(ET 14: 3-5, 12-14; MT 7: 7-12)

Huab Tais Yes Xus hais tias nej thov ces nej yuav tau txais, nej nrhiav cev nej yuav ntsib, nej kob qhov rooj ces luag yuav qhib rau nej’.

Huab Tais Yes Xus twb hais meej kawg tias yog thaum peb tsa ncauj thov Tswv Ntuj, mas Tswv Ntuj yuav pub rau peb, txawm tias coob leej ntau tus thov npaum cas los saib zoo nkaus Tswv Ntuj tsis teb nws cov lus thov li. Qhov ntawd vim nws tsis ua tib zoo thov, nws tsis tso siab rau Tswv Ntuj, thiab nws lub siab tsis npuab Tswv Ntuj, los tej zaus twb yog Tswv Ntuj pom tias muaj yam zoo dua yam nws thov, ces Tswv Ntuj twb pub rau nws tab sis nws tsis nco qab txog xwb, raws li Huab Tais Yes Xus hais ntxiv tias “Yog nej tus tub taij mov, nej puas muab pob zeb rau nws; nws taij ntses, nej puas muab nab rau nws?”

Nej tus me nyuam tshaib tshaib plab, nws taij mov noj, tab sis tej zaus nej twb tsis muab mov rau nws, tiam sis nej muab nyiaj rau nws mus muas lwm yam noj, los yog nej pub lwm yam muaj qab hau dua rau nws. Tswv Ntuj yeej zoo li ntawd thiab.

Hnub no, peb pom tias Tswv Ntuj tsis muab yam peb xav tau rau peb, tab sis Tswv Ntuj twb muab yam muaj txiaj ntsim dua ntawd rau peb, yog kev kaj siab lug.

Kev kaj siab lug yog lub paj tshab zoo tshaj plaws txhua yam peb taij thov ntawm Tswv Ntuj. Txawm peb muaj nyiaj ntau, muab vaj tse zoo, tab sis yog peb lub siab tsis kaj, peb yuav ua neej nyob zoo siab xyiv fab luag ntxhi puas tau? Yeej tsis tau.

Yog li mas niaj zaus peb thov Tswv Ntuj, mas nco ntsoov tias Tswv Ntuj twb pub rau peb lawm, tsuas yog peb puas kam txais xwb.

Peb yuav txais tau kawg yog peb yuav ua li Huab Tais Yes Xus hais rau peb tias “Tas ib puas tsav yam us koj xav kom luag ua rau koj, mas koj yuav xub ua rau luag tso.”