Leej Ntshiab Aas Xes yog noob nom yug xyoo 1034 hauv As Os Tas (Aosta) hauv Is Tas Lias teb. Thaum Aas Xes muaj 15 xyoos, nws xav kawm ua tub tshaj Ntuj Lus tiam sis nws txiv tsis kheev, ces lub tsev qhia txuj ua Leej Choj thiaj tsis txais Aas Xes mus kawm nyob hauv lawv. Aas Xes txiv xa nws mus kawm ntawv nyob Fab Kis teb.
Thaum Aas Xes muaj 26 xyoo, nws tuaj txog Leej Ntshiab Npes Nes Dis lub tsev Txiv Twj Cuab hauv lub zos Npes, nws nrog Las Foos (Lanfranc) tham tas ces nws txiav siab ua Las Foos thwj tim. Thaum Aas Xes txiv tuag, Aas Xes ua xyem xyav xyov yuav rov qab mus txais nws txiv lub cuab tam, los nws yuav txiav siab ua Txiv Tab Seeb zoo. Las Foos thiaj coj Aas Xes mus ntsib Tswv Qhia. Aas Xes nrog Tswv Qhia sib tham tas, nws txiav siab txais Cim Tiag Tes, thaum ntawd Aas Xes muaj 27 xyoo.
Thaum Aas Xes muaj 30 xyoo, lawv xaiv nws ua tus tswj lub tsev Txiv Twj Cuab nyob Npes. Aas Xes hnub nyoog tsawg tab sis tos lawv xaiv nws vim nws yog neeg thoob tsib, nws coj tus cwj pwm zoo, nws muaj lub siab mos hlub sawv daws thiab nws coj lub neeg ntshiab. Aas Xes hais tias “Yog Tswv Ntuj tsis xub qhia nws rau peb, mas peb lub tswv yim yuav tsis to taub txog Tswv Ntuj thiab peb kuj yuav tsis to taub txog qhov tseeb.” Aas Xes kuj hais tias “Yog peb muab ua tib zoo xav txog ‘yam zoo’, peb yuav pom tias muaj ntau yam zoo. Nyob hauv yam zoo ntawd, muaj ib yam zoo tshaj lwm yam. Yam zoo tshaj ntawd yog Tswv Ntuj. Tswv Ntuj tsis yog yam zoo tshaj xwb, Tswv Ntuj tseem muaj yam zoo tshaj thiab.”
Xyoo 1078 Haws Lus Is (Heruin) tus Txiv Twj Cuab tuav lub tsev Txiv Twj Cuab tag sim neej, ces lawv tsa Aas Xes ua tus tuav lawv sawv daws. Aas Xes hla mus mus los los ntawm Fab Kis teb thiab Aas Kiv teb, thaum ntawd Las Foos ua Tuam Tswv Qhia (Archbishop) nyob Kaas Tos Npes Lis (Canterbury).
Thaum Aas Xes muaj 60 xyoo, Tuam Tswv Qhia Las Foos tag sim neej, ces Aas Xes thiaj ua Tuam Tswv Qhia nyob Kaas Tos Npes Lis. Aas Xes muaj lus tsis sib haum nrog tus vaj Vis Lis As 2 (William II), Aas Xes thiaj raug tshais chaws mus nyob lwm qhov. Tus vaj Vis Lis As 2 tuag tas, tus vaj tshiab yog Hees Lis (Henry), nws rov hu Aas Xes los nyob Kaas Tos Npes Lis. Aas Xes rov los tau tsis ntev, nws rov muaj lus nrog tus vaj Hees Lis vim nws tsis pom zoo nrog tus vaj kev xaiv tsa cov Tswv Qhia tshiab, nws thiaj rov raug tshais chaw mus nyob lwm qhov dua.
Xyoo 1109 tus vaj cia Aas Xes rov los nyob hauv Kaas Tos Npes Lis. Aas Xes tuag nyob ntawd.