Xis Nplias Nus yug xyoo 210 hauv Kas Tas Nkes (Carthage). Xis Nplias Nus tau hnov ntau zaj lus uas Yes Xus hais los ntuas cov neeg Yus Das raug nws siab kawg, ces nws thiaj mus kawm kev ntseeg, nws txais lub Cim Ntxuav thiab lub Cim Txhab Zog. Xis Nplias Nus lub siab thiaj tsis dai rau tej nyiaj txiag li qub. Thaum nws ntsib tej tus neeg pluag nws xyiv fab pab lawv. Nws hlub cov neeg pluag thiab cov txom nyem, nws zoo siab pab lawv sawv daws. Nws hais tias “Nyem no, kuv lub siab nyob kaj lug thiab kuv coj tau ib lub neej nyob thaj yeeb lawm.”
Xyoo 249 cov ntseeg hauv lub nroog Kas Tas Nkes xaiv Xis Nplias Nus ua lawv tus Tswv Qhia vim lawv pom tias nws yog neeg siab zoo siab dav thiab txawj coj cov ntseeg.
Xyoo 251 cov nom tswv Los Mas nrhiav cov neeg ntseeg Yes Xus tua pov tseg, cov neeg ntseeg uas lawv nyiam Tswv Qhia Xis Nplis Nus thiaj coj nws mus zais hauv ib lub me nyuam zos nyob deb ntawm lub nroog Kas Tas Nkes, ces cov nom Los Mas thiaj tsis paub tias Tswv Qhia Xis Nplias Nus nyob rau qhov twg lawm.
Lub caij Tswv Qhia Xis Nplias Nus tsiv nraim, nws kuj sau tej tsab ntawv pab txhawb cov ntseeg. Cov ntseeg ib txhia kuj raug cov tub rog Los Mas ntes coj mus kaw hauv tsev loj faj. Tswv Qhia Xis Nplias Nus ntuas lawv thiab txhib kom lawv kub siab npuab txoj kev ntseeg txog Tswv Ntuj tib leeg thiab kom lawv kub siab saib Yes Xus ua lawv lub chaw vam khom. Yog vim Tswv Qhia Xis Nplias Nus tej tsab ntawv pab cov ntseeg ua siab loj li ntawd, ces cov ntseeg feem coob thiaj nyob ruaj nreb hauv txoj kev ntseeg. Lawv ua tiag nyiaj ris kev txom nyem, lawv tsis thim kev ntseeg. Tab sis kuj muaj coob leej uas lawv lub siab muag, lawv ntshai ris kev txom nyem thiab kev tsim txom ces lawv tim kev ntseeg. Lawv rov teev dab raws li cov nom Los Mas hais. Lawv thiaj dim ntawm txoj kev tuag.
Thaum txog xyoo 257 cov nom tswv rov qab nrhiav cov neeg ntseeg ntes. Thaum ntawd Xis Nplias Nus xav tias cia nws tuag ua Yes Xus tim khawv mas sawv daws lub siab thiaj yuav loj li nws, ces nws nyob hauv tsev tos cov neeg tuaj ntes nws. Xis Nplias Nus yog ib tug neeg muaj hwj chim, tas nws tsev neeg kuj yog neeg muaj hwj chim nyob hauv lub teb chaws ntawd. Cov nom tswv ntshai muab Xis Nplias Nus tua, lawv thiaj xa nws mus nyob ib lub teb chaws deb deb, thiab muab nws kaw hauv tsev loj faj.
Xyoo tom qab cov nom tswv nyob Kas Tas Nkes mloog tus vaj Xes Ntxas, lawv tso tub rog mus coj Xis Nplias Nus rov qab los nyob Kas Tas Nkes, kom tau muab Xis Nplias Nus tua nyob ntawd. Thaum Xis Nplias Nus tuaj nyob hauv tus nom lub tsev, tus nom hais rau Xis Nplias Nus tias “Koj twb paub tias peb tus vaj ntxwv xav kom koj hlawv ntawv teev peb tus huab tais Los Mas.”
Xis Nplias Nus teb tias “Kuv paub, tiam sis kuv yuav tsis ua.” Tus nom hais tias “Koj ceev faj, koj xav tswv yim kom zoo zoo.” Xis Nplias Nus teb tias “Koj tsis txhob hais ntau. Yog leej twg qhia koj ua yam twg mas koj yuav tsum ua yam ntawd sai.”
Tus nom txiav txim pom Xis Nplias Nus tsis hloov siab. Nws khuv xim, nws sau ntawv tseg hais tias “Peb txiav txim hais tias Xis Nplias Nus yuav tuag, peb yuav txiav nws caj dab.” Ces tus Tswv Qhia Xis Nplias Nus teb hais tias “Kuv ua Ntuj tsaug.”
Luag coj Xis Nplias Nus mus txog ntawm ib lub hav, nyob ze lub nroog Kas Tas Nkes. Ib pab neeg ntseeg coob kawg xa Xis Nplias Nus mus txog ntawm lub hav ntawd. Cov nom tsis muaj cuab kav yuav ntiab sawv daws rov qab. Muaj ntau leej qw qw tias “Peb xav nrog Xis Nplias Nus tuag. Peb sawv daws yog Xis Nplias Nus. Peb sawv daws puav leej ntseeg zoo li Xis Nplias Nus ntag.”
Cov neeg teev dab pom Xis Nplias Nus ua siab loj thiab nws teev Ntuj ntawm kev, nws ntuas cov neeg ntseeg kom sawv daws ua siab loj.
Thaum txog chaw lawm, luag yuav muab Xis Nplias Nus tua. Xis Nplias Nus txhos caug, nws maj mam hle nws cev ris tsho Tswv Qhia cev rau cov Leej Choj uas xa nws tuaj. Tus tub rog yuav txiav nws caj dab yog ib tug xab txheeb, thaum tus xab txheeb tuaj txog, Xis Nplias Nus tuav tus xab txheeb tes. Nws hais rau cov Leej Choj kom lawv muab 25 txiag kub ua nqe tes rau tus xab txheeb. Xis Nplias Nus rov qab txhos caug, nws muab ib daig ntaub los vov nws qhov muag, ces nws nyo taub hau tos tus xab txheeb txiav nws caj dab. Cov neeg ntseeg kuj muab ib daig ntaub los pua ntawm qhov chaw uas luag yuav txiav Xis Nplias Nus caj dab. Lawv tsis xav kom Xis Nplias Nus cov ntshav poob rau saum cov av uas cov neeg tsis huv txhais taw tau tsuj.
Thaum tsaus ntuj cov neeg ntseeg mus nqa Xis Nplias Nus lub cev. Lawv sawv daws tuav tej tes tsau, tej tes tswm ciab. Sawv daws hu nkauj cav txog Tswv Ntuj. Lawv kwv Tswv Qhia Xis Nplias Nus mus faus hauv lub qhov ntxa nyob ze lub nroog.
Leej Ntshiab Xis Nplias Nus tau sau tseg tias “Thaum twg Tswv Ntuj pom ib tug neeg ntseeg ua txhaum rau Tswv Ntuj, mas Tswv Ntuj tsis nplua tus neeg txhaum ntawd sai. Tswv Ntuj ua siab ntev, Tswv Ntuj muab sij hawm rau tus neeg txhaum ntawd, saib tus neeg ntawd puas txawj tu siab rau nws tej txhaum. Yog tias nws txawj tu siab rau nws tej txhaum, nws tig los yuav lub siab tshiab, mas Tswv Ntuj yuav zam nws tej txhaum huv tib si.”
Leej Ntshiab Xis Nplias Nus hais tias “Niaj hnub peb yuav xav txog lub hwj chim thiab txoj kev kaj uas yav tom ntej peb yuav tau txais los ua peb tug nyob pem Tswv Ntuj lub Ceeb Tsheej, peb yuav tau nrog Leej Pleev nyob. Tas cov neeg siab ncaj thiab tas ib tsoom Leej Ntshiab yuav ua koj luag. Peb yuav tau pom xyeem Tswv Ntuj ntawm qhov muag, peb thiaj yuav tau txoj sia nyob mus li tas ib txhiab ib txhis. Li ntawd, peb niaj hnub yuav tos nrhw txog lub hwj chim thiab txoj kev kaj lug tuaj ntawm Tswv Ntuj tuaj.”
Nws tseem hais ntxiv tias “Ib tug tib neeg uas kub siab nrhiav Tswv Ntuj lub Ceeb Tsheej thiab Tswv Ntuj txoj kev ncaj, mas Tswv Ntuj yuav pub tas ib puas tsav yam los pauj nws tes dej num. Li ntawd, yog ib tug neeg twg muaj Tswv Ntuj nyob txawm hauv nws nruab siab, mas nws yuav tsis tshaib tsis nqhis txog dab tsi.”
Leej Ntshiab Xis Nplias Nus tau hais tias thaum peb hais zaj ‘Peb Txiv Nyob Saum Ntuj’ mas yog peb tab tom cog lus rau Tswv Ntuj tias peb zoo siab coj tus yam ntxwv haum lub neej ua Tswv Ntuj cov me nyuam tiag.
Leej Ntshiab Xis Nplias Nus (St. Cyprian)
