Muaj ib nkawm niam txiv hauv nroog Pas Os Las, Is Tas Lias teb tau mus thov Leej Ntshiab Fas Ntshis Kus kom pab thov Ntuj pub ib tug tub rau nkawd, ces xyoo 1416 nkawd txawm muaj me nyuam lawm tiag, nkawd tis npe rau tus me nyuam tias ‘Fas Ntshis Kus’.
Thaum Fas Ntshis Kus muaj 16 xyoo, nws ncaim tsev mus coj lub neej Txiv Twj Cuab nyob rau hav suab puam thiab nws tau txhim tsa ib pawg Txiv Twj Cuab hu ua ‘pawg neeg txheej qis’(The Order of Minims), lawv coj lub neej nruj thiab tsis noj nqaij. Nws hais rau sawv daws tias “Cov kwv tij, kuv thov ntuas nej kom nej kub siab rau nej sab ntsuj plig, vim txoj kev tuag yog yam neeg yuav tsum tau ntsib, neeg txoj sia luv luv li thiab neeg txoj sia yuav yaj mus xws li tej pa taws.”
Fas Ntshis Kus hais ntxiv tias “Cov kwv tij, kuv thov ntuas nej kom tso txoj kev sib ntxub thiab kev yeeb ncuab pov tseg. Nej hais lus mas nej yuav xyuam xim, nej hais ib lo lus siab leej twg los yog ua rau lawv tu siab mas nej yuav tsis txhob txaj muag hais lo lus thov txim tus ntawd. Nej ib tug yuav khuv leej ib tug thiab tsis txhob nco luag tej txhaum cia hauv nej nruab siab, mas qhov npau taws thiab kev ntxub ntxaug thiaj tsis nrhau cag nyob hauv nej. Nej yuav nco tias kev txhaum ua rau Tswv Ntuj npau taws, yog li nej yuav tu siab rau nej txoj kev txhaum thiab thov Tswv Ntuj zam txhaum rau nej tiag tiag, mas Tswv Ntuj thiaj yuav zam rau nej.”
Xyoo 1481 tus vaj Lus Is 16 nyob Fab Kis teb yuav tag sim neej, ces nws thov kom Fas Ntshis Kus mus xyuas nws. Fas Ntshis Kus hais ib co lus deev tus vaj siab ces tus vaj thiaj ua ib siab tuag yam tso siab rau Tswv Ntuj. Xyoo 1507 Fas Ntshis Kus tso ntiaj teb tseg thaum nws muaj 91 xyoos. Nws hais tias “Kev nyiam Leej Pleev tab tom txhib peb.”
