As Nres (Andreas, Andre) yog ib tug neeg siab loj siab dav thiab coj tus. As Nres yog Yos Nas nyob Npes Xais Das tus tub, yog Pob Zeb tus kwv. Lub npe As Nres txhais tias ‘yog ib tug txiv neej yawg tiag’.
As Nres yog Zam Ntxuav Plig ib tug thwj tim, tom qab nws tau paub Yes Xus, mas nws los ua Yes Xus thwj tim raws Yes Xus qab. As Nres coj nws tus tij laug Pob Zeb los paub Huab Tais Yes Xus.
As Nres yog tus hais rau Yes Xus nyob ntawm tsoom sid xub ntiag tias : muaj ib tug me nyuam muaj 5 lub ncuav mov thiab 2 tug ntses qhuav xwb. Lo lus no zoo li As Nres txhob txwm hais li ntawd kom Yes Xus ua hwj huam yees ntxwv.
As Nres tau nrog Fis Lis Pos mus tshaj Ntuj Lus ntau qhov chaw. Nws coj lwm cov haiv neeg los ntseeg txog Yes Xus.
Tseem hnov tias As Nres tau mus tshaj Ntuj Lus nyob Hes Las thiab ob peb lub teb chaws nyob As Xias Nrab. Nws tuag ua Yes Xus tim khawv nyob hauv lub nroog Pas Tas Xos. Luag muab nws khi rau ib tug ntoo khaub lig. Vim li ntawd, thaum ib tsoom neeg pom tus khaub lig (X), mas sawv daws hais tias yog Leej Ntshiab As Nres tus ntoo cuam. Nws raug tsim txom nyob ntawm ntoo khaub lig 2 hnub, tsis kav nws tseem qhuab qhia cov neeg nyob ib ncig kom sawv daws ntseeg txog Tswv Ntuj. Vim li ntawd, Lav Xias teb thiab Aas Kiv sab pej thiaj xaiv Leej Ntshiab As Nres ua tus tuav pov hwm lawv 2 lub teb chaws.
Vaj Qhia Paj Lug tim 6 (Pope Paul VI) tau muab Leej Ntshiab As Nres cov pob txha rau lub Ceeb Koom Txoos nyob sab hnub tuaj. Leej Ntshiab As Nres cov pob txha raug khaws tseg nyob hauv Leej Ntshiab Pob Zeb lub Tuam Tsev Teev Ntuj. Tom qab no raug xa mus rau lub nroog Pas Las Xos lawm.
Leej Ntshiab As Nres (St. Andrew, the Apostle)
