Xyoo 1800 yog thawj zaug uas cov tseem hwv Kos Lim tsim txom cov neeg ntseeg. Lub caij ntawd, cov tub tshaj Ntuj Lus nkag tsis tau mus hauv lub kuj cuab Kos Lim ib tug li, ces tsoom ntseeg sib sau los ua Thaj Txi Ntuj tsis tau. Tsis kav lawv tsis tso Tswv Ntuj tseg thiab lawv ua siab loj siab tawv. ‘Paj Lug Tsoos Has Sas’ (Paul Chong Hasang) thiaj sawv kev ntawm teb chaws Kos Lim mus txog lub tuam ceeb Pej Ceeb (Beijing). Nws mus thov saib puas muaj ib tug Tswv Qhia thiab ib cov Txiv Plig uas lawv zoo siab pab txhawb nqa cov neeg ntseeg hauv lub teb chaws Kos Lim. Tsoos Has Sas tau mus txog lub tuam ceeb Pej Ceeb 9 zaug sib law, tab sis tsis muaj ib tug uas txaus siab tuaj pab li.
Xyoo 1825 Tsoos Has Sas sau ib tsab ntawv mus rau Vaj Qhia Les Os tim 12 (Pope Leo XII) uas nyob Los Mas. Ob peb xyoos tom qab, Vaj Qhia Nqes Nkos Lis tim 16 (Pope Gregory XVI) thiaj xa Tswv Qhia Laus Lees Ntxos Is Npes (Laurent-Joseph-Marius Imbert) thiab ob tug Txiv Plig mus pab cov ntseeg nyob Kos Lim teb. Thaum Tsoos Has Sas nrog cov Txiv Plig nyob, cov Txiv Plig pib qhia ntau yam txuj rau nws.
Xyoo 1839 yog zaum ob uas cov ntaus thawj Kos Lim tsim txom cov neeg ntseeg Kos Lim. Lub caij ntawd Tsoos Has Sas tseem kawm txuj tsis tau tiav thiab nws tsis tau txais lub Cim Tiag Tes ua Leej Choj. Muaj ib hnub ib pab tub ceev xwm tuaj ntes nws, lawv coj nws mus kaw hauv tsev loj faj. Cov tub ceev xwm tsim txom Tsoos Has Sas heev kawg, ces qhov kawg lawv muab nws txiav taub hau. Thaum ntawd Tsoos Has Sas hnub nyoog muaj 44 xyoos.
Xyoo 1845 tim 17 lub 8 hli ‘As Nres Kis’ (Andrew Kim Taegon) txais lub Cim Tiag Tes ua Leej Choj nyob hauv lub nroog Saas Hais (Shanghai), nyob Suav teb, nws yog thawj tus Leej Choj haiv neeg Kos Lim.
Txiv Plig Kis rov mus ua tub tshaj Ntuj Lus nyob Kos Lim teb. Lub caij ntawd cov tseem hwv Kos Lim txwv nruj tsis pub kom muaj ib tug neeg teev Tswv Ntuj nyob Kos Lim teb. Txiv Plig Kis nyiag mus saib tej pawg ntseeg me me nyob hauv nws lub teb chaws. Nws kub siab pab cov neeg ntseeg kom ua siab loj siab tawv. Txiv Plig Kis nyiag nkaum nyob hauv cov zos ntseeg li ntawd tau 1 xyoos ntau, ces nws raug ntes thiab coj mus kaw hauv tsev loj faj.
Lub rooj txiav txim kuj nug nws ntau yam txog kev ntseeg Ntuj. Txiv Plig Kis teb tej lo lus tseeb kawg tias nws qhia txoj kev ntseeg mus raws kev thoob tsib. Lub rooj txiav txim muab lub txim tuag rau Txiv Plig Kis. Thaum Txiv Plig Kis hnov tej lus txiav txim rau nws, nws hais tias “Kuv yog ib tug neeg Kos Lim ib yam li nej. Kuv tau kawm txuj txheej siab nyob pej kum teb los, tab sis kuv tseem yog neeg Kos Lim. Kuv cev nqaij daim tawv thiab kuv tej roj ntsha tseem yog roj ntsha Kos Lim. Kuv zoo siab ua neeg ntseeg Ntuj. Tas kuv sim neej kuv yog neeg teev Tswv Ntuj, tus Tswv Ntuj uas tsim lub ntuj lub teb. Yog hnub twg kuv tso lub ntiaj teb no tseg mas hnub ntawd yog ib hnub zoo, vim kuv yuav mus coj ib lub neej muaj hwj chim tsis muaj caij kawg.”
Tim 16 lub 9 hlis, xyoo 1846 cov tub ceev xwm coj Txiv Plig Kis mus nram tus dej Has (Han River) uas nyob ze ntawm lub nroog Xes Us (Seoul). Lawv txiav nws taub hau nyob ntawd. Lawv muab Txiv Plig Kis faus nyob ntawm qhov chaw lawv muab nws tua. Cov neeg ntseeg mus thov cov ntaus thawj nyob hauv lub nroog Xes Us, lawv coj nws lub cev tuag mus faus pem lub ncov roob Mis Lis Nais.
Txij xyoo 1791 txog xyoo 1888 muaj 103 tus neeg ntseeg nyob Kos Lim teb raug tua tuag ua tim khawv txog lub Moo Zoo, ces xyoo 1984 Vaj Qhia Zam Paj Lug tim 2 tau ceeb toom thiab tsa 103 tus tim khawv nyob Kos Lis teb ua Leej Ntshiab.
Cov Tim Khawv Kos Lim (The Korean Martyrs)
