Hwb, Huab Tais Yes Xus hais lo lus twg lawv zoo siab coj raws li Huab Tais Yes Xus qhia. Yes Xus yog lawv tus Huab Tais.